آفْرُودِيتْ 🦢

الحلقة التاسعة و الستون🦢

🔸️حلقة 69
🔸️إلينا_تحكي:
حليت عينيا على نهار جديد..أصلا منتذكرش إمتى رقدت...خاطرني عديت ليلة كاملة ساهرة معاه قعدت على طرف السرير...و غزرت لساعة...اليوم تعدا شهر بالظبط على تاريخ ولادتي...و على خسارة بنتي زادة فقت من سرحتي على صوتو...هزيت روحي بالسيف و هزيتو بين يديا...ضيقت عينيا مستغربة كي حسيت بسخانتو لي لامست خدي...عاودت تفقدتها بيدي مصدومة...هاذي أول مرة يسخن بالطريقة هاذي...دقات قلبي قوات في لحظة و معرفتش شنوة نعمل بالظبط خذيت نفس و قست سخانتو وين تأكدت أنو هو بالرسمي تااعب...حتى أنو رفض يرضع و صوت البكا متاعو وترني أكثر لميت شعري و طلبت أركان مرتين ورا بعضهم..دخلت بعضي أكثر كي مردش عليا...لي خلاني نطلب أيان وين هز عليا يحكي
أيان:سواان...صباح الخير
أنا:أياان وينك تواا ؟
أيان:شبي صوتك هكا ؟
أنا:ويليام حرارتو مرتفعة برشا و معرفتش شنوة نعمل بالظبط
أيان:مسافة الثنية و نكون عندك
أنا:بااهي
علقت عليه و عاودت تفقدت سخانتو...قعدت بجنبو و كبست على يدو نحكي
أنا:أمك معااك...أنت باش تكون لباس يا روحي
غزرت للوقت أكثر من مرة قبل ما يوصل عندي..دخل عندي يحكي
أيان:وينو ويليام ؟
أنا:هاني باش نجيبو
رجعت لبيتي و هزيتو بين يديا...دخل ورايا و حط يدو على جبينو يحكي
أيان:خلينا نمشيو للكلينيك توا
هزيتلو براسي باهي و خلطت عليه للكرهبة...ركبت من تالي و عديت صوابعي على خدو نحكي
أنا:هو باش يكون مليح مش هكاا ؟
أيان:أكيد...باش يقاوم مدامو ولدك إنتي
أنا:أما بنتي مكانتش قوية و تخلات عليا
أيان:هدي روحك...متأكد أنو هو باش يكون بخير
كبست عليه في حضني...منحبش نخمم في الإحتمالات الخايبة لي ممكن تصير...هزيت روحي نزلت أول ما شد الفران و سبقتو للكلينيك...سلمتو للفرنلية و فهمتها لي صار معايا...وقف ورايا و حط يدو على كتفي يحكي
أيان:ويليام قوي و باش يتحسن
تلفت عندو في لحظة و هزيت عينيا في وجهو نحكي
أنا:طلبت أركان قبلك و مهزش علياا
أيان:توقعت يكون عندك علم
أنا:علم بشنية ؟
أيان:أركان سافر لفلوريناا
أنا:فلورينااا ؟
أيان:ممم و مع إيماا
غزرتلو مستغربة...محاولة مني باش نفهم كلامو و خذيت نفي نحكي
أنا:متأكد ؟
أيان:تنجم تسألو و لا حتى تسأل نوح...اليوم هو ضيف شرف في مركز الأيتام لي بإسم ولدو...كيما تعرف دانييل توفى في فلوريناا...أكا علاش كل الجمعيات الخيرية و المرافق الخاصة بأركان على إسم ولدو و نظن وجود إيما المرة هاذي ضروري خاطرها تحرمت من ولدها و مكانتش عندها و لو فرصة وحدة أنها تهزو بين يديها...عالأغلب أركان قاعد يكفر على ذنبو معاهاا
أنا:ممم هااك حتى أنت متعاطف معاها
بعدت عليه و قربت من الباب...حطيت يدي على قلبي و خذيت نفس...منحبش نعيش نفس الشعور لي عشتو شهور لتالي...وقت توفى خوياا...عديت دقايق على أعصابي...قبل ما يخرج الدكتور...قربت منو نحكي
أنا:طمني على ولدي
هو:هدي روحك مداام...الصغرون بصحة جيدة و سخانتو منخفضة تواا
أنا:نجم نشوفو توا ؟
هو:أكيد...تنجم تشوفو و ترضعو زادة...أما باش تبقى هوني معانا شوية...لين نتأكد أنو هو ينجم يخرج من غير ما يتكرر اللي صار
أنا:باهي عيشك
دخلت عندو و قربت عندو شوية...تبسمت كي ريتو يتحرك و فرحت أكثر كي تأكدت أنو سخانتو هبطت و رضع عادي...حتى أنو غرق في النوم بعد ما كان يفيق و يرقد...حطيتو من يدي و غفيت بجنبو خاصة بعد ما عديت ليالي منجمش نرقد...لدرجة محسيتش بالوقت كيفاش تعدا...حليت عينيا على صوتو من جديد و غزرت للممرضة نحكي
أنا:قداش الساعة توا ؟
هي:17:00 مساءا...السيد أيان طلب أنو نخلوك ترتاح
أنا:وينو توا ؟
هي:يستنى فيك برا
حطت ويليام في يدي...لي عاودت رضعتو و خليتو معاها...خذيت نفس و خرجت عندو نحكي
أنا:مكانش لازم تخليني الوقت هذا الكل راقدة و تبقى هوني
أيان:الأهم أنك تحسنت على بكري
أنا:أحسن من قبل
تبسمت و قربت منو شوية..هزيت عينيا في وجهو نحكي
أنا:أنا مظطرة نشكرك مرة أخرى..خاطرك كنت موجود في الوقت لي أنا بحاجتك فيك
مد يدو شوية و بعدلي خصلات شعري من وجهي يحكي
أيان:أنا باش نكون معاك في كل لحظة سواان و يا ريت معادش تشكرني مرة أخرى
أنا:أنت علاش خبيت عليا أنو أركان تعرض لحادث ؟
أيان:عرفت بعد فترة من الحادث خاطرني كنت لاهي بيك وقتها و لاحظت أنو كان بصحة كافية تخليه يلوج عليك...أما كان مهتم بإيما وقتها..كان إنتي عرفت بالحادث وقتها تطلب أنك ترجع و تتصدم بالواقع أكثر إلينا إنتي كل مرة تكون بحاجتو معاك تلقاه يجري في جرتها و واقف معاها هي...مهما نكرت الحقيقة هاذي تلقاها تطارد فيك 
أنا:أنا مانيش بحاجتو...طلبتو خاطر ويليام ولدو هو
أيان:وينو توا ؟ علاش مردش عليك ؟
عديت عينيا على وجهو من غير حتى كلمة...عدا صوابعو على خدي و غزرلي ندرا كيف يحكي
أيان:إلينا...أنا نحبك تحل عينيك مرة وحدة و تشوف الدنيا من غير أركان..متخليهش يربطك بويليام و يقيد حريتك
أنا:مفما حتى شي يقيد حريتي
أيان:مش صحيح...إنتي لتوا متحررتش من أركان القايد
أنا:نظن أنك غالط المرة هاذي
أيان:أثبتلي ملا
أنا:شقصدك ؟
أيان:عرس بيااا و أنا باش نكون معاك لآخر لحظة من حياتي سواان
عديت عينيا على وجهو مصدومة من الطلب متاعو هذا غير أنفاسو لي قوات في وجهي..كبس على خدي و نزل على شفايفي شوية و حبس قبل ما يبوسني كأنو يراقب في ردة فعلي قبل آخر خطوة منو..وين لقيت روحي ضايعة بين الطلب متاعو و تصرفاتو و معرفتش شنوة لازمني نعمل بالظبط...مديت يديا زوز...حطيتهم على صدرو و بعدتو عليا قبل ما يبوسني و لا حتى يقدم على خطوة أخرى جيت باش نحكي معاه...أما سكت كي جات عيني على أركان لي كان واقف وراه منعرفش كيفاش وصل لهوني و لا حتى من وين عرف باللي صاار للحظة حسيت روحي في دوامة جديدة من غزرتو ليا...قرب منا بسرعة و ضربو لوجهو أول ما تلفت عندو...حطيت يدي على فمي مروهجة...هد عليه أكثر و شدو من كول الفاست متاعو...دزو على الحيط يحكي
أركان:أناااا حذرتك قبل توااا...قتلك رد بااالك تقرب منهااا و لا تحط يدك عليهااا
أيان:ماااهيش ملكية خاااصة بيك...هي حرة في إختياراتها و مع شكوون تحب تكمل حياااتها
أركان:أنااا باش نقتلك...صدقني نهايتك باش تكون على يدياا زوز
أيان:أنت أضعف من أنك تتخلص مني
أركان:المرة هاذي باش نعملها...صدقني مانيش باش نتردد جملة
أيان:نستنى في الخطوة هاذي منك
غزرتلهم مصدومة..متوقعتش أنهم حاقدين على بعضهم لهدرجة...جبد روحو شوية و قحرلو يحكي
أركان:هاذي آخر مرة تحاااول تقرب منهاا...سواء في وجودي و لا غيااابي
مد يدو و مسح الدم لي هبط من خشمو و تبسم يحكي
أيان:القرار يرجع ليها وحدها
بعد عليه و مشى من غير حتى كلمة أخرى...تلفت عندي في لحظة و قحرلي يحكي
أركان:شنية لي قاعد يصير بيناااتكم ؟
أنا:الأمر يخصني وحدي
جبدني من يدي قبل ما نبعد و دزني على الحيط يحكي
أركان:المرة هااذي الأمووور متمشيش كيمااا تحب إنتي هذااا واااضح ؟
أنا:مااهوش وااضح و معندكش حق تدخل في أموري الشخصية
أركان:متحاولش تتحدااني خاطر باش تخسر برشااا حاجات في المقابل
أنا:أنت كيفاش تهددني بالطريقة هاااذي ؟
أركان:ماانيش باش نعاود الكلام لي قلتو...كان يتكرر لي صااار توا مع ●●●● أياان و لا أي وااحد غيرو نهاايتك باش تكون على يدي...حبيت و لا كرهت إنتي ممنوع تكون لأي شخص آخر...سواء تكون ليا و لا تموت على يدي
أنا:أقتلني ملااا...فاش تستنى ؟
أركان:حسااابك مبعد
جبد روحو مني في لحظة و حل الباب بقوة و غزر للممرضة يحكي
أركان:أخرج تواا
قرب من ويليام و هزو في حملتو أول ما خرجت حبست مع صوتو يحكي
أركان:و إنتي معااها زاادة
أنا:ماانيش باش نخلي ولدي وحدو
تلفت عندي في لحظة و قحرلي...لي خلاني نحس بخوف غريب من غزرتو و مع هكا...قربت منو و فكيت ويليام من يدو نحكي
أنا:ويليام متاعي وحدي و ماهوش بحاجتك معاه
أركان:إليناااا..حط الصغير من يدك و أخررج خاطرني منحبش نغلط معااك توا
أنا:مااانيش خايفة منك و مدام أنت مهتم بولدك هكاا علاش مكنتش موجود كي طلبتك ؟
أركان:كنت في الطيااارة وقتها
أنا:ساامحني ملا كنت باش نفسد عليكم رحلتكم لفلورينا
أركان:مكاانتش رحلة...فما حفلة خاصة بالأيتام اللي غديكا...كنت نحضرها كل عام
أنا:أما العام هذا مختلف..خاطر عندك مرافقة خاصة
أركان:لو كنت نعرف لي ويليام باش يتعب مكنتش باش نساافر جملة
أنا:ويليام بحاجتك في كل لحظة معاااه..أما أنت مااكش مووجود...أنت ولا مرة كنت موجوود معاناا ياخي لهدرجة هي و مشاعرها أهم مني و من ولدك ؟
أركان:إنتي تعرف أنو مفما حتى شي أهم منكم
أنا:وينك لتوا ملا ؟
أركان:حاولت نتواصل معاك مرديتش عليااا
أنا:والله خليت تليفوني في الدار...خاطر تركيزي كان مع ولدي
أركان:شنية صااار ؟ علاش تعب فجأة ؟
أنا:كان جيت موجود تعرف وحدك
أركان:الصبر يااا ربي...تحب تهبلني ؟ 
أنا:نظن عندهم دكتور للأمراض العقلية هوني خليه يشوفك
عدا يدو على وجهو و قرب مني شوية باش يهزو من عندي...عطيتو بظهر نحكي
أنا:هو لباس توا...أرجع وين كنت...ميجيش تخليها وحدها
أركان:إيما مشات من أسبوع تقريبا و كانت معاهم في كل التحضيرات...و أنا مشيت باش نحضر الإفتتاح كيما كل عام و نرجع في نفس اليوم و مفما حتى علاقة بيني و بينها...باش تحاسبني عليها
كبست على ويليام و تلفت عندو بالوقت...نحكي
أنا:مانيش نحاسب فيك...أمورك متهمنيش جملة
أركان:وااضح برشااا...هات الطفل لهوني خليني نطمن عليه
أنا:لااا...يعني لااا...ماكش باش تمسو
أركان:بالله ؟
أنا:والله...شوف وحدة من النسا متاعك و جيب منها صغاار و ربيهم كيما تحب أنت
أركان:معينيش نجيب صغير آخر تواا...يكبر ويليام شوية و نخمم في الحكااية
أنا:ساااقط
هز حاجبو شوية و قرب مني...حط يدو على جبينو و باسو من راسو...و غزرلي فرد وقت يحكي
أركان:مدام إرتاح توا...خلينا نمشيو
أنا:مانيش باش نجي معااك
أركان:أغزرلي هووني...مش وقت هباالك تواا...نظن وضحت سبب غياابي و لثاني مرة نقلك أنو أنا مكنتش معاها و سافرت وحدي..كنت باش نغيب لساعات و نرجع ليكم...الميتم يتعلق بذكرى دانييل و لازمني نكون موجود في النهار هذا معاهم
أنا:مانيش بحاجة تبريرك
أركان:ملا علاش متغشة لهدرجة ؟
أنا:كان لازم تكون موجود مع ولدك
أركان:و هذا لي عملتو..أول ما سمعت بالخبر..رجعت لأثيناا...غير هكا إنتي لي رفضتي تكوني معايا و إلا مكنتش باش نخليك ورايا لحظة وحدة
أنا:ماكش مجبور تهزني معاك لكل بلاصة تمشي ليها باش تخلي ولدك بجنبك
عدا يدو على وجهو و نزل راسو شوية لعندي يحكي
أركان:باهي..شنية المطلوب مني توا ؟ خبرني و أنا باش نعمل اللي تحب عليه المرة هاذي
أنا:ما نحب منك حتى شي
كبست على ويليام و سبقتو...خلط عليا من غير حتى كلمة...رغم حسيتو مزال متغشش من اللي صار...غير
هكا حسيت روحي بردت شوية بعد ما عرفت أنو مكانش معاها من الأول و مع هكا نحبو يبعد عليها جملة و ما يبقى حتى شي يجمع بيناتهم...غزرت لسائق لي حل الباب...خذيت نفس و ركبت...ركب بجنبي و غزرلي يحكي
أركان:هات عليك...مانيش باش نرتاح قبل ما نطمن عليه
مد يديه زوز لعندي و شدو عليا...تلفت لشباك بالوقت و أنا نسمع فيه يحكي
أركان:روح بابا...شنية صار باش تعبت هكا ؟
أنا:على أساس يهمك برشا تعرف
أركان:أرفع صووتك خليني نسمع
أنا:محسوب باش نخاف منك
أركان:بااهي...أول حاجة نبدا بيها بعد توا هي لسانك هذاا
أنا:شقولك تهتم بأمورك الخارجية...مش أحسن
أركان:منسيتش لي شفتو قبيل...و مزلت نستنى في تفسير منك
سكت و تلفت لشباك مرة أخرى...أصلا لتوا مفهمتش تصرفات أيان و لا حتى كيفاش يطلب مني حاجة هكا و إحنا في الظروف هاذي...أصلا كان يعرف الحكاية بالقدا يهبل أكثر...دورت راسي شوية و غزرتلو...كان لاهي بويليام لي حل عينيه و قاعد يغزرلو...عديت الثنية ساكتة باش مندخلش في نقاش آخر معاه...هزيت روحي نزلت أول ما وصلنا و سبقتو لدار...دخل ورايا و حطو في البوسات متاعو يحكي
أركان:إيجا هوني...خلينا نحكيو
أنا:مفما حتى شي نحكيو فيه
دخلت للمطبخ و خليتو...محاولة مني باش نلهي روحي بأي حاجة...لين يمشي هو...قرب مني شوية و وقف ورايا يحكي
أركان:مزلت نستنى في جواب منك
أنا:خليه هو يجاوبك
أركان:إليناااا...حل فمك أحسنلك
تلفت عندو في لحظة و قحرتلو بالوقت...نحكي
أنا:و لا شنوة باش تعمل ؟
أركان:شفما بينك و بينو ؟
أنا:أنت فاااش يهمك...حياتي و أنا حرة فيها
قرب مني شوية...لي خلاني نوخر لتالي...ضربت في الحيط لي ورايا...غزرلي يحكي
أركان:عاود لي قلتو ترااه
أنا:معندكش حق تدخل في حياتي الشخصية
أركان:وليت أنا الغاالط توا ؟ ●●●● كااان باش يبوووسك و أناااا نشوف ؟ ميكوونش عملها معااك قبل توااا ؟
مديت يدي و ضربتو كف من غير ما نحس..منعرفش علاش متقبلتش السؤال متاعو...خاطر معندوش حق يشك فيا و أنو ممكن أنا نعمل حاجة هكا...دزيتو لتالي باش نبعد عليه...كبس عليا و رجعني لتالي يحكي
أركان:مزلت لتوا متحكم في أعصابي و منحبش نغلط معاك...فسرلي لي صااار بكري توااا
أنا:طلب يعرس بيا و أنا واافقت
ضحك بالوقت و جبد روحو شوية...عطاني بظهرو و عاود تلفت عندي يحكي
أركان:ياخي إنتي مستعجلة على نهاايتك ؟
أنا:أنا قررت نبني حيااتي من جديد...عالأقل مانيش باش نكون مجرد رقم في حيااتو
هد عليا في لحظة و شدني من وجهي بالوقت يحكي
أركان:علااااش أنا إمتى إعتبرتك مجرد رقم و لا حتى كنت مجرد مراا عادية في حياااتي...إنتي شنية صااار لمخك...فهمني الطريقة لي قاااعدة تخمم بيهاا
أنا:سيبني و كهوو
جبدت روحي منو و بعدت عليه شوية...دموعي هبطو ورا بعضهم...مزلت نحس في روحي تاعبة و نفسيتي أكثر...قرب مني شوية و جبدني عندو مرة أخرى حاولت نحكي معاه...عنقني بالوقت...و عدا يدو على شعري يحكي
أركان:مقصدتش لي صاار...منحبش نظغط عليك جملة أما أعصابي تلفت من اللي ريتو و من كلامك زادة
غمضت عينيا بالوقت...للحظة حسيت روحي هديت خاصة أنو تعدا برشا وقت على الحاجات لي قاعدة نحس فيها توا معاه...جبدني من عندو شوية و حاوط وجهي بيديه زوز يحكي
أركان:منحبش اللي صار يتكرر مرة أخرى...إنتي ما عندك حتى فرصة مع أي واحد آخر من غيري أنا و كهو و بالنسبة لإيما مفما حتى شي بيني و بينها حكايتي معاها وفات من سنين...منحبش الموضوع هذا يخلق مشاكل بيناتنا...و لا حتى يخليك تبعد عليا باهي نعرف أنو وضعنا تاعب و مستحيل تسامحني بسرعة...أما هذا الكل باش يتصلح مع الوقت يا روحي
عدا صوابعو على خدي و نزل على شفايفي شوية دوب وصل ليهم...وقف مع صوت ويليام...و تبسم يحكي
أركان:الفرق الوحيد...أنو فما قطوس صغير بيناتنا و ظاهر باش يحرم عليا برشا حاجات في المستقبل
نزلت على شفايفي شوية و جبدت روحي منو...عديت يديا زوز على وجهي و رجعت شعري لتالي...قرب عندو و جبدو من البوسات يحكي
أركان:شبيك زادة...شنية صاار ؟
أنا:يمكن جااع مرة أخرى و لازمني نبدلو الحفاظة متاعو زادة
أركان:باهي شد رضعو تراه
أنا:ماكش باش تمشي ؟
أركان:لاا
عديت عينيا على وجهو و شديت ويليام عليه...قربتو عندي و بستو نحكي
أنا:أنا هوني معاك
دخلت لبيتي و رضعتو...فرد وقت لقيت روحي نخمم في كلامو...زعمة بالرسمي مفما حتى علاقة بيناتهم و مدام هكا علاش كان يلوج عليها طول الفترة لي فاتت حطيت ويليام من يدي و بدلتلو حفاظتو و حتى دبشو زادة...وين غطس في النوم...بستو و عديت صوابعي على خدو نحكي
أنا:محلاك يا روحي
دورت راسي شوية وين لقيتو واقف...جنب الباب يغزرلنا...قرب مني شوية يحكي
أركان:هيا إيجا...حتى إنتي لازمك تاكل شوية
أنا:معينيش
نزل عندي شوية و قعد على ساقو مقابلني...كبس على يدي يحكي
أركان:مش لازم تحكي معايا و أنا مانيش باش نظغط عليك...أما زادة منجمش نخليك هكا...خاصة أنو لازمك تتغذى مليح باش متمرضش إنتي زادة
أنا:ويليام بحاجتك معاه ديما
أركان:و أنا باش نكون موجود معاكم في كل لحظة و مستحيل نتخلى عليكم بعد تواا
عديت عينيا على وجهو و غمضت عينيا مع يدو لي تحطت على خدي...باسني من جبيني و كبس على يدي يحكي
أركان:هيا إيجا معايا 
كبس على يدي و وقفني معاه...خلطت عليه من غير حتى كلمة...أصلا نحس في روحي تاعبة عاللخر غزرت لطاولة لي كانت حاضرة...منعرفش إمتى طلب هذوما الكل..جبدلي الكرسي قعدت و قعد مقابلني هزيت عينيا في وجهو...للحظة لقيت روحي نحب نعرف كلشي منو و الأهم حقيقة علاقتو معاها في الشهور لي فااتت الكل كبست على المغرفة في يدي و غزرت لصحن منعرفش من شنوة لازمني نبدا و لا حتى على شنوة لازمني نسأل بالظبط...حسيت روحي في دوامة جديدة أقوى من اللي قبلها...غزرتلو مرة أخرى نحكي
أنا:شنية صار بعد الليلة هذيكا بالظبط ؟
أركان:إني نفيق على واقع إنتي ماكش فيه...كان هو الكابوس الحقيقي
أنا:و مع هكا محاولتش أنك تلقاني جملة
أركان:هذا اللي صورهولك مخك ملاا
أنا:أنا استنيتك...رغم كلشي صار كنت متأكدة أنو أنت باش تلقاني
أركان:أنا كنت موجود في الفيلا بعد ساعات من مغادرتك لبريطانيا
أنا:أنت كنت تعرف إني في لندن
أركان:إنتي قررت تبعد عليا بالقدر هذاا
أنا:أنا كنت مجبورة نحمي الحاجة الوحيدة لي بقاتلي في الدنيا هاذي
أركان:مفما حتى حد ينجم يحمي ولدي من غيري أنا و كهو
أنا:كان عندي أمل أنك تظهر قبل حتى ما نولد...أما إنشغالاتك كانت أكبر من أنك تهتم بينا
أركان:أنا كنت نعرف كل تحركاتك و كل مرة كنت نقرب منك خطوة...أيان يبعدك بعشرة
أنا:أيان مكانش باش يمنعك في أنك تقرب مني
أركان:أما نجح في أنو يسمم أفكاارك و يقنعك بفكرة أنو أنا تخليت عليك...ياخي إنتي سألت وين الممرضة الخاصة بيك ؟
أنا:جيناا ؟
غزرلي من غير حتى كلمة...ضيقت عينيا نحكي
أنا:شنية عملت فيها ؟
أركان:باش تبقى ضيفة عندي أيامات أخرى
أنا:أما جينا ما عندها حتى ذنب في اللي صار
أركان:أما المعلومات لي عندي تقول أنو هي شخص مهم بالنسبة لأيان....و بالنسبة ليا ولات ورقة رابحة
أنا:شنية لي بينك و بينو ؟
أركان:توقعت أنو سيد أيان ماهوش باش يخبي عليك علاقتي بيه
أنا:أنا لي محاولتش نعرف و مكانش يهمني
أركان:ملا خليه يخبرك بالحقيقة...خاطر في الأخير إنتي باش تصدق اللي يقولو هو
أنا:شقصدك ؟
أنا:قصدي واضح...طول الفترة لي بقيت فيها معاه نجح في أنو يخليك تصدق كلشي منو...و إقتنعت بفكرة أنو أنا نسيتك و خليتك وراياا...إنتي حتى متعرفش إني كنت في كل مكان إنتي كنت فيه قبلي و خبى عليك حقيقة إختفاء جينا زادة...خاطر كان يعرف أنو إذا إنتي عرفت إني قريب منك...تخلي كلشي وراك و ترجع لعندي...أما إنتي اخترت أنك تصدقو و تبقى معاه
أنا:مهما كانت حقيقة لي عملو أيان معايا ماهيش باش تأثر فيا...خاطرني خممت في مصلحتي و كهو غير هكا أنت عملت معايا نفس الشي أركان...أنت خليتني نصدق أنك تحبني لدرجة أنك مستحيل تتخلى عليا مهما كان اللي باش يصير بيناتنا...أما فلت يدي أول ما سمعت الحقيقة مني...و من ساعتها و أنا نحس في روحي وحدي...للحظة هاذي و بعد وفاة خويا فقدت الأمان في الناس الكل
أركان:يمكن ردة فعلي كانت قوية...أما مكنتش باش نتخلى عليك و لا حتى نخليك تغيب على عيني لحظة وحدة
أنا:و ويليام ؟ علاش محاولتش تحميه ؟
أركان:اللي صار مع ويليام كان مدبر من داخل القصر
غزرتلو ندرا كيف...و هزيت روحي وقفت في لحظة نحكي
أنا:شقصدك ؟ أنت تعرررف شكون عمل في خويا هكا ؟
هز روحو وقف و قرب مني شوية...شدني من يدي يحكي
أركان:لاا...أما اللي بعث الفونتولين لويليام...واضح أنو من داخل القصر
أنا:أركان خبرني أماانك...شكون عمل في خويا هكاا ؟
أركان:إلينااا...هدي رووحك
أنا:أنت باش تخبرني بكلشي تعرفو تواا...مااكش باش تخبي عليا حقيقة اللي صااار
أركان:هدي روووحك
هزيت عينيا في وجهو و سكت...غزرلي يحكي
أركان:إذا أنا خبرتك توا...إنتي باش تعقد الأمور صدقني باش تعرف كلشي في الوقت المناسب
مديت يديا زوز و دزيتو لتالي بكل قوتي...نحكي
أنا:أنت متنجمش تخبي عليااا حاااجة تتعلق بموت خويااا...أنا نحب نعرف كلشي توااا
أركان:إلينااا أسمعني...إذا تحب حق خووك يرجع لازمك تتعاون معايا...مش تتصرف بالطريقة هاذي
أنا:أنا حكيت مع إسكندر و باش يحل تحقيق خاص في كلشي صااار و أنت باااش تعطيه إذن يدخل للقصر متااعك زااادة
جبدت روحي منو و دخلت لبيت ويليام...دموعي هبطو مع كل ذكرى جات على عيني...دخل ورايا بالوقت..تلفت عندو نحكي
أنا:ويليام ماا عندو حتى ذنب في اللي صار الكل إحنا جينا هوني باش نبعدو على مشاكل غالي...أما ظاهر عملنا أكبر غلطة...لو كنت نعرف أنو علاقتي بيك باش تكلفني روح خويا مكنتش باش نقرب منك جملة
جبدني من يدي و عاود عنقني...عدا يدو على شعري يحكي
أركان:و أنا مانيش باش نسامح روحي قبل ما نعرف شكون اللي عمل هكا و علاش...في الأول أنا باش نتأكد من شكوكي الكل و بعدها صدقني باش نخبرك بكلشي و نخليك تاخو حق خوك بيدك
كبست على أجنابو من غير حتى كلمة...معادش نعرف إذا نجم ناثق فيه مرة أخرى و لا لا...أما بالنسبة ليا معادش عندي ملجأ آخر من غيرو بعد خوياا...هذا اللي يخليني نحبو يكون موجود في كل لحظة معايا كبس على ظهري يحكي
أركان:و أنا نقول لشكون خرج الكتكوت متاعك لي يبكي كل شوية
تبسمت و كبست عليه أكثر...فرد وقت خذيت نفس نحكي
أنا:أنت باش تخلي إسكندر يعاوني و ماكش باش تمنعو يدخل لقصرك ؟
أركان:أكيد...كلشي تحب عليه باش يصير بعد توا يا روحي
غرس يدو في شعري و باسني من راسي فرد وقت وين لقيت روحي نخمم في كلامو...زعمة شكون عندو مصلحة يتخلص من ويليام و هو في شكون قاعد يشك و علاش ميحبش يحكي...حتى أيان متوقعتش يخبي عليا الحاجات هذوما الكل و يكذب عليا زادة...دخلت في دوامة أخرى من الأسئلة و مع هكا بقيت ساكتة حتى إني محاولتش نبعد عليه و لا نجبد روحي منو
إذا كان كلامو صحيح بخصوص إيما و علاقتنا و ولدنا لازمو يثبتهولي المرة هاذي نحب نتأكد أنو صادق معايا و مهما صار ماهوش باش يتخلى عليا مرة أخرى.