في قلبي حروب دامية

البارت السادس و العشرون

السلام عليكم و رحمه الله تعالى و بركاته ❤

البارت السادس و العشرون

🌺 بقلم ؛ حمامة السلام 🕊 ( عاشقة غوكو ❤ ) 🌺

منتهى

- يحيى ..... يحيى رجع

ضليت صافنه بوجهه من دون ما انطي رده فعل

اباوع بوجهه و مدري شأحجي

نزلت دموعي بدون ارادتي

احس الدنيه و دارت بيه

وكعت على ركبي و اباوع بلا شي و دموعي يجرن جري

- لزمتني هدى من جتافي و تهز بيه

- منتهى شبيج زينه احجي

- رجع مووو رجع

- اي رجعلنه يا كلبي رجع

اخذتني بحضنه و اني ما عولت ابجي و اطلع الحسر الي جانت بكلبي

- كافي لتبجين كومي جوه

- ما اريد اخذيني اله هسه اريد اشوفه

- نوب يجي هشام و يذبحج انتي مناقصج كتل

- معليه اخذيني اله خل انكتل و انسحل ولج هذا اخويه تدرين شنو اخويه

- اي ادري بس ميصير هيجي

- لا متدرين يا هدى متدري

ردت اطلع سحبتني من ايدي و جرتني ليجوه و طبكت الباب

- هسه هو يجي لهنا علمودج دكعدي

- اني اروحله

- خرب ولج هسه يجيج توه اجه خل يسبح و يرتاح و يجيج

- احجي شلونه

- تردين الصدك موزين ممبين عليه انو زين

- معرفتي ليش هرب

- ما رضه يحجي بس سلم على اهلج و جهاله و سال عليج

- شجانت رده فعله

- حيل انقهر من عرف ازوجتي و هو مسجون

- اريد اروحله

جرتني من جتفاي و كعدتني

- هسه اني شأحجي كعدي ميصير تروحين خلي يرتاح و هو يجيج هسه حاله مو مال احد يحجي وياه من يجيج تحجيله كلشي علمود يطلكج من هشام

- لا لا لا لا انسي الموضوع سحبت ما اريد اطلك

- ليش ولج عاجبتج عيشه المهانه لو شنو

- لا عاجبتني و لا شي انتي حجيتيه يحيى تعبان و اني ما اريد احمله فوك طاقته

- انتي تخبلتي شي

- اي تخبلت وراح اتخبل اذا اشوف اخويه روحي و دمي دايتاذه علمودي

- راح يتاذه اكثر من تسكتين