آفْرُودِيتْ 🦢

الحلقة الأولى 🦢

🔸️الحلقة 1
🔸️إلينا_تحكي:
هزيت قطعة من قماش الساتان لي منثور على الفوتاي و دورتو على بدني العريان...عديت عينيا على روحي كيما كل مرة نتأكد إني نملك كل المقومات لي تخليني في المرتبة الأولى على المسرح الجمال...القوة و الإرادة أما فما حاجات أهم تحكم من غير هذوما هي أنك تكوني على معرفة بأركان القايد...تبسمت على جنب و وخرت لتالي...نعاود في الخطوات قبل ما يلحق فستان العرض...العرض هذا بالظبط...لي باش يغير برشا أمور أكا علاش لازمني نركز فيه أكثر...من غير ما نعمل حساب لوجود أي شخص آخر...حطيت يدي على صدري باش نثبت القماش أكثر...فرد وقت نردد في خطواتي ورا بعضها مقابلة المرايا...غمضت عينيا باش نركز أكثر...أصلا قطعت شوط كبير برشا باش نوصل لهوني و باش نكون الراقصة المصاحبة لصوفي راميز...خذيت نفس طويل قبل ما نعمل الدورات الثلاثة...حليت عينيا كي ضربت فيه بالوقت...وخرت لتالي من غير ما نحس و قحرتلو نحكي
أنا:شكووونك أنت و فااش تعمل هوني ؟
سألتو من غير ما نخمم...خاطر ممنوع أي حد يدخل لهوني و بالأخص لغرف التبديل...نظراتو لي كانت تتصفح في وجهي من غير حتى كلمة...خلاتني نوخر لتالي و نكبس على على صدري أكثر...فكرة أنو هو يتفرج فيا من بكري منجمتش نستوعبها...خاطر ديما نستغل لحظات التدريب هذوما كي نبدا وحدي و كهو خاصة بالقطعة لي دوب مغطية بدني...هزني و حطني ضيقت عينيا نحكي
أنا:شبيك تغزرلي هكا ؟
دورت راسي شوية نغزر لأطلس لي جاي ناحيتي وخرت لتالي و قربت منو نحكي
أنا:وينك لتوا ؟ و كيفاش تخلي اللي يجي يدخل لهوني
شديت فستان العرض من يدو و دخلت ورا الريدو نسمع في صوفي لي جات على غفلة تحكي
صوفي:أركااان
نزلت على شفايفي بالوقت...إسمو برك خلاني نطل عليه من ورا الريدو من غير ما ناخو بالي...صحيح سمعت عليه برشا و كنت نعرف أنو صوفي تابعة ليه أما ولا مرة توقعت باش نقابلو بالطريقة هاذي..أصلا ما سمعت منو حتى كلمة...رجعت لتالي كي غزرلي مرة أخرى و كبست على قطعة القماش لي فوق بدني أكثر...دقات قلبي قوات على غفلة...شي من غزراتو و من ملامح وجهو القاطعة و أهم شي من فكرة إني نجم نخسر منصبي هوني...مدامو يملك المركز الثقافي هذا الكل نفخت بالقاوي نحكي
أنا:تو معقول يجي لهوني جيست باش يعنقها و يبوسها كهو
خذيت نفس و طليت على أطلس من الناحية لأخرى نحكي
أنا:إيجا هووني
قرب مني شوية و دخل راسو من ورا الريدو يحكي
أطلس:فاش كنت تعمل مع أركان القايد ؟
أنا:مكنتش نعرف لي هو أركان القايد...ساعة شوفلي إذا هو مشى خاطر لازمني نعاود ماكياجي و معادش بكري على العرض
أطلس:تهنى أكيد صوفي ماهيش باش تخليه في الساحة...خاصة كي تبدا إنتي موجودة
أنا:شقصدك ؟
أطلس:لي نقصدو أنو حتى وحدة ما تنجم تنافس جمالك...ساعة منستغربش إذا خذيت عقلو في الدقايق لي فاتت
أنا:أطلس أمشي من وجهي توا
أطلس:مثبتة أنو هذا جمال طبيعي ؟ متطلعش وحدة من آلهة اليونان العريقة...فينوس مثلاا
أنا:معناها ماكش باش تمشي
ضحك و عطاني بظهرو..تبسمت و رجعت لتالي هزيت الفستان لي استلمتو منو في يدي...و خليت القطعة لي على بدني تطيح عالأرض...حضرت روحي بالزربة منحبش نوخر على العرض جملة...فرد وقت لقيت الطفلة جات عندي باش تثبتلي مكياجي...بقية لبنات حضرو للإستفتاح قبلنا...و بقيت أنا و صوفي كهو...أول ما خرجت لقيتها في وجهي...تبسمت و قربت مني تحكي
صوفي:محلااك
أنا:عيشك و إنتي زادة
صوفي:مش قدك
قرصتني من خدي و تبسمت على جنب...خذيت نفس و خلطت عليها...ساعات منحبش ناخو على تصرفاتها برشا...خاصة أنها ديما تخلي روحها محط إهتمام الكل بطريقة تعاملها معاهم و معايا بالأخص خاطرني متأكدة أنها متحبنيش و لا حتى تحب تشاركني بالعروض متاعها...غزرتلي تحكي
صوفي:العرض هذا مهم برشااا...ركز فيه باش تثبت وجودك هوني
هزيتلها براسي باهي و دخلت وراها للمسرح...شديت بلاصتي و غزرت لأطلس لي كان يشجع فيا من بعيد قبل ما يتهز الستار...وين جات عيني في عينو بالظبط قاعد في المقام الأول لي يفصل على الجمهور...و جاي فوقهم...رجالو زوز واقفين بجنبو نزلت راسي بالوقت خاطر منحبش نركز معاه و لا حتى نتذكر لي صار بالظبط...غزرت لصوفي لي كبست على قطعة الحرير الحمراء الهابطة من فوق أصلا هاذي هوايتها...و المرة هاذي العرض باش يكون مشترك بين رقصة الباليه و الرقصة متاعها كلوحة فنية...نفسها القطعة المسدولة توا...سحبتني سنين لتالي..لأحداث منحبش نتذكرها اللون هذا منحبوش و منفضلش إني نشوفو جملة غمضت عينيا بالقاوي و إندمجت مع خطوات الرقصة متاعي لي بدات في الوقت لي هي كانت تتسلق في القطعة الحريرية الخاصة بيها...هاربة من ذكريات اللي هدت عليا في لحظة...صوفي راميز..أركان القايد..المركز الثقافي مع رقصة بحيرة البجع...كانت مجرد أحلام أبعد من أنها تتحقق في النهار من النهارات...أصلا ولا مرة توقعت أنو هو بالذات باش يحضر للعروض متاعي رغم أنو الفضل يرجع لصوفي...أصلا مانيش باش نستغرب اذا كان خذا بخاطرها و حضر العرض هذا حتى هي أيقونة الرقص و الجمال فرد وقت...أما هذا الكل وفى في اللحظة لي تحل فيها الحبل الحريري و خلاها طيح من أعلى إرتفاع كانت فيه...عند ساقيا بالظبط...جمدت في بقعتي و أنا نغزرلها...من غير ما ناخو بالي لناس لي دخلت بعضها و لا للأمن و الفريق الطبي لي تدخل في لحظة...هزيت راسي شوية من غير ما نحس...وقف من بلاصتو يغزرلها مروهج تحركت من بقعتي كي جبدني أطلس في لحظة و رجعني للداخل...غزرتلو مصدومة نحكي
أنا:أ..أطلس...ص..صوفي
أطلس:ششش هدي روحك توا إلينا...متخاافش
هزيتلو براسي لا...خاطر لتوا المنظر هذاكا بين عينيا دخلت بعضي كي ريتو يزرب في خطواتو ناحية المسرح...بعدلو الأمن بالوقت..صياحو و هي يحكي معاهم خلاني نحضن أطلس من غير ما نحس مستحيل الحادث يتعاود قدامي مرة أخرى..مستحيل اللي قاعد يصير يطلع حقيقة...دورت راسي مع صوت واحد من الفريق الطبي لي هز روحو وقف و غزرلهم يحكي
هو:وقت الوفاة 22:30
غزرتلو مصدومة...هذا آخر شي توقعتو...أنو صوفي راميز تموت في عرض كيما هذا و على غفلة..كيفاش و الطاقم الكل تأكد من سلامة الوضع..كيما هي متعودة على الرقص هذا من سنين و مستحيل تطيح بالطريقة هاذي...عالأقل مش من أعلى المسرح ؟ أسئلة هدت عليا و دخلتني بعضي أكثر..لحظات كانت كافية باش يحاوطو مسرح الجريمة..خاطر حتى حد ما نجم يصدق أنو اللي صار هو سقوط حر مش أكثر...قعدت على الكرسي لي جابو أطلس و حط الفاست متاعو...بدني رعش من كمية البرودة لي تملكتني..كيما لقيت روحي نغزرلها كل شوية...عكس أركان لي كان واقف من غير ردة فعل...الهدوء متاعو كان غريب برشا بالنسبة ليا و بالنسبة لشخص فقد حبيبتو بطريقة مأساوية هكا..أول ما غزرلي دورت وجهي نحكي
أنا:ناقص كان يحصلها في راسي بغزرتو هاذي
أطلس:شبيك ؟
أنا:نحب نمشي لداري توا
أطلس:ممنوع حد يخرج من هوني توا
أنا:والسبب ؟
أطلس:مش قبل ما يتحل التحقيق الأولي..الشرطة في طريقها لهوني
عديت يدي على وجهي و تكيت لتالي...لتوا منجمتش نستوعب الحادث و لا طريقة السقوط متاعها..خذيت نفس نحكي
أنا:أنا باش نمشي لبيتي توا...منجمش نقعد هوني أكثر...كي توصل الشرطة خبرني
أطلس:خليني نوصلك
أنا:نجم نمشي وحدي
هزيت روحي وقفت و خليت الفاست ورايا...نمد في الخطوة بالسيف...أصواتهم قوات في راسي...لدرجة منجمتش نركز في اللي قدامي..حسيت بشكون ورايا...تلفت بالوقت وين جات عيني في عين واحد من رجالو...حبست في بلاصتي نحكي
أنا:أنت ؟
غمضت عينيا بالقاوي و عاودت حليتهم...محاولة مني باش نركز معاه أكثر...قرب مني شوية يحكي
نوح:إنتي لباس ؟
هزيتلو براسي لا...خاطر بالرسمي حسيت روحي في قالب دوامة غريبة...منجمتش نفهم شنية لي صار فيها بالظبط...فرد وقت لازمني نبقى قوية...خاطر الحادثة تمسنا الكل...خذيت نفس طويل نحكي
أنا:أ..أنا ريتها كي طاحت قدامي
نوح:هدي روحك...و تفضل معايا توا
أنا:وين ؟
نوح:والله فما تحقيق لازمك تحضرو
أنا:ما عندي حتى علاقة بموتها
نوح:مش أنا لي بحاجة التفسير هذا..كيما إنسحابك توا من مكان الحادثة يخليك مذنبة
أنا:في الأصل أنت علاش خلطت عليا ؟ ميطلعش عرفك لي بعثك ورايا ؟
نوح:إن شاء الله ميطلعش عندك يد في الموضوع
أنا:مانيش مجرمة..كيما مانيش باش نسمح لحتى حد منكم يتهمني بحاجة هكا
نوح:أعضاء التحقيق يستناو فيك
أنا:أنا باش نمشي نرتاح توا..خليهم يبداو بعرفك خاطرو أحق مني في القضية هاذي
عطيتو بظهري و زربت في خطواتي لغرف التبديل غزرت لدبشها و مكياجها..حسيت بسخانة قوية لهمتني غسلت وجهي أكثر من مرة هاربة من تفاصيل الحادثة و منو هو زادة...منعرفش من وين خرجلي السخطة و لا علاش يبعث في واحد من رجالو ورايا...فقت من سرحتي على صوت أطلس..لي طل عليا يحكي
أطلس:لازمك تحضر توا..خاطر تقريبا حققو مع الكل
أنا:و الراجل لي كان معاها ؟
أطلس:أركان القايد معفي من التحقيق
أنا:و السبب ؟
أطلس:إلينا مش وقت الأسئلة هاذي..أصلا ممنوع يحقق معاه حد من غير حضور المحامين متاعو
أنا:ميطلعش هو المجرم ؟
أطلس:ششش رد باالك..الكلام هذا يكلفك أكثر من جريمة قتل
أنا:مكنتش نعرف لي أنت خواف لهدرجة
قحرلي بالوقت...ضحكت و سبقتو...خذيت نفس طويل و وقفت وراه بالظبط...تلفت عندي يحكي
إسكندر:إلينا دايون
أنا:حضرة المحقق
إسكندر:شهادتك معانا ضرورية
أنا:أكيد باش نعاونك باللي نجم عليه
شاورلي بيدو للكرسي..عديت عينيا على وجهو و قعدت...تكيت لتالي و حطيت ساقي فوق أختها غزرت لأركان لي كان حاضر في التحقيق..غزرلي يحكي
إسكندر:نحب نعرف حدود معرفتك بصوفي راميز
أنا:حدود العمل و كهو
إسكندر:أما هذا أول عرض تقدمو مع صوفي
أنا:صحيح...خاطرها قبل كانت المدربة متاعي..كيما أنا لي كنت نقدم الأدوار الثانوية هوني
إسكندر:أصحابك في المجال..يقولو إنك الخليفة متاعها على المسرح و حتى هي كانت معجبة بيك غير هكا العروض متاعك ناجحة و جمهورك قوي
أنا:يمكن هذا لي خلاها توافق تقدم العرض معايا
إسكندر:تقصد أنو صوفي راميز تحاول تشعل نجمة الشهرة من جديد بيك إنتي
أنا:منعرفش أما الكل هوني موافق إني أحسن منها
إسكندر:هذا دليل كافي باش يخليك محطة شبهة
أنا:موتها ما يفيدني بحتى شي
إسكندر:يكفي أنو يخليك النجمة الأولى هوني
أنا:نجم نوصل للمركز هذا من غير ما نقتل حد..زيد أنا كنت في المسرح معاها و نظن هذا دليل كافي باش يبرأني
إسكندر:التحريات مزالت مطولة...تنجم تغادر مسرح الجريمة توا...أما تذكر أنو إحنا مزلنا بحاجتك...يعني ممنوع تخرج لأي بلد و لا حتى ترجع لبلدك الأصلي
أنا:أنا هوني نجمة مسرح حضرة المحقق...يعني مستحيل نتخلى على أحلامي..بسبب حادث معنديش ذنب فيه
هزلي براسو باهي..وقفت و عطيتهم بظهري من غير ما نغزرلهم مرة أخرى...زربت في خطواتي لغرف التبديل لبست كبوطي و خرجت من المركز...كلشي يهمني توا إني نبعد من هوني و كهو.