((((((السكة شمال ٢)))))
#لولو_محمد
الحلقه ٨٤
مديحه / ممكن ادخل اتكلم معاكى شويه
مرام / طبعا يا عمتى بيتك اتفضلى
مديحه تدخل و تقعد على اقرب كرسى مرام تسيب الباب مفتوح و تروح تقعد
مديحه / انا عارفه ان ما ليش عين اكلمك بعد اللى حصل بس ربنا وحده اللى يعلم باللى بيا
مرام / انا مقدره يا عمتى اى حد مكانك
مديحه / اى حد مكانى كان هياخد ضناه فى حضنه و يحاجى عليه بس انا ...
مديحه تبص فى الارض
مرام / خلاص يا عمتى اللى حصل حصل و ما فيش اى داعى نفكر فيه او نفتحه من جديد
مديحه / انا ما بنامش يا مرام انا عايشه على المنوم و المهدات هتجنن
....................................
مرام / بعد الشر عنك يا عمتى و الله العظيم انا ما زعلانه منك بالعكس انا مقدره انا عارفه انى اتسببتلكوا فى مشاكل كتير انا عارفه انى ... عمتى انا اسفه والله
مديحه / محمود قالى انك رجعتى لمازن
مرام / ايوه ردنى امبارح
مديحه / امال ايه اللى رجعك عملوا معاكى حاجه تانى
مرام / لا ماعملوش ... لسه ... هيعملوا ايه يعنى اكتر من اللى عملوه هيموتونى ياريت
مديحه / بعد الشر عنك يا ضنايا ان شالله هما و اللى يتشددلهم
مرام / انتى عامله ايه و مروه عمله ايه
مديحه / الحمد لله كويسين
الباب يخبط و محمود يدخل و هو ملهوف مرام اول ما تشوفه تقوم تقف يبص فى الارض و يفكر يرجع تانى و بعدين يقرر يواجه و يبصلها
محمود / عامله ايه
مرام / على ما افتكرت تسال
محمود / طول الوقت كنت بسال
مرام / بتسال الغرب و لا مره فكرت تيجى تسالنى انا
محمود / غصب عنى
مرام تهز راسها و تبص فى الارض و تقعد
محمود / انتى عامله ايه
مرام تبصله بحزن
مرام / عايشه الحمد لله
محمود يبص فى الارض
مرام / لفيت لفيت و رجعتله ما نابنى الا البهدله و العذاب و التعب بس عايشه الحمد لله
مرام تبص فى الارض و تمسح دموعها
محمود / مرام
مرام تبصله
محمود/ انا عارف انى لو كنت قولت الكلام ده قبل كدا ... حتى و انا بقوله دلوقت برده ... لسه شهادتى فيه مجروحه بس انتى لازم تعرفى اللى كان بيحصل من وراكى لما حصل اللى حصل و روحنا بيت المعلم اسعد الله يرحمه القديم و انتى كنتى مصممه على الطلاق انا قولت لمازن يطلبك فى بيت الطاعه و لما يتقفل عليكوا باب واحد هيعرف يراضيكى
مرام / انت بتقول
محمود / هو مرضيش قالى مش هكسرها مش ههينها اكتر من كدا و طلقك فعلا لما عرف اللى حصل مع المحامى الشمال اللى روحتيله و لما عرف انك بعتى الحلق بتاعك طلقك على عينه و هو عنده امل يرجعلهك و لما اهله ضيعوا اخر فرصه عليه مازن حاول ينتحر و لولا خليفه البواب كان زمانك قاريه نعيه من زمان ابوه و اخوه لما جم يوم ما كنتى عنده كانوا جايين عشان ياخدوه مصحه و مرتبين انهم يثبتوا انه مجنون عشان يحجروا عليه كانوا ناويين يدفنوه فى مستشفى مجانين و عشان عارفين انك مش هتسبيه كان لازم يبعدوكى عن طريقه الاول
مرام / انت بتقول ايه
محمود / انا اقدر اثبت كل كلمه بقولها بالمستندات مازن ما اتخلاش عنك لحظه كل الشغل اللى اشتغلتيه مازن اللى كان بيموله حتى مدام ايمان كان بيدفع مرتبك من معاه و عمل التامين بتاع الموظفين عشان خاطر مامتها و ظبط مواعيد شغلها عشان متاثرش على دراستك و المشروع اللى فوق هو اللى طلب من مصطفى يكلمك عشان متحتاجيش لمليم و كان بياخد الوجبات يفرقها على العمال باقل من ربع تمنها عشان يخليكى تقفى على رجليكى تانى
مرام تبصله
محمود / بقولك اقدر اثبت كل حرف بالورق و المستندات و الفواتير و اسالى سعد اسالى مصطفى و شريف اسالى اى حد من الشركه كان بياخد الوجبات كلها ما عدا شركتين صغيرين بتوع كمال جوز اخته لكن كلو كان بيروح للموظفين و العمال عند مازن
مرام / ليه ما قولتليش
محمود / كرامتك فوق الكل تموتى من الجوع انتى و تيته و تشحتى و لا انكيش حتى تاخدى نفقتك و حقك
مرام تبص فى الارض
محمود / كل ده و لا حاجه ما شوفتيهوش و هو بيطير من بيت لبيت عشان يلحقك زى المجنون ما شوفتيهوش و هو بيخاطر بحياته عشانك كان ممكن يقع من الدور الرابع و لا الخامس عشانك و لا همه و لا اتردد ثانيه ابوه كان عاوزه يسافر عشان يبقى بعيد عنك و ده بيحصل ما سافرش عشان كان خايف عليكى كان خايف يكون فخ زى اللى عملهوله ابوه قبل كدا لما عمل عيان عشان يبعده عنك مازن بيحبك و لو لفيتى الدنيا كلها مش هتلاقى حد يحيبك و يخاف عليكى قده كلمه حق و قولتها تقولى بقى بشتغل عنده دافعلى اقول تقولى عاوزينك تمشى تقولى اللى تقوليه كلمه حق و قولتها
مديحه / اهدى يا محمود بالراحه البنت ما اتكلمتش
محمود / انا تعبت بتختار اطول و اصعب طريق بتختار اللى يعذبها و يعذبنا كلنا معاها يا مرام انا الوحيد اللى كنت رافض مازن فى حياتك تفتكرى فعلا وافقت و بدافع عنه عشان الفلوس و لا عشان اثبتلى مليون مره انه شاريكى و بيحبك و بيحارب فى كل الجهات عشانك
مرام / انت ما تعرفش حاجه
محمود / عرفينا قوليلى يمكن ضاحك عليا يمكن نطته من بيت لبيت و طيرانه و مجازفته بحياته اللى حصلت قدام عينى كانت تمثيل يمكن كان مربوط بحبل فى طياره هليكوبتر لابسه طقيه الاخفى
مرام / الحاجات دى بسيطه بالنسبه لمازن مهو نط قبل كدا بالموتسكل من فوق عربيات عشان يتمنظر على صحابه و طلع فى التليفزيون
محمود / ما حدش كان بيصوره المرادى ما حدش شاف اللى حصل غير انا و شريف مازن بيحبك يعمل ايه اكتر من كدا عشان يثبتلك انه شاريكى الواد اتغير اقسم بالله بقى واحد تانى بحس نفسى قليل جنبه بعد ما كنت بشوفه صرصار تحت جزمتى ما تضيعيهوش من ايدك يا مرام
مديحه / كفايا يا محمود
محمود / لا مش كفايا سكتنا كتير حد يوعيها بقى تعرفى عمك اللى انتى روحتيله ده كان بياخد من مازن عشرين الف جنيه فى الشهر تمن اقامتك عندهم و مش بس كدا دا الكلب اللى اسمه هيثم ده خد اربع تلاف عشان يسمحولك تروحى معاه للدكتور
مرام تبص الناحيه التانيه
مديحه / مرام لازم تعرفى ان ده بيتك و اننا اهلك و ان اى كلام قولته قبل كدا كان من ورا قلبى و ندمت عليه و بيتى و قلبى مفتوحينلك انتى و ملك لاخر يوم فى عمرى
مرام تبص لمديحه و الدموع تنزل من عنيها مديحه تقوم تاخدها من حضنها و مرام بتبص لمحمود
..............................
فى شركه فى روسيا
احمد و زياد على ترابيزه الاجتماعات مع ناس روس و منهم اتنين بنات شقر شكلهم جد جدا زياد يوطى على احمد
زياد / ايه يا عم الجو ده احنا ما اتفقناش على كدا انت قولتلى انك مظبط الدنيا
احمد / يا عم هو حد اتكلم
زياد / ياعم جوز الغربان اللى مسابوش تفصيله ما سالوش فيها شكلهم هيبوظولنا الليله
احمد/ اهو جوز الغربان دول هيبقوا جوز يمام فى العشا بالليل
زياد / عشا ايه
احمد / جرا ايه يا زياد هو انا اللى هفهمك احنا دلوقت هنتكلم فى الاساسيات و احنا فايقين لكن التفاصيل بقى نتفق عليها و هما مساطيل
زياد / لا يا عم انا لسه ما فوقتش من حوار امبارح
بنت 1/ يست بروبليما ؟ ( هل توجد مشكله ؟)
احمد / موى دروج فيبيشاتلين فاشيمى جلازامى ( صديقى معجب بعينيكى )
البنت تبص لزياد و تبتسم
البنت / سباسيا ( شكرا)
زياد يشد احمد
زياد / انت كنت بتقولها ايه
احمد / العمر دا كله و ما اتعلمتش روسى البت معجبه بيك
زياد / انت بتهزر و لا عاوز تجيب اجلى
احمد / خليك انت خايف من لبنى لحد ما اليمامه تطير الصفقه كلها من ايدك
زياد / اعمل ايه يعنى
احمد / ايه مش هتعرف تسلك امورك يعنى لحد ما المصلحه تخلص نيمها فى العسل
زياد / والله انت هتودينى فى داهيه
احمد / يا عم انا اللى هوديك الجنه
احمد يبص للبنت
احمد / اون خوشيزنات تيبا بولشا ( عاوز يتعرف عليكى اكتر ) جوزتاخ نوتشيو ؟ ( فى العشا بالليل ؟ )
البنت / خاراشو ( تمام )
البنت تبتسم لزياد زياد يشد احمد
زياد / اتفقتوا على ايه
احمد / بتقول هتمضى بالليل فى العشا بعد ما تراجع العقود
زياد / اووووف بقى انا كنت مواعد لبنى اننا نخرج سوا
احمد / يا سيدى اعتزرلها باى حجه النهرده و بكره راضيها زى ما انت عاوز دى صفقه بمليارات و انت الكوميشن بتاعتك منها ملايين دا غير وضعك اللى هيتغير خالص عند جوز امك لما يعرف انك عملتها لوحدك و بالفلوس اللى هتطلعلك ابقى اشترى للبنى احلى هديه تراضيها بيها ليله تفوت و لا حد يموت يا زياد شوف مصلحتك هو انا اللى هعلمك مشى امورك
زياد يبص للبنت يلاقيها مبتسمه و بتوشوش اللى جنبها يبتسملهم و يبص الناحيه التانيه و ينفخ
..............................
فى الشركه
مازن / اذا اردت شيئا بشده فاطلق سراحه مين ابن الكلب اللى قال الجمله دى عشان اكله اهى طارت
شريف / ما تبقاش طماع اصبر البنت لسه فى عصمتك ما طلقتهاش يعنى سبها تفكر و تاخد وقتها و هترجعلك
مازن / بص انت بالذات تسكت خالص الا عمرك ما شورت عليا شوره و فلحت اطلع من نقره لضحضيره و من فخ لفخ حاجه نيله طلقها سيبها اعملها سويلها ابو كدا يا اخى ابو كدا و ام كدا كمان
شريف / يا عم انت كنت فين ما تحمد ربنا
مازن / الف حمد و شكر ليك يارب الف حمد و شكر ليك يارب
شريف / بص لو عاوز ماما تروحلها و تكلمها
مازن / انا مش عاوز اى حد يكلمها فى اى حاجه كفايا اوى لحد كدا انا حاسس انها بتعاندنا و خلاص و كل ما حد يكلمها تعند اكتر مش عارف انهى دماغ دى بس
شريف / ما يمنعش تبتعلها بوكيه ورد كدا يحنن قلبها يعنى
مازن / مش النهرده بكره
شريف / تمام
مازن / لا و انا اللى عملت كل ده على اساس هتقولى لا انا هقعد معاك هديك فرصه لا انا همشى ما صدقت طبعا و فين سى محمود دا كمان
شريف يزعق / لا اله الا الله مش انت يا ابنى قولتله يفضل فى البيت عشان لو احتاجت اى حاجه
مازن / اه صح و بعدين انت متعصب ليه نسيت يا اخى
شريف / مش انا اللى متعصب انت اللى متعصب
مازن يزعق/ انا مش متعصب
شريف يزعق / امال بتزعق ليه
مازن يزعق/ انا مبزعقش انت اللى بتزعق
شريف بيزعق / انا بزعق عشان انت بتزعق
مازن بيزعق / خلاص متزعقش و انا مش هزعق ابو كدا يا اخى
شريف يبصله مازن ينطر الملف اللى قدامه بعيد
.............................
فى الفندق فى روسيا
لبني / والله
زياد / اعمل ايه غصب عنى انتى يعني مش عارفه الروس و غباوتهم
لبني / تصدق انا غلطانه انا كانت عارفه ان ده اللى هيحصل من الاول
زياد / قلبي قلبي قلبي
زياد يحاول يحضنها تزقه
زياد / لما امضى الصفقه دى هعوضك عن كل ده هجبلك احلى هديه و افسحك احلى فسحه مش هحرمك من حاجه هاخد اجازه شهر و نسافر المالديف انا و انتى و بس
لبني / تمام انا هاجى معاكوا بالليل
زياد / ايه ؟؟
لبني / ايه مش هشرفك قدام الجروب الروسي
زياد / لا طبعا يا حوبى تنورى هكلم احمد اخليه يزود كرسي بقي عشان المطعم بالحجز
لبني / هو احمد رايح معاكوا
زياد / طبعا امال مين بيترجملى
لبني / انت بتثق فى احمد اوى انه يترجملك ما جبتش مترجم ليه
زياد / يا ستى العقود بالانجليزي مش بمضي غير اللى انا قاريه و فاهمه انما اللت و العجن مليش فيه امال انا بسايسه ليه عشان يمشيلى مركبي و ياخد عمولته و بعد كدا يترزع على قفاه
لبني / اه و انت سيد من يرزع على القفا
زياد / ليه ما خليتوش يعيط قبل كدا
لبني تبصله
لبنى / خلاص انا هبقي ارتب مع انس و اروح اقابله خليك انت فى شغلك الجو هيبقي رخم اوى بالنسبالى
زياد / والله انا قولت كدا برده عشان كدا ما حجزتلكيش
لبنى / تمام
.......................
قدام بيت مازن
مازن يركن العربيه بالليل متاخر و هو مخنوق و مش طايق نفسه ينزل من العربيه يجى يدخل البيت خليفه يقابله و هو مبتسم اوى يروح لمازن
خليفه / مازن بيه مازن بيه
مازن / بعدين يا خليفه مش قادر لاى حاجه دلوقت
خليفه / انا بس كنت عاوز اقولك
مازن يسيبه و يمشي يركب الاسانسير و يطلع و هو بيبص فى الموبايل يدخل من باب الشقه و يقفل الباب وراه و يبص على الشقه و هو بينفخ و يقلع الجاكت و الجرافات و يدخل اوضته ضلمه و هما على ايده يرميهم في الارض و يبدا يفك فى زراير القميص بتاعه الكمام
مرام / ما بدرى يا استاذ
مازن يتخض يايد النور يبص يلاقي مرام بتطلع من تحت الغطا يفرح
مرام / ايه شوفت عفريت و لا بوظتلك اللى كنت ناوى عليه
مازن يجرى يحضنها تزقه
مرام / اوعى كدا انت اتجننت و لا شارب حاجه ايوه طبعا ما ان غاب القط اللعب يا فار ما صدقت سربتني و خليلك الجو
مازن يحضنها جامد اوى ما تعرفش تفلت منه
مازن / بعشق نكدك بموت فيكى بحبك بحبك بحبك
مرام / طب اوعى كدا اوعى حاسب
مازن يسيبها و يقف مبسوط زى العيل الصغير
مرام / بالراحه الله و بعدين ايه نكدى دى تقدر تقولى البيه كان فين لحد دلوقت
مازن / والله كنت فى الشركه و اسالى شريف
مرام / و ايه هدومك دى طبعا ما الفلبينبه هتنضف وراك
مازن يجرى يشيلهم و يعلقهم
مرام / تعمل حسابك ان لو هكمل فى البيت ده لازم يبقي فى نظام
مازن يهز راسه موافق
مازن / اللى تقولى عليه المهم انك رجعتيلى
مرام / انا ما رجعتلكش انا رجعت عشان ملك انا فكرت فى كلامك انت معاك حق ملك من حقها تعيش اللى انا و انت اتحرمنا منه انها تعيش مع اب و ام بيحبوها
مازن / و بيحبوا بعض
مرام / انا ما رجعتلكش انت ابو ملك بس انا مش هقدر اكون مراتك لا تقرب منى لا ليك اى دعوه بيا
مازن / ما حدش عارف بكره فيه ايه يا عالم مش يمكن تغيرى رايك
مرام / ما يهمنيش اللى يهمنى ملك و بس انت قولت انى لما ببعد بسيب مسافه يدخلوا ياذونا منها انا اهو معاك احميها منهم ملك محتاجه امانك اكتر من اى حاجه تانيه فى الدنيا محتاجه ضهر تتسند عليه انا مش عاوزه منك اكتر من كدا
مازن / طب ممكن انام جنبك
مرام / لا
مازن / السرير كبير هنام بعيد
مرام / قولت لا
مازن/ طب ممكن لما تخبط احط ايدى
مرام / لما تخبط
مازن / ممكن نبقي ناكل سوى و نتكلم سوا و نقضي وقت سوا يعني على الاقل نبان قدامها اننا زوج و زوجه طبيعين
مرام / ممكن
مازن / نورتى بيتك يا مرام
مازن مبتسم يمد ايده لمرام تسلم عليه يبتسم اكتر
.....................
فى روسيا
لبني نايمه فى الاوضه الباب يتفتح و احمد يدخل و يروح جنبها و يعدى ايده بالراحه على رجلها و هو بيقرب منها تصحى تشوفه تتفزع
لبني / انت بتعمل ايه هنا انت دخلت ازاى
احمد / زياد ادانى الكارت
لبني / انت كداب
احمد / لا مش كداب لو مش مصدقانى كلميه بس ما تزعليش لو مردش او لو رد و سمعتى اصوات ما تعجبكيش
لبني / انت عملت فيه ايه
احمد / انا ؟؟ و انا مالى هو زياد مقالكيش هو كان فين و مع مين
احمد يقعد جنبها على السرير
لبني / اطلع بره
احمد / انتى زعلانه منى
لبني / انا بكرهك
احمد / بتكرهى اللى بيحبك و تحبي اللى بيكرهك و تتجوزى اللى بيخونك
لبني / زياد عمره ما بص لواحده غيرى
احمد يبتسم و يطلع موبايله فيديو زياد نايم فى حضن البنتين الروس و قالعين لبني تبص لاحمد
لبني / انت بتعمل معايا كدا ليه
احمد / انتى اللى طلبتي منى اعمل كدا
لبني / انت مجنون انا طلبت منك تخلى جوزى يخونى
احمد / ليه هو انا ربطه مهو بمزاجه و دا فيديو مش صوره اللعب فيها
لبني / انت مريض و مجرم
احمد / و انتى ملاك بريئ ضحيه الظروف انا كمان بحب اللعب اللعبه دى اوى
احمد يحاول يبوسها تزقه و تقوم من السرير
احمد / هههههههههههههههههه لا ما فيناش من جرى و تنطيت
لبني / اطلع بره
احمد يشاورلها جنبه على السرير
لبني / ارحمنى بقي يا اخى اخرج من حياتي
لبني تعيط احمد يقوم يحضنها
لبني / كفايا بقي يا احمد عشان خاطرى كفايا
احمد / بس يا قلبي خلاص خلاص انا مقدرش على كدا تعالى اقعدى تعالى
احمد يقعد لبني جنبه على السرير
لبني / انا تعبت تعبت من عيشتي و من حياتى تعبت من الدنيا كلها
احمد يبعد شعرها عن وشها و يرجعه ورا ضهرها و هى بتعيط
لبني / يوم ما كنت عند مازن ما فيش حاجه حصلت بينا
احمد / عارف
لبني تبصله
احمد / كنتى نازله معيطه لو كان فى حاجه حصلت ما كنتيش هتبقي بالحزن ده
لبني / بهدلنى و جرحنى و ذلنى و صورنى
احمد / عشان كدا كنتى يتنقليله اخبارنا
لبني / قالى هينزل الفيديو على النت
احمد / ما يعملهاش
لبني / عارفه بس ما كنتش بقدر ازعله تعرف ايه اصعب حاجه فكل ده
احمد / ايه
لبني / انى لسه بحبه عمل كل حاجه عشان اكرهه و بدل ما اكرهه كرهت نفسي و كرهتكوا و كرهت الدنيا كلها
احمد / هههههههههههههههههه
لبني / انت بتدحك
احمد / انتى عارفه انتى محتاجه ايه
لبني / ايه
احمد / محتاجه تاخدى شاور بارد يهدى اعصابك
لبني تبصله احمد يقوم و يقومها لحد ما توصل لباب الحمام يدخلها و يقفل الباب و يفضل واقف على الباب لحد ما يسمع صوت المايه يبتسم و يفتح الباب و يدخل يقفله وراه
......................
فى الشركه تانى يوم الصبح
مازن / والله انا لو عليا ما كنتش نزلت بس انا حبيت اديها الاسبايس بتاعها يعني بس اكيد مش ناوى اتاخر يعني
شريف / والله فرحتلك اوى و اهو مع الوقت هتلين و الوضع بينكوا هيتحسن كتير
مازن / ايوه على الاقل رجعت و شالت فكره الطلاق من دماغها الباقي امره محلول و الاهم انها شالت فكره انها مغصوبه عليا
شريف / اه و بعدين الوضع دا كلو هيتغير بعد الخلفه يعني ملك هتقربكوا من بعض
مازن / هى مرام بس كانت محتاجه تحس ان القرار في ايدها شوفت عشان تصدقني لما قولتلك حوار اذا اردت شيئا بشده فاطلق سراحه شوفت
شريف يبصله بطرف عينه
شريف / على يدى باماره ما كنت بتضرب نفسك بالجزمه انك سبتها تمشي و عامل زى اللى ميتلك ميت امبارح
مازن / لا انا بس ما كنتش عاوز اروح و هى مش البيت
شريف / اه صح هههههههههههههههههه
مازن / تصدق انا اللى استاهل ضرب الجزمه انى سايب مرام و جاي افرحك و انت جزمه كدا
مازن يقوم يسيب المكان و شريف بيدحك
...........................
فى فندق تانى فى روسيا
زياد يصحى يلاقى نفسه نايم جنب البنتين يتفزع ويقوم يجرى ياخد هدومه و يدخل الحمام بنت تصحى
البنت / دوبريوترا (صباح الخير )
زياد / ابو شكلكوا خربتوا بيتى
زياد يدخل الحمام و يقفل الباب و ثوانى و يطلع يجرى يخبط فى احمد
احمد / زياد ؟؟ انت بتعمل ايه هنا
زياد / مش عارف هو ايه اللى حصل امبارح انا صحيت لقيتنى
بنت تطلع من الاوضه لابسه روب قصير و ماسكه موبايل زياد
البنت / فاش مابيلنى ( موبايلك )
زياد ياخد الموبايل و البنت تدخل الاوضه زياد يبص لاحمد و هو هيموت من الرعب
احمد / اوووووبس
زياد / انا مش فاكر اى حاجه مش عارف حتى دا حصل ازاى انا كل اللى فاكره انى كنت معاكوا امبارح فى السهره و بنتكلم و فجاه صحيت لقيتنى عريان معاهم و مش فاكر اى حاجه مش فاكر اى حاجه
احمد / اهدى اهدى
زياد /اهدى ازاى اهدى ازاى لبنى لو عرفت
احمد / مش هتعرف حاجه انا هقولها انك جاملتهم فى كاسين و نمت عندى فى الاوضه
زياد / انت بجد ممكن تعمل كدا
احمد / احنا فى بينا بيزنيش بمليارات يا زياد تفتكر هضيع كل ده عشان حوار ما يخصنيش فى حاجه و بعدين مدام مش فاكر ما تتحسبش هتبوظ حياتك عشان حاجه انت مش فاكرها اساسا و لا فاكر استمتعت بيها و لا لا
زياد / انا مش مصدق نفسى انا عمرى ما كنت كدا هى اول مره اشرب يعنى امبارح و النهرده
احمد / يا ابنى الحاجه هنا غير مصر خالص و يمكن عشان يومين ورا بعض الموضوع قلب معاك و كدا انسى انسى اعتبر دا ما حصلش و تعال عندى الاوضه خد شاور و غير هدومك و اتصل اطمن على لبنى
زياد / مش عارف هقولها ايه انا هتجنن
احمد / يا راجل هههههههههههههههههه تعال تعال
احمد ياخد زياد تحت باطه و يمشوا ناحيه اوضه احمد
....................
فى شقه مرام
مرام قاعده بتتفرج على فيلم فى الليفنج و جنبها علبه فيشار بتاكل منها مازن يدخل
مازن / صح النوم
مرام / رجعت بدرى ايه ما فيش شغل و لا ايه
مازن / لا خلصت الحاجات المهمه و الباقى شريف و محمود هيخلصوه
مازن يروح يقعد جنب مرام و ياكل معاها من الفشار
مرام / المفروض ما تتقلش على شريف فى الشغل الراجل بيجهز ليه و لاخواته يعنى مش فاضى
مازن / عنده اللى يشيل عنه بس هو اللى بيحب يحلل القرش اوى تعرفى انا عاملهم برنامج الهانيمون بتاعهم هديه منى بس انما ايه خرافه ... بقولك ايه رايك نسافر معاهم
مرام / طب هما عرسان احنا ايه
مازن / ما احنا ما عملناش هانيمون يعنى
مرام / و بعدين انا حامل و مش هقدر اسافر
مازن بياكل من الفيشار
مرام / انت بتعمل ايه كدا هيسد نفسك انا كنت فكراك هتتاخر عشان كدا ما عملتش الاكل
مازن / احنا ما اتفقناش انك هتعمليلى الاكل بتاعى
مرام / اتفقنا اننا ناكل سوا ايه هتاكل اكل و انا هاكل اكل تانى يعنى
مازن / لا بس احنا اتفقنا انى مش جوزك و انك هنا عشان ملك ما تخيلتش انك هتتعبى نفسك و تعمليلى اكل يعنى
مرام / مش اللقمه اللى هتاكلها اللى هتتعبنى
مازن / طب خلاص خليها عليا النهرده و انتى خليكى بكره ايه رايك اهو انا يوم و انتى يوم ها تحبى اعملك الاكل بايدى و لا نطلب دليفرى و لا نطلع ناكل بره فى اى حته
مرام / لا مش قادره اخرج الكنبه دى مش مريحه ابدا انت نمت عليها ازاى
مازن / اعمل ايه حكم القوى ربنا يحنن قلبها عليا
مرام / بيت طويل عريض ما فيهوش غير سرير واحد
مازن يجرى يقعد جنبها
مازن / عارفه بفكر اجيب سرير اطفال و احطه فى الاوضه اللى جوه و اخليها اوضه ملك ايه رايك
مرام / ملك هتنام فى حضنى اكيد مش هنيمها فى اوضه لوحدها يعنى
مازن / اه بس دلوقت فى اجهزه بيبى مونيتورينج كتير ممكن تتحط فى الاوضه و اول ما ملك تصحى او تعيط انتى تروحيلها عباره عن كاميره صغيره بتتحط فى الاوضه و بتتوصل بجهاز بتشوفى ملك و هى نايمه او بتلعب طول الوقت من اى مكان فى الشقه و تخلصى اللى وراكى و لما تعيط تروحيلها على فكره انا عملت سيرش عن كل الحاجات اللى ملك ممكن تحتاجها و كتبت بيهم لسته عندى جوه استنى اجيبهالك
مازن يجي يدخل جوه مرام تمسك ايده يبصلها
مرام / ملك هتنام فى حضنى
مازن / تمام يبقى انا هنام معاكوا فى السرير جوه انا كمان عاوز ملك تنام فى حضنى
مرام تبصله و ترفع حاجبها مازن يتخابث عليها
مازن / ده حقى و بعدين ما تبصليش كدا ملك هتبقى فى النص يعنى اكيد مش هتقلب من فوقيها و اجيلك الا لو طلبتى
مرام / انت
مازن / ثوانى هجيب الليسته اللى كتبتها حالا
مازن يقوم بسرعه قبل ما مرام تلحق ترد
.....................................................
