في قلبي حروب دامية

البارت الثامن و العشرون

السلام عليكم و رحمه الله تعالى و بركاته ❤

البارت الثامن و العشرون

🌺 بقلم ؛ حمامة السلام 🕊 ( عاشقة غوكو ❤ ) 🌺

ازهار

- اريد اجيب جهالي

حجت هدى

- جهالج الي ما ينعرف ابوهم منو

- سكتي احسلج لتدخلين بشغله متخصج

- روحي انكتليلج كتلتين بعد بلكي تموتين و ننفك من فضيحتج

- صايره هواي تلغين انتي منو حتى تحاسبيني حتى بت عمي ممعتبرتج

عاطت ماما

- كااااافي روحي لغرفتج و لا تشاوفيني وجهج

- كتلج اريد جهالي

اندارت ماما على هدى و حجت

- روحي جيبي الجهال و تعاي

- بس عمه

- يله روحي

هدى

طلعت من البيت و كلي على نار هسه شكول

وصلت لبيت يحيى

لكيته كاعد مكابيل الباب

اخذت نفس و سلمت

- السلام عليكم

- و عليكم السلام

رد السلام من دون ما يرفع راسه

- اه هو مدري شلون احجيه بس لازم احجيه ال ...... ازهار تريد الجهال

- اخذيهم

- بهل سهوله

- كتلج اخذيهم

- تمام

طبيت جوه و سلمت على عمتي

اباوع لجهال عيونهم حمر

- هاي شبيهم الجهال

- يريدون العار الي خلفتهم خبصوني بيه

حجيت وياهم

- تريدون تروحون لماما

هذولي كاموا على حيلهم

- اخذينه لماما

ما اتعجب منهم من يريدون امهم

هاي بعد فطرتهم و اساسا بلكوه جانوا يشوفون ابوهم مره كل شهر فيحسوه غريب عليهم

باع الله رزق العار شلون جهال يخبلون و غيره يتحسرون عليهم

رحت لميت غراضهم و همه يهوسون فوك راسي

حد مخلصت لم اغراض انصرعت من عياطهم

مو جنهم ذولاك الي جانوا مساعه يبجون

خلصت شلت جنطهم و لزمت اديهم و طلعت