(((((السكة شمال 2))))))
#لولو_محمد
الحلقه 165
عبده / كل يوم برزقه و الحمد لله حبايبنا بره بيهونوا علينا القاعده
مازن / كنت بتقولي انك خارج
عبده / يا باشا المخلصاتيه ما بيسيبوش بعضيهم و ربك ما يرضاش بالظلم كلو الا الشرف و لا مؤاخذه
مازن / طبعا
عبده / جدع طيب و ابن حلال عمل زياره لبيت الننوس و الحمد لله اخوه طلع راجل محترم قال انا لا يمكن اقبلها لا علي امي و لا مراتي و اتنازلوا و هخرج بكره الصبح ان شاء الله
محمود / هددوهم
عبده / حد الله بينا و بين الحرام كلو الا الولايا يا محمود بيه بس علي راي المثل و علي الباغي تدور الدوائر و لا ايه يا محمود بيه
مازن / معاك حق بس المهم فعلا ما نجيش علي الولايا هما ما لهمش ذنب
عبده / يا باشا احلفلك بايه ما هوبنا ناحيتهم احنا كلامنا مع الرجاله احنا مش علي اخر الزمن عيل زي ده هيركبنا العيبه و لا ايه يا شريف بيه
شريف / والله انا مقدر موقفك جدا و كان ممكن ابقي مكانك في يوم من الايام لولا ولاد الحلال
شريف يبص لمازن
............................
عبده / كل يا باشا ما تقلقش الاكل نضيف والله
شريف / لا ما نقلقش باكل
مازن / ما يغركش يا عبده دا لو فتح في الاكل هياكلنا
شريف / طب والله علي لحم بطني من الصبح عينك رشقت في الطعميه انا عارف
مازن / اهو ربنا بدلهالك بكباب كل بقي و احمد ربنا
شريف / الف حمد و شكر ليك يارب... يدوم العز يا معلم عبده
عبده / الف هنا يا خبر دا احنا نهارنا ندي النهرده
الكل ياكل
عبده / امال البهوات جايين في ايه
محمود / ضربني
شريف / احنا داخلينله فعملنا متخانقين رمونا في الحجز لحد ما نتعرض الصبح علي النيابه و لما يطلع هنتصالح و نخرج احنا كمان
عبده / اهو دي الرجاله الواحد يقع يلاقي اللي في ضهره كلو كلو
....................
في المستشفي
لبني / زياد انا تعبانه و مش قادره لك
زياد / خلاص والله العظيم ربنا جابلك حقك منها و هتسافر عند موني و مش هتدايقك تاني و انا هجيبلك فيلا اكبر من اللي خدتها منك و احلي و هكتبلك اللي انتي عوزاه حتي لو عوزاني ادي لموني نصيبها من الورث كامل هديها
لبني / انا مش عاوزه منك حاجه
زياد / لبني انتي عارفه قد ايه بحبك ارجوكي
لبني / عمري ما كنت اتخيل ان كل ده يجرالي من تحت راسك خنتني و ضربتني و دلوقت حرمتني من الحاجه الوحيده اللي كنت بتمناها في حياتي حرمتني اني احس باحساس الامومه ابقي زي كل البنات و اشيل ابن يقولي يا ماما قولي استفدت ايه قولي ازاي بتحبني و تعمل فيا كل ده امال لو بتكرهني كنت عملت فيا ايه ارحمني بقي يا اخي ارحمني
زياد / يعني اقتل امي عشان ترتاحي
لبني / انا مش قليله الاصل يا زياد بيه مامتك مهما كانت ست كبيره و هي اللي مربياني و ما تحاولش تبرأ نفسك من اللي حصل انت كمان شريك معاها و مهما كان ارحموا عزيز قوم زل و هي دلوقت محتجاك جنبها اكتر من اي وقت فات دي مهما كانت امك و مش معني اني مش بخلف ان عيالك مش هيعملوا فيك كدا
زياد / انا لو مش منك مش من غيرك انا كمان يا لبني اتحرمت من الابوه انا كمان عمري ما هكون اب بس انتي يا لبني عندي بالدنيا انتي و بس انتي عندي كفايا
لبني / مامتك مهما عملت انا برده بنت اصول انا هاخد بالي منها انا اللي هخدمها بنفسي و مش هسمح لغريب يقرب منها
زياد / ايوه بس موني
لبني / موني عندها ابنها و دراستها و حرام نبليها بمامتك خصوصا بعد كل اللي شافته مامتك السبب في العز اللي احنا فيه و انا هحطها في عنيا هديها المعامله اللي تستحقها من هنا لحد ما تموت بعد عمر طويل ان شاء الله
زياد / انا بجد يا لبني مش عارف اقولك ايه
لبني / ما تقولش و ياريت كفايا كلام انا تعبانه و محتاجه انام
زياد يبوس ايدها لبني تسحبها و تبص الناحيه التانيه
.........................
فى شقه فاطمه تانى يوم
جرس الباب يضرب تقى تروح تفتح تلاقى شريف و وراه مازن
تقى / ابيه مازن جه ابيه مازن جه
شريف / و انا امشى يعنى و لا ايه
تقى / ازاى بس يا ابيه
مرام تطلع من جوه بتجرى و لما تشوف شريف تلم نفسها
مرام / الف حمد الله على سلامتك
مازن / عامله ايه اوعى تكونى صدقتى
مرام / ما شكتش لحظه انك مش برئ
مازن / اهو ده عندى بالدنيا
صافى تطلع من جوه
صافى / حمد الله على السلامه الحمد لله انكوا جيتوا لو كنتوا طولتوا عن كدا كنا متنا من الجوع
رؤى / كنا النون دى جت منين ان شاء الله
صافى / ما تتلمى يا بت بقى بدل قسما عظما لاسلط عليكوا بيدوا يطلع عينك
رؤى / دا حبيب عمته ده ما لكيش انتى دعوه ... الحمد لله يا ابيه انك جيت مراتك و اختك بهدلونا بيبدلوا على التلاجه انا خسيت النص فى البيت ده جوزونى قبل ما اختفى
قاطمه تطلع من جوه شايله المنفضه
فاطمه / انا كنت عارفه انك محتاجه تتربى
رؤى / لا اوعى رؤى ما تنضربش حبيبك سعد يزعل
فاطمه / عشان خاطر سعد بس انا عارفه عجبه فيكي ايه دا كفايا لسانك
رؤى / ردى يا تقى
تقى / هى كدا الشجره المثمره بيحدفها الناس بالطوب
فاطمه تضرب تقى بالراحه
تقى / هو عشان ما عنديش سعد يعنى دا ايه الظلم ده
مازن / هههههههههههههههههههههههه دا انا كان فايتنى كتير والله
مرام / وحشت ملك اوى على فكره حبيبتى ما بطلتش عياط ما كانتش بتنام الا لما بتجيب اخرها من العياط كانها يا قلبى حاسه انك مش موجود
فاطمه / و اهو رجعلها اهو ليه تدايقيه بقى ربنا لا يحرمها منه و لا يحرمكوا منها
مازن / و لا يحرمنا منك يا بطه انتى يا عسل بقول ايه انا جعان هو التلاجه نشفت بجد و لا دى اوشاعات و لا ايه
شريف / عيب عليك يا جدع تلاجه بطه ما تخلاش و لا ايه يا بطه انا واقع
فاطمه / نصايه و احلى سفره تكون مفروشه يلا يا بت منك ليها انجروا قدامى على المطبخ
رؤى / طبعا انتى مانتخه
صافى / ردى يا تقى
تقى / اعداء النجاح
الكل يدحك و البنات كلهم يدخلوا المطبخ و مرام تشاور لمازن باى
مازن / هاتى ملك
شريف / تعال احنا ندخلها و بالمره نفرد ضهرنا على اى سرير لحسن البورش قطم ضهرى
مازن / طب مش هنستحمى الاول و لا ايه الواحد حاسس انه نتن
شريف / يا سيدى جيت فى جمل على ما يعملولنا لقمه ادخل الحمام اتشطف و خدلك غيار من عندى و روق نفسك و لا اقولك تعال نروح شقتى و ننزل على الاكل
مازن / احسن برده هبص بصه على ملوكه و اجيلك
شريف / ما تعوقش بدل ما تيجي تلاقينى نايم
مازن يشاوله و يدخل جوه
.............................
فى شقه مديحه
مديحه / الف حمد الله على السلامه
مروه / يعنى كان ايها لزمتها انها تبات فى الحجز انت كمان يعنى
محمود / خلاص يا مروه بقى مش وقته
مروه / يعنى ينفع افضل طول الليل قلقانه عليك بالشكل ده و فى الاخر تقولى مش وقته طب اقول للناس ايه جوزى اتحبس ليه
محمود / انا ما اتحبستش خلاص بقى طب والله كانت قاعده زى الفل و كلنا كباب و كفته و حاجه اخر دلع
مروه / يا سلام
محمود / اقسم بالله دا اللى حصل بصى ايه رايك ادخل اخد دوش تكونى حضرتيلى لقمه من ايدك الحلوه اكلها و اريح ساعتين و اقوم احكيلك كل حاجه بالتفصيل الممل ايه رايك
مروه / و انا يعنى اقدر اقول لا عن اذنكوا هسخن الاكل
مروه تقوم تدخل المطبخ
مديحه / بنت اصول البت دى ما نمتش طول الليل و كل شويه تتصل بيا ما فيش اخبار ما فيش اخبار و اول ما النهار طلع كانت واقفه قدامى هنا بتسال عنك
محمود / نقاوت ايديكى يا توحه عن اذنك بقى لحسن انا على اخرى
مديحه / ربنا معاك يا حبيبى اتفضل
محمود يقوم يدخل الحمام و مديحه متابعاه
........................
فى شقه شريف
شريف يطلع من الحمام يلاقى مازن واقف فى اوضه صافى اللى فيها الفستان
شريف / انت دخلت الكرار
مازن / لقيت الباب مفتوح ايه الابداع ده
شريف / صافى بتتسلى لما بتبقى قادره
مازن / دا هيبقى بتاع رؤى صح
شريف / ايوه يا سيدى كانت طلعالها بموديل لقتها شغاله فى ده شبطت
مازن / بس دا شكله غالى اوى هو سعد هيقدر على تمن فستان زى ده
شريف / سعد مين هى صافى بتحاسب حد من البنات على اى حاجه بتاخدها منهم و لو فكرت تكلمها تتقمص دول اخواتى و انت مش شايف بيعملوا عشانى ايه و بتحرجنى اوى بزوقها بصراحه
مازن / احسن حاجه عندك الحب اللى بين امك و اخواتك و مراتك ده بجد ربنا يباركلك انت فى نعمه انا شخصيا اتحرمت منها
شريف / ليه يا عم طب دا مونى روحها فى مرام
مازن / مونى !! الله يعينها على اللى هى فيه لسه قافل معاها البنت منهاره اوى
شريف / ليه يا ابنى انت مش طمنتها
مازن / ايوه بس زى ما قولتلك زياد مش هيسكت بتقول لبنى اتخانقت مع مامتها لبنى وقعت من على السلم شالت فيها الرحم و فريده لما عرفت اتشلت
شريف / من قلبها الطيب اوى تتشل على لبنى
مازن / لا كانت بتحبها يا شريف برده و كانت وخداها تحت جناحها
شريف / امال المشاكل اللى كانت بينهم الفتره اللى فاتت دى ايه
مازن / امال اتشلت ليه يعنى
شريف / بصراحه متاثرتش بالعكس ... والله يا مازن انا ما عارف هما يستاهلوا فعلا و لا انا اللى قلبى قسي الواحد من كتر اللى شافه فعلا قلبه قسى خصوصا على الاشكال دى عقبال زياد الكلب ده و اللى من عينته
مازن / بتقول ما لوش دعوه بحوار البت اياها بتقول هو وقتها كان فى العمليات محتاس بمراته هو فعلا اللى عمل حوار زعتر و اللوح و هو اعترف و قالها ان ربنا انتقم منه فى مراته و امه
شريف / هو و لا مش هو اللى عمله ما كانش شويه
مازن / بس لبنى ما لهاش ذنب هى عملت ده عشانى
شريف / عشانك و لا عشان نفسها لو عاوزه تخلع ما تخلع ايه اللى يجبرها تفضل على ذمه حيوان زى ده بقولك ايه انا مش قادر اتعاطف معاهم انت بس اللى لسه فيك حته طيابه كدا مش عارفه جاتلك منين دا انت ما كنتش بتطيق سيرتها
مازن / عملت عشانا كتير
شريف / بقولك ايه بجد ما تحاولش ما فيش اى حاجه جوايا والله دورت كتير ما لقيتش
مازن يبتسم الباب يخبط يروح يفتح يلاقى تقى
تقى / الاكل جاهز
شريف / جايين اهو شريف و مازن يمشوا و مازن يقفل الباب وراه
. ...........................
فى المستشفى
لبنى نايمه فى السرير
لبنى / خلى امانى تجهزلها الاوضه اللى تحت عشان مش هنعرف نطلعها و ننزلها لو احتاجت علاج او اى جلسات
زياد / تمام يا قلبى تؤمرينى باى حاجه تانى
لبنى / اه انا هجيب واحده مع امانى مخصوصه لمامتك امانى تعبانه فى شغلها و مغلبانا فى الفيلا و مش هتقدر تخدم مامتك كمان
زياد / تحبى انا اللى اجيبها و لا انتى تعرفى حد
لبنى / لا انا هتصرف ما تشغلش انت بالك
زياد / تمام يا حبيبتى
لبنى / خليها توضبلها الاوضه اللى جنب الحمام مش التانيه عشان هتحتاجه اكيد
زياد / بس دى اوضه امانى
لبنى / محتاجينها يا زياد هنعمل ايه يعنى امانى هتنضفها و ترشها و مامتك تنام فيها
زياد / خلاص تمام و امانى هتنام فى الاوضه التانيه
لبنى / اكيد لا طبعا المرافقه هى اللى هتنام فيها امانى هتنام فى الاوضه اللى عند المطبخ
زياد / تمام يا حبيبتى اللى تشوفيه
لبنى / كلمت مونى
زياد / اه كلمتها و هتوصل النهرده تطمن عليكي و على كل حاجه
لبنى / تنور انا بجد مش عارفه هقابلها ازاى و انا كدا
زياد / ايه بس يا حبيبتى مالك ما انتى زى القمر اهو
لبنى / انا تعبانه اوى يا زياد تعبانه اوى بجد
زياد / يا حبيبتى الدكتور قال بكره هتروحى و كلها كام يوم و الجرح يلم و ترجعى احسن من الاول كمان
لبنى / امين يا زياد امين
زياد يقوم و يبوس راسها
لبنى / كلم امانى تجهز احسن اوضه لمونى لازم تمشى من هنا و هى عارفه ان زيارتها لبيت اخوها مفتوحه لاى وقت لازم تعرف قد ايه هى غاليه عندك راضيها يا زياد هى اللى ليك فى الدنيا
زياد / حاضر يا حبيبتى والله زى ما انتى عاوزه
لبنى تبتسم يقوم يمسك التليفون و يتصل
زياد / ايوه يا امانى ....
..............................
فى شقه مازن
مازن نايم الباب يخبط مرام تفتح تلاقى مونى و كامل وراها شايل مازن
مرام / مونى حبيبتى وحشتينى جدا جدا
مرام تحضنها اوى
مرام / اتفضلوا اتفضلوا
الكل يدخل
مرام / بسم الله تبارك الله سبحان من خلقك دا احلى من الصور بكتير
مرام تشيل مازن
مرام / تعال يا روح قلب خالك
مرام / مازن نايم انا هاخد مازن يصحيه اتفضلوا ارتاحوا
مرام تشيل مازن الصغير و تحطه فى حضن مازن مازن يفتح عينه يشوفه يقوم يقعد
مرام / هههههههههههه اما مفاجاه
مازن / هى فين
مرام / بره مستنياك
مازن يشيل مازن الصغير و يطلع يجرى يحضن اخته
مونى / الف حمد الله على السلامه
مازن / ايه المفاجاه الحلوه دى ما قولتليش ليه انك جايه
مونى / نسيت ما افتكرتش غير لما قفلت معاك مش عارفه ايه نسانى بس الحمد لله بقى
مازن / شوفتى مامتك
مونى / لا لسه قولت افرح بيك الاول و بعد كدا اروح اطمن على ماما بصراحه لو شوفتها الاول ما كنتش هقدر ابتسم معاكوا و انتوا مالكوش ذنب انكد عليكوا
مرام / مالها طنط
مونى / اتشلت
مرام / لا اله الا الله من ايه زعلها على اونكل ابراهيم
مونى / زعلها على لبنى وقعت من على السلم و شالت الرحم امبارح كان يوم صعب اوى يا مرام
مرام / لا اله الا الله لا اله الا الله و الله زعلت عشانها جامد
مونى تبص فى الارض بحزن
كامل / على فكره انا مش عاوز ابقى قليل الذوق بس انا من ساعه ما عرفت انى جايلكوا و انا مستخسر اكل انا عاوز اكل من ايد الاسطوره ما ليش دعوه
مرام / بس كدا يا نهار ابيض نصايه و احلى اكل لاحلى ضيوف و لا انتوا مش ضيوف دا انتوا اصحاب واجب
مرام تجرى على المطبخ
كامل / ليه يا مونى احنا قولنا هنيجي نفرفش و ندحك عاجبك كدا
مونى / والله غصب عنى انا تعبانه اوى ... تعبانه اوى يا مازن
مونى تعيط مازن ياخدها فى حضنه
مازن / حاسس بيكي يا حبيبتى حقك عليا
مونى / كل حاجه فى حياتى بايظه انا بجد مش عارفه ليه كدا و كلو ورا بعضه مش عارفه ابطل عياط و مش عارفه اركز فى حاجه انا حياتى وحشه اوى يا مازن وحشه اوى مع انى والله ما ليا ذنب فى اى حاجه من اللى بتحصل دى
كامل / ليه كدا يا مونى حرام عليكي
مازن / يا حبيبتى انتى ربنا رازقك بزوج بيحبك و ابن زى القمر و انتى الحمد لله بصحتك خلاص احمدى ربنا
مونى / بابا و ماما و زياد و لبنى دول برده جزء من حياتى يا مازن و انت و اللى جرالك امبارح اكيد طبعا اتاثرت بكل ده هعمل ايه يعنى يا مازن هو انا حجر ما انا بشر برده
مازن / عارف يا حبيبتى عارف تعرفى انا عارف ايه اللى ممكن يفرفشك استنى
مازن يدخل الاوضه يجيب ملك نايمه يحطها فى حضن مونى
مازن / قوليلى بقى عمرك شوفتى بنت احلى من كدا
مونى تبتسم و تبصلها بحب
مونى / و لا هشوف سبحان الخالق الوهاب ربنا يحميهالك يارب
مازن / ايه رايك نطنش فرق السن البسيط ده و نجوزهم و لا نخليهم اخوات انا عن نفسى افضل يبقوا اخوات دول لو اتجوزوا هتقوم حروب بسبب عيالهم
مونى / ربنا يخليك ليا يا مازن انا بجد مش عارفه من غيرك كنت عملت ايه
مازن / انا اللى مش عارف من غيرك كنت عملت ايه ربنا يخليكي ليا يا احلى اخت فى الدنيا
مازن يقوم يبوس راسها و يحضنها و هى حاضنه ملك صوت زيت
مازن / ثوانى هبص على مرام و اجيلكوا البيت بيتكوا
مازن يقوم يدخل جوه يلاقى مرام واقفه بتقلى بانيه
مازن / بتعملى ايه
مرام / بقلى بانيه و فى مكرونه بشامل فى الفرن حلو و لا اطلع حاجه كمان من الفريزي
مازن / ما فيش حاجه حلوه او عصير
مرام / فى التلاجه كل حاجه الحمد لله الخير كتير بس انا خايفه اسد نفسهم
مازن / يعنى كبايه عصير على ما تخلصى الاكل
مرام / تمام فى التلاجه و التلج فى الفريزر
مازن / ربنا ما يحرمنى منك و لا من عمايلك الحلوه يا احلى مرام فى الدنيا
مرام / و لا يحرمنى منك يلا يلا صبلهم فى الكاسات الجديده بتاعه التصوير
مازن / حاضر
مازن يفتح درفه و يطلع كاسات شيك و يحطها على صينيه شيك و يصب عليها العصير و يطلعلهم
مازن / عصير كدا على ما مرام تغرف المكرونه البشامل و البانيه
مونى / العشق دا انت هايص
مازن / عاوز اقولك انها بقت بتخزنهم فى الفريزي على السوا اقولها جعان تسخن المكرونه و تقلى البانيه ما انا باجى متاخر برده
مونى / الله يعينك و اخبار الشغل ايه
مازن / الحمد لله تمام اخدت النهرده و بكره اجازه و باذن الله بعد بكره انزل الشغل تانى بصراحه تعبت اوى من نومه الحجز
مونى / عدت الحمد لله
مازن / الحمد لله
.................................
فى المستشفى
باب الاوضه يخبط و احمد يدخل
زياد / احمد ازيك
احمد / الحمد لله لما عرفت جيت اطمن على لبنى ... سلامتك
لبنى / الله يسلمك
زياد / عرفت منين هو الخبر لحق ينتشر
احمد / اعمل ايه لما نزلت مصر قررت انى اسال على الحبايب
زياد / و نازل بقى فسحه و لا بيزنيس
احمد / اقامه بصراحه زهقت من الغربه و قررت انى انزل هنا علاطول و الحمد لله مازن ما عادش يقدر يمنعنى من انى ارجع اشتغل هنا تانى و لا ايه
زياد / نورت بلدك امال شغلك اللى فى روسيا هتعمل فيه ايه
احمد / ماله مهو ماشى زى الفل مع انى و الله بفكر اصفيه و احول كل فلوسى هنا و انزل بتقلى فى السوق
زياد / على فكره تكسب دهب الفتره دى الحكومه عامله احلى شغل مع المستثمرين احسن تسهيلات و احلى معامله خصوصا اديك شايف البلد عامله ازى
احمد / متابع .. امال هتروحى امتى يا لبنى
زياد / الدكتور هيبص عليها و يكتبلها خروج ان شاء الله
احمد / انا جيت و اطمنت عليكي هبقى اجى ازورك فى الفيلا لما تروحى ان شاء الله
لبنى / اكيد هنتقابل
احمد يبتسم
احمد / اكيد
احمد يبص لزياد و يحيه براسه و يمشى
زياد / شوفتى ربنا بيقطع من هنا و يوصل من هنا اهو نزول احمد مصر هيفتحلنا سكك جديده و شغل ما لوش اول من اخر
لبنى / اكيد و خصوصا ان احمد له حبايبه و سككه اللى هتخلصلك كل اللى واقف قدامك
زياد / الموضوع ده محتاج مخمخه
لبنى / و انا متاكده انك هتعرف تتعامل معاه صح
زياد يبصلها و يبتسم
.......................
فى الفيلا
مونى بتزق فريده على كرسى بعجل و كامل ماشى وراها شايل شنطه ادويه ضغيره على ايد و مازن الصغير على الايد التانيه امانى تقابلهم
امانى / اهلا مونى هانم شفاها الله و عافاها
مونى / شكرا يا امانى هتقدرى تساعدينى نطلعها فوق و لا ننادى حد من الجناينيه و البواب مع كامل يشيلوها
امانى / لا زياد بيه امر انى اجهزلها الاوضه اللى جوه تقعد فيها و منها تبقى دور ارضى لا تتشال و لا تطلع و لا تنزل و منها جنب الحمام
مونى / تمام فكره كويسه برده ساعدينى ندخلها بقى
مونى تزق السكه و امانى تاخد شنطه الادوبه من كامل
مونى / هى مش الاوضه دى كانت اوضتك
امانى / ايوه بس الست فريده احتاجتها بقى نقلت انا الاوضه اللى جنب المطبخ
مونى / ايوه
مونى و امانى ينيموا فريده فى السرير و مونى تبص حواليها الاوضه مش باينلها شباك
مونى / هى ما فيهاش شبابيك
امانى / لا فيها
امانى تروح تشيل ملايه من على الحيطه
امانى / ان شاء الله هيعملولها ستاره كويسه و انا هفتحلها الشباك ده اصل انا كنت بخاف حد يبص عليا و انا بغير و لا حاجه فغطيت الشباك بالملايه
مونى تهز راسها
امانى / بس الشباك لما بيتفتح بيطل على الجنينه و هواها حلو
مونى / فعلا كنتى ظالمه نفسك و ظالمه الاوضه بقفلتك للشباك دى يا امانى سبيه مفتوح يدخلها شمس و هوا
امانى / تحت امرك يا ست مونى امال ست لبنى اخبارها ايه
مونى / الدكتور هيكتبلها خروج بكره الصبح و هتروح على هنا ان شاء الله
امانى / توصل بالسلامه و الله زعلت عليها خالص اصل بصراحه هى ما تستاهلش كل ده
مونى / النصيب ممكن معلش اتعبك تعملى شوربه و لا اى حاجه لماما اكلها
امانى / حالا يا ست الكل حالا
امانى تمشى و مونى تقعد جنب ماماتها
مونى / صغيره بس تفى بالغرض حضرتك فعلا هتخرجى كتير الفتره الجايه عشان جلسات العلاج انا عوزاكى تجمدى عشان خاطرى انا محتاجاكى
فريده تبصلها و الحزن مالى ملامحها صوت عياط مازن بره
مونى / هروح ابص على مازن اشوفه جعان و لا عاوز يغير و لا ايه و هرجعلك تكون امانى عملت الاكل عن اذنك
مونى تطلع بره و تسيب فريده لوحدها بتبص بعنيها على الاوضه القديمه اللى هى فيها
...............................
فى المستشفى
زياد نايم لبنى بتتكلم مع احمد واتس
لبنى / قولتلك مش عوزاها تموت
احمد / و انتى فاكره انك لما تعملى فيها كدا هتعيش قد ايه يعنى مهى برده هتموت بقهرتها
لبنى / اجلها بقى هعملها ايه
احمد / ههههههههههههههههه جبروت
لبنى / المهم قولى ناوى تعمل ايه مع زياد
احمد / ما فيش حاجه كفايه عليه هاين عليا اقتله و اخلص منه
لبنى / الموت خساره فيه سيبه يعيش
احمد / انتى متاكده ان هو ده السبب الوحيد
لبنى / امال هكون بحبه مثلا
احمد / بتعاقبى نفسك مثلا بتعذبيها
لبنى / انا و هو ما ينفعش نكون غير مع بعض تصدق لو قولتلك ساعات كتير بيصعب عليا
احمد / ما يصعبش عليكي غالى دا واطى و ابن كلب
لبنى / زيي و زيك و زي كل اللى نعرفهم الا من رحم ربى
احمد / انا عمرى ما كنت هعمل فيكي كدا
لبنى / و هو كمان لو كنت حلفتله على الميه تجمد انه هيعمل فيا كدا ما كانش هيصدق كلكوا عينه واحده تجروا على الحاجه بالمشوار و تعملوا البدع عشان توصلولها و لما تبقى فى ايدكوا خلاص دورها خلص
احمد / بتظلميني بتساويني فى نفس الكفه مع البتاع ابن امه ده
لبنى / للمره التانيه هقولهالك انا محتاجه زياد يحمينى منك و محتاجاك تحميني من زياد للاسف انا خلاص مش هقدر اكابر اكتر من كدا انا محتاجاكوا انتوا الاتنين و هفضل باقى عمرى محشوره بينكوا انتوا الاتنين
احمد / افهم من كدا انى دخلت الصوره اخيرا
لبنى / ما فيش عقاب لزياد اقوى من انى اللبسه العمه
احمد / احلى عمه دى و لا ايه
لبنى / على قد ما انا مقروفه من نفسى و كارهاك بس للاسف الغل و الكره اللى جوايا لزياد اكبر بكتير
احمد / انا عمرى ما فهمتك بس ما دام انا دخلت فى الصوره خلاص تهمنى راحتك
لبنى / ليه بتقول كدا
احمد / عشان واحده غيرك كانت عززت نفسها خلعت زياد و سجنته باللى عمله فيها و اتجوزت الراجل اللى يصونها بجد
لبنى / ما كنتش اعرف عنك انك غبى ما تقفلنيش منك بقى هو انا هقولها كام مره انت بالنسبالى فى نفس الكفه زيك زي زياد انا بكرهكوا انتوا الاتنين و بكره نفسى انى مضطره اعرفكوا بس للاسف انا حياتى وقفت على كدا انا نهيتها بايدى زمان لما اتهبلت فى عقلى و طاوعت امى و نمت مع زياد لاول مره ساعتها قتلت نفسى بايدي بس ما كنتش اعرف غير من قريب
احمد / يادى مازن اللى مش هنخلص منه
لبنى / تعرف انه كان معايا فى العمليات كان ماسك ايدي
....................................
