في قلبي حروب دامية

البارت الخامس

السلام عليكم و رحمه الله تعالى و بركاته ❤

البارت الخامس

🌺 بقلم ؛ حمامة السلام 🕊 ( عاشقةغوكو ❤ ) 🌺

يحيى

حجت و هي لازمتني من ياختي

- الظاهر انت متصيرلك جاره ابد و لا راح تتعلم و راح اضل تعاند بس اني هسه اعرف شنو دواك و شلون اخليك تفهم حجيه و بعد متعاند

عافت ياختي و ضليت كاعد بلكاع انتظر شناويه تسوي بيه

ما انكر الخوف الي بده يكعد جواي

حسيت راح تسوي فد شي بس ضليت جامد بمكاني مترقب الي ناويه تسوي

طلعت شيش من شياشه الكباب و راحت شغلت الطباخ و حطت الشيش على نار

ردت اكوم

ما حسيت غير جرتني من ايدي قوي و لزكتني بيه

- وين رايح هاااا عبالك تفلت مني بعمايلك هاي و الله اذا ما اشاوفك الويل و اخليك مثل الحمار تجر عدل و تبطل هذا العناد الي عندك

ادفع بيه و اعيط

- عوفيني وخري عني

بس مهدت ملابسي

اشوف الشيش شلون صار احمر من النار

عرفت هاي الليله يا ميت جوه ايده يا مشوه

شالت الشيش من النار

و اول ضربه رادت تضربه على وجهي

بس غطيت وجهي بين اديه

اجه الشيش على ظهري

شكد ما جان حار و يجوي

شكد ما جانت الضربه اطلع روح الواحد

عطت عيطه طلعوا اخواني كلهم للمطبخ

ضليت مغطي راسي بين اديه

لا تجيني ضربه تصلخ راسي

ضربت مره لخ على ظهري

اجتي عدل بمكان ضرباته السابقه بالحزام

ضربتين بس خلت بلاعيمي تيبس من العياط

محد من اخواني حرك ساكن

يعرفون الي يجي يساعدني ياخذ نصيبه من الكتله

رفعت الشيش مره لخ حتى تضربني

سمعت صوت الباب و هو يندك

دفرتني برجله على بطني و عافتني الوب بمكاني من الوجع

احس ظهري انصلخ من الوجع

اصغر حركه مني تكوم الوجع كله على جسمي

رجعت ماما ورا ما سدت الباب و حجت

- شوف عياطك وين وصل بلكوه دبرت حجه لجوارين يله كوم امشي ولي منا قبل لا اموتك بها الساعه