في قلبي حروب دامية

الجزء الثاني البارت الثالث

السلام عليكم و رحمه الله تعالى و بركاته ❤

الجزء الثاني البارت الثالث

الكاتبة ؛ حمامة السلام 🕊 ( عاشقة غوكو ❤ )

بعد مرور ثلاثة اشهر

رقيه

صافنه من الجامه على الطريق و الدنيا طالعه من خشمي و مالي خلك لاي شي

كلام الدكتور وحده سد نفسي تحملنه روحه و رجعه من غير محافظه علمود هذا الدكتور و اخر شي يكلي ايامج معدوده و ماكو اي علاج يفيد حالتج و راح يضل وضعج هيجي حد ما الله ياخذ امانته

المفروض هذا احسن دكتور بالعراق و هيجي جان رايه صبرت كله هالمده علمود هيجي خبر

تاخرت روحتي اله علمود صار بيه كورونا و من تعافيت اول مره رحتله كالي صاير تلف عندج بالكبد و الطحال و الرئه و وضعج من سيء لاسوء و هاي ثاني روحه اله و يكلي هسه ما بيج امل و ما يفيد وياج اي شي

انسدت نفسي من كلشي متحملين اهلي كل هالمصاريف و كل هالتعب و الضيم حتى نروح لغير محافظه و اخر شي هيجي يكللهم

جان حالهم اسوء من حالي بس ما بينوا هالشي و بعدهم مصرين يشوفون دكتور غيره

بس اني مليت من الدكاتره كل يوم دكتور شكل و كل يوم علاج شكل الراحه صارت شبه مستحيله و اني وكعت بين ادين هيجي مرض عرفت هذا المرض راح يخسرني هواي شغلات بس متوقعت توصل لهاي المرحله

اول شي سويته بعد ما وصلت على البيت هو انو انام طول اليوم التعب الي جان بيه ممكن انو ينومني اسبوع من دون ما احس

لا راسلت و لا جاوبت احد مالي خلك اسمع احد بس اريد ارتاح من سيره الدكتور و العلاج

رسيل

- يمه بس اذا عفناهه لوحدهه راح تتكآب و تفقد الامل من روحه

- هي تعبت من الدكاتره و روحه و جيه و ما بيهم خير من ترتاح نرجع نجرب وياهه ليضل بالج انتي عوفيه ترتاح و لا تحاجيه هي من تصير زينه

- ماشي حعوفه بحاله و لو اني ما مقتنعه

- و صدك انتي ليش مكلوب وجهج صاير شي

- لا يمه مصاير شي بس تعبانه و كلت اجي يمكم

- من الضيم جايه لضيم اكبر

- ميخالف ما ارتاح الا ابيتي

- هلا بيج بكل وكت جربايتج موجوده و غرفه لجهالج موجوده ايمته ما تردين تعاي

- زين لعد حضل اسبوع يمكم

- و زوجج ما يعترض مثل كل مره

- لا يمه حاجيته و كتله تعبانه و روحي طالعه اريد ابقه يم اهلي و مكدر يحجي شي

- خير ان شاء الله

مكدرت اكلله اني زعلانه منه و جايه ارتاح منه و من الضغط الي مسوي عليه حارمني من ابسط حقوقي بسبب غيرته الزايده حتى جيه اهلي مره بالشهر حسره عليه لو بيده ميخليني اطلع من البيت اصلا تعبت من التحكم الزايد و الغيره الي ماله حد متحكم بيه لابعد الحدود و اني ساكته و متحمله حد ما طك بيه الحال و بزعت من الوضع و فرغت كل الي بكلبي عليه و لميت غراضي و خليته يجيبني اني و الجهال يم اهلي