آفْرُودِيتْ 🦢

الحلقة التاسعة و التسعون 🦢

🔸️حلقة 99
🔸️إلينا_تحكي:
حليت عينيا شوية شوية و غزرت للمرايا لي كانت مقابلتني...عديت دقايق واقفة من غير حتى حركة قد ما حبيت الفستان و التفاصيل متاعو..متوقعتش يطلع عليا بالطريقة هاذي...قربت من المرايا أكثر و غزرت لإنعكاسي...آخر شي كنت نحلم بيه هو الفستان هذا خاطرني ولا مرة توقعت أنو أركان باش يقدم على خطوة هكا و الأحلام تتحول لواقع غزرت لإنعكاس ويليام زادة...رغم كلشي مزلت نشوف خيالو في كل مكان نكون فيه...في الأخير هو جزء مني و منجمش نتخلص منو...تبسمت نحكي
أنا:قصتنا صارت حقيقة و معادش فما مكان للخوف بعد تواا...يا ريتك مزلت هوني
غمضت عينيا و حليتهم مع صوت الباب...وين جات عيني عليها...وقفت دقايق و هي تغزرلي...تبسمت تحكي
كاثرين:شنية الجمال هذا الكل إلينا ؟
تبست و حطيت يديا زوز على الفستان...نحكي
أنا:حبيت الفستان عاللخر
كاثرين:الفستان ما يجي حتى شي قدام جمالك و لون عينيك
أنا:والله حتى لون عينيك كيفي بالظبط
كاثرين:صحيح...أما بنتي أحلى مني
أنا:عيشك أمي
غزرتلي مستغربة...وين لاحظت نظرتها لي تبدلت في لحظة...قربت مني شوية تحكي
كاثرين:صحيح لي سمعتو منك توا ؟
هزيتلها براسي إيه و عديت عينيا على وجها نحكي
أنا:أناا نحبك تكوني معايا بعد توا...في كل مراحل حياتي...نعرف إني كبرت و باش نعرس...أما رغم هكا مزلت بحاجتك...ويليام الصغرون بحاجتك زادة خليك معانا و كهو
كاثرين:و أنا بحاجتك إلينا...نعرف إني مانيش باش نعوضك على الحاجات لي عشتها في غيابي و لا باش نجم نرجع ولدي...أما باش نعطيك كلشي تحرمت منو بسببي...و وجود ويليام خلى عندي سبب أقوى باش نحب الحياة من جديد...خاصة إني تحرمت منكم و من إني نجيب صغار زادة
تبسمت و قربت منها أكثر...عنقتها بالوقت و كبست عليها...معادش نحب نعطي فرصة للوقت باش يبعدني عليها...حتى هي ما عندها حتى ذنب في اللي صار معانا...جبدت روحها مني شوية و حطت يدها على خدي...تحكي
كاثرين:أنا طلبت من الطاقم ما يخلوك تلبس حتى عقد مع الفستان...مع أنو عقد الألماس لي وصى عليه أركان مناسب برشا لجمالك
جبدت روحها مني شوية و حلت العلبة لي جابتها في يدها...عديت عينيا على العقد لي موجود فيها..حتى هو من الألماس زادة...تبسمت تحكي
كاثرين:ورثت العقد هذا من أمي في يوم عرسي و طلبت مني نعطيه لبنتي في يوم عرسها...صراحة متتوقعش فرحتي توا خاطرني حضرت لنهار هذا بالحق و لحقت باش نشوفك عروس زادة
أنا:أنا يكفيني وجودك معايا...صدقني ما نحب حتى شي من الحاجات هاذي سواء منك و لا من أركان يكفي أنكم تحبوني و كهو
كاثرين:أنا محظوظة بيك و أركان محظوظ خاطر نجح في أنو يخلي بجعة اليونان توقع في حبو و توا نحبك تطرد كل الأفكار السيئة من مخك و تركز في عرسك و كهو...عيش فرحتك كاملة عزيزتي
هزت العقد من العلبة و حطاتو على رقبتي...عديت صوابعي عليه و تبسمت...خاطرني حبيت التفاصيل متاعو...غزرتلها نحكي
أنا:حبيتو عاللخر
تلفت عندها و عنقتها مرة أخرى...جبدت روحي منها مع صوت الباب...دقات قلبي قوات و أنا نغزرلهم..عدا عينيه على وجهي و نزل بيهم للفستان...كبس على ويليام و قرب مني شوية...يحكي
أركان:فينووسي
أنا:تفضل سيد أركاان
غزرلي مروهج...لدرجة منجمش يكمل كلامو..قصت علينا كاثرين تحكي
كاثرين:أنا باش نمشي توا و ويليام باش يبقى معايا
أنا:لحظة...خليني نشبع منو شوية...توحشتو عاللخر
قربت من أركان أكثر و هزيتو من عندو...نحكي
أنا:إيجاا يا روح ماما
ضحك معايا بالوقت...بستو و خذيت نفس من ريحتو نحكي
أنا:محلااك يا روحي...شنية هذا الكل ؟
ضحك مرة أخرى و غزر لأركان...وين كان ضايع بيناتنا...عاودت بستو و عطيتو لكاثرين...لي كبست عليه و خرجت...دورت راسي شوية...وين جات عيني في عينو..قرب مني أكثر و باسني من جبيني..حطيت
يديا الزوز على صدرو...غزرلي يحكي
أركان:إنتي أحلى مراا ريتها في حياتي و مستعد ندفع عمري الكل في سبيل إني نعيش معاك لحظة وحدة
أنا:و أنت عشقي الوحيد أركان...كيما إني مستعدة ندفع عمري الكل باش نكون معاك
تبسم و نزل عليا شوية...باسني من شفايفي يحكي
أركان:محلاك فينوسي
أنا:عيشك على الفستان...كأنو قطعة من العصر الفيكتوري..كيما إني ريت شنية عملت في سانتوريني و التحضيرات الخيالية زادة...أنا بالرسمي متوقعتش أنو هذا الكل باش يصير
أركان:طبيعي باش يكون فما إحتفال يليق بالأميرة متاعي...غير هكا نحبك تعيش الفرحة هاذي كاملة رغم إني نعرف بالقدا لي حتى شي ماهو باش يعوضك على الحاجات الخايبة لي عشتها بسببي
حطيت صوابعي على شفايفو و غزرت لعينيه نحكي
أنا:أنت العوض بالنسبة ليا أركان...منحبش نحكي على الحاجات الخايبة لي صارت معانا في الماضي خاصة اليوم
كبس على يدي و باسني منها...فرد وقت غزرلي يحكي
أركان:بعد توا باش تكون عندنا حياة خاصة بينا و مستحيل نخلي أي سبب يفرقني عليك مرة أخرى
أنا:يكفي أنك تحبني و كهو
أركان:الحب كلمة صغيرة برشا قدام الحاجات اللي نحس فيها معاك إليناا و مع هكا حبي و عشقي ليك باش يكبر في لحظة تتعدا علينا
أنا:و أنا نحبك برشا سيد أركان و نحب نعيش كل لحظات حياتي معااك
تبسم بالوقت...عدا صوابعو على خدي و باسني من شفايفي في نفس الوقت...عنقتو أول ما جبد روحو مني...كبس على آخر ظهري و باسني من رقبتي..أصلا في اللحظة هاذي بالظبط منحبش نبعد عليه جملة.
خذيت نفس من ريحتو و جبدت روحي شوية منو عدا عينيه على وجهي مرة أخرى و تبسم...نزلت راسي شوية و غزرت للخاتم لي كان في يدو..ضيقت عبنيا مستغربة...تنهد بقوة و كبس على يدي اليمنى و لبسهولي يحكي
أركان:هذا خاتم أمي...الحاجة الوحيدة لي بقات معايا منها هي طول السنين هاذي
عديت عينيا على وجهو مصدومة...متوقعتش أنو هو باش يعطيني حاجة هكاا...عديت عينيا على تفاصيل الخاتم نحكي
أنا:أ..أركاان
أركان:خليه في يدك ديما...كلشي نحب عليه منك..هو أنك تحافظ عليه...كيما حافظت عليه أنا طول السنين هاذي...بااهي ؟
هزيتلو براسي إيه...تبسم و باسني من يدي...لي خلاني نعنقو مرة أخرى...كبس عليا يحكي
أركان:إنتي أحلى حاجة صارت معايا في حياتي إليناا إنتي الأمل لي فقدتو من حياتي...عشقي و روحي اللي مانيش باش نعيش من غيرها
أنا:و أنت حياتي الكل أركاان
جبد روحو مني شوية و باسني من جبيني...يحكي
أركان:خلينا نمشيو...عالأغلب الناس الكل تستنى فينا تواا
أنا:أناا حاضرة سيد أركاان
كبس على يدي و خرجني معاه...ضحكت و أنا نغزر
للممر لي كان مزين بالورود و الشموع اللي كانت مغطية بالزجاج...غير الزينة لي كانت فوقنا...للحظة تخايلت إني دخلت لمدينة سحرية...خاصة مع صوت الموسيقى الخافت لي كان في كل الأرجاء...أصلا
متوقعتش أنو هو باش يأمر بتزيين المدينة كاملة كبس على يدي بالوقت...تبسمت و عديت عينيا على تفاصيل وجهو...ضحكت مع صوت التصفيق بعد ظهرنا للكل...غير الورد لي كان يطيح فوقنا...كبست على باقة الورد لي كانت في يدي و غزرت لويليام لي كان في حضن كاثرين...يحرك في ساقيه و يديه مع الورد لي نزل...كأنو عامل جو عليه...تبسمت لآنيا و عديت عينيا على عيلتها لي كانت قريبة منها...أحسن شي لقاو بعضهم...نعرف وجيعة الفراق و الإحساس بالنقص في غياب العيلة...فرد وقت غزرت لجينا فرحت أنها حضرت مع أيان و لي أمورهم تحلت خاطرني سمعت بالحادث و اللي صار معاهم من أركان..ضحكت و أنا نغزر لأطلس لي كان يشاورلي بيدو...ليا برشا على آخر مرة شفتو فيها...شاورتلو بيدي ليه و لكل طاقم المسرح لي كان موجود...في اللحظة هاذي بالظبط لقيت روحي وسط الناس اللي نحبهم الكل و اللي كانو معايا في أهم فترات حياتي أما ويليام مكانش موجود...الشخص الوحيد لي تمنيت أنو يرافقني في الممر هذا هو خويا خاصة بعد كل المعاناة اللي عشناها مع بعضناا...تبسمت و أنا نغزر لخيالو في وسط الحضور...فقت من سرحتي كي كبس على يدي...يحكي
أركان:لبااس عزيزتي ؟
تبسمت و هزيتلو براسي إيه...عدا عينيه على وجهي و عاوني باش نطلع الدرجتين لي يفصلونا على طاولة عقد القران...وقفت بجنبو و غزرت لأيان و نوح لي كانو شهود على عرسناا...نزلت على شفايفي شوية و أنا نغزر لكاتب العدل لي قرب منا و غزرلنا يحكي
هو:إلينا دايون تقبل الزواج من أركان القايد...بدون أي ظغط و تكون معاه في الصحة و المرض و الغنى و الفقر ؟
تبسمت و هزيتلو براسي إيه...فرد وقت غزرت لأركان نحكي
أنا:موااافقة
كبس على يدي أكثر و تلفت لعندو...تبسم و كمل يحكي
هو:أركان القايد تقبل الزواج من إلينا دايون...بدون أي ظغط و تكون معاها في الصحة و المرض و الغنى و الفقر ؟
أركان:أكييد و باش نبقى معاها لآخر لحظة في حيااتي
ضحكت و عديت عينيا على وجهو...بعد ما كمل كلامو يحكي
هو:بعد موافقة الطرفين و بموجب القانون...أعلنكما زوجا و زوجة
مديت يدي بالوقت و وقعت على العقد اللي قدامي و خليتو وقع بعدي...و آخر شي وقع نوح و أيان...مد يديه الزوز...بعدلي الفوال من وجهي و باسني من شفايفي بالوقت...تبسمت نحكي
أنا:أنت متاعي قانونيا تواا
أركان:أحلى شي صاار هو أنك وليت على إسمي
باسني من جبيني و غزر لنوح و أيان لي قربو منا غزرلي نوح يحكي
نوح:إليناا...رد بالك عليه...خاصة أنو عدا النهار الكل متوتر
أيان:طبيعي...خاطر توا فقد حريتو
أركان:ميزيتش أنت و هو
ضحكت بالوقت و قربت من آنيا...عنقتها أول وحدة خاطرها تعتبر أفضل رفيقة ليا توا و كيما أختي باستني من خدي تحكي
آنيا:مبروك يا روحي
أنا:عيشك آنيا
غزرت لجينا لي قربت منا...خذيت نفس و عنقتها كبست عليا تحكي
جينا:مبروك إليناا و سامحني إذا غلطت في حقك قبل توا
أنا:المفروض أنا لي نطلب منك حاجة هكا..خاطرني غلطت في حقك برشا
جينا:ما تحط شي في بالك
تبسمت و جبدت روحي منها..عنقت أمي لي باستني من خدي و غزرتلي تحكي
كاثرين:مبروك يا أجمل عروس في الدنيا
أنا:عيشك أمي...فرحت أنك موجودة معايا في لحظة كيما هاذي
كاثرين:و باش نكون معاك ديما
تبسمت و مديت يديا زوز لويليام...لي بدا يعرف شوية و يعقل كل واحد فينا...كبست عليه و بستو من خدو بالوقت...ضحك معايا و حط يدو على العقد فرد وقت حاول يحط فمو عليه..وقفو أركان يحكي
أركان:إيجاا عند بابا..هاك تلاحظ كلشي
كبس عليه و باسو..حرك يديه زوز و حط راسو على كتفو...كبست على يدو بالوقت..واضح أنو تعب حتى قبل ما يبدا العرس..حط يدو على ظهرو يحكي
أركان:ياخي باش ترقد من توا..هكا من غير ما تحضر عرس بابا و ماما
أنا:صغروني تعب و لازم يرقد شوية
أركان:يكون أحسن و إلا ماهوش باش يبعد من حضنك
ضحكت و بستو من يدو..دوب غفى في حضنو..قرب
من كاثرين و حطو بين يديها..فرد وقت كبس على يدي و جبدني عندو أكثر..حطيت يديا زوز على أكتافو و تبسمت..نحب نعيش تفاصيل اليوم هذا الكل من غير ما نخمم في حتى شي آخر.