في قلبي حروب دامية

البارت الثالث و الخمسون

السلام عليكم و رحمه الله تعالى و بركاته ❤

البارت الثالث و الخمسون

🌺 بقلم ؛ حمامة السلام 🕊 ( عاشقة غوكو ❤ ) 🌺

‏أنه الميت موت وادم موش موت الله وتفض..!

رسيل

اطرافي جمدت بس عيوني الي بقت تتحرك و اتابع المشهد

نبضات كلبي تباطأت و دموعي تتسابق حتى تنزل بسكوت

كعدت من صدمتي على صوت الباب و هو ينفتح

يتبعه صوت رقيه

- هاي شصاير ليش صوتج واصل ليجوه

- تعاي شوفي اختج شلون كاطعتلي كلادتي

- كل هاي الهوسه علمود كلاده شجاج انتي منتبه على روحج لو لا

- طبعا الكلاده مو كلادتج علمود تعصبين خل الست تخرب بغراضي على راحته و اني اضل ساكته

تحركت بخطوات سريعه لخارج الغرفه ادل على غضبه مني

رقيه الي اخذتني بين اديه و تحاول تمسح دموعي جانت مثلي مصدومه من ردت فعل سوسن الغريبه

شكد مكسره اله غراض بس مجانت تعصب و تكول ميخالف

تركت رده فعله اثر بداخلي خلاني التزم الصمت و دموعي تشرح بدالي على هذا الموقف

- يله مسحي دموعج و لتبجين هي مقصده تعصب منج بس نفسيته هاي الايام حيل موزينه لا تاخذين بخاطرج عليه

مرديت بشي اكتفيت بهز راسي دلاله على ايجاب

نزلت جوه و حطيت راسي على رجلين ماما و غمضت عيوني

- وين الماشات مو علساس اجيبيهن علمود اسويلج شعرج

- ما اريد عوفي هيجي

- شبيج ضايجه مساعه جنتي تهوسين يمي

- نعسانه اريد انام

- يله نامي لعد

مررت اديه الناعمات بخصلات شعري بينما دموعي غاصات بملابس ماما بدون متحس هي و تنتبه

رغم بساطه الموقف و سخافته بس ما تعودت احد يحجي وياي بهل طريقه حتى من اغلط يلزموني و يعلموني من دون ما يرفعون صوتهم عليه و خصه بابا ميقبل احد يعاملنه هالشكل

غاصت افكاري باحلام مختلفه تعيدلي المشهد الي صار ويه اختي خلاني افز اكثر من مره بانزعاج

حتى النوم مراح يخليني ارتاح

مروه

كاعده اباوع على مسلسل ساره خاتون و مندمجه بالمشهد حد ما اندك الباب طلعت رقيه تفتحه و ضليت اني اباوع

شويه و دخلت رقيه وياه صبريه

- ماما اني اروح اكمل قرايه