في قلبي حروب دامية

البارت الثالث و الستون

السلام عليكم و رحمه الله تعالى و بركاته ❤

البارت الثالث و الستون

🌺 بقلم ؛ حمامة السلام 🕊 ( عاشقة غوكو ❤ ) 🌺

حال يحيى

‏الغيم يبچي
وينسمع ونَ الڪَمر
وين أشر جرَوحي
والدنُيا مطر ؟

- ڪاظم إسماعيل الڪَاطع

رسيل

سمعت صوت همس قريب على اذاني

- اني اجيت

درت وجهي جان اشوفه

الوجه اسود

العيون ذبلانات

لحيته طويله و تارسه الشيب

و لا جنه ذاك ابوي

حطيت اديه على وجهه

- مو حلم هذا انت

هزلي راسه ب اي

شمرت روحي بحضنه و عيوني يصبن جنهن حنفيه و لا وكفن

احس الحجي وكف ابلعومي و لا يطلع

الخنكه لزمتني

- رجعت علمودج لو بالسجن لو كاعد يمكم و الله ساترني شيصير خل يصير

كاضبه دشداشته بثنين اديه و ابجي

شكد اشتاقيت لهذا الحضن

رفعت راسي و باوعتله

- بابا و الله اني ماسويت هيج بس ياسر جذب عليه

- ادري بيه بس كومي انطيني دشداشتي السوده

- شكو بابا

- بعد ما عندي ولد اسمه ياسر

كام من يمي و طلع

بعدني بحاله صدمه

مسحت دموعي و صدك رحت فتحت الكنتور و طلعت دشداشته السوده وديته اله

نسيت كل الي صار وياي

كلشي هان كبال عيني من رجع بابا

لبس الدشداشه و السوده و كعد يبجي ...

صافنه عليه

اول مره اشوفه يبجي هيجي من كل كلبه و بحركه

محد تاثر اكثر منه بدكه ياسر

مو دموع جنه تيزاب يحرك كلوبنه حرك على حاله

حاله جمود صابتنه

منكدر نتقرب منه و نكله كافي صار الي صار

هذا ابنه ...

اكبر واحد ...

مفروض يكون السند اله مو يكسرله ظهره

شكد توجعنه على الي سواه ياسر شكد بجينه و شكد لطمنه بس مجان يتقارن بشي على حاله بابا