(((((السكة شمال ٢))))))
#لولو_محمد
الحلقه ٣٩
مازن / مش هتعرفي انا قافل اللوك
مرام تبصله و تجز على سنانها
مرام / دا ايه الاستفزاز و البرود اللى فيك دا يا اخى انت عاوز تنقطنى انت حد مسلطك عليا انا عملت ايه فى دنيتى بس ياربى عشان تبلينى البلوه السوده ده
مازن / اخبار حراس القلعه بتاعتك ايه
مرام / ياريتنى كنت سبتهم يضربوك يمكن كانوا موتوك و خلصنا
مازن / مين دول اللى يضربونى انتى مكنتيش موجوده و لا ايه دا لولا انى مش عاوز ائذيهم كنت قمت بيهم
مرام / هو البيت بعد و لا انت عمال تلف بالعربيه و لا ايه
مازن يبصلها و يبتسم و يرجع يبص قدامه
مرام / انا بجد مش طيقاك ... و مش قادره اصدق اللى انت عملته
مرام تنفخ و تفرد نفسها في الكرسي و تسند ضهرها و مازن سايق فى صمت
.................................
فى شقه مرام
تهانى / لا بس مستحيل السكه تاخد الوقت دا كله
سميحه تبص لمديحه و ترجع تبص لتهانى
تهانى / مكنش المفروض اسيبها تمشي معاه بس هى
محمود / هو مش هيعملها حاجه يمكن يكونوا قعدوا في مكان يتكلموا او حاجه
تهانى / يمكن
سميحه / متاخذيناش يا بنتي جينا و جبنالك مشاكل انتى في غنى عنها
تهانى / بتقولي ايه بس يا امى دا مرام زى بنتي
سميحه / تسلمي يا حبيبتي كلمها تاني يابني و لا كلمه هو
محمود / بيكنسلوا والله يا تيته كلمتهم مليون مره
سميحه تبص لتهانى باحراج
مديحه / هعملك شاى
تهانى تبتسم لمديحه مديحه تدخل المطبخ
.............
على ناصيه الشارع
مازن يركن العربيه و يبص يلاقى عربيه مصطفي راكنه و مصطفي قاعد عالكابوت اول ما يشوف مازن يقوم يقف و جنبه عربيه تهانى مازن ينفخ و يبص لمرام
مازن / و دا ايه حكايته ده هنا كمان
مرام / لو سمحت كفايا مشاكل ليوم واحد تمام
مازن / ما انا لازم افهم الباشا ده بيعمل ايه هنا و عرف بيتك منين
مرام / وصل مدام تهانى بيتنا امبارح تمام و ممكن يكون جه معاها عربيتها هنا
مازن / جه معاها ليه يعني ماله و مالك هو انتى هتجننيني
مرام / والله معرفش و مش فارق معايا اعرف كل اللى فارق معايا دلوقت انى مش عاوزه مشاكل
مازن / تمام انزلى
مرام / مازن
مازن / هوصلك البيت
مرام / وصلتني و الموضوع انتهى امشي
مازن / انا امشي و هو يستني
مرام / يارب خدنى بقي اووووف
مرام تنزل من العربيه مازن ينزل هو كمان و يمشي وراها مصطفي ينفخ و يجي يروح ناحيه مرام مرام تشاورله يستني بالراحه و تهز راسها لا و تدخل الحاره و مازن وراها و عينه على مصطفي اهل الحاره على القهوه يشوفوا مازن يقوموا يسلموا عليه مرام تدخل البيت مصطفي يشوف الناس و هى بتسلم على مازن بحراره يبصلهم باستغراب مازن يستاذن من الناس و يدخل البيت و مصطفي واقف هيطق
.................
فى شقه سميحه
مديحه تحط صينيه الشاى عالترابيزه و تناول تهاني الكبايه باب الشقه يتفتح و مرام تدخل و وراها مازن تهانى تقوم تجري عليها
تهانى / انتى كويسه اتاخرتوا كدا ليه
مرام / مفيش حاجه انا كويسه
مرام تبص لمحمود من فوق لتحت
مرام / عن اذنكوا
مرام تدخل اوضتها سميحه تقوم تدخل وراها و تهاني تروح تقف قدام مازن و تتخانق معاه
تهانى / لو كنت اتاخرت خمس دقايق كمان كنت نزلت بلغت عنك البوليس
مازن / بتهمه ايه يعني ان شاء الله و بعدين لو فى حد له حق يبلغ البوليس يبقي انا شباب الجمعيه بتوعك اتهجموا عليا و لا حضرتك نسيتي
تهاني / انت بتهددنى لعلمك لو هقفل الجمعيه هقفلها و لا ان البنت اللى جوه دى تتاذي
مازن / البنت اللى جوه دى تبقي مراتي لو هموت و لا انها تتاذي هموت عادى و ياريت تحطى تحت مراتي دى مليون خط
مرام تفتح الباب و تطلع و سميحه تقف عالباب
مرام / مخلاص بقي يا مازن انت مش وصلتني و اطمنت عليا الحمد لله ياريت تمشي بقي و كفايا اوى اللى عملته لحد كدا و ياريت و انت ماشي تاخد ديلك معاك
مرام تشاور بصابعها على محمود
مديحه / فى ايه يا مرام ما تتكلمى عدل
مرام / والله يا عمتى انا بتكلم عدل الدور و الباقي على ابنك المره الكام اللى تبيعني فيها دى يا محمود هاه المره الكام
محمود / انا مش فاهم انتى بتكلمى عن ايه
مرام تبص لتهاني
مرام / انا متشكره اوى و اسفه اوى
تهانى / مرام لو عاوزه محامى الجمعيه
مرام / انا مش عاوزه محامين
تهانى / متخافيش منه احنا معاكى
مازن / تخاف منى ليه اصلا
تهانى تبصله
مرام / انا متشكره اوى بس انا مش محتاجه حاجه
جرس الباب يضرب محمود اقرب واحد للباب يفتح يلاقي مصطفي
مازن / دانت بجح اوى انت جاى لحد هنا كمان
مازن يجي يمسك في مصطفي مرام تقع في الارض سميحه تصرخ مازن يسيب مصطفي و يجري عليها و ياخدها في حضنه و يحاول يفوقها و محمود يجرى عالمطبخ يجيب كبايه مايه و مصطفي واقف مصدوم
.................
فى الفندق
احمد / هههههههههههههههههه يعني خطتك فكست
زياد / مش ناقصك بنت المحظوظه فلتت منها اديني اخر التطورات اما نشوف هنعمل ايه
احمد / مرام طلعت من المحل امبارح خدت التاكس اللى بيوصلها و راحت الجمعيه قعدت شويه و طلعت هى و ست كدا وصلتها نفس الست دى شاب وصلها لمرام تاني بالليل قعدت شويه و بعدين مشيت الشاب ده بقي شافوا مرام خارجه من الجامعه راكبه عربيته و مازن بيجري وراهم و يزنق عليهم و يتخانق معاه و بعدين راحوا الجمعيه كملوا خناق هناك على كبير و بعدين مازن اخد مرام و هما دلوقت في بيتها
زياد يبص لاحمد باستغراب
احمد / مين الست دى و مين الشاب ده و ايه علاقه مرام بيهم بيتهيالي محتاجين نعرف اجابه الاسئله دى قبل ما نفكر في اي خطه جديده
زياد / والله مش عارف افكر اصلا في اي حاجه غير رد فعل مازن على اللى انس عمله النهرده
احمد / هيعمل ايه يعني كبر مخك
زياد / و انت هتفضل قاعد في الفندق هنا كدا
احمد / امال اخد فيلا تانيه يولعلى فيها خليني كدا في الامان تشرب حاجه ؟؟
...............
فى اوضه مرام
مرام نايمه فى السرير و سميحه و تهاني و مديحه حواليها و بره مازن و مصطفى قاعدين باصيين لبعض بغل و محمود قاعد في النص عمال يبص للاتنين
مازن / انت شكلك شاب محترم بس اللى انت عملته النهرده ....
مصطفي / اللى انا عملته النهرده و لا حاجه جنب اللى هعمله لو حاولت تدايقها تانى
مازن يقوم و مصطفي يقوم و محمود فى النص بيحوش
مازن / ادايق مين يا بتاع انت انت مالك بيها اصلا
مديحه تفتح الباب الكل يبص عليها
مازن / هى عامله ايه
مديحه / كويسه
مديحه تبص في الارض و تبص لمحمود تهانى تطلع من الاوضه
تهانى / اتصل بعمك يا مصطفي خليه يجى
مديحه / استني بس يا استاذه انا متاكده ان فى سوء تفاهم في الموضوع
مصطفى يروح فى جنب و يتكلم فى التليفون تهانى تشاور لمازن و محمود
تهانى / انا هوديكوا انتوا الاتنين فى ستين داهيه
محمود / انا عملت ايه
مازن / انا كنت بدافع عنها
محمود / من ايه
مازن / انس اتهجم عليها
تهانى / و الباشا عامل نفسه من بنها قال يعنى مش هو اللى بعتلها الرساله
محمود / رساله ايه
تهانى / استهبل استهبل
مديحه / اهدى بس يا استاذه انا قولتلك مستحيل محمود يعمل كدا ابدا
مازن / لا ثوانى يا عمتوا رساله ايه
مرام تطلع من الاوضه و معاها الموبايل
مرام / دى يا سى محمود قول بقى ان مش انت اللى باعتها
محمود يروح ياخد منها الموبايل و يبص فيه ومازن ياخد منه الموبايل يبص فيه محمود يطلع موبايله و يبص فيه الرساله ممسوحه
محمود / لا مش انا اللى باعتها و ابعتها ليه اصلا
مرام / عشان اروحلك ورا المبنى بما انك الوحيد اللى بثق فيه و هناك بقى سى انس يتهجم عليا
مصطفى / عشان كدا كنتى طالعه من هناك بتعيطى
مرام تبص لمصطفى
مصطفى / طب مقولتليش ليه
مازن / صحيح مقولتيش لمستر هركليز بتاعك ليه يا مرام هاه
مصطفى و مرام يبصوا لمازن يروح يقعد على الكنبه و هو بينفخ
محمود / دى اكيد اريج هى الوحيده اللى استخدمت موبايلى حتى اسالى سعد خدته على انها هتكلم احمد عبد التواب و جابته على انه فصل و لما فتحته اه يا بنت الكلب يا جزمه
مرام / و انا طبعا مصدقاك
محمود / متستهبليش يا مرام والله هو ده اللى حصل
مصطفى / على العموم عمى جاى فى الطريق
مديحه / مفيش داعى نكبر الموضوع
تهانى / هو ايه اللى ما فيش داعى هو بنات الناس لعبه
مديحه / يا ست انتى اهدى مش كدا انتى جايه تولعيها دول اخوات متربيين سوا متعودين يقسموا اللقمه مستحيل ياذيها مستحيل
محمود / مرام انا عمرى ما اعمل فيكى حاجه زى دى
مرام / مش اول مره تبيعنى
مازن / انتى لو معمولك غسيل دماغ مش هتعملى كدا
تهانى / اصلا هانت دلوقت ننزل نعملكوا محضر و اقل حاجه هتتفصلوا من الكليه و تتحبسوا
مازن / صح طبعا بس ياترى بتهمه ايه؟؟ انى دافعت عنها فعلا تهمه خطيره جدا
مديحه / انتى ساكته ليه يا حجه ما تقولى حاجه
سميحه تبص لمحمود محمود يهز راسه لا تبص لمازن مش باصصلها و تبص لمرام واقفه مش بصالها
سميحه / هقول ايه
مديحه / قولى ان محمود عمره ما يعمل كدا قولى محمود بيعمل ايه عشان خاطر مرام قولى بيخاف عليها قد ايه داحنا سبنا بيتنا و روحنا معاكوا فى الشارع اتبهدلنا و اتهنا عشان منتخلاش عنكوا طول عمرنا عالحلوه و المره سوا محمود ما يعملش فى اخته كدا ابدا
تهانى / مين كان عارف ان مرام بتتعامل مع محل الحلويات اللى اسمه بيبيتو
مازن / و دا كان سر دولى يعنى
مازن يدحك بسخريه
تهانى / يعنى بتعترف
مازن / بايه انى كنت عارف اه كنت عارف هنكر ليه يعنى
مرام / يعنى فعلا انت اللى خليت الراجل يعمل معايا كدا
مازن / لو قولت مش انا هتصدقى يعنى
مازن و مرام يبصوا لبعض بعتاب
مازن / هعمل معاكى كدا ليه
مرام / معرفش يمكن فاكر انى كنت هتحوجلك مثلا
مازن / واحده بتاخد فى الشهر عشرين الف جنيه نفقه هتتحوج بحركه هبله زى دى
مرام تبصله و تبص لمديحه و تبص لمحمود باستغراب
مديحه / انا نسيت اقول لمحمود اتلخمت و حاجات كتير حصلت ورا بعض
مرام / يعنى ايه
مديحه / الفلوس جوه فى درج البوفيه نسيت اديها لمحمود يرجعها مفتكرتش الا دلوقت لما جت سيرتهم والله
مرام تروح تقعد على اقرب كرسى تبص تلاقى نفسها جنب مازن و باصصلها تبصله
مرام / امال مين
مازن / شوفى انتى بقى
مرام تبصله بحزن و تبص فى الارض مازن يحط ايده على كتفها تبصله و مصطفى يبصله و يبص لايده
مازن / بالعقل كدا انا مازن اللى انتى اكتر واحده عارفاه و عارفه يقدر يعمل ايه لو عاوز ائذيكى هعمل الحركات الهبله دى تفتكرى انى عاجز اوى كدا و مقداميش غير انى اضربك فى اوردر و لا اسلط عليكى عيل هفا زى انس لا و كمان اروح اضربه ... اه سورى نسيت عشان ابان قدامك بطل فتترمى فى حضنى بطلى و منقذى هههههههههههههههههههههههههه
مازن يفرد ضهره على الكرسى و هو بيبص لمرام و يدحك سميحه تروح تقعد و الصمت سيد الموقف و الكل بيبص لبعضه
مازن / اتصل بعمك شوفه اتاخر ليه ليكون مش عارف يوصل ابعتله حد يجيبه الا عمك ده بيشتغل ايه صحيح
مصطفى / محامى
مازن يهز راسه و يرفع حواجبه و بعدين يبتسم
مازن / و انت
مصطفى / بشتغل مع والدى فى معرض اجهزه كهربائيه
مازن / تشرفنا
مصطفى يبتسم من تحت الدرس
مديحه / ايه البرود اللى انتوا فيه كلكوا ده انتوا بجد هتقعدوا هادين كدا و فى الاخر تشيلوا محمود الليله دى اخرتها يا مرام دى اخره تربيتى فيكى
مرام تبصلها و تبص لتهانى و بعدين تبص لمصطفى
مرام / لو سمحت يا مستر مصطفى اتصل بعم حضرتك و اعتزرله انا مش محتاجه محاميين
محمود / يعنى مصدقه ان مش انا اللى عملتها
مرام تقوم
مرام / معدتش تفرق عن اذنكوا
مرام تدخل اوضتها و تقفل الباب الكل يبص لسميحه باصه فى الارض
تهانى / اسمعى يا حجه انا رقمى مع مرام لو احتاجتوا اى حاجه فى اى وقت
سميحه / كتر خيرك يا بنتى بس احنا الحمد لله مش محتاجين كتر خيرك
تهانى / يبقى خليها تكلمنى تسال عليا يمكن اكون انا محتاجه لحاجه
سميحه تهز راسها اه تهانى تبتسم و تشاور لمصطفى يمشوا و مصطفى واقف عينه على مازن و مازن عينه عليه
تهانى / يلا يا مصطفى
مصطفى واقف مازن يتعدل فى قعدته و يحط رجل على رجل
تهانى / مصطفى
مصطفى ينفخ و يمشى مع تهانى مديحه تروح تقفل الباب
مديحه / وليه بوتجاز جنازه و تشبع فيها لطم مسكت ودن البت و هاتك يا تسخين لما ولعت فيها
الكل يبص على سميحه باصه فى الارض و ساكته
مازن / اللى حصل فى الكليه
سميحه / روحى يا مديحه هاتى الفلوس لمازن
مازن / ده حقها
سميحه / لما نحتاج منك حاجه هنقولك
مديحه / ثوانى
مديحه تفتح الباب و تروح شقتها مازن يبص لسميحه و يمشى محمود يروح يقعد تحت رجلين سميحه
محمود / والله يا تيته ما عملتها والله يا تيته و لا عمرى هعمل حاجه زى دى انتى عارفه مرام بالنسبالى ايه انا عمرى ما اعمل كدا ابدا يا تيته والله عمرى
سميحه تطبطب على ضهر محمود و تقوم تدخل الاوضه و تقفل الباب مديحه تدخل معاها الظرف متلاقيش الا محمود
مديحه / امال راحوا فين
محمود يمشى و يروح شقته و مديحه محتاسه بالظرف مش عارفه تعمل فيه ايه تحطه عالترابيزه و تقفل باب الشقه و تمشى
......................................
فى شقه على
نورا بتكلم على فيديو كول
على / قابلتيه يعنى
نورا / اه قابلته كانه واحد تانى
على / طب و انتى مكنتيش واحده تانيه
نورا / كنت ... هتنزل امتى
على / والله فى الهم ده كل يوم لما فاضلى شويه و ابوس رجل الراجل
نورا / انا عاوزه اجيلك
على / بتهزرى
نورا / لا مبهزرش انا ايه يجبرنى انى اكمل فى مصر لما ممكن اكمل فى امريكا يعنى و اقدم عندك و اخد شهاده برده
على / طب و الترم اللى فات
نورا / مش مهم استفدت برده قربت من اهلك و حبيتهم و حبونى و اتعلمت شغل البيت و الطبيخ
على / والله هى فكره مغريه جدا
نورا / شوفت
على / طب سبينى افكر و اظبط امورى
نورا / على
على / عيون على
نورا / انت بجد بتحبنى
على / يعنى اعمل ايه اكتر من كدا عشان تصدقى انى بحبك يعنى لا حقيقى اعملك ايه
نورا تبتسم
نورا / مش هتخس يعنى لو قولت بحبك اوى يعنى
على / بحبك اوى يعنى
نورا / ايه الرخامه دى منغير يعنى بحبك اوى و بس
على / بحبك اوى و بس
نورا / اقفل يا على اقفل
على / هههههههههههههههههه بحبك اوى يا نونو
نورا تبتسم
..............................
فى الشركه
مازن بيتكلم فى التليفون
مازن / تمام ... ظبطنى انت بس و حلاوتك عندى ... لا يا عم هو انا بتاع الحاجات دى برضه ... ههههههههههههههه حبيب قالبى تسلم .... سلام
مازن يقفل السكه و يحط الموبايل عالترابيزه و يروح يقعد جنب شريف اللى بيبص فى ملف
شريف / والله شويه عليها
مازن / تفتكر كانت عارفه نيه انس
شريف / المهم اننا كالعاده هنسيب الحمار و نتشطر عالبردعه
مازن / الحمار لسه كاعع عشره مليون جنيه فى الارض هو قايم بالواجب و بيضرب نفسه بالجزمه دلوقت
شريف / برده
مازن / المهم قولى وصلت لايه
شريف / مصطفى ؟؟ واد ابن ناس مفيهوش غلطه انا شخصيا لو جه اتقدم لاختى والله معزها عليه
مازن / طب و دا هعمل معاه ايه يا شريف
شريف / هتعمل ايه يعنى و لا حاجه
مازن يبص لشريف و ينفخ و يبص للموبايل و ياخده و يروح يقف فى جنب و هو ماسك الموبايل بايد و بيبصله و بيقرقض ضوافر الايد التانيه و بعدين يكتب رساله و يبعتها
شريف / بتعمل ايه
مازن / مش عارف انا بعمل ايه انا لو اعرف مكنش دا بقى حالى ادينى بخبط
مازن يحدف الموبايل على المكتب توصله رساله يجرى يجيب الموبايل مازن يفتح الموبايل و يبتسم
..........................
فى شقه مرام
مرام قاعده عالكنبه في الصاله وواخده رجليها في حضنها و حاطه الموبايل قدامها و عينها عليه الموبايل ينور و يتهز منغير صوت وهى بصاله تمسكه و تفضل بصاله و بعدين ترد
مازن / قولت كدا احسن من الواتس
مرام / انا شايفه كدا برده
مازن / طبعا لو كان وش لوش كان اكيد هيبقي احسن
مرام / يفى بالغرض كنت باعت بتقول مينفعش نتعامل بشكل حضارى مش فاهمه
مازن / تمام كنت بقولك يعني انك حتى لو زعلانه منى حقك اللى حصلك مكنش شويه بس كمان احنا عشنا مع بعض حاجات كتير حلوه مستحيل تتنسي
مرام / انت عاوز ايه
مازن / انتى عارفه انا عاوز ايه
مرام / عفوا لقد نفذ رصيدكم احنا اتفقنا دى كانت اخر فرصه ليك
مازن/ والله يا مرام مكنت اعرف انهم جايين انا حتى كلمت محمود يومها
مرام / خلاص يا مازن موضوع و انتهى بقى مش وقته متندمنيش انى رديت عليك
مازن / كدا كدا هتندمى بس عالايام اللى بتعدى و انتى بعيد هتندمى
مرام / ياريت ده يحصل.... تعرف اكيد ده هيكون اهون مليون مره من الندم اللى انا بعيشه دلوقت .... ندم انى عرفتك
مازن / انا مستاهلش منك كدا
مرام / ولا انا كنت استاهل منك كدا
مازن / و ان ما كنتش قادر ابعد اعمل ايه
مرام / و ان ما كنتش انا قادره اقرب
صمت
مرام / بما انك ساكت فبيتهيالى كدا المكالمه خلصت مش كدا
صمت
مرام / سلام
مرام تقفل و تحط الموبايل و تقعد تعيط
................
فى الشركه
مازن حاطت التليفون على ودانه و الدموع بتنزل من عنيه شريف يبص فى الارض و يتنهد و يقوم ياخد الموبايل
شريف / كان ممكن متردش او تعملك بلوك
مازن / اسكت يا شريف
شريف يبص فى الارض و يسكت و مازن يمسح دموعه و يمشي يطلع بره الشركه و يركب عربيته و يسوقها و يمشى و الدموع بتنزل من عنيه اشاره حمره يوقف و يفضل باصص قدامه و بعدين يبص جنبه يلاقي تلت اطفال نايمين على الرصيف و مستغطين ببطانيه الاشاره تخضر و عربيه وراه تزمر يبص قدامه و يتحرك بالعربيه و يركن فى اقرب مكان و ينزل و يرجع للتلت اطفال و يصحيهم
مازن / انتوا ايه اللى منيمكوا هنا فين اهاليكوا
الطفل 1/ ملناش اهل
مازن / طب عارفين عنوانكوا فين
التلاته يبصوا لبعض
الطفل 1/ احنا كنا فى ملجا و كانوا بيضربونا جامد فهربنا
مازن / طب تعالوا معايا
الطفل 1/ على فين
مازن / هشوفلكوا مكان احسن تناموا فيه تعالوا متخافوش
الاطفال يقوموا و يلموا حاجتهم و يروحوا ورا مازن يفتحلهم العربيه يركبوا و يسوق بيهم
.............................
فى الكليه تانى يوم
مرام تدخل المدرج مليان طلبه و فى مكانين فاضيين تروح و تقعد و تطلع الكشكول و تحطه قدامها و تفتحه و تبص فيه زياد يدخل و يشوفها يبص يمين و شمال و يروحلها
زياد / المكان ده فاضى
مرام تبصله
مرام / لا محجوز
زياد / محجوز لمين
مازن / ليا
زياد يبص وراه يلاقى مازن يبتسمله و يرجع يدور على مكان تانى ورا و مرام بتنفخ و تبص فى الكشكول تانى تبص جنبها تلاقى مازن لسه واقف
مرام / ايه ؟؟
مازن / هو انا ينفع اقعد
مرام تبص فى الكشكول و متردش مازن يحط حاجته جنبها و يطلع بره و مرام عينها وراه من تحت لتحت مازن يوصل لباب المدرج يبص عليها تبص فى الكشكول بسرعه
...............................
فى مكتب شؤؤن الطلبه
مصطفى قاعد بيدحك مع موظف
الراجل / هههههههههههههه والله يا مصطفى لولا انك حبيبى
مصطفى / انا عمرى ما هنسالك الجميل ده ابدا انا بس هسال عنها مش اكتر يعنى هبص عليها من بعيد يعنى حضرك عارف يعنى
الراجل / مانت بس لو تجبلى اسمها
مصطفى / كل اللى اعرفه ان اسمها مريم و انها فى رابعه شعبه اداره اعمال
الراجل / متعرفش مريم ايه
مصطفى / لا معرفش بس لما هشوفها هعرف يعنى
الراجل / بص على العموم كل اللى اسمهم مريم فى سكشن واحد مع بعض انا هجيبلك جدولهم
مصطفى / الله يباركلك يارب انا هتعامل بقى
الراجل / تمام استنى ثوانى
مصطفى / بقولك ايه يا عم عباده الموضوع ده سر بنا لا تسيحلى و لا تسيح للبت
الراجل / عيب عليك هو انا تلميذ بس اوعى تنسى تعزمنى عالفرح
مصطفى / لا عيب عليك بس شوفلى انت الحوار ده بسرعه
الراجل / طب استنانى هنا ثوانى
الراجل يطلع بره و مصطفى قاعد مش على بعضه و بيفرك لحد ما الراجل يدخل تانى و معاه ورقه
الراجل / جدولها اهو هتلاقيها دلوقت لو جت النهرده يعنى فى مدرج اتنين و هتطلع منه كمان نص ساعه كدا تروح قاعه سته عندها سيكشن
مصطفى / تسلم يا عم عباده يا سكر زياده
الراجل / متنساش تطمنى
مصطفى / ان شاء الله استاذنك انا بقى عشان اللحق
الراجل / اتفضل
مصطفى ياخد الورقه و يطلع من المكتب و يروح ناحيه مدرج اتنين
...........................................
