((((((السكة شمال 2)))))))
#لولو_محمد
الحلقه 160
.فريده / ايه كنت محتاج اذن الهانم عشان تنقذ حياه امك
زياد / ايه الحساسيه الاوفر دى امتى عملت كدا انا
فريده / يعنى ما عملتش
زياد / لا طبعا ما حصلش
فريده / يعنى انت مش كنت رافض تدفع و بتقول يبتزك و لما لبنى قالتلك دا تمن كوليه يا زياد وافقت
زياد / لا يا ماما لما حضرتك وقعتى انا قلقت عليكي مش عشان كلام لبنى و بعدين قولنا مليون مره بلاش كدا بجد بدايق
فريده / بتدايق !! انت اللى تدايق و يا ترى من ايه ان شاء الله
زياد / من ان حضرتك كل حاجه تقولى لبنى لبنى على فكره لبنى هى اللى لقت لحضرتك المتبرع المفروض تشكريها مش تعملى الحاجات دى
فريده / لا ازاى اشكرها و اشكرك انت كمان يا زياد شكرا يا حبيبى
زياد / العفو عن اذنك هدخل الحمام
زياد يسيبها و يدخل الحمام فريده تبص للسقف
فريده / انا عملت ايه بس يا ربى لكل ده
...................
في شقه شريف
شريف قاعد علي السفره قدامه ورق كتير و اله حاسبه عمال يشتغل صافي تدخل و تقعد جنبه و تديله كبايه قهوه
شريف / جت في وقتها
صافي / طولت اوي النهرده
شريف / معلش يا قلبي بقفل الحسابات
صافي / و ايه الاخبار
شريف / العجز وصل خمسه و تلاتين الف
صافي / ازاي انت مش بتقول
شريف / عندي انا يا صافي مش عندك انا اللي عندي العجز ده
صافي / مش فاهمه يعني ايه عندك انت
شريف / انا ساحب خمسه و تلاتين الف من الشغل
صافي / يا راجل خضيتني افتكرت حد بيسرقنا و لا حد ما دفعش
شريف يهز راسه و هو باين عليه الضيق و يشرب من القهوه
صافي / هو العجز ده ماثر علي الشغل
شريف / لسه ماثرش بس لو زاد اكيد هياثر يعني
صافي / طب تمام نحاول نلم ايدينا في المصاريف شويه
شريف يهز راسه و يقفل الشغل و يشيله يحطه في درج البوفيه و يدخل اوضته و صافي تدخل وراه شريف يفتح الدولاب و يطلع هدوم
صافي / هو انت صرفتهم في ايه يعني مش علينا خلاص كبر مخك
شريف يبتسملها و يمسك ايدها و يبوسها
صافي / انا عارفه ان مصاريفنا كتير بس الحمد لله احنا احسن من غيرنا بكتير
شريف / الفلوس دي انا ساحبها في الحضانه لرؤي مش صارفها علي البيت يا صافي
صافي / طب ما بكره الحضانه تتفتح و تتملي عيال و كلو يبقي تمام مزعل نفسك ليه بقي
شريف / تعالى يا صافى اقعدى
شريف ياخد صافى و يقعدوا على السرير
شريف / انتى عارفه انى مرتبى قل الربع و المصاريف هى هى ان ما كانتش زادت انتى واخده بالك من ده
صافى / انت للى عامل تكليف و بتقعد تفصل نسبتك عن نسبتى عن فلوس الاداره و بتقعد تحنتف فى كل التفاصيل دى
شريف / يعنى بعد كل ده ابقى الراجل اللى عايش هو و اهله على قفا مراته صح
صافى / صيغه سخيفه ايه يعنى لو الراجل مر بضيقه يعنى مراته ما تساعدوش و بعدين مين اللى مشغل كل ده مهو انت و بعدين اهلك هما اهلى ماما بطه دى اللى شيلانى و بتعمل عشانى اكتر من اللى امى نفسها بتعمله و اخواتك اللى كانهم اخواتى دلوقت عاوز تفصل
شريف / الجق ما بيزعلش
صافى / تمام انا هديك قرض و لما ربنا يسهلها و تخلص حوار رؤى و تبدا الحضانه تشتغل ابقى سددهولى براحتك هجدولهولك على خمسين سنه بدون فوايد ايه رايك
شريف يبتسم و يبص الناحيه التانيه
صافى / تفتكر هعيش كمان خمسين سنه يا شريف
شريف يضربها على قفاها
صافى / ااااه والله لقول لماما بطه ضربتنى و انا حامل
شريف / انا خارج رايح لمازن مش هتاخر هتعوزى حاجه و انا جاى
صافى / عاوزه ايسكريم شيكولاته
شريف / من عنيا يا حوبى
شريف يبوس راسها و يقوم يكمل لبس و يمشى
......................
فى شقه مديحه
مروه / و ليه مش كل اسبوع ايفنت مثلا
مرام / كل اسبوع !!!
مروه / اه كل اسبوع ان ما كانش كل يوم بصى انا عندى فكره احنا هنعمل ايفنت شهر
مرام / شهر بحاله ليه هو انا لاقيه صحتى
مروه / يا بنتى اسمعى الايفنت عباره عن ايام الحد مثلا خصم عشرين فى الميه الخميس بنات بس الجمعه مسابقه الطبخ كدا يعنى بحيث كل يوم حاجه جديده نقدمها تلاتين يوم بتلاتين فكره اكيد هنرضى جميع الاذواق
مرام / مين هيقدر يقف تلاتين يوم يا مروه لا انا و لا انتى هنقدر
مروه / يا بنتى
مرام / ميزه الايفنت انه حاجه مش بتتكرر كتير فرصه انك تدوق اكلى لما المطعم يتفتح مش هيبقى فى ايفنتات اصلا
مروه / غلط بالعكس الايفنت هيتعمل فى المطعم بتاعك يعنى فى المطعم الناس بتطلب من المنيو هيبقى فى ايفنت بالحجز اوبن بوفيه و كل يوم منيو جديد
مرام / كملى
مروه / يوم المحاشى يوم النواشف يوم المعجنات يوم الاسماك يوم هيلثى فود او الاكلات الدايت يوم الاسماك المملحه رنجه و فسيخ و كدا يوم مخبوزات فطير و جبنه و عسل و فطاير محشيه و حاجات من دى
مرام / شبه المعجنات بس ماشى
مروه / لا التانى بيتزات دا فطاير دا زوق و دا زوق
مرام / مش موضوعنا عجبتنى الفكره
مروه / و ممكن من الساعه كذا للساعه كذا ببلاش من الساعه كذا للساعه كذا بنات بس
مرام / على فكره انتى دماغك حلوه اوى
مروه / شوفتى بقى و تقولى نلغى الايفنتات انتى عاوزه تخربى بيتنا
مرام / انا هتكلم فى الموضوع ده مع مازن و متاكده انه هيعجبه افكارك اوى يا مروه شكلك مشروع مديره اعمال ناجحه كنتى فين يا بنتى
مروه / هو انا حد كان بيدينى فرصه
مرام / ههههههههههههههههههههه
....................................
في الاستوديو
مازن / انت ايه مشكلتك طيب
شريف / هى الحضانه دى بفتحها لامى يعنى
مازن / لا يا سيدى بتفتحهالها زى ما فتحت لشيماء صيدليه و زى ما شغلنا جوز نهله و زى ما تقى بقت معاكوا فى الورشه و الفاشون فيها ايه يعنى لما يبقالها مصدر دخل
شريف / مين هيمسكها يا ابنى
مازن / يعنى البت مش هتتجوز و لا انت فاكر ان سعد مش هيكمل هناك على فكره هو مبسوط هناك و رؤى كمان هتنبسط هى هتحب هى اللى تروحله كل ويك اند مش هو اللى يجي هتبقى فسحه بجد و هتفصل بيها عن المزاكره و كدا
شريف / اللى على البر عوام
مازن / اتفضل يا سيدي
مازن يدي لشريف ظرف مليان فلوس
شريف / ايه ده
مازن / مرتبك ... بتاع الفتره اللي فاتت كلها و شكرا انك صبرت عليا
شريف / انت بتهزر صح
مازن / يا ابنى انت الفتره اللى فاتت عملت عشانى اللى ما فيش مخلوق عمله كفايا وقفتك جنبى فى موت بابا الله يرحمه
شريف / بس انا ما عدتش شغال عندك و ان كنت عملت كدا عملته عشان انا صاحبك
مازن / حتى الصحاب ما بيعملوش كدا عشان بعض بص يا ابنى انا بصراحه ما اقدرش اعيش من غيرك مدير اعمالى و بعدين اذا كانت مروه بتاخد الفين جنيه فى الشهر كمديره اعمال مرام يبقى مراتى ليها مديره اعمال و انا ماليش
شريف / ههههههههههههههههههههههههه
مازن / دا مرتبك كامل طول الفتره اللى فاتت هو المفروض كان بيبقى فى حوافز و حاجات من دى بس انا ما عرفتش احسبها فصرفتلك شهر زياده
شريف / انا مش هاخد الفلوس دى
مازن / مين كان بيتابع شغلى و انا مسافر و مين كان بينظم الايفنت الاول لمرام ووقف مع الاسبونسرز و اتفق مين اللى سافر دبى من غير ما يكون الموضوع يخصه
شريف / انت تخصنى يا حيوان
مازن / ماشى يا عم بس الحق حق انت ما بترضاش تاخد حاجه مش من حقك ليه بقى عاوزنى اخد حاجه مش من حقى بص يا شريف انت وقفت جنبى و انا فى زنقتى مع انها كانت زنقه مايعه على راى مرام واحد معاه خمسه مليون و مجوهرات ما يعرفش حتى بكام و فى زنقه امال لو مفلس هتبقى فى ايه يا عم اقسم بالله واد فرفور اوى انا
شريف يبصله و يبتسم
مازن / خد الفلوس ياله ما تخلينيش اتغابى عليك و اعزمنا على الغدى عاوزين نجيب العريس و نيجي نحدد معاد الفرح
شريف / تنوروا بس انا مش بشتغل عندك
مازن / مستقيل يعنى
شريف / انت دلوقت بتدفع قسط شقه و كمان بتجهز مطعم مرام انت محتاج لكل قرش
مازن / و الحمد لله بكسب كويس برده يا ابنى اقسم بالله انا الفتره اللى فاتت كنت محرج منك جدا و مش عارف اطلب منك حاجه خد حقك عشان انا كمان هبقى محتاج استغلك جامد اوى الفتره الجايه
شريف / يا سيدى استغلنى زى ما انت عاوز و اطلب اللى انت عاوزه
مازن / هو عشان صاحبى اكلك يعنى ما خلاص بقى يا شريف بطل رزاله
شريف / يا ابنى انا
مازن / تصدق انا الغلطان انى بتكلم معاك انا ارزعك كف مخبرين هتاخد الفلوس و انت ساكت
شريف / ما تحاولش مش هتقدر
مازن / عشان بحبك بس خد بقى الفلوس
شريف / انت كلمت صافى
مازن / لا ليه
شريف / ما فيش
مازن / لا بجد فى ايه
شريف / ما فيش والله افتكرتها اتصلت بيك كان فى حوار كدا بس اهبل يعنى
مازن / تحب تحكى
شريف / مش مستاهل المهم هتيجوا عندنا بكره
مازن / اه عندكوا غدى و لا نجيب غدانا معانا
شريف / اه لو امى سمعتك
مازن / هههههههههههههههههههههههه دى حبيبتى مامتك دى ربنا يخليهالك و يشفيها يارب فرحها يا عم و خليها تفرح ببنتها عقبال تقى يا رب
شريف / بيتسرسبوا منى واحده ورا التانيه
مازن / عقبال ملك ياااااه يا جدع دا الواحد عمال يحلم و يتخيل ربنا ينولهانى يارب
شريف / امين
...................................
فى المستشفى
مونى / انت بتهزر يا زياد صح
زياد / الشغل واقف من يوم وفاه بابا و الاسهم فى النازل لازم حد يتابع ده كلو
مونى / و ماما
زياد / ماما الحمد لله عملت العمليه و بقت كويسه هتقعد فتره بس هنا
مونى / هنا فين فى المستشفى
زياد / مهى لازم تفضل تتابع مع الدكتور لحد ما الجرح يلم و نطمن ان المرض خرج منها خالص
مونى / ايوه بس الموضوع ده ممكن ياخد شهور
زياد / مهى اكيد مش هتستحمل سفر رايح جاى يعنى هى هتسافر السخنه دى هتسافر لندن
مونى / انا ما عنديش مشكله تفضل معايا بس
زياد / بصى انا ممكن اجيبلها فيلا جنبك و اجبلها ممرضه مقيمه و هاوس كيبينج و سيكيوريتي من اعلى المستويات و انتى ابقى بصى عليها كل شويه
مونى / لا انا ما كانش ده قصدى انا ماما على راسى و انت عارف و اخدمها بعنيا انا بس عليك انت هى محتجانا حواليها احساسها ايه لما تفوق من البينج ما تلقيكش انت و لبنى
زياد / لا ما انا مش همشى بسرعه اوى كدا انا هطمن عليها الاول و اتاكد ان الحمد لله مش ناقصها حاجه و بعدين اسافر هى بس لبنى هتسافر الاول
مونى/ انتوا مش هتشوفوا الدكتور هنا زى ما قولتوا
زياد / الكلمتين اللى ما كانلهمش اى لزمه اللى ماما قالتهم للبنى قفلوها هى اصلا بتقولى انا بقالى شهور بين المستشفيات من ساعه ما سقطت و بعدين عيا بابا الله يرحمه و دلوقت عيا ماما بتقول اعصابها تعبت اوى و كمان فعلا الاسبا لوحده و اديكي شايفه ماما كل ما تشوفها تديها كلمتين خلاص افصل القوات و بعدين هى ماما هتحتاج لبنى فى ايه يعنى و لا انتى ايه رايك
مونى / اللى تشوفه
زياد / والله انا شخصيا بقالى كتير اوى لا بنام و لا برتاح يلا كلو بثوابه بقى
مونى تبصله و تبص فى الارض
............................
فى شقه شريف
شريف يدى لصافى ظرف تفتحه و تبص فيه
صافى / انت بتهزر يا شريف طب والله زعلت منك
شريف / والله ما كنت عاوز اخدهم منه هو اللى صمم و قعد يرغى و بتاع و حاولت حتى و انا ماشى ما اخدهمش و استهبل قفشنى من قفايا و حلف
صافى / يا شريف انا و انت كيان واحد بينا مشكله هنحلها ايه دخل مازن بيها يعنى عشان تسد مراتك تستلف من صاحبك هو اقربلك منى يعنى
شريف / انتى بتقولى ايه يا بنتى لا طبعا ما حصلش الكلام ده نهائي
صافى / امال يعنى هو من نفسه اداك الفلوس دى
شريف / والله العظيم ده اللى حصل بس انا عارف هو ادهانى ليه
صافى / ليه
شريف / عشان رؤى و جوازها هو عارف انى باجل مع سعد عشان الفلوس
صافى / طب هو قالك ايه يعنى مش فاهمه قالك خد دول جوز رؤى و لا ايه
شريف / لا طبعا هو مش هيحرجنى للدرجادى يعنى قالى انت بقالك قد ايه ما قبضتش المرتب و انا محرج منك و صبرت عليا و الحمد لله ربنا فرجها و كدا يعنى
صافى / سبحان الله و انت ناوى تعمل ايه بقى
شريف / هعمل ايه فى ايه هو انا ليا راى فى حاجه هو عازم نفسه هو و سعد بكره عند ماما عشان يحددو معاد الفرح و يخلصوا الليله
صافى / ههههههههههههههههههه
شريف / الواد ده طلع زنان اوى
صافى / مكلهم كانوا كدا هو مش عمر برده كان كدا و انا كنت كدا
شريف / اموت انا فى الزن لما يبقى كدا
صافى / هههههههههههههههههههههه بس بقى
شريف يغمزلها تدحك
................................
في المستشفي في لندن
موني / حمد الله علي سلامتك يا ماما
فريده / الله يسلمك يا حبيبتي
زياد / حمد الله علي سلامتك يا ست الكل عامله ايه دلوقت
فريده / تعبانه
موني / ان شاء الله هتخفي و تبقي زي الفل الدكتور طمنا
فريده / هو كامل و لبني فين
موني / كامل في الشركه و لبني نزلت مصر
فريده تبص علي زياد
زياد / ايوه يا ست الكل اؤمري
فريده / شكرا
موني / ماما انا هروح اطمن علي مازن و ارجع تحبي اجبلك حاجه معايا
فريده / هتسبيني لوحدي
موني / زياد هنا اهو و انا ما غيرتش هدومي و مرضعتش مازن و لا رضعه هاجي على طول
فريده / ماشي يا حبيبتي خدي بالك من نفسك
موني / عاوز حاجه يا زياد
زياد / تحبي اوصلك
موني / لا العربيه تحت خليك جنب ماما
زياد / في عنيا
موني تهز راسها اه و تاخد شنطتها و تمشي
فريده / هي لسه زعلانه ؟
زياد / نهائي دي حتي عوزاكي تعيشي هنا عندها و استاذنتني بتقول ان معدلهاش غيرك و مازن الصغير و كدا يعني
فريده / و انت رايك ايه
زياد / والله اللي يريحك بس أكيد وجودك هنا اكيد مصلحه
فريده / ليا و لا للبني
زياد / ايه اللي جاب سيره لبني دلوقت هو انتي لازم تحطي اسمها في جمله مفيده و خلاص يا ست الكل وجودك هنا هيحسن علاقتك بموني و تسكتيها عني و تضمني ان مازن ما يسيطش عليها و لا يغسل دماغها و بعدين الدكتور و المركز هنا هتفضلي بقي رايحه جايه من دبي للندن
فريده / دبي!!!!
زياد / بيتك يا ست الكل
فريده / و مصر ما عدليش بيت فيها خلاص
زياد / يا خبر دا انتي ليكي قصور شاوري انتي بس و انا اعملك كل اللي تؤمري بيه
فريده / انا عاوزه بيتي
زياد / انهي ده
فريده / اللي انت خليت جوزي يكتبه باسم مراتك
زياد / عاوزه مشاكل يعني طب ما تطلبي قصر في اي حته في العالم و انا اجيبهولك
فريده / هاتلها هي و خليها ترجعلي بيتي
زياد / طب ما تاخدي فيلا صفوت اكبر و احلي و موقعها احسن
فريده / هتكتبها باسمي و لا هيجي عليا يوم و اندم اني سلمتك رقبتي
زياد / يا ماما هو انا عمري استخسرت فيكي حاجه انا مش عارف بس ايه اللي قلبك عليا كدا
فريده / انا عاوزه انام
زياد / كويس برضه اهو ترتاحي انا هطفيلك النور و اسيبك و اطلع بره لو عوزتي حاجه اضربي الجرس
فريده تهز راسها زياد يقوم
.....................
في شقه فاطمه
فاطمه و شريف قاعدين في اوضته و قافلين الباب
فاطمه / يا ابني هو انا يعني مش عاوزه افرح برؤي بس مش علي حسابك
شريف / حسابي ازاي يعني
فاطمه / انت مراتك علي وش ولاده و محتاج مصاريف و الحضانه اللي دفعت فيها دم قلبك عشان ترضي اختك كمان دلوقت جهازها و جوازها
شريف / يا ست الكل ما تقلقيش سبيها علي الله بترزق و بعدين خدي
شريف يطلع ظرف و يديه لمامته تبص فيه في فلوس
فاطمه / ايه دول
شريف / فلوس يا ماما جهاز رؤي و مصاريفكوا و لو احتاجتي تاني قوليلي
فاطمه/ انت جبت الفلوس دي منين ما تقنعنيش ان السوق عند صافي اتحرك و دول نصيبك اوعي ياض يا شريف تكون
شريف / مازن اداهوملي
فاطمه / ليه كدا يا ابني انا حارفه ان الحمل تقل عليك بس الدين
شريف / يا ست الكل سبيني اكلم مازن اداني الفلوس دي مرتبي الفتره اللي فاتت هو بيقول اني صبرت عليه و دلوقت ظروفه اتحسنت و هيرجع يديني مرتبي تاني
فاطمه / يا ابني يعني ابوه يحرمه من الورث و و اقساط الشقه و توضيب المطعم و الحضانه و تقولي ظروفه اتحسنت طب يا حبه عيني هو محتاج الفلوس دي اكتر مننا
شريف / قولتله قالي انه بيكسب كويس و مرام كمان بتكسب كويس و القريه شغاله زي الفل فحرام ياكل حقي
فاطمه / و دا بجد؟ فعلا يعني ؟
شريف / اه الحمد لله بس المفررض انه كان بيحوش عشان المصانع لما يستلمها دلوقت قرر انه يستثمر احسن
فاطمه / طب و انت يا شريف شايف انك تستحق الفلوس دي كنت بتشتغل فعلا الفتره اللي فاتت معاه زي زمان انت حللت الفلوس دي
شريف / والله يا ماما مش هكدب عليكي انا عمري ما حسيت اني استاهل المرتب الكبير اللي كنت باخده بس هو شايف غير كدا و بصراحه اكتر انا مدايق اني باخد الفلوس دي بس برده محتاجهم انا كنت ساحب من فلوس الشغل بتاعه صافي خمسه و تلاتين الف و عمال اماطل مع سعد و محرج اقوله معييش اجهز اختي انا مش عارف ايه الصح هو انا المفروض ما كنتش اخدهم منه ؟ انا والله رفضت يا ماما و هو صمم حتي جم النهرده مع سعد عشان يتم الاتفاق و انا ما ينفعش ارجع خلاص حددنا معاد الفرح اعمل إيه
فاطمه / حقك عليا يا ابني شيلتك الهم بدري
شريف / عمركوا ما كنتوا هم يا امي ربنا يديمكوا عليا نعمه و يحفظكوا من الزوال
فاطمه / رجعت لصافي فلوسها
شريف / اه و دا كل الباقي خلصي حاجه رؤي كلها و ان شاء الله اول الشهر لما اقبض اكملك لو في حاجه ناقصه
فاطمه / استني
فاطمه تقوم تفتح الدولاب و تطلع خاتم و غويشه
فاطمه / خد دول
شريف / ليه ما فرجت اهي ايه لزمته ابيع الدهب
فاطمه / يا حبيبي مراتك اللي سلفتك دي في ديقتك ما تستاهلش منك هديه لما ربنا يفرجها عليك و صاحبك ده مش هينقل في شقه جديده و عاوز هديه حلوه خدهم غيرهم بموديلات حلوه كدا و ادي حاجه لصافي و حاجه لمرام
شريف / بس الدهب ده جهاز تقي ما حدش عارف ظروفنا بكره هتبقي عامله ازاي
فاطمه / ان شاء الله خير ما تشيلش انت بس هم و اعمل زي ما بقولك و سبها علي الله
شريف /و نعم بالله
.........................
في شقه مرام
مرام / و الله فرحتلهم اوي
مازن / عقبال ملك
مرام / امين يا رب امين بس شوفت بقي انا قولتك مش هتلاقي طريقه و لا وقت احسن من ده تديله فيهم الفلوس دي مع انها اقل بكتير من حقه والله ربنا يباركلهم اللي بيعملوه معانا الاخوات ما بيعملوهوش مع بعض
مازن / ربنا ما يحرمني منك و لا من افكارك
مرام / مازن انا كنت عاوزه منك حاجه و مكسوفه
مازن / اؤمري يا قلبي خير
مرام / انا عندي فكره لعيد ميلاد ملك
مازن يتعدل في قعدته و ينتبه
مرام /انت عارف ان شقتنا صغيره و عارفه ان ده اول عيد ميلاد لملك و انا نفسي اعملها حاجه ما تتنسيش و افرح بيها ما تنساش انها لما اتولدت انا برده كنت لسه زعلانه غير تعب الولاده و المشاكل اللي كنا فيها
مازن / انتي عاوزه ايه يا قلبي قولي و انا انفذ
مرام / عاوزه الم كل الفلوس اللي كانت هتتصرف علي العيد ميلاد و نعمل اطعام
مازن / مهو انتي فعلا عامله ايفنت اطعام
مرام / بالظبط
مازن / يا لئيمه انتي عاوزه تدمجيهم و تكبري
مرام تبتسم
مازن / طب و الناس اللي عازه تباركلنا و هابي بيرث داي تو يو و كدا
مرام / هنعمل كل ده برده في الايفنت بص انا جتلي فكره احنا هنخلي عدد تيكتس بعدد الانفيتاشينز بتاعتنا
مازن / ثانيه ثانيه الايفنت مش في يوم عيد ميلادها اصلا
مرام / فرقت يومين تلاته يعني نرحله
مازن / ماشي كملي
مرام / المهم الموضوع كالاتي انا هجيب اربع خمس عربيات و املاهم و جبات و يلفوا البلد اي غلبان يدوله و جبه
مازن / حلوه جدا
مرام / و القاعه زي ما قولت الحبايب حجزناهم خلاص و باقي التيكتس هتتعرض اللي حابب يحضر عيد ميلاد ملك و الفلوس بتاعه التزاكر هتتجمع و تتزود علي تمن الاطعام ايه رايك
مازن / فكره حلوه جدا
مرام/ هعملها تورته كبيره و هنصورها و نعمل كل اللي نفسنا فيه ايه رايك
مازن / مش دا هيسعدك
مرام / اوي
مازن / خلاص كلمي مديره اعمال و انا هكلم مصطفي يظبطنا في حوار العربيات و الشباب اللي هتوزع و الاماكن اللي هيتوزع فيها
مرام تبتسم و تهز راسها موافقه مازن يبتسم
.....................
في فيلا موني بعد فتره
كامل قاعد مع زياد ماسك الموبايل و موني بتسقي مامتها شوربه
كامل / الواد مازن ده عبقري انا مش عارف بيجيب الأفكار دي منين
زياد / عمل ايه جديد عبقرينوا زمانه
كامل / عامل ايفنت لعيد ميلاد ملك
زياد / دا قليل الزوق اللي عاوز يحضر عيد ميلاد بنتي يدفع فلوس تزكره ايه الجليطه دي
فريده / و انه يعلمه و باباه لسه ميت مش اهانه يلا و هو هيعرف الاصول منين
موني و كامل يبصوا لبعض
كامل / عن اذنكوا
كامل يقوم
موني / احنا كنا ناوين نعمل عيد ميلاد لمازن لما حضرتك تقومي بالسلامه
فريده / ساعتها هيكون عدي وقت لكن دلوقت ازاي
موني / وقت قد ايه يعني اسبوع اتنين شهر بالكتير هتفرق في ايه
فريده / تفرق طبعا اليوم بيفرق
موني / الحمد لله اجبلك تاني
فريده / لا يا حبيبتي شبعت ممكن يا زياد تطلعني اوضتي ارتاح شويه
زياد / طبعا يا ماما
زياد و موني يسندوا فريده تطلع
.......................
في الايفنت
بالون كبير مكتوب عليه ملك و ورد في كل حته و كل الناس في الاستوديو موجودين و اهل شريف كلهم و اهل مرام و صحفيين و صفوه المجتمع و مرام واقفه مع اتنين ستات هاي كلاس
ست 1 / انا متبعاكي من زمان علاطول بتفاجئيني بكل جديد
ست 2 / فكره انك تعملي حفله خيريه علي شرف عيد ميلاد ملك دي فكره ممتازه
ست 1 / انا عضوه في واحده من اشهر جمعيات حقوق المراءه عاملين شغل هايل خصوصا في الريف عالجنا حالات كتير من التسرب من التعليم و زواج القاصرات بجد يا مدام مرام ياريت تشرفينا في واحده من الندوات و تقولي كلمه للبنات
مرام / انا!!! انا مش عارفه ارد ازاي علي المجامله اللطيفه دي
ست 2/ لا مجامله و لا حاجه انتي مثال للمراءه الناجحه كفايا انك كل مره بتقعي بتقدري تقفي علي رجلك تاني بنات كتير لما يسمعوا حكايتك هتفرق جدا معاهم و تديهم بوزتيف انيرجي
ست 1/ انتي مش متخيله احنا بنعمل مجهود قد ايه عشان نلاقي رول موديل نعرضها
مرام / انا مش عارفه اقول ايه لو تسمح‘لي اخد راي مازن الاول قبل ما اديكوا كلمه و علي العموم مروه
مرام تشاور لمروه تيجي
مروه / ايوه
مرام / مروه مديره اعمالي هتاخد رقم التليفون و تبلغكم ان كان ينفع او لا
مرام تروح ناحيه مازن بيتكلم مع شريف و شايل ملك
مرام / مازن
مازن / قلبي اؤمري
مرام / بقولك الاتنين اللي كنت واقفه معاهم طلعوا مجانين ههههههههههههههههههههههه
مازن / هههههههههههه عرفتي ازاي
مرام/ عاوزيني اروح الجمعيه بتاعتهم احكي قصتي للبنات كحافز
........................
