في قلبي حروب دامية

البارت الثاني و العشرون

السلام عليكم و رحمه الله تعالى و بركاته ❤

البارت الثاني و العشرون

🌺 بقلم ؛ حمامة السلام 🕊 ( عاشقة غوكو ❤ ) 🌺

منتهى

- احجي عمو شصارله

- دخلوه لسجن

هنا حسيت الدنيا دارت بيه اريد استوعب الي سمعته

- عمو شنو سجن شدا تحجي

- دخلوه سجن فراري

بقينا صافنين واحد يباوع بوجه الخ

حجت ماما

- و عسا لا رد ان شاء لله

حجته و دخلت جوه

رحت ركض لعمو

- عمو شنو سجن فراري شسوه يحيى علمود يدخلوه السجن احجي

- ما ادري حالي من حالكم كلشي ما ادري قبل شوي اجه ولد دك بابنه هيجي بعده شاب مبين هو ويه يحيى كال انو هرب من الجيش و من لكطوه ذبوه بالسجن

اريد استوعب حجيه بس ما اكدر شنو يعني هرب شنو سجن لحد هسه ممستوعبه

ازهار حاله حال عمتي كيفت و طبت جوه اطك اصبعتين بالهوه

كلبي كام يوجعني بشكل مو طبيعي

دخلت و اني دايخه شنو سجن

لا يحيى ميسويه

كعدت يم السنك و طبكت رجليه يم صدري

- كومي منا روحي كعدي جوه احسلج روحي ارتاحي وجهج صار اصفر

- شرتاح عمو انت كول شرتاح و يحيى بالسجن

احجي و دموعي يصبن عشره

حط اديه على وجهي و مسح دموعي

- يا روح عمو ميصير تسوين هيجي بروحج

- شتتوقع اسوي بروحي و الشخص الوحيد الي يهتم بيه الي هو ابويه بالسجن شتريد اسوي اطك اصبعتين مثلهن

احجي و أ أشر على غرفه ماما

- مو قصدي هيجي بس انتي لتقهرين روحج هلكد فتره و يطلع و اكيد اني راح ادور حل و اطلعه مراح نبقه كاعدين انتي بس كافي تبجين

- هو ليش سوه هيجي هاا ليش

- ما ادري يا عيني ما ادري انتي هسه كومي غسلي وجهج روحي تمددي خاف ضغطج هبط و اني بس اعرف شي اجي اكلج زين

- تمام

كمت وصلت عمو للباب و رحت غسلت وجهي و كعدت على جودليه ضامه رجليه و ابجي

يعني بعد مراح اشوفه هاهيه

خنكتني العبره و ضليت امدده ابجي

حد ما اجتي ماما عاطت بيه

- شبيج كاعده تبجين على هذا العاوي لو ما انتي عاويه مثله مكعدتي تبجين عليه