آفْرُودِيتْ 🦢

الحلقة التاسعة و الثلاثون🧚‍♀️

🔸️حلقة 39
🔸️نوح_يحكي:
مديت يدي شوية و حبست الباب قبل ما تتسكر فرد وقت هزيت راسي شوية نغزرلها...قحرتلي و وقفت على جنب...خذيت نفس و دخلت بعد ما عديت عينيا عليها خذيت نفس من ريحتها نحكي
أنا:توقعت مزال بكري على الدرس متاعك
آنيا:منحبش نتأخر
أنا:فطرت ؟
آنيا:لااا
أنا:بالله ملا علاش خارجة ؟
آنيا:نفطر في الكافيتيريا
أنا:منحبش لي صار آخر مرة يتعااود...واضح كلامي
آنيا:وااضح
أول ما تحل الباب...خرجت من غير ما تتلفت ناحيتي و لا تغزرلي...هزيت حاجبي مستغرب...متوقعتش أنها ماخذة في خاطرها مني لهدرجة...تنهدت بالقاوي و خلطت عليها..عديت عينيا عليها من البعيد و هي تحكي مع ليو...لي تبسم قبل ما يحللها الباب...عديت يدي على وجهي و حلت الباب ركبت...منحبش نركز في التفاصيل هاذي توا و لا باش نضيع نهاري الكل شديت الثنية لمستشفى إعادة التأهيل...خاطرني لازم نشوفها و نحكي معاها...في الأصل نحب نعرف شنوة لي تخمم فيه و شنوة قرارها زادة خاصة أنو مستحيل حد منا يسلم فيها و لا يخليها تعيش نفس المعاناة متاع السنين لي فاتت...في الأخير أركان غلط معاها و أنا غفلت عليها رغم صداقتنا و نسيتها مع الوقت...شديت الفران و هزيت روحي نزلت خذيت نفس طويل قبل ما ندخل عطيتهم إسمها بالوقت...خاطرني خذيت موعد باش نشوفها قبل توا غزرت للممرضة لي رافقتني لصالة وقفت ورا البلار نغزرلها كيفاش تمد في الخطوات بمساعدة ممرضة أخرى معاها...غير بقية المرضى لي معاها..كل وحدة منهم ليها تمارين خاصة...مديت يدي شوية و شاورتلها من البلار...شاورتلي هي زادة و حكات مع الممرضة متاعها...لي عاونتها باش ترجع للكرسي و خرجت عندي بالوقت تحكي
مادلين:نووح
أنا:أهلا مادلين
مادلين:متوقعتش باش نشوفك اليوم
أنا:نحب نحكي معاك شوية إذا مفماش مانع
مادلين:أكييد...فما كافيتيريا على يدك اليسار...خلينا نرتاحو فيها
تبسمت و هزيتلها براسي باهي...قربت من الممرضة و إستلمتها منها..كبست على الكرسي متاعها و دزيتها في طريقي لين وصلنا للكافيتيريا..قعدت مقابلها و طلبت قهوة...تبسمت تحكي
مادلين:غريبة برشا وجود فرد من عيلة ديلان في الأماكن العامة
أنا:إنتي فرد من العيلة هاذي مادلين
مادلين:نفضل نبقى بإسم عيلتي الحقيقية..خاطر مفما حتى شي يربطني بعيلة ديلان
أنا:نعرف أنك موجوعة من كلشي صاار...كيما نعرف روحي غلطت في حقك..أما أنا موجود معاك توا مادلين و باش نصلح الغلط لي صار قبل سنين
مادلين:نعرف أنك مستعد لهذا الكل..أما أنا مرتاحة في حياتي...رغم أنك جبتني لهوني مجبورة و يمكن مرفضتش جيست خاطرني نحب نتحسن بسرعة و نبدا من جديد
أنا:كيفاش تحس في روحك هوني ؟
مادلين:مرتاحة...غير هكا نظن إني تحسنت شوية على قبل و نجم نعمل أكثر من خطوة...جيست مزلت نحس بوجيعة خفيفة في ظهري...لازمني نتعود على المشي مرة أخرى
أنا:نحبك تبذل مجهود أكبر باش تتحسن..خاطر يكفي الوقت لي عديتو في المستشفيات..لازمك تسترجع حياتك الطبيعية
مدت يدها شوية و حطتها على يدي...تحكي
مادلين:صدقني أنا مرتاحة و فرحانة برشا بوجودك معايا
أنا:مدام هكا خليني نعاونك مادلين...عالأقل نكفر على ذنبي معاك
مادلين:أنت ما غلطت في حتى شي...غير هكا أنا نسيت كلشي تعديت بيه هوني...و معادش يأثر عليا الموضوع هذا جملة
أنا:ملا علاش رفضت أنك تقابلو و لا حتى أنك تحكي معاه
مادلين:اللي تحكي عليه توا...هو شخص غريب بالنسبة ليا...و ما عندي حتى شي نحكي فيه معاه
أنا:نظن أركان تعاقب بما يكفي مادلين...خسارتو لدانييل ما يعوضها شي في الدنيا
مادلين:و أنا خسرت كلشي نوح...تعرف شنية غلطتهم الزوز إستغلو مشاعري...الزوز خباو عليا علاقتهم..أنا
سكتت شوية و كبست على يديها زوز...تحكي
مادلين:أنا كنت نسمع تفاصيل علاقتهم من إيما و ننصحها من غير ما نعرف لي هي تقصد في الشخص لي كنت باش نعرس بيه...صدقني كان وقتها خبرني أنو هو يحبها مكنتش باش ناقف حائل بيناتهم
نوح:نعرف...أما وقتها باتريك مريض و رفض أركان ليك ضاعف حالتو لي خلاه يستسلم باش ميضروش أكثر إنتي أكثر وحدة تعرف قداش أركان متعلق بيه و يحبو
مادلين:أما ضرني أنا..في الأخير مكانش عندي ذنب في الفوضى لي صارت و لا حتى كنت باش نتعلق براجل يحب صحبتي
تنهدت بالقاوي و عدات يديها زوز على وجها تحكي
مادلين:مش مهم هذا الكل توا..أنت شنية عملت في السنين هذوما
أنا:تفاصيل ماهيش باش تفرحك صراحة
مادلين:نتذكر أنك كنت على علاقة مع طفلة إسمها سارة
أنا:مسكينة سارة..ساعة كانت باش تمرض من ظغط زمردة عليها وقتها..أحسن شي أنها قصت علاقتها معايا و نفذت بروحها
ضحكت بالوقت و غزرتلي مرة أخرى...تحكي
مادلين:مقتليش شحالها توا ؟
أنا:كانت هوني من فترة...توا رجعت بحذا أختها نظن هكا أحسن و لا باش تستمر في التدخلات متاعها لي تقلب الدنيا
مادلين:معناها فما طفلة أخرى في حياتك
أنا:صحيح...أما الوضع مختلف...متأكد أنك باش تحبها كي تتعرف عليها
مادلين:أكيد شرف ليا..ساعة أنا إرتحت برشا بعد ما حكيت معاك..في الأخير أنا كنت بحاجة القعدة هاذي
أنا:أنا باش نكون معاك ديما..جيست نحبك تركز على فقرات العلاج متاعك و ترجع كيما قبل و أحسن
مادلين:عيشك نووح
تبسمت و تكيت لتالي..حسيت روحي إرتحت كي طمنت على وضعها و صحتها خاصة بعد المعاناة اللي تعدات عليها طول السنين لي فااتت و لي بدلت برشا حاجات معاها و حاجات أخرى وفات و ماهيش باش ترجع مرة أخرى