في قلبي حروب دامية

البارت الثاني عشر

السلام عليكم و رحمه الله تعالى و بركاته ❤

البارت الثاني عشر

🌺 بقلم ؛ حمامة السلام 🕊 ( عاشقة غوكو ❤ ) 🌺

يحيى

جنت كاعد و بصفي الولد يبجي و لحد هسه ماكو اي خبر عن حال البنيه

بس جان وضعه حيل فضيع من شفته بالشارع جسم متحول لفحمه

هيجي شعله صغيره من النار انتقلت من اللاله و اخذت طريقها لثوبها حد ما انتشرت بجسمه

حتى لو عاشت راح تدخل بصدمه نفسيه على اغلب جراء الي صار وياه

بس استبعد انو تعيش لان الضرر الي صار وياهه اكبر من انو تتحمله طفله مثله

حسيت بتعب ردت انام

بس لازم ابقي عيني مفتوحه على الولد لا هو هم يصير بيه شي

ضليت اباوع عليه و اباوع على حالي

لحوالي ساعتين يله اجه عمي وياه المره تلطم و تبجي و تصيح

- راحت بتي من بين اديه راحت عافيتي

تجر بعبايته و تضرب بروحه و ابنه يبجي بحضنه و يريد يلزمه

و هي فاقده لا اشوف روحه و لا اشوف ابنه

الوجه صار احمر من الضرب و الناس تتفرج عليه

عمي يحجي وياهه و هي و لا كأنوا

العيون جمر صايرات من البجي

سألني عمي

- ماكو خبر عن البنيه

- لا والله ماكو اي خبر من رحت و هي جوه و محد يرضه يكلنه شي

بهل اثناء المره اغمي عليه من العياط

وكعت بلكاع لا حس و لا نفس

ركض عليه عمي لكاه فاقده

- ام عمر اصحي شجاج ام عمر

يضرب على خدوده و هي جثه متتحرك

راح عمي يدور ممرضه تشيله شي

و اني باقي لازمه من جتافه و ابنه كاعد يبجي و يباوع على امه

حد ما اجتي الممرضات و شالنه على كرسي المتحرك

ضلينه اني و عمي واكفين نباوع بصمت

هاي الناس الفقره محد يباوعله و يعينه

يعينون روحهم بروحهم

رحت كعدت على فد كرسي

و اجه عمي كعد بصفي

- انت روح للبيت اليوم عرسك

باوعتله و كتله

- المفروض

درت وجهي عنه