في قلبي حروب دامية

البارت الثمانون

السلام عليكم و رحمه الله تعالى و بركاته ❤

البارت الثمانون

🌺 بقلم ؛ حمامة السلام 🕊 ( عاشقة غوكو ❤ ) 🌺

رسيل

وكع المبايل على سجاده

اسمع الصريخ و عيوني بس يصبن

جسمي كله كام يرجف

مسحت وجهي و حاولت اهدي روحي

كضبت المبايل و اديه ترجف و اني اكتب الرساله

الرعب الي عشته و اني انتظر هذا الجواب

احس الروح انسحبت مني

كلبي يدك على سريع

منا عميه و منا ما اكدر اشوف الاحرف كبالي من الصدمه

ابجي و اكتب

حد ما خلصت كتابه خلص عمري وياهه

دزيت الرساله و كعدت انتظر الرد و اني كاعده على نار تحرك بكلبي

جان يوصلني الجواب

- شلونج ...

- حبيبي هذا انت

- اي اني

- شلون صرت اريد اسمع صوتك اريد اتاكد انت زين

- زين زين ليضل بالج ... لا ادكين توني كاعد من البنج و ما اكدر احجي بس اكدر احرك اصابعي

- انت ارتاح بعدين اني اتصل بيك

- شطلعت نتيجه التحليل

- حامل ...

دزيت هاي الرساله و بعده ما دز شي

افتر بالغرفه رايحه جايه انتظر منه يرد بس ماكو ما رد عليه

اني شعندي كتله هسه و هو توه كاعد من البنج لو منتظره حد ما يصير زين

شويه و سمعت صوت رساله توصلني

عود جايه افتحه زلك المبايل من ايدي وكع على وجهه

شلته جان الكه الزكه متكسره كله

شلون ما جان فتحت الرساله و قريته

- الف مبروك حبيبتي عينج على نفسج

- انتبه على روحك

سديت المبايل و كلبي يرجف بين ضلوعي

على الخوف الي عشته لازم اصلي ركعتين

توضيت و اجيت مديت السجاده

بعدني مكايله الله اكبر انتبهت اني دا اصلي عكس القبله

تيهت وين تصير صلاتي

فريت السجاده و تاكدت هالمره القبله صح و صليت

ضليت احمد ربي حد ما حسيت لساني يبس

اول ما شلت السجاده كضبت المبايل و دكيت على حماي