آفْرُودِيتْ 🦢

الحلقة الواحدة و العشرون🧚‍♀️

🔸️حلقة 21
🔸️إلينا_تحكي:
مديت يدي شوية نحرك في المغرفة داخل الفنجان متاعي...لتوا منعرفش فاش قاعدة نخمم بالظبط و لا حتى نجمت نستوعب الأمور..أصلا منجمتش نحكي معاه و لا نواجهو..من الفازة اللي صارت في الجناح متاعو و التنبيزة لي كليتها منو جراير التصويرة و توا طور الأمر للعذراء الروسية لي جابها من غير ما يعطيني علم و لا حتى يخبرني السبب اللي خلاها تجي لهوني حتى إني مخرجتش من جناحي بعد الليلة لي ريتهم فيها و لا حاولت نفهم منو زادة..كيما منعرفش علاش ماخذة في خاطري منو..بسبب أنو محاولش حتى يوضح اللي قاعد يصير..غزرلي يحكي
ويليام:وين سرحت ؟
أنا:حتى شي مهم
ويليام:متطلعش تخمم في العذراء الروسية ؟
أنا:واضح أنو جابها لنفس السبب و مش بعيد يخلس علاقتو بيها تكون كاملة
ويليام:في شنية يقلقك الموضوع هذا ؟
أنا:والله إذا طلع الموضوع هذا صحيح..أنا باش نخرج من هوني في أقرب فرصة..غير هكا أنا و هي في نفس الكفة مدام لتوا متعلق بصاحبة التصويرة
ويليام:إلينا..متخليش عواطفك هي لي تتحكم فيك زيد منتوقعش واحد كيما أركان يتصرف بالطريقة هاذي أكيد فما سبب ورا وجودها هوني
جيت باش نحكي...أما سكت كي سمعت صوت الأصونصير تحل..دورت راسي شوية و ضيقت عينيا مستغربة و أنا نغزرلها..وقفت أول ما شافتنا و دورت عينيها على الجناح بالزربة..بعدت الكرسي و وقفت نحكي
أنا:شتعمل هاذي هوني ؟
هز روحو وقف و قرب مني شوية...يحكي
ويليام:هدي روحك...تو نحكي معاها أنا
أنا:بالله ويليام...قدراتك باش تخرج توا
قرب منها شوية و دور عينيه عليها...عدا يدو على شعرو يحكي
ويليام:أنا ويلياام...و إنتي ؟
آنيا:أنت تتكلم الروسية ؟
ويليام:أنا نفهم 7 لغات...اليونانية..العربية...الفرنسية الإنجليزية...التركية...الإيطالية و الروسية..كيما نجم نستوعب شوية من اللغات الأخرى زادة
ضحكت و قربت منو شوية..وخر لتالي و حبسها بيدو يحكي
ويليام:متقربش مني...خليك غديكا
آنيا:منقصدش...أنا جيست فرحت خاطرني لقيت شكون ينجم يفهمني
ويليام:إحنا ممكن نحكيو...أما من غير ما تقرب مني
آنيا:بااهي...مانيش باش نقرب أكثر
ويليام:إنتي شتعمل هوني...هذا الجناح متاعي أنا و أختي إلينا
آنيا:مكنتش نعرف..أصلا معرفتش كيفاش نخرج من الجناح لي كنت فيه و منعرفش كيفاش وصلت هوني ويليام:وين تحب تمشي ؟
آنيا:حبيت ننزل للجنينة شوية..كان مفماش مانع و لا عالأقل نرجع وين كنت
ويليام:تنجم تنزل أكيد...إنتي أظغط الزر قبل الأخير على اليمين و بعدها أخرج للجنينة..فما خدم اللوطة ينجم يوجهك
آنيا:باهي عيشك ويليام
تبسم و هزلها براسو باهي...وخرت باش تمشي و وقفت من جديد تحكي
آنيا:فما إحتمال نحكيو مرة أخرى ؟
ويليام:إنتي أظغط الزر لي ظغطتو بكري و باش تلقاني هوني ديما
آنيا:عيشك
ضحكت و رجعت للأصونصير بالزربة..تلفت عندو نحكي
أنا:فاش كنتو تحكيو ؟
ويليام:غلطت في الجناح
أنا:كانت ماشية للجناح متاعو ؟
ويليام:لااا..للجنينة
هز راسو شوية يثبت في الأصونصير من بعيد قحرتلو نحكي
أنا:ويليام فاش تعمل ياخي ؟
ويليام:شي...ساعة متوقعتش أنو العذراء الروسية مزيانة لهدرجة
أنا:ويييلياااام
ويليام:أنا عطيتها إذن باش تجي لهوني وقت ما تحب
أنا:شنووة ؟ ويليااام شنية صااار معاك..كيفاش تعمل حاجة هكااا يااخي ؟
ويليام:عادي..هاذي أول مرة نجم نستعمل اللغات متاعي الكل
أنا:توا وليت مبهور بالهوايات متاعك و تحب طبقها زيد من إمتى تحكي مع الغرباء أنت ؟
ويليام:شبيك متغشة لهدرجة..يكفي أنها متقربش مني كهو
أنا:ويليااام ياخي ناوي تهبلني ؟
نزل عينيه من وجهي و عطاني بظهرو...راجع لبيتو ضربت ساقي على الأرض نصيح
أنا:ويليااااام
طفاني كأني مش قاعدة نادي عليه...أصلا ديما يعمل لي في راسو و مش مهم ردة فعلي..كيما متوقعتش يعمل حاجة هكا و يرضى يتواصل مع حد غريب عليه...ساعة الكل طلع معجب بيها..عديت بقية النهار على أعصابي منو و من كلشي قاعد يصير..كيما بقيت وقت كافي نغزرلها من البالكون متاع بيتي و هي قاعدة على حافة المسبح و تلعب مع لاسي..غير هكا الأيامات لي عديتها هوني خنقتني أكثر..للحظة حسيت روحي إشتقت لحريتي لي كنت عايشتها بعيد على الظغط هذا الكل دخلت لبيت الدبش و قربت من الفساتين القصيرة الخاصة بالسهرات إخترت واحد منهم في اللون الفضي لميت شعري و عدلت روحي..عرفت من أولجا أنو خرج مع نوح من بكري و مزال مرجعش لتوا...طلعت للجناح متاعو و دخلت لصالة..حليت القجر لي جبد منو مفتاحو آخر مرة و عديت عينيا على بقية المفاتيح...خذيت واحد منهم و رجعت للأصونصير خاطر الكراهب لي خاصين بيه يبقاو مفاتحهم عندو..نزلت للبركينيغ قربلي واحد من الحرس يحكي
هو:تفضل آنسة إلينا
أنا:وين القسم الخاص بأركان ؟
هو:من هوني..ياخي باش تمشي وحدك ؟
أنا:عندك مانع ؟
هو:لا أما لسلامتك و كهو
أنا:أركان عندو علم بالموضوع
هزلي براسو باهي و شاورلي على القسم متاعو لي كان فيه أكثر من 8 كراهب جنب بعضهم...غير الباقي لي في الأقسام الأخرى...الخاصة بالحراس و بيه هو زادة..خاطر يستعمل أغلبهم...أصلا لتوا منعرفش قداش من كرهبة موجودة هوني خاصة أنو كلهم من الطراز الرفيع ظغطت على الزر و غزرت للكرهبة لي شعلت..غزرلي يحكي
هو:آنسة هاذي المفضلة عند سيد أركان...إذا معندوش علم من غير ما تاخوها
أنا:أمنعني ملاا
حليت الباب و ركبت..طيشت البوشات و التليفون من يدي و نزلت على الفيتاس..خرجت من القصر بأقصى سرعة باش منظطرش نجاوب على بقية الحرس...تكيت لتالي و حليت البلار بالوقت...حسيت بطاقة غريبة خاصة أنو تعدا برشا وقت على آخر مرة سقت فيها لدرجة إني ضيعت الرخصة الخاصة بيا...قويت السرعة حليت الموسيقى و ضربت يديا زوز على الفولون عاملة جو مع ألحان الموسيقى القاوية كأني قاعدة نخرج في الظغط لي عشتو طول الشهور لي فاتت...كيما نحب ننسى اللي صار بكري الكل..أول ما وصلت شديت الفران بالقاوي و نزلت...طيشت المفتاح لواحد من المسؤولين في البركينغ و دخلت للبار...ماهيش أول مرة نجي لهوني...أما الإستقبال كان مختلف على قبل...يمكن تحسبا للكرهبة لي جيت بيها...قربت من الكنتوار استندت عليه بيديا زوز و طلبت ويسكي بالقلاص...فرد وقت نتحرك مع الموسيقى...خاصة أنو برشا عاملين جو معاها...و أصواتهم عالية...نحب نغطس في السهرة هاذي و نرتاح شوية من الأفكار لي متزاحمة داخل مخي دورت راسي مستغربة مع صوتو و هو يحكي
إسكندر:شراب الآنسة على حسابي
هزيت حاجبي مستغربة و أنا نغزرلو خاطر متوقعتش يكون موجود هوني...كيما هو آخر حد نحب نشوفو توا و نحكي معاه و مع هكا لقيت روحي نغزرلو من غير ردة فعل...حطلو الكأس ليه...كبس عليه بيدو..هز عينيه في وجهي و دزو لعندي... وصل بسرعة خاطر سطح الكنتوار أملس...حبستو بيدي...و رجعتهولو بنفس الطريقة نحكي
أنا:دعوتك مرفوضة
ضحك و كبس عليه...شرب منو شوية و عدا عينيه على وجهي يحكي
إسكندر:شتعمل هوني ؟
أنا:لاا عاد...باش تولي تستجوبني في كل مرة تشوفني فيها ؟
إسكندر:قبل أيامات حياتك كانت في خطر...معناها وجودك هوني ممكن يقضي عليك
أنا:منظنش الموضوع هذا يهمك برشا...مهما كان اللي باش يصير...وجهة نظرك ماهيش باش تتبدل ناحيتي يعني باش نبقى متهمة مهما كان اللي تعرضتلو قبل توا
مديت يدي و هزيت الكأس لي حطو السرفور..خذيت رشفة منو و سرحت مع الموسيقى أكثر...نحب ننسى أنو موجود هوني و نكمل السهرية مع روحي...قرب مني شوية يحكي
إسكندر:يعرف أنك هوني ؟
أنا:لاا...كان تحب أعطيه علم باش يجي توا
إسكندر:إلينا شنية لي قاعد يصير ؟
أنا:مانيش مجبورة باش نجاوب على أسئلتك حضرة المحقق...كيما تنجم تأجل كل أسئلتك بخصوص القضية لوقت آخر
إسكندر:مانيش نسأل فيك على القضية...أما وجودك هوني وحدك هو المشكلة...متعرفش شكون اللي قاعد يخطط باش يأذيك في أي لحظة
مديت يدي شوية و طلبت كأس أخرى...نحكي
أنا:شقولك تاخو دور ال bodyguard و تحميني لين يخلط أركان القايد
قرب مني أكثر و وقف في وجهي بالظبط...عدا عينيه على وجهي من غير حتى كلمة...دورت راسي شوية نغزر لطفلة لي قربت منو و حطت يدها على كتفو تحكي
هي:إسكندر...مزلت مطول ياخي ؟
نزلت عينيا من وجها و تبسمت بالوقت...نحكي
أنا:هوكا طلعت عندك رفقة لسهرية...شبيك لاهي بيا و بأموري حضرة المحقق
إسكندر:أنا باش نرجعك للقصر توا...و لآخر مرة نقلك أنو وجودك وحدك يعرضك للخطر و معادش تظهر في أماكن عامة وحدك
أنا:و أنا لآخر مرة نقلك معادش تدخل في أموري لا أنت و لا أي حد آخر غيرك...أسئلتك باش تكون بخصوص القضية و كهو...و في الوقت المناسب سيد إسكندر...مش في البار
هزيت الكأس من عند السرفور و شربتها على ضربة حطيت الكأس في يدو و بعدت عليه..وين لقيت روحي دخلت مع جو الموسيقى و الرقص...فرد وقت لاحظت غزراتو لي كانت تلاحق فيا..حتى أنو حسيت المشروب بدا ياخو مفعولو فيا بعد الكأس الثالث لي هزيتو من عند السرفور..فرد وقت لقيت ذكريات الماضي تلاحق فيا..من الأحداث لي عشتها مع غالي حياتي لي تقلبت في لحظة..لوجودي في اليونان بين ناس جديدة و عالم مختلف..لمقتل صوفي راميز و أخير ظهور أركان القايد في حياتي و قلبي لي تمرد عليا و بدا يتعلق بيه...مع إني نعرف و متأكدة أنو الثنية هاذي مسدودة..مهما كان اللي باش نوصلو ليه في الأخير و مع هكا معرفتش نتراجع و لا نحط حد لكلشي قاعد يصير معايا...فقت من سرحتي كي حسيت بشكون حط يديه زوز على أجنابي من تالي ضيقت عينيا و تلفت عندو مستغربة دزيتو بيديا زوز نحكي
أنا:شكوونك أنت ؟ و فاااش تعمل ياااخي ؟
قرب مني أكثر و جبدني عندو مرة أخرى...يحكي
هو:شبي القطوسة داخلة بعضها ؟ خلينا نشيخو مع بعضنا شوية...ساعة متأكد ماكش باش تندم جملة
دزيتو مرة أخرى و ضربتو كف بكل قوتي...وخر لتالي مروهج و هد عليا مرة أخرى...بعدت عليه شوية باش ميمسنيش...قحرلي يحكي
هو:جبتها لرووحك يا ●●●●●
حبس قبل ما يقرب مني...حليت عينيا مصدومة و أنا نغزرلو كيفاش هد عليه...جبدو لتالي و نزل يضرب فيه بكل قوتو..حليت عينيا مصدومة...خاطر منعرفش إمتى جا و كيفاش لقاني من الأساس تبسمت و نزلت على شفايفي شوية...منعرفش علاش عجبني الوضع...رغم إني متأكدة كي يوصل للوضع هذا معادش يتحكم في روحو...شدو من مريولو وقفو و دزو ناحية الحارس متاعو يحكي
أركان:باش نضيفوه عندنا أيامات
كبس عليه و خرجو معاه...تلفت عندي بالوقت..يحكي
أركان:إنتي لباس ؟ مسك ؟
عديت عينيا على تفاصيل وجهو...و ملامحو الحادة و غزرتو لي كانت تهديد كافي بالنسبة ليا...قربت منو بالوقت...حاوطت وجهو بيديا زوز و نزلت على شفايفو من غير ما نخمم في الناس اللي تغزرلنا و لا الوضع لي إحنا فيه...منعرفش أصلا علاش بستو بالطريقة هاذي كبس على أجنابي بقوة...لدرجة أنو وجعني...دورت يديا زوز على رقبتو و غطست فيه أكثر من غير ما نخمم في اللي عملو معايا بكري و لا في الروسية لي جابها على غفلة للقصر و لا حتى في اللي باش يعملو بعد اللحظة هاذي...جبدت روحي منو شوية و عديت عينيا على وجهو دقات قلبي قوات أكثر مع غزرتو...منجمتش و منحبش نستوعب لي صار...كأني نحب نحصر روحي في اللحظة هاذي و كهو...مد يدو شوية و حطها على خدي يحكي
أركان:خلينا نمشيو توا
نزلت يديا من وجهو و هزيتلو براسي لا...نحكي
أنا:مانيش باش نجي معاك
أركان:إلينا متصححش راسك
أنا:و لا شنوة باش تعمل ؟
أركان:شربت مرة أخرى ؟
أنا:صحيح
تنهد بالقاوي و قرب مني مرة أخرى...شدني من يدي يحكي
أركان:أسمع الكلام المرة هاذي و خلينا نمشيو توا
أنا:نظن مانيش باش نفيدك بعد توا...حتى فما شكون أهم مني لازمك تهتم بيها توا
أركان:هيا إيجا و نوعدك باش نحكيو في كلشي صار
أنا:مش لازم...كيما مانيش باش نسألك جملة...مش هذا اللي تحب عليه أنت ديما
عطيتو بظهري و بعدت عليه شوية...هزيت كأس و شربتو فرد مرة قبل ما يلحق لعندي..وين لمحت إسكندر يغزرلي من بعيد...عطاني بظهرو أول ما قرب مني أركان و فك الكأس من يدي يحكي
أركان:يززي كهو
دورت يديا زوز على رقبتو و قربتلو أكثر...نحكي
أنا:أنت كذبت عليا في كلشي...أنت مجرد حلمة مستحيل تتحقق أركان
مد يدو شوية...حطها على ظهري من تالي و جبدني عندو في لحظة...عنقني و كبس عليا يحكي
أركان:تتوقع كان طلعت نكذب عليك أنا معاك توا ؟
ياخي مزال مستوعبتش حقيقة إني متاعك كيما إنتي متاعي بالظبط
جبدت روحي شوية و عديت عينيا على شفايفو نحكي
أنا:باش تقول نفس الكلام لروسية متاعك ؟
ضحك و مد يدو شوية...عدا صوابعو على خدي يحكي
أركان:إذا رفضت تجي معايا توا...هذا اللي باش يصير
أنا:أنت أناني و ساقط زادة
أركان:قاعدة تسجل في إضافات لقائمة الأخطاء لي باش تتحاسب عليهم
أنا:مانيش صغيرة باش تحاسبني و لا حتى باش تعديها عليا...أصلا أنت مستحيل تكون متاعي..خاطر لي في التصويرة أهم من أنك تحب غيرها
أركان:إلينا..خلينا نمشيو توا و نوعدك باش نحكيو في كلشي..هاني نسايس فيك خاطرك مش في وعيك و منحبش نخليك تاخو في خاطر أكثر
أنا:السهرة بدات توا...منحبش نحبش نرجع للقصر متاعك
أركان:باهي..مدام هكا تنجم تبقى هوني وحدك
أنا:ماكش باش تخليني وحدي...خاصة إني ريت إسكندر دورمان هوني..ميطلعش هو اللي خبرك ؟
أركان:حكيت معاه ؟
هزيتلو براسي إيه و قربت منو شوية...حطيت راسي على صدرو نحكي
أنا:أسئلتو ماهيش باش توفى جملة...حتى أنو عرض عليا باش يرجعني للقصر..ساعة علاش الكل يخاف منك بالطريقة هاذي
أركان:هيا إيجاا
كبس على يدي و قحرلي...عوجت فمي و خلطت عليه...فرد وقت لقيت روحي عاملة جو مع الموسيقى العالية لين وصلنا لبرا...لقيت رجالو مغطيين البلاصة الكل...حطيت يدي على فمي نحكي
أنا:ياخي هذوما الكل خرجو باش يفركسو عليا ؟
دورت راسي نغزر للكرهبة لي جيت بيها...نزلت على شفايفي نحكي
أنا:أففف...نسيت جملة إني خذيت أهم كرهبة عند أركان القايد...ساعة طلعت تبدل فيهم كيما النسا متاعك بالظبط
تنهد بالقاوي و غزرلي من غير حتى كلمة...استلم مفاتحها و جبدني من يدي...حلي الباب...ركبني و خلط عليا...طار بيها على غفلة...مديت يدي شعلت الموسيقى..طفاها بالوقت...شعلتها من جديد...عاود طفاها...قحرتلو و شعلتها للمرة الثالثة..شد الفران بالقاوي و طفاها يحكي
أركان:جرب أشعلهااا توا
نزلت على شفايفي و تبسمت...منعرفش علاش عاملة جو على غشو و صياحو ليلة..هزيت روحي شوية و قربت منو على غفلة...غزرلي مصدوم...قعدت في حملتو و حطيت يديا زوز على أكتافو نحكي
أنا:محلاك كي تبدا على أعصابك هكا
أركان:أرجع لبلاصتك تواا
عديت صوابعي على خدو و نزلت بيهم لرقبتو نحكي
أنا:مرتاحة هكا
غمض عينيه بالقاوي و حلهم مرة أخرى...حط يدو على جنبي يحكي
أركان:إلينااا
تبسمت و مديت يديا زوز لأزرار الشوميز متاعو نحل فيهم...هز حاجبو شوية يحكي
أركان:صااار...المرة هاذي باش تبدا بيا
حليتها شوية و حطيت يدي على الوشم متاعو نحكي
أنا:نظن إني مغرومة بالوشم متاعك
نزلت على شفايفي شوية و هزيت عينيا في وجهو مد يدو بالوقت و حلي شعري...لي طاح على ظهري و تنهد بالقاوي يحكي
أركان:شنعمل فيك توا ؟
أنا:نحب على نفس الوشم أنا زادة
أركان:والله باش تتحصل على وشم أما بطريقة أخرى
حطيت يدي على خدو و قربت من شفايفو...نحكي
أنا:معناها منجمش نتحصل على نفس الوشم ؟
غزرت لعينيه نستنى فيه باش يجاوبني...رجعلي خصلات شعري لتالي و نزل على شفافي...غمضت عينيا بعد ما تحولت البوسة لعضة..كبست على صدرو أكثر وين جبد روحو شوية..قحرتلو نحكي
أنا:فااش تعمل يااخي ؟
أركان:أرجع لبلاصتك توا ؟
أنا:شبيك مقلق مني لهدرجة ؟
نزلت على شفايفي شوية و حطيت راسي عاى كتفو ريحتو القوية خدرتني..عدا يدو على شعري يحكي
أركان:نتوقع أنو فينوسي ماخذة في خاطرها أكثر من المرات لي فاتت
أنا:معناها تعرف روحك غالط
هزيت عينيا في وجهو...تبسم و باسني من جبيني يحكي
أركان:إحنا باش نحكيو في كلشي صار..يكفي أنك تسمع الكلام توا
حطيت يدي على خدو و قربت منو أكثر...عضيتو من رقبتو و طلعت بشفايفي لخدو نحكي
أنا:توا ولينا متعادلين
عدا صوابعو على شفايفي و تبسم..كبس على أجنابي و رجعني لبلاصتي في لحظة..تنهد بالقاوي و عدا يدو على وجهو و غزرلي...تكيت لتالي و عديت صوابعي على شفايفي..أصلا حسيت برغبة قوية في النوم و مع هكا لقيت روحي نغزر لتفاصيلو و ضايعة فيها تبسمت أول ما مد يدو ناحيتي و رجعلي خصلة من شعري ورا وذني و كبس على يدي لين غفيت.