آفْرُودِيتْ 🦢

الحلقة السابعة و التسعون 🦢

🔸️حلقة 97
🔸️جينا_تحكي:
حليت عينيا شوية و تمددت في بلاصتي...منعرفش قداش رقدت بالظبط...أما حسيت روحي إرتحت على أمس...وين بديت نسترجع في الأحداث لي صارت معايا...هزيت روحي و قعدت بالوقت...حطيت يديا زوز على وجهي أول ما تذكرت لي هو شافني عارية...من فوق مرة أخرى...و مع هكا تعشيت و رقدت كأنو ما صاار شي...كأني كنت مخدرة وقتها و توا وفى مفعول البنج...نزلت يديا شوية و تروهجت أكثر كي شفتو راقد على الفوتاي...متوقعتش أنو باش يبقى...هزيت روحي بالزربة و وقفت...باش نمشي لبيت البانو و منها نحاول نستوعب اللي صار و نهدي روحي...دعثرت في الكرسي متاع الكوافوز...وين حل عينيه و قام مروهج...غزرت للخاتم لي طاح من يدو حك عينيه و غزرلي يحكي
أيان:شفماا ؟
أنا:شبيك راقد هوني ؟ على أساس كنت باش تمشي
أيان:و بدلت رايي...إنتي شحالك توا ؟
أنا:لباااس علياا
زربت في خطواتي لبيت البانو و سكرت الباب في وجهو...حليت الكاب باش ناخو دوش...أما تصدمت أكثر كي لقيت روحي من غير حتى قطعة...سكرتو مرة أخرى و خرجت عندو نحكي
أنا:أياااان
أيان:شبييك تصيح ؟
أنا:أنت شنية عملت ؟
غزرلي مستغرب و دور راسو على المكان قدامو و عاود غزرلي يحكي
أيان:شنية عملت ؟
أنا:أنت تعرررف بالقدا شنية عملت
أيان:الصبر يا ربي...جينا ياخي إنتي كنت تحلم بيا شعندي عملت ؟ هاني كنت راقد كيفك
أنا:أنت كيفاش تتعدا حدودك معايا بالطريقة هااذي ؟
أيان:أناا ؟
أنا:جاوبني تواا
أيان:حدود شنية لي قاعدة تحكي عليهم ؟
أنا:أنت تعرف على شنوة نحكي...علاااش جيت للغرفة متاعي أصلاا و سمحت لروحك تشوفني هكاا
أيان:مفهمتكش
أنا:بالله...مش أنت لي نحيتلي الغطا متاعي ليلة أمس
أيان:سخانتك كانت مرتفعة...غير هكا أناا ما عندي حتى ذنب كي إنتي رقدت من غير ملابس
أنا:و شنية بخصوص القطعة لأخرى ؟
أيان:قطعة شنية ؟
مديت يديا زوز و رجعت شعري لتالي...محاولة مني باش نهدي روحي شوية و قحرتلو نحكي
أنا:أيااان...متحاولش تلعب بأعصابي أكثر من هكاا
أيان:أنا بالرسمي منعرفش على شنوة تحكي بالظبط خاطر بالرسمي أنا ما عملت شي و إنتي كنت من غير حتى قطعة
عديت عينيا على وجهو...مع خدودي لي حسيتهم باش يطرشقو...سكت شوية و تذكرت إني نحيت القطعة الأخيرة...بعد ما تقلقت منها و رقدت خاطرني عجزت نقوم نبدل و متوقعتش أنو هو باش يجي أصلا و معملتش حسابو...بعد عليا شوية...نزلت على شفايفي باش نتمالك روحي و نخرج من الموقف لي حطيت روحي فيه...دورت راسي مع صوتو يحكي
أيان:تقصد في القطعة هااذي ؟
حليت عينيا على وسعهم مصدومة من الفازة...قربت منو شوية باش نفكها منو...بعد يدو شوية يحكي
أيان:أنا بالرسمي مكنتش نعرف عليها...أماا مكنتش باش نمانع لو نحيتها أناا
أنا:سااا-قط و متحشمش زادة
أيان:غير هكا إنتي من شنية حاشمة ؟ هاذي مش أول مرة نشوفك فيها و لا نسيت المسبح لي كنت تنزل ليه من غير حتى قطعة
عديت عينيا على وجهو مصدومة...متوقعتش أنو كان يراقبني و لا حتى أنو شاافني زادة...دزيتو بقوة و فكيتها من يدو...رجعت لتالي و زربت في خطواتي لبيت البانو...سكرت الباب من داخل و تكيت عليها حطيت يدي على قلبي لي حسيتو باش يخرج من بقعتو...خلط عليا و دق على الباب...يضحك و يحكي فرد وقت
أيان:بااهي...أخرج تواا خلينا نحكيو
أنا:أمشي من هووني و كهو...أصلا مكنتش نعرف أنك ساا-قط و تراقب أختك من بعيد و بلا ما تحشم زادة
أيان:أما إنتي ماكش أختي...يعني ما عملت حتى شي غاالط
أنا:و تبرر لروحك زادة ؟ الحق علياا خاطرني كنت ناثق فيك و
أيان:و شنية ؟
أنا:حتى شي...أمشي من هووني و كهوو
أيان:شبيك على أعصابك ؟ أصلا إنتي نسيت قطعة أخرى هوني
أنا:أيااان
أيان:الحق علياا نخبر فيك
غطيت وجهي مرة أخرى...منعرفش علاش حسيتو يحب يلعب بأعصابي...غير هكا دخلت بعضي أكثر و تروهجت من اللي صار معايا...لدرجة إني منجمتش نتحرك من بقعتي...حتى بعد ما صوتو تقص برا خذيت نفس و نحيت الكاب...وقفت قدام المرايا فكرة أنو هو شافني أكثر من مرة...خلاتني نثبت في بدني أكثر...نفخت بقوة خاطرني مزلت نخمم فيه و فديت من الأفكار لي كانت تدور في راسي...منعرفش علاش وليت نسأل في روحي إذا كنت باش نعجبو و لا لا وسط هذا الكل متوقعتش أنو هو يعمل هكا خاطرني كنت ننزل للمسبح...وقت نتأكد بالقدا أنو مفما حتى حد يراقب فيا...حطيت يديا زوز على خدودي و رجعت لتالي...حليت الما و دخلت تحتو كنت بحاجة إني ناخو دوش باش نهرب من الأفكار لي حاوطتني و سيطرت عليا...أما وين نغمض عينيا يتكرر المشهد قدامي لدرجة منعرفش قداش من مرة سبيتو في داخلي...خذيت نفس و لفيت المتشفة على بدني...حطيت وذني على الباب و حليتها بعد ما تأكدت أنو مفما حتى صوت برا مديت خطوة لبرا وين خطفني من يدي بقوة و حصرني مع الحيط ضيق عينيه و غزرلي يحكي
أيان:ملا أنا ساا-قط ؟
أنا:و متحشمش زاادة
أيان:بالله ؟
هزيتلو براسي إيه...رغم حسيت أنو دقات قلبي باش تفضحني قدامو...هزني و حطني و ضيق عينيه يحكي
أيان:من إمتى تحكي معايا بالطريقة هاذي إنتي ؟
أنا:من تواا ؟
حاولت نبعد عليه...كبس على جنبي و حصرني أكثر دخلت بعضي أكثر مع أنفاسو لي ضربت في وجهي و خلاتني عاجزة قدامو...رغم إني منحبش نتحط في نفس الموقف معاه و نظطر نعيش نفس اللي صار معاياا...هزيت عينيا في وجهو...غزرلي ندرا كيف و عدا أنفو على شعري...من غير ما ينطق بحتى حرف آخر.
نزلت على شفايفي شوية و حطيت يدي على صدرو محاولة مني باش نخليه يبعد...نزل لوذني شوية يحكي
أيان:محلاها ريحتك...مع إني متعود بغيرها...غمضت عينيا مروهجة من كلامو...متوقعتش يفيق أني بدلت نوع الشامبو متاعي...كبست على صدرو أكثر نحكي
أنا:أ..أيان...أبعد علياا تواا
أيان:تحبني نبعد بالحق ؟
عديت عينيا على وجهو من غير حتى كلمة..منعرفش علاش لقيت روحي عاجزة باش نجاوبو...مد يدو لأخرى و بعدلي خصلات شعري لي لصقت على خدي و نزل بصوابعو لشفايفي يحكي
أيان:جااوبني جيناا
هزيتلو براسي إيه...كبست على شفايفي أكثر يحكي
أيان:نحب نسمعها منك...قولها و إنتي تغزر لعينيا
خذيت نفس طويل و هزيت عينيا في وجهو...نحكي
أنا:أ..أبعد علياا تواا..أ
تبسم و نزل على شفايفي...قبل ما نكمل ننطق بإسمو فرد وقت نزل على جنبي أكثر...وين لقيت روحي محصورة بين يديه و شفايفو في نفس الوقت و مع إني رافضة الوضع لي بيناتنا أما لقيت روحي خاضعة ليه مرة أخرى و هاربة من أفكاري لي تقولي أبعد عليه و مترضخش ليه أكثر من هكا...خاطر اللي قاعد يصير بيناتكم غالط و ميجيش...كبست على المنشفة لي تحلت أول ما نزل لرقبتي...كبست على صدرو أكثر...من غير ما نفيق إني ظغطت على مكان العملية جبد روحو مني شوية و غمض عينيه مروهج...حتى يدو ترخفت على جنبي...أصلا كنت نعرف لي هو مزال يعاني خاطر ماهوش يهتم بروحو...جبدت روحي شوية و بعدت عليه نحكي
أنا:أ..أنت لازمك تمشي من هوني توا
كبست على المنشفة أكثر...أصلا دخلت بعضي أكثر من حالتي...غزرلي يحكي
أيان:ألبس دبشك و إيجا...مانيش باش نمشي قبل ما نحكيو
دخلت لغرفة الدريسينغ...هاربة من نظراتو ليا...و غزرت للمرايا لي قابلتني...وين كان وجهي أحمر باش يطرشق متوقعتش أنو باش يصير فيا هذا الكل من قربو...قعدت على الفوتاي باش نجم نهدي أنفاسي لي غلبتني...و لبست حوايجي بعد ما حسيت روحي إرتحت شوية رجعت شعري لتالي و خرجت عندو وين كان قاعد على الفوتاي...هز راسو شوية و غزرلي ندرا كيف...يحكي
أيان:إيجاا هوني
أنا:كيفاش تحس في روحك توا ؟
أيان:أنا لبااس...هاني باش نرتاح مع الوقت
أنا:مش صحيح...أنت مزلت تضر في روحك و إذا مكملتش الكونترولات متاعك...ممكن تظطر لعملية أخرى
أيان:والله كان تهتم بيا...نرتاح بسرعة
غزرتلو من غير حتى كلمة...تبسم و حط يدو بجنبو يحكي
أيان:هياا إيجاا...خلينا نحكيو من غير ما نستلمو بعضناا
خذيت نفس و قربت منو...قعدت بجنبو و كبست على يديا زوز...باش نخفي التوتر متاعي...هز عينيه في وجهي يحكي
أيان:خلينا نحكيو جينا و نجاوبو بعضنا بصراحة نظن هذا أحسن شي لازم يصير في وضعنا تواا
هزيتلو براسي باهي...يمكن كلامو صحيح و الحوار هذا أحسن خل باش نحطو النقاط على الحروف نزلت راسي شوية و غزرت للخاتم لي هزو في يدو مرة أخرى...حطو على الطاولة يحكي
أيان:مزلت معاه ؟
أنا:لااا
ضيق عينيه مستغرب و غزرلي ندرا كيف...يحكي
أيان:أعطيني إجابة واضحة جينا
أنا:أنا قابلت توماس البارح و حكينا مع بعضنا بخصوص اللي صار آخر مرة...و أنا خبرتو بالحقيقة كاملة و باللي صار بيناتنا بالظبط و في نفس الوقت فسخنا علاقتناا خاطرني غلطت في حقو برشاا و معادش نحب نظلمو معايا أكثر من هكاا
سكت شوية و عدا عينيه على وجهي بالوقت...يحكي
أيان:و كنت باش تظلمني أنا زادة بقرارك
هزيتلو براسي لا...و كبست على يديا أكثر...نحكي
أنا:لااا...أنت مكنتش باش تلاحظ غيابي و لا حبي ليك...لولا الخطوة اللي عملتها معاك في المستشفى
قرب مني شوية و كبس على يديا زوز في لحظة و غزرلي يحكي
أيان:إنتي تعرف لي الكلام هذا مش صحيح جيناا تعرف أنو أنا منتخلاش عليك...مهما كان وضعي
أنا:بااهي لو أنا مقلتش لي قلتو نهارتهاا...أنت كنت باش تلاحظ وجودي كأنثى تكمل حياتك معاها مش مجرد أخت تربيت و كبرت معاها ؟
عديت عينيا على وجهو...نستنى فيه يجاوبني منعرفش علاش كنت نستنى في الكلام اللي باش يقولو توا...أكثر من أي شي آخر...كبس على يديا أكثر يحكي
أيان:أنا كنت ضايع طول الوقت...إنتي تعرف انو حياتي مكانتش سهلة ولولا عيلتك مكنتش باش نجم ندبر أموري و لا نداوي باباا زادة...و لا حتى نركز في خدمتي و لا في أي حاجة أخرى...وسط هذا الكل إنتي كنت الملجأ الوحيد اللي نهرب ليه من الجوجمة اللي كانت في حياتي...إنتي الوحيدة لي كنت تفهمني و تهديني و تسمعني زادة...و بعد خسارتنا للكل...كنت نخاف من فكرة أنو فما شكون باش يقتحم العالم متاعنا و يكون جزء منو
حك جبينو شوية و عاود غزرلي...يحكي
أيان:بااهي...أنا كنت ساا-قط معاك وقت كنت نراقبك من غير علمك...رغم كنت نعرف أني غالط...غير هكا أنا كنت عائق قدام كل شخص يقرب منك و معطيتكش فرصة باش تكتشف روحك و لا حتى تشوف ثنية أخرى غير ثنيتي...خاطر الحقيقة نعتبرك ملكية خاصة منحبش شكون يتعدا حدودو معاك و لا حتى يقرب منك...خلي أنو يمسك و لا يشوف بدنك...أنا كنت أنااني معاك...و يمكن لولا الخطوة متاعك كنت باش ناخو وقت أطول باش نعرف اللي نحب عليه بالظبط...خاطر الشي الوحيد اللي كان يهمني هو أنك معايا و بجنبي طول الوقت جينا
عديت عينيا على تفاصيل وجهو...مستغربة من الكلام لي متوقعتش إني نسمعو من عندو و اللي خلاني عاجزة باش نرد عليه...خاطرني معرفتش شنية لازمني نقول بالظبط...حسيت روحي ضايعة أكثر و ما نجمت نعمل حتى شي من غير إني نغزرلو و كهو...خذيت نفس و جبدت يديا زوز منو...رجعت شعري لتالي...محاولة مني باش نهدي روحي و نستوعب الكلام اللي سمعتو منو...عديت عينيا على وجهو نحكي
أنا:يعني كان فما إحتمال أنك ترتبط و تعرس زادة ؟
أيان:أنا كنت مشوش فترة طويلة و إحتمال إني نرتبط بعيد برشاا
أنا:أما كنت باش تعرس بإلينا
أيان:إلينا تابعة لأركان و إنتي تعرف أنو إنتقا-مي كان أهم منها
أنا:كنت مستعد تتخلى على أركان في سبيل أنك تبقى معاها...يعني متنجمش تنكر حقيقة إعجابك بيها
أيان:صحيح...أما لا أركان و لا إلينا و لا أي شخص آخر في دنيا يتقارن بيك
أنا:نعرف إني مهمة ليك و أنك متفرطش فياا...أماا ياا أيان مشاعرك كانت مختلفة و ماهيش باش تتبدل بين ليلة و نهار...يعني لو أنت على علاقة توا و لا عرست بإلينا و لا أي طفلة غيرها مكنتش باش تمانع علاقتي مع توماس و لا مع أي واحد غيرو
أيان:كنت باش نعمل نفس الشي جينا...أنانيتي ناحيتك كانت باش تغلبني...أنا ما ريتك مع حتى راجل قبل و مانيش باش نخليك تكون...حتى لو حرقت الدنيا الكل
أنا:معناها أنت سا-قط و أناني زادة...و كلشي تحب عليه هو أنك تحب تتحكم في حياتي و كهو
غزرلي ندرا كيف...وين تذكرت الكلام لي قالو بكري وقفت في لحظة و بعدت عليه نحكي
أنا:كلامك هذا و فهمتوو...أما كيفاش تعطي الحق لروحك أنك ترااقبني ؟
أيان:منحبش نحكي في الموضوع هذا توا
أنا:لاا باش نحكيو...خاطر معندكش الحق تعمل حاجة هكا و تتطفل علياا...انا وقت كنت ننزل للمسبح نتأكد أنو مفما حتى حد يراقب فياا
أيان:كان لازمك تعمل حساب أنو نافذة قاعة الرياضة مقابلة المسبح
أنا:أما اللي نعرفو زادة أنها طول الوقت مسكرة و أنا مكنتش ننزل للمسبح كي تبدا موجود في الفيلا
أيان:ملا كان لازمك تاخو بالك أكثر
أنا:متغزرليش هكااا...عيب اللي عملتو و ميجيش في حق أختك يااا وا-طي
أيان:توا وليت خوك ؟
أنا:كنت هكا طول الوقت
بعدت عليه و عطيتو بظهري باش نخرج...خلط عليا بالوقت...حطو يدو على كرشي و جبدني عندو عنقني من تالي و حط راسو على كتفي يحكي
أيان:متمشيش
أنا:سيبني أياان
أيان:مكنتش نجم نمنع روحي و مكنتش نعرف علاش كنت نراقبك بالطريقة هذيكا و في نفس الوقت كنت نخاف من فكرة إني نخيبلك ظنك و نخليك تحس بعدم الأمان معايا...غير هكا أنا نحبك تعطيني فرصة أخرى توا...فرصة مختلفة على قبل خليني نكون الشخص لي تحب عليه
نزلت على شفايفي شوية و حطيت يديا زوز على يدو لي كانت فوق كرشي...كبست عليها و نزلتها شوية...فرد وقت تلفت عندو و هزيت عينيا في وجهو نحكي
أنا:بااهي...موافقة...أنا باش نعطيك الفرصة هاذي أياان أما الفرصة هاذي باش تكون ليك وحدك
أيان:مفهمتكش
أنا:أنت باش تاخو وقتك و تتأكد من مشاعرك ناحيتي منحبكش دخلني في الصراع متاعك مع روحك و قلبك...منحبش نعيش تجربة خايبة معاك نحبك تتأكد أنو أنت بالحق مستعد باش تكمل حياتك معايا و اللي أنت باش تحبني بالطريقة لي حبيتك بيها و الأهم تتأكد أنو أنت نسيتها
أيان:أنا نعرف شنية لي نحب عليه بالظبط يا روحي و مع هكا باش نعمل اللي تحب عليه الكل...أنا باش نحبك و نعشقك من أول و جديد...كأنو تعرفنا على بعضنا في اللحظة هاذي
تبسمت و هزيتلو براسي...حبيت أنو تكون عندنا فرصة من البداية و ما عندها حتى صلة بالماضي..مد يديه زوز و رجعلي شعري لتالي...يحكي
أيان:نحب الكل يعرف أنك وليت معايا توا و خاصة توماس...يكفيني لي شفتو و ما نحب حتى حد يقرب منك
عديت عينيا على تفاصيل وجهو و حطيت يدي على صدرو نحكي
أنا:أما مزلت موافقتش عليك سيد أيان
أيان:معندكش حل آخر صغرونتي
جيت باش نحكي...غمض عينيه كأنو مقلق من الوجيعة...حليت الشوميز متاعو بالوقت و غزرت لمكان العملية نحكي
أنا:أنت وعدتني أنك تهتم بروحك
أيان:أنا لبااس جيناا
أنا:إذا موفيتش بوعدك كيفاش ملا باش نعطيك فرصة ؟
أيان:بااهي...هاني باش نبدا نعمل كنترولات جديدة و كان تحب تكون المشرفة معنديش مانع
أنا:باهي ملا من غدوة إيجا للكلينيك
أيان:فما أوامر أخرى
أنا:أمشي لدارك توا
أيان:هذيكا دارنا و هاذي نفس الشي...أي بلاصة تجمعنا هي لينا الزوز...و وين تكوني إنتي نكوون أناا واضح ؟
أنا:إذا بقيت معايا طول الوقت...ماكش باش تلقى فرصة و تفهم روحك
أيان:تهنى...نعرف ندبر أموري وحدي...و توا إنتي باش تنشف شعرك و تشد فرشك
أنا:أنا لباس...جيست جعت شوية
أيان:تنجم تخرج ؟
هزيتلو براسي إيه...قرصني من خدي و تبسم يحكي
أيان:باهي برشا ملاا...حضر روحك باش نمشيو
أنا:وين ؟
أيان:لأكثر بلاصة تحبها عزيزتي
أنا:باهي موافقة
أيان:نستنى فيك ملا
تبسمت و هزيتلو براسي إيه...دخلت لغرفة الدريسينغ وين لقيت روحي نبدل في دبشي أكثر من مرة كأني باش نخرج معاه لأول مرة...منعرفش علاش داخلة بعضي لهدرجة...و لا حتى علاش متوترة...كأنو خارجين في موعد...هزيت راسي شوية...غزرت لروحي و تبسمت بالوقت...حطيت يديا زوز على وجهي و تنهدت براحة منعرفش إذا الخطوة هاذي صحيحة و لالا...أما يمكن هي الفرصة الوحيدة لعلاقتنا...و بالحق باش تكون عندنا حياة مع بعضنا بعيد على كلشي عشناه من قبل...أصلا علاقتنا كانت حاجة مستحيلة بالنسبة ليا...فقت من سرحتي كي لقيتو ينادي عليا...وين فقت بروحي إني طولت برشا من غير حتى ما نختار شنوة نلبس...تنهدت بقوة و حضرت روحي بالزربة...من غير ما نخلي الأفكار لي في مخي تسيطر علياا أكثر من هكا.