((((((السكة شمال ٢))))))
#لولو_محمد
الحلقه ٨٢
شريف / هتدخل تقول لهدير هانم تلبس و لا الرجاله تدخل و نزعل كلنا
هدير تلبس الاسدال و تطلع
هدير / هو فى ايه رجاله ايه اللى يدخلوا انت بتكلمنا بصفتك ايه يا جدع انت
عبد الله / اسكتى اسكتى
هدير / لا مش هسكت احنا معانا عقد ايجار
شريف / خديه و اطلعى على القسم
شريف يشاور للرجاله يدخلوا على اوضه النوم هدير تصوت
عبد الله / يا باشا ما يصحش كدا يا باشا يا باشا احنا عرسان و البيوت ليها حرمه
شريف / انا مبحبش اكرر كلامى نص ساعه و الشقه تكون فاضيه هتخرجوا بشنطه هدومكوا بس باقى الحاجه بتاعه مرام انا هستنى فى العربيه ... شوفوا شغلكوا يا رجاله
........................
فى شقه هادى
هادى / انا هكلم مرام انا مش هسكت على قله الادب دى انا هطلب البوليس
محمود / اعلى ما فى خيلك اركبه مرام رجعت لجوزها خلاص
هادى / انا معايا عقد ايجار انت ملكش حق تطردنى
راجل يطلع من جوه و معاه شنطه يحطها على الارض
الراجل / لمينا الهدوم كلها يا محمود بيه
محمود / ارموهم بره و اقفلوا الشقه و شوفوا حد يرشها و ينضفها يلا
اتنين بودى جارد يزقوا هادى و شيرين وواحد يشيل الشنطه و يرموهم فى الشارع و مديحه واقفه فى البلكونه تزرغط و ام مروه و اخواتها واقفين فى البلكونه يزرغطوا مروه تدخل البلكونه شايله جردل مليان ميه تكبه عليهم فى الشارع و تقف تزرغط
مروه / خلى الحاره تنضف الله عليك يا حوده لولولولولولولولولولولولى
..............................
فى شقه مازن
مازن واقف فى المطبخ بيحضر صينيه الفطار و ياخدها و يدخل الاوضه على مرام و هو فى منتهى السعاده يلاقيها بتعيط
مازن / مرام انتى كويسه
مرام تمسح دموعها بسرعه و تبصله
مرام / اه كويسه
مازن / جبتلك تفطري
مرام / مش جعانه شكرا
مازن يدخل و يحط الصينيه على الكومدينو جنب مرام و هى مش مركزه معاه و ياخد كبايه اللبن و يقعد جنبها
مازن / طب اشربي شويه لبن
مرام تاخد منه الكبايه و تبصله
مرام / شكرا
مازن / عامله ايه
مرام / ما قولت كويسه
مازن / امال بتعيطي ليه
مرام / ما بعيطش
مازن يفضل قاعد باصصلها و هى باصه في الارض يرفع كبايه اللبن اللى فى ايدها ناحيه بقها تشرب بق و تحطها جنبها
مازن / تمام انا هسيبك براحتك لو عوزتى اى حاجه ناديني انا مش نازل قاعد في الليفينج
مرام تبصله و تهز راسها اه
مازن يتنهد و يقوم و يروح للباب و يبص عليها و يتنهد و يطلع بره
...............
فى المستشفي
فى عنبر مليان عيانين خمسه بدى بيلدينج لابسين بدل يدخلوا واحد منهم يروح ناحيه هيثم
راجل / استاذ هيثم نور الدين
بكرى / خير يابني فى حاجه
الراجل / كتبولك خروج اتفضل معانا
ام هدير / يتفضل معاكوا فين دا عيان مش كفايا اللى عملتوه في اخواته ما تتقوا الله بقي
الراجل يشاور للى معاه يدخلوا يشدوا هيثم و امه و ابوه يحاولوا يحوشوا عنه
ام هدير / اللحقونا يا ناس اللحقونا يا هو حد يغيتنا يا عالم فين امن المخروبه دى
بكرى / طب خدونى انا مكانه هو عمل ايه طيب
ام هدير / سيبوا الواد هتعملوا ايه في ابنى سيبوه حسبي الله و نعم الوكيل فيكوا حسبي الله و نعم الوكيل
الرجاله تزق هيثم فى العربيه و مفيش مخلوق يدخل و الكل بيتفرج ام هدير تقعد في الارض تلطم و بكرى واقف يتفرج
ام هدير / اعمل حاجه يا راجل اتنحرر اعمل حاجه
بكرى / انا قولتله ما يدخلناش فى مشاكل انا قولتله ما سمعش كلامى
ام هدير / هى بنت الكلب ما فيش غيرها يا مين يلايمنى عليكي دلوقت قولى عنوان سى زفت دا ايه
بكرى / هتعمليله ايه يعني
ام هدير / هاكل قلبه لو مس شعره من ابني اتصل بعبد الله عبد الله بيشتغل عنده و اكيد عارف عنوان الشركه اتصل بيه يا راجل الواد هيضيع
..............
فى شقه شريف
رؤي / انت بتتكلم جد يا ابيه
شيماء / طب هنروح نشوفها امتى
شريف / دلوقت لو تحبوا خشوا اللبسوا
البنات يجروا على جوه
فاطمه / هى عامله ايه يا شريف يا ابني
شريف / الدكتور قال كويسه ما فيهاش حاجه بس اكيد زعلانه يعني
فاطمه / لما هتشوف البنات هتفرح و تعرف انها مش لوحدها ... بقولك خد اخواتك و خليهم ينقولها طقمين حلوين
شريف / لا مافتكرش انها محتاجه هدوم على العموم لما نروحلها نبقي نشوف ناقصها ايه و نجيبهولها بس ما دام مازن مطلبش حاجه يبقي
موبايل شريف يرن
شريف / ياريتني افتكرت مليون جنيه ... ايوه يا مازن
مازن / هاتلى شيكولاته كتير وورد و انت جاى
شريف / هههههههههههههههههه حاضر حاجه تانى محتاج لبس او اى حاجه
مازن / لا هات بس الشيكولاته
شريف / حاضر
شريف يقفل
شريف / شوفتى
رؤي و شيماء و تقى يطلعوا من جوه لابسين
شريف / ايه السرعه دى تتحسدوا
رؤي / مش هاتيجي يا ماما
فاطمه / خليني انا هعملها لقمه تغذيها و بعدين ابقي اروح
شريف / تمام يا ست الكل .. يلا يا بنات
شريف ياخد اخواته و ينزلوا و فاطمه تقفل الباب وراه
...................
فى الشركه عند مازن
بكرى و عبد الله و ام هدير واقفين يتخانقوا مع الامن مش عاوز يدخلهم
بكرى / يا جدع انت بقولك انا عم المدام
الامن / و انا قولتلك مازن باشا مجاش النهرده
عبد الله / طب انا بشتغل هنا دخلنى
محمود يطلع
محمود / خير فى ايه ايه الدوشه دى
بكرى / احنا عاوزين نقابل مازن انا عم مراته و البتاع ده
محمود / مازن مش هنا اتفضلوا بدل ما هنطلبلكوا البوليس
ام هدير تحاول تمسك فى محمود الامن و بكرى يحوشوها
ام هدير / انا اللى هطلبلكوا البوليس يا ولاد الكلب يا عرر الواد عيان
محمود / ارموا الاشكال دى بره و لو حاولوا يدخلوا تانى اطلبولهم البوليس
عبد الله / طب انا بشتغل
محمود / اه اه عبد الله صح
عبد الله / ايوه يا باشا
محمود / لا انت استغنينا عن خدماتك خلاص
محمود يسيبهم واقفين متنحين و يمشي
......................
فى شقه مازن
البنات قاعدين حوالين مرام و علبه الشيكولاته فى النص
رؤي / يا جزمه يعني كنتى عارفه و سبتيهم يدحكوا عليا
مرام / انا والله كنت معترضه جدا بس واضح انهم فاهمين بيعملوا ايه جابت معاكى
رؤي / نصيبي بقي
مرام / هههههههههههههههههه نصيبك ؟؟
رؤي / اتلمي يا بت
تقى تاخد واحده شيكولاته
شيماء/ سنانك يا توته
تقى / ايه هبقي اغسلها
مرام / اخبار صافي ايه صحيح هتنزل امتى
شيماء / كمان اسبوعين حجزت خلاص ما شوفتيش انتى الشقه عندنا كلنا بنمشي بالجنب كدا من كتر الكراتين
مرام / ربنا يتملكوا على خير
رؤي / احنا فصلنا كلنا نفس الفساتين على اساس اننا برايد مايد و كدا عاوزين نبقي ناخد مقاساتك و نعملك واحد
مرام تبصلهم و تبتسم
شيماء / امال انتى هتفقسي امتى صحيح
مرام / شهر شهر و نص كدا
شيماء / يااااه كل ده
رؤي / جهزتى شنطه البيبي طيب
مرام / كنت مجهزاها فى البيت بس معرفش راحت فين بقي
رؤي / عند عمك ؟؟
مرام / لا عند تيته الله يرحمها
شيماء/ بسيطه سيبى الموضوع ده علينا احنا هنظبطلك كل حاجه
مرام / ما اتحرمش منكوا ابدا
رؤي / مش ناقصك حاجه يا مرام
مرام تبصلها و تبتسم و تهز راسها لا
شيماء / قولى يا بت ما تتكسفيش لو ناقصك اى حاجه قولي
مرام / والله لو ناقصني هقول بس زى ما انتوا شايفين انا مش ناقصني حاجه تسلموا
شريف يخبط على الباب
شريف / ايه يا بنات بايتين و لا ايه سيبوها ترتاح
شيماء / احنا مش تاعبينها و بعدين هى وحشانا اوى
رؤي / و احنا كمان وحشينها مش كدا يا مرام
مرام / خليهم شويه
شريف / عندى شغل والله يا مرام هبقي اجبهم تانى و ماما تيجي معاهم يلا يا بنات
البنات يقوموا يحضنوا مرام و يمشوا شريف يشاورلها باى و يمشي و مفيش ثوانى و مازن يدخل مرام تبص في الارض
مازن / ماما فاطمه بعتالك اكل اغرفلك ؟؟
مرام / مش جعانه كلت شيكولاته كتير اطفى النور خليني انام شويه
مازن / بقولك في فيلم حلو اوى فى التليفزيون تحبي تقومى تتفرجى معايا عليه
مرام / لا مش فايقه شكرا
مازن / تمام انا فى الليفنج لو احتاجتى حاجه ناديني تصبحي على خير
مرام / و انت من اهله
مازن يطفى النور و يمشي و يسيب الباب مفتوح و مرام تنام و تقعد تعيط مازن يدخل تانى و يقعد جنبها تمسح وشها و تقوم تقعد و تبصله
مازن / على فكره اللى انتى بتعمليه ده غلط
مرام / ما بعملش حاجه
مازن/ ما انتى كنتى قاعده بتدحكى و تهزرى معاهم هو انا وش غم
مرام / هو انا كلمتك و لا هى تلاقيح جتت و خلاص
مازن / الا صحيح يا مرام هو انتى متاكده انك حامل فى بنت
مرام / هو مش الدكتور قايل قدامك هغشك ليه يعنى
مازن / ما اقصدش والله اهدى كدا العصبيه غلط على ملك هتطلعيها عصبيه زيك انا اقصد ان معروفه ان البنت بتاخد من جمال امها يعنى و انتى ما شاء الله عليكى يعنى محلويه بزياده
مرام / و دى مين حفظهالك دى
مازن يدخل جنبها فى السرير و هى بتبصله باستغراب
مازن / عيب عليكى و هى جمله زى دى تعصى عليا
مرام تبص الناحيه التانيه و تدحك
مازن / خشى شويه لحسن هقع
مرام / ما تقع انا مالى
مازن / بسيطه اخش انا
مازن يقوم ينام جنبها الناحيه التانيه
مازن / احنا عاوزين نتكلم سوا
مرام / انا عاوزه انام
مازن / تمام تعالى ننام و لما نصحى نتكلم
مرام / ننام فين
مازن / لا اله الا الله هنا فى هذا السرير الفسيح
مرام / مازن ما تستهبلش
مازن / لا اله الا الله لا اله الا الله هو فى ايه يا بنتى هو فين الاستهبال فى الموضوع الاول قولتى عده و ما ينفعش دلوقت انتى مراتى رسمى فهمى نظمى
مرام / دا على الورق بس
مازن / دا عند امه الكلام ده
مرام تبصله تلاقيه باصصلها و يقوم يتعدل و يقعد و يبصلها
مازن / كدا يبقى ما فيش نوم و نتكلم بقى فى كام جمله قولتيها محتاجين نحط النقط على الحروف فيهم
مرام / عاوز ايه
مازن / لما قولتى اتصل بزياد و لبنى انتى بجد متخيله انى ممكن اعمل معاكى كدا
مرام تبص الناحيه التانيه و تسكت مازن يجيب وشها بايده ناحيته
مازن / انتى بجد شيفانى وحش اوى كدا
مرام / انت شايف نفسك ايه انت شايف نفسك كويس
مازن / بحاول
مرام / بتحاول ؟؟
مازن / ما حدش فينا كامل و لا حتى انتى
مرام / كنت فين التلت شهور اللى فاتو
مازن / كنت جنبك انتى بقي كنتى قافله على نفسك و مش عاوزه تشوفينى فدى قصه تانيه
مرام / ماشي
مازن / هو ايه اللى ماشى
مرام / ماشى انت كنت جنبى فعلا بدليل ان تيته ماتت و انت جنبى اتبهدلت و اتهنت من اللى يسوى و اللى ميسواش و انت جنبى
مازن / انتى اللى بعدتى و سبتى مسافه يدخلوا منها
مرام / و هو مين اللى بعدنى ما انا كنت جنبك من الاول و لا نسيت
مازن / انتى اللى بعدتى لما صدقتيهم و رجعتى الحاره
مرام / و انت سمحتلهم يدخلوا علينا يوم الصبحيه انت اتراهنت عليا
صمت ثوانى
مرام / و رجعت و قولت هيصالحنى هيعتزر لاقيتك جايب اهلك تشمتهم فيا و انا رجعالك
مازن / ما حصلش دى كانت صدفه والله انا كلمت محمود و حاولت امنعك تيجى لما هما جم انا ما كنتش عارف انكوا هتتقابلوا والله صدفه
مرام / ماشى خلاص كفايا بقى انا تعبانه
مازن / انا ما بعدتش عشان نسيتك و مطلقتش عشان مش عاوزك انا بس ما كنتش عاوز اجبرك على حاجه ما كنتش عاوز اكسرك
مرام تصرخ / و اديك كسرتنى و اجبرتنى ارجعلك
مازن / لا
مرام / كان قدامك مليون حل كان ممكن تساعدنى بمليون طريقه بس انت اخترت انك تردنى انت اخترت انك
مازن / ما احنا جربنا المليون طريقه يا مرام
مرام تقوم تقف و هى بتعيط
مرام / انا كنت بدعى ربنا ما اعيش و اشوف اليوم ده انا الموت كان عندى اهون من انى ارجعلك انت متخيل و انت ما شاء الله اول ما جتلك الفرصه رديتنى انا كان عندى فى حياتى كابوس واحد انى اعيش اللحظه دى انى اقف قدامك مطاطيه و اقولك برافو يا مازن كسبت ... برافو يا مازن كسبت
مرام تيجى تسيب المكان مازن يقوم و يقف فى طريقها و الاتنين يزعقوا لبعض
مازن / مهياش حرب انا و انتى مش بنحارب بعض لو خسرنا هنخسر احنا الاتنين لو كسبنا هنكسب احنا الاتنين
مرام / انا اللى بخسر لوحدى انا اللى بتاذى لوحدى انا اللى بتيتم لوحدى
مازن / سمعتك من سمعتى و ووجعك هو وجعى و تيته كانت غاليه عندى كانها جدتى انا كمان انتى فاكره ان اللى حصل ده عدى عليا عادى انتى ما تعرفيش اى حاجه عن اللى عشته الفتره اللى فاتت ما تعرفيش انا عشت ايه و لا شوفت ايه عشانك
مرام تمسك بطنها و توطى مازن يسندها للسرير و هى بتتوجع و هو ملهوف عليها
مازن / ارتاحى اهدى ... ارتاحى
مرام / و لسه ... ولسه لما ملك تيجى و تشوف هتستخدمها ضدى ازاى
مازن / طب ارتاحى و نتكلم بعدين ماشى
مرام / انا مش عاوزه اتكلم خالص لو سمحت سبنى فى حالى
مازن يبصلها بحزن و هى ماسكه بطنها و نايمه و يتنهد و يسيبها و يمشى مرام تغمض عنيها و تعيط
.....................
قدام الشركه
شريف يركن العربيه بكرى و هادى يجروا عليه
هادى / شريف بيه شريف بيه
شريف يبصلهم
شريف / افندم
بكرى / ابنى يا شريف بيه عيل و غلط ما كنش فى وعيه نربيه ما نموتوش ابوس ايدك
شريف / تمام تعالوا معايا فوق ما بحبش وقفه الشارع
بكرى و هادى يمشوا ورا شريف يدخلوا الشركه يعدوا من قدام محمود واقف بيتكلم مع راجل محمود يبص لهادى و يبتسم و هادى بيبصله بغل و يكمل مشى لحد ما يوصلوا لمكتب شريف يدخلوا شريف يقعد بكرى يجى يقعد
شريف / ما قولتلكش تقعد
بكرى يقف و يبص لهادى
هادى / يا باشا احنا شيلنا مرام فى بيتنا
شريف / ده شيك ب تسعين الف جنيه قيمه الفلوس اللى سحبتوها من مازن او مرام مقابل انكوا تشيلوها فى بيتكوا لو انتوا فعلا كنتوا بتشيلوا لحمكوا و بتعملوا جميله نفتكرها لابنكوا الواطى اللى اتهجم على سته تمام واحد منكوا يتكرم و يمضى عليه و خدوا ربوه انتوا بمعرفتكوا انما بقى فلو دول كانوا مقابل ان مرام تقعد عندكوا فاسمحولنا بقى كدا ما فيش بينا جمايل هيثم بقى بتاعنا هنربيه بمعرفتنا
بكرى / انا عاوز اقابل مرام
شريف / لما الباشا يرجع من شهر العسل ابقى حدد معاه معاد انا قولت اللى عندى قدامكوا خمس دقايق تفكروا و تفضوا المكتب عشان عندى اجتماع مهم و مش فاضى للاسف بس لو محتاجين وقت تفكروا تقدروا تحددوا معاد تانى فى السيكرتاريه بره
بكرى يبص لهادى
هادى / ما تبصليش انا لا كلت و لا شربت عشان ادفع الحساب
شريف / الخمس دقايق خلصوا فكروا فى البيت براحتكوا و بعدين نورونا في اى وقت
شريف يشاورلهم على الباب باصينله و متنحين
شريف / عيب اطلبلكوا الامن احنا برده نسايب
تليفون شريف يرن يبص فيه يلاقي مازن يبصلهم و يسيب المكان و يقوم يطلع بره ثوانى و شاب يدخل
الشاب / اتقضلوا معايا
بكرى و هادى يبصوا لبعض و يمشوا ورا الشاب
....................
فى فندق خمس نجوم فى روسيا
لبني نايمه الباب يخبط زياد يطلع من الحمام يروح يفتح يلاقي احمد
احمد / ايه يا عم انتوا جايين تناموا و لا ايه
زياد / الله مش شهر عسل
احمد / بقولك ايه انا مجهزلكوا برنامج فسحه هتحلف بيه
زياد يبص جوه يلاقي لبني بتقوم من السرير تدخل الحمام
زياد / صحيت اهى
احمد / قشطات هستناكوا تحت ما تتاخروش
زياد / انت يعني مش عارف الستات بتتاخر فى اللبس قد ايه
احمد / خدوا راحتكوا السهره النهرده صباحى يلا هسيبك تلبس بقي
زياد / تمام يا ابو احميد
احمد يمشي و زياد يدخل يخبط على لبني الحمام تفتح الباب
لبني / احنا هنخرج معاه
زياد / يعني الراجل عازمنا و جاى لحد عندنا نحرجه و بعدين انا محتاجه يظبطنى بعلاقاته هنا عشان المشروع اللى قولتلك عليه عاوزين نكبر بقي يا لولا
لبني تبص الناحيه التانيه و تتنهد
زياد / حد يلاقي دلع و ما يدلعش اللبسى يلا خلينا نتفسح الله امال احنا جايين هنا ليه
لبني / تمام ... حاضر
زياد / ربنا يخليكي ليا يا احلى لولا في الدنيا هههههههه
لبني تبتسم من تحت الضرس و تروح تلبس
................
فى شقه بكرى
عبد الله / و احنا نجيبلهم تسعين الف جنيه منين
ام هدير / انا معايا حتتيتين صيغه كنت عيناهم لجوازه هيثم و كل واحد يدفع اللى يقدر عليه
عبد الله / منين يا حماتى ما على يدك اخر جنيه فى جيبى ركبت بيه تاكس عشان نيجى على هنا
شيرين / و لسه اجره المحامى اللى هيمشى فى حوار الشقق انا امى بتنيم الناس اللى عاوزين يجوا يباركولى هيجوا فين بعد ما لفينا عليهم واحده واحده و قولنالهم انى هتجوز فى شقتى
هدير / ياختى و هى شقتك كانت شقه امال انا اعمل ايه صحباتى مبيبطلوش رن عالتليفون عاوزين يجوا يتفرجوا على السرايه بتاعتى حسبى الله و نعم الوكيل فيكى يا مرام
ام هدير / بصوا يا بنات فى الاول و الاخر هيثم اخوكوا و اتعملكوا فرح ماكنتوش تحلموا بيه
هدير / يا ماما و هى يعنى ما كانتش عايشه عندنا بتاكل و تشرب و تنام دا اقل فندق هياخد منها الشئ الفلانى
ام هدير / عشان خاطر اخوكى يا هدير يا عالم عاملين فيه ايه دلوقت
عبد الله / قولتلكوا تبلغوا الحكومه الله
هادى / هو البعيد ما بيفهمش الكاميره فى المستشفى مسجلتش و الدفاتر لا دخل و لا خرج و مفيش صريخ ابن يومين عاوز يشهد على اللى حصل و المستشفى بتخلى مسؤليتها
ام هدير / و احنا مش عاوزين نزعلهم اكتر من كدا
عبد الله / يعنى ايه هنديهم الفلوس
هادى / يا عم احنا حيلتنا حاجه
ام هدير / اسمعوا يا بنات لو كل واحده ادتنى حاجه من شبكتها سلف
شيرين / شبكه مين لا طبعا و انا مالى بهيثم ادفعله ليه هو انا اللى خليته يبلبع و يروح يتهجم على بنت عمه طب دا حتى يستاهل اللى يجراله
هادى / شيرين
شيرين / بقولك ايه انا خارجه من بيت امى على انى هعيش فى شقتى و خرجت فى الصبحيه بفضيحه و سكت و قولت نلم الليله لكن شبكتى لا يا هادى مهياش نصبايه هى
هادى / نصبه ايه اللى بتقولى عليها
شيرين / الله امال تقول ايه عن اللى بيحصل تجبلى شقه و شبكه و تتجوزنى و يوم الصبحيه تاخدنى تعيشنى عند امك و تبيعنى صيغتى فى شرع مين دا بقى ان شاء الله
هادى / لمى نفسك يا شيرين
ام هدير / خلاص يا هادى بناقص احنا اصلا ما كناش مستنين منها حاجه ولاد الاصول بيبانوا
شيرين / الحق ميزعلش يا ماما
ام هدير / انتى خليتى فيها ماما .. هدير
عبد الله / بصى يا حجه الليله دى احنا مالناش فيها كفايا اوى انى خسرت شغلى و حلنى على ملاقى شغل جديد خلى الدهب ده نتسند عليه احنا لسه ليلتنا طويله
ام هدير / بس دا دهب بنتى
عبد الله / و انا جوزها
بكرى / يا خويا مدام متشملل اوى كدا و عامل سبع رجاله فى بعض ماخدتهاش ليه يا جوزها فى بيتك و لا احنا كنا مجوزينهالك فى اوضتها ناقص نديك مصروف كمان
ام هدير / عشان خاطر اخوكى يا هدير والله اول ما ربنا يفرجها عليا هجبلك بدالهم و جرامات كمان
هدير / عبد الله مش موافق يا ماما اعمل ايه يعنى اخرب على روحى عشان خاطر سى هيثم و عمايله السوده و بعدين يستاهل ما هو اللى جبهالنا و دبسنا معاها فى الهم ده و لا انتى بقى عوزانى اطلق يوم صبحيتى و اقعدلك هنا يمكن ساعتها ترتاحى انتى و سى هيثم بتاعك ده
هادى / هما يعنى هيعملوا فيه ايه ما كدا كدا هيسيبوه يعنى هيموتوه يعنى اهو علقه تفوق و لا حد يموت
عبد الله / والله عليك نور انت حتى لو بعنا اللى ورانا و اللى قدامنا و دفعناهم هيثم بنفسه هيجى يقولنا كنتوا سبتونى انضرب و حوشتولى الفلوس اتجوز بيها
شيرين / و اهو ساعتها الواحد يحط فلوسه فى حاجه مضمونه مش اروح ابيع الدهب و اديه لست مرام هانم و يا عالم هو اصلا معاهم و لا لا
هدير / امال هيكون فين يعنى ياختى
شيرين / ما يمكن ودوه مستشفى تانيه و سايبنا نلف حوالين نفسنا و لا يمكن يكون هرب منهم و مستخبى فى اى حته هو هيثم يعنى هيغلب
ام هدير / ما تعمل حاجه يا بكرى ابوس ايدك
بكرى / هعمل ايه يعنى عوزانى اقضى اخر ايامى فى السجن سيبيه يتربى عشان يفكر الف مره قبل ما يكررها دى ما بقتش عيشه دى
بكرى يسيب المكان و يدخل جوه و ام هدير عماله تعيط
..........................
فى الريسبشن فى الفندق فى روسيا
احمد قاعد حاطت رجل على رجل بيشرب قهوه و عينه على اساسنسير يتفتح و تخرج لبنى لابسه فستان احمر تايبيست قصير حمالات و زياد حاطت ايده على وسطها احمد يبتسم و يقوم يقف و يعدل بدلته زياد و لبنى يوصلوا احمد يمسك ايد لبنى و يبوسها
احمد /لا اسمحيلى بقى تستاهلى كل ثانيه استنيتك تجهزى فيها
لبنى / ميرسى
زياد / ها يا احمد ناوى تفسحنا فين النهرده
احمد / لا دا انا هدلعكوا على الاخر هعيشكوا اسبوع معشتوش لا قبله و لا بعده اتفضلوا الليموزين بره مستنينا
لبنى تتحرك و زياد حاطت ايده فوسطها يطلعوا بره الفندق و احمد وراهم ليموزين تركن و السواق يفتح الباب لبنى تركب و زياد و احمد و السواق يقفل الباب و العربيه تتحرك
زياد / اخبار الشغل ايه يا احمد
احمد / لا بقى اسمحلى النهرده ما فيش اى كلام عن الشغل خالص ايه يا زياد انت نسيت ازاى بتنبسط و لا ايه
لبنى / الشغل بقى واخد كل وقته
احمد / لا متقوليش بقى فى حد يبقى معاه القمر ده و يسيبه و يفكر فى الشغل برده
زياد / خف يا احمد
احمد / عرفتوا ان مازن رد مرام
........................................
