آفْرُودِيتْ 🦢

الحلقة الواحدة و السبعون🦢

🔸️حلقة 71
كبست على يديه زوز و سحبت الجثة لباب الثاني متاع المعمل و اللي كان أقرب لحديقة دارهم..وصلتو ليها بعد ما تأكدت أنو مفما حتى حد برا و حطيتو بنفس الطريقة لي وقع بيها...و حطيت سلاحو بين يديه خذيت المضرب و الوشاح معايا...دورت كرهبتو و محيت آثارها جنب المعمل و دقيت باب دارهم...حلت عليا بالوقت تحكي
نورا:ويليام ؟ فاش تعمل هوني ؟
أنا:غ..غالي...يحب يشووفك تواا
نورا:غاالي ؟
أنا:إيجاا تواا
نورا:أنت تعرف أني وحدي في الدار...عيلتي غايبين ليلة
أنا:نعرف...أما لازمك تجي معايا...هو باش ياخو إلينا معااه و طلب يحكي معاك
نورا:و أنت شبيك داخل بعضك هكا ؟
أنا:قتلك باااش ياخو إلينا معااه و إنتي باش تحاول تهديه مدام فماا علاقة بيناتكم...أكيد باش يسمعك مدام طلب يشوفك
نورا:وينو توا ؟
أنا:في الحديقة متاعكم...أكيد باش يسمع كلاامك و يخليها لين ترتاح على الأقل...نورا إنتي مجبورة تعاون إلينا المرة هاذي...عالأقل نهربها من هوني و يبقى ليك وحدك
نورا:مانيش باش نجم نعاونها...مدام غالي يحب عليها ماهوش باش يسيبها قبل ما ياخو لي يحب عليه منها
أنا:أحكي معاه المرة هاذي و كهو
سكرت الباب و خلطت عليا...وقفت مصدومة تحكي
نورا:ويليام شنية عملت ؟
أنا:أنااا ؟
دارت عندي في لحظة...تبسمت و قربت منها شوية نحكي
أنا:إنتي متهمة بموت غالي الرازي
نورا:أنت فااااش تحكي ؟
نزلت عندو بالوقت تتفحص فيه...نزلت عندها بالوقت نحكي
أنا:الشخص الوحيد لي حبيتو إنتي اللي باش تتحمل نتيجة وفاتو
نورا:و..ويليام أنت فااش تعمل ياخي ؟
أنا:إنتي كنت وراا كلشي نوراا...إنتي لي عاونتو باش يخط-ف إلينا و خبيت علينا و على الشرطة الحقيقة و كنت تاخو منو فلوس مقابل أنك تظلل الكل...إنتي خنت ثقة صديقتك الوحيدة...كنت تعرف أنو هو قاعد يعذ-ب فيها و يتمتع ببدنها و مع هكا ما تحرك فيك حتى شي خاطر وعدك أنو هو باش يكون ليك بعد ما يتخلص منها
نورا:أنت من وين عرفت هذا الكل ؟
أنا:للأسف رغم اللي عملتو...أما معرفتش تحمي الحاسوب متاعك و تليفونك من الإختراق
نورا:أنت متنجمش تعمل فيا هكاا
أنا:صدقني أنا نجم نعمل الأسوء من هكاا...في الأخير أنا شخص مريض و متوحد و حتى حد ماهو باش يصدق كلاامك
نورا:شنوة باش تعمل فياا ؟
أنا:أنا كنت مغروم بيك نوراا و للأسف منجمش نخليك تخلط عليه...أكا علاش عقابك باش يكون أسوء من الموت
نورا:ويليام...أماانك خليني نمشي من هوني
مديت يدي شوية...عديت صوابعي على خدها و خدرتها بيدي لأخرى...و هزيتها بين يديا...بعد ما خليت بصماتها على المضرب و الوشاح زادة..كيما ظطريت نخلي جرح على جبينها و قبضات يدي على معصمها...كيما خبشتو من رقبتو بأظافرها و رجعتها لدارهم...الأحسن أنو عيلتها كانو مسافرين بسبب مرض جدها...دخلتها لبيتها...حطيتها في وسط سريرها...عديت صوابعي فوق الضربة على جبينها و نزلت بيهم لشفايفها...و بستها من جبينها نحكي
أنا:الوداع جوريتي
هزيت روحي وقفت...و حطيت الوشاح في وسط دبشها...رجعت للمعمل و نظفت كلشي...و دخلت لدار قربت مني في لحظة تحكي
إلينا:شنية عملت ؟ وين حطيت الجثة متاعو
أنا:متسألنيش إليناا...مانيش باش نجاوبك على حتى شي يخص الليلة هاذي...يكون أحسن لو متعرفش تفاصيل اللي صار
إلينا:إمتى باش نمشيو من هوني ؟
أنا:مناش باش نمشيو قبل ما تتخلص من التوتر لي إنتي فيه
إلينا:أنااا خاايفة برشاا ويليام
أنا:صدقني إحنا باش نكونو بخير...يكفي أنك تتخلص من التوتر هذا...خاطر عالأغلب فما تحقيقات باش تصير و إحنا من ضمنها..خليك قوية إذا تحب نخرجو من هوني...باهي ؟
إلينا:على أساس إحنا باش نساافرو ؟
أنا:السفر بسرعة يعرضنا لشك..يكفي أنك تتصرف كيما وصيتك و كهو..إنتي عاجزة توا و متنجمش تقوم من فرشك و حتى حروقك مزال مبراتش واضح ؟
حاوطت وجها بيديا زوز و بستها من جبينها...و صار اللي توقعتو..إحنا خضعنا لتحقيقات الروتينية بالنسبة لإلينا كانت خارجة من المستشفى من مدة قريبة و قوتها مكانتش كافية باش تقضي عليه..أما أنا بالنسبة ليهم مجرد مختل و متوحد ماهوش باش يقوى على جر-يمة كاملة...أما بابا ليلتها رجع متأخر و رجع للمكان لي كان فيه..في نفس الليلة باش يثبت عدم وجودو وقت الجر-يمة و حتى بعد التحقيقات ما كان عندنا حتى شي يدل على أنو كان موجود في دارنا الأدلة و البصمات الكل كانت تدينها هي و كهو خاصة بعد ما لقاو الرسائل لي بيناتهم و اللي كانت أغلبها على إلينا و رسالة تهد-يد بعثتها من الحساب متاعو ليها هي قبل ما نحط الجثة في حديقة دارهم باش يظهر أنو جا ليها من الأول و لسبب هذا تسكرت القضية بسرعة و هذا الكل مكانتش تعرف بيه إلينا خاطر بقات بعيدة على بقية التحقيقات بسبب نفسيتها لي كانت تاعبة برشا و الجروح لي أثرت عليها و تقريرها الطبي خلى  الشرطة متظغطش عليها في التحقيقات و هذا كان سبب آخر باش يبرئنا...و سافرنا بعد أسبوع واحد من الحكم على نورا...منعرفش كيفاش نجمت نسيطر على الوضع و نقنع إلينا أنو التحقيق مع نورا كان روتيني و كهو أما نجحت...نجحت في إني ناخو حقي منهم الزوز و نخلي أختي تبدا حياة جديدة بعيدة على الكل.
🔸️أند_باك:
غضمت عينيا وين طاحت دمعة مني على آخر الحروف لي قريتها..الصدمة لي حسيت بيها كانت مختلفة برشا منعرفش إذا نتغشش من ويليام خاطر عمل حاجة هكا من غير ما يشاورني...كيما منعرفش إذا نورا تستهل لي صار فيها..خاصة أنها كانت سبب ورا كلشي صار معايا من غير ما تعطف عليا جملة...تهزيت و تحطيت مع صوت الباب...سكرت المذكرة بالوقت...و هزيت روحي وقفت...خذيت نفس طويل قبل ما نقرب ناحية الباب و نحلها...استرجعت أنفاسي كي لقيتو هو...ضيق عينيه يحكي
أركان:إنتي لباس ؟
هزيتلو براسي إيه و بعدت على جنب باش نخليه يدخل...حط أكياس الأكل من يدو و قرب مني شوية يحكي
أركان:شنية صاار ؟
أنا:حتى شي مهم
أركان:ملا شبي وجهك أصفر هكا
أنا:تاعبة شوية و كهو...ويليام في بيتي
ضيق عينيه و دخل للبيت...زربت في خطواتي و رجعت للمذكرة...هزيتها من الطاولة و خبيتها منعرفش على الحقائق لي باش تظهر فيها زادة..أصلا لتو نحس في روحي مروهجة من اللي عرفتو حطيت العشا في الصحون و قعدت نستنى فيه..قرب مني و قعد بجنبي يحكي
أركان:عرفت حاجة من المذكرة ؟
هزيتلو براسي لا و كبست على الشوكة..رغم أنو شهيتي مسدودة...كبس على يدي في لحظة و غزرلي يحكي
أركان:أغزرلي هوني...مهما كان اللي باش يصير أنا معااك و مانيش باش نتخلى عليك جملة
جيت باش نحكي قص عليا صوت ويليام من جديد تبسم يحكي
أركان:خليك هوني...تو نشوفو أنا
هزيتلو براسي إيه...دخل عندو و جابو معاه...سكت و هو في حضنو...تبسمت و نزلت راسي لصحن...دوب كليت شوية...نحس في أفكاري الكل تظغط عليا مديت يديا زوز و شديت ويليام من حضنو خاطر بدا يبكي من جديد و رضعتو بالوقت...أصلا مكانش عندي جهد باش نقوم...عديت صوابعي على خدو و تبسمت نحكي
أنا:ولدي كان أحلى شي صار معايا في السنين لي فاتت من بعدك أنت
غزرلي ندرا كيف...و عدا صوابعو على خدي في لحظة...يحكي
أركان:إنتي أحلى صدفة في حياتي الكل إلينا
تبسمت و نزلت راسي لي ويليام...سيب صدري بعد ما شبع...خذيت نفس نحكي
أنا:عالأغلب باش يعاود يرقد...هاني باش نرجعو لسريرو
أركان:هات عليك
حطيتو بين يديه...وين بقى معاه شوية...لين غفى في حضنو...كبس عليه و هزو لسريرو...خلطت عليه بالوقت و وقفت نغزرلو...نسمع فيه يحكي معاه
أركان:و أنت أحلى هدية في حياتي
خذيت نفس و قربت منو شوية...تلفت عندي بالوقت و حاوط وجهي بيديه زوز يحكي
أركان:ماكش باش تخبرني شبي حالتك هكا ؟
أنا:خليك ليلة هوني معاياا...منحبش نبقى وحدي
أركان:شنية صاار يا روحي ؟
أنا:أنا بحاجتك معايا توا...و إلا مانيش باش نجم نرقد ليلة هاذي أركاان
عدا يدو على شعري و كبس على خدي يحكي
أركان:أنا باش نكون معاك في كل لحظة
تبسمت بالوقت...وين قرب مني أكثر و عنقني..دورت يديا زوز على ظهرو و خذيت نفس من ريحتو وجودو معايا توا...يخليني نتخلص من الخوف و التوتر لي حسيت بيهم في الساعات لي فاتت...أصلا مانيش باش نجم نرتاح مع أي شخص آخر من غيرو هو و كهو باسني من راسي و جبدني من عندو شوية يحكي
أركان:إنتي بحاجة راحة إلينا...أكا علاش لازمك ترقد شوية و ما تخمم في حتى شي آخر
هزيتلو براسي باهي و جبدت روحي شوية منو..كبس على يدي و قعدني على السرير...نحى الفاست متاعو و قعد بجنبي...عدا صوابعو على خدي يحكي
أركان:مهما كان لي عرفتو...تذكر أنو إنتي ماكش وحدك و مانيش باش نخليك وحدك مرة أخرى...مهما كان اللي باش يصير بيناتنا
قرب مني أكثر و باسني من جبيني...خذيت نفس نحكي
أنا:خليك معاياا 
جبد روحو مني شوية و جبدني من يدي أول ما تسطح حطيت راسي على صدرو و غمضت عينيا مع صوابعو لي سرحت في شعري...فرد وقت نسمع فيه يحكي
أركان:مهما كان اللي يوجع فيك...نحبك تشاركو معايا حتى لو  كنت موجوعة مني و ماكش باش تسامحني واضح يا روحي ؟
مديت يدي شوية و حطيتها على صدرو...نحكي
أنا:وقت كنت مسجونة عند غالي...أحلامي الكل تسجنت معايا...لدرجة فاتت عليا لحظات صدقت فيها أنو أنا مانيش باش نتحرر منو و حياتي باش تكون ليه و ماهيش باش تكون عندي سلطة على حتى قرار يخصني...حتى بدني تعود على التعذ-يب متاعو و الحاجات لي كنت نشوفها غريبة منو تعودت عليها خاطرني ولا مرة توقعت إني باش نخرج من الغرفة هذيكا
كبس على يدي و باسني منها بالوقت...خذيت نفس و هزيت راسي شوية و عديت عينيا على وجهو نحكي
أنا:أنت كنت كيما الحلم لي نلجأ ليه في أسوء الليالي باش ننسى لي صار معايا...و كل لحظة عديتها معاك كنت نعرف أنو هي ماهيش باش تبقى و يجي نهار و توفى...حتى ولا مرة توقعت أني باش نجيب صغير يربطني بيك
كبس على ظهري و جبدني عندو أكثر...يحكي
أركان:مانيش باش نخلي الحلمة هاذي توفى و بالنسبة لويليام...كان أحلى هدية منك...أصلا إنتي الوحيدة لي خليت علاقتي كاملة معاها و من غير شروط...خاطرني ولا مرة خممت نربط روحي بصغير من أي مراا كنت معاها قبلك
أنا:حتى هي ؟
أركان:وجود دانييل في حياتي كان صدفة و من غير تخطيط
أنا:يكفي أنو من المرا لي حبيتها
أركان:علاقتي بإيما كانت خاصة...أما أنا ما حبيت حتى مرا من غيرك
أنا:و صوفي كانت حامل منك زادة
أركان:بيني و بين صوفي كان فما عقد...يعني لو بقات حية لتوا...كانت باش تلتزم بالشروط لي وقعت عليها
أنا:يعني لو أنا وقعت نفس العقد وقتها...كنت باش تلتزم بيه بخصوص ويليام ؟
أركان:لاا...اللي بيني و بينك أكبر من أنو يكون مربوط بعقد...إنتي ماكش باش تتخلص مني إلينا و باش نبقى في وجهك لآخر عمرك
نزلت على شفايفي شوية...تبسم و باسني من عيني خذيت نفس من ريحتو و عاودت حطيت راسي على صدرو...يمكن كنت بحاجة إني نسمع الكلام هذا منو رغم أنو لتوا نحس أنو وجودها في حياتو توا...باش يبدل فيه برشا حاجات...خاطر مهما كانت مشاعرو ناحيتها...مستحيل يتخلى عليها مرة أخرى...حاولت نرقد أما أفكاري غلبتني...كبست على يدو و عديت عينيا على رقبتو نحكي
أنا:أنت تعتبر اللي صار غلطة...يعني أنا لو مشيت مع غالي ليلتها مكانش باش يصير معانا هذا الكل
أركان:أنا كنت باش نعمل فيه نفس الشي و أكثر إليناا واحد كيفو يستهل لي صار فيه الكل
خذيت نفس و جبدت روحي شوية منو..قعدت مقابلاتو و غزرت لعينيه نحكي
أنا:أنا كذبت عليك بخصوص لي صار في الليلة هذيكا
ضيق عينيه مستغرب و تقعد في بلاصتو....بعدت خصلات شعري من وجهي و كملت نحكي
أنا:في الليلة لي رجع فيها غالي باش يرجعني معاه كان عندي عجز و حروق سببهالي هو...يعني مكانتش عندي قوة كافية باش نتخلص منو..ويليام ظهر في آخر لحظة و ضربو من تالي...و خنقو لين لفظ بقية أنفااسو قداامي
قرب مني شوية و كبس على يديا زوز لي كانو يرعشو بصفة غريبة...و غزرلي يحكي
أركان:هدي رووحك عزيزتي
أنا:ويليام هو لي قت-ل غالي و مكنتش نعرف أنو لصق التهمة كاملة في نوراا...كلشي خممت فيه إذا إنكشفت الحكاية...أنا نتحمل نتيجة اللي صار..أصلا هو إنتقم منها هي زادة خاطر هي ورا كلشي صار معايا...أنا ولا مرة توقعت أنو صديقتي الوحيدة تعمل فيا هذا الكل و منعرفش علاش ويليام خبى عليا هذا الكل زادة
أركان:إيجا عندي ترااه
كبس على يدي و جبدني عندو في لحظة...قعدت في حضنو و عنقتو بالوقت...كنت بحاجة وجودو معايا في اللحظة هاذي...عدا يدو على شعري يحكي
أركان:هدي رووحك تواا...مهما كان اللي صار في الماضي إنتي ما عندك حتى ذنب فيه...خاطرك حاولت تحمي روحك و تحمي خوك زادة
أنا:توقعت أنو هي تحبني و ماهيش باش تضرني..أنا كنت نخبرها بكل تصرفات غالي معايا...و حتى وقت خط-فني كانت معايا و توقعت أنو هي باش تخبر عيلتي و الشرطة و لا أي حد ممكن يعااوني
مديت يدي بالسيف نمسح في دموعي...خاطرني منجمتش نتقبل حقيقة لي عرفتو...و أنو هي أول وحدة غدرتني...جبدني من عندو شوية و حاوط وجهي بيديه زوز يحكي
أركان:يززي كههو...توقعت أنو كان عندك علم بكل التفاصيل
أنا:م..مفهمتكش
أركان:عرفت من المعلومات لي طلبتها...أنو فما طفلة أخرى تحملت الجر-يمة كاملة...أما على حد علمي خرجت بعد خمس سنين من الحبس و عالأغلب هي لي حركت قضية غالي مرة أخرى
عديت عينيا على وجهو مصدومة...و نزلت يديا من صدرو نحكي
أنا:ك..كيفاش تنجم تحل القضية من جديد و هي ما عندها حتى دليل ضدنا
أركان:عالأغلب فما شكون وراها...خاطر مستحيل تنجم تثبت برائتها و هي في الحبس...هي إتهمت ويليام...أما منعرفش إذا كان عندها دليل و لا لا و حتى لو وصلت لدليل ماهوش باش ينفعها في شي خاطر ويليام معادش موجود و هي تستهل كلشي صار فيها
أنا:أما تنجم تتهمني أنا و تورطني من جديد...أنا منحبش نعيش نفس الشي مرة أخرى...منجمش نخلي ولدي وحدو و نتحبس جراير غالي...أصلا أنا منعرفش إمتى نتخلص منو و نرتاح من الماضي هذا جملة
حاوط وجهي من جديد و غزرلي ندرا كيف يحكي
أركان:تتوقع أنا باش نخليها تضرك و لا حتى تورطك بحاجة إنتي معندكش يد فيها ؟ إليناا إنتي تحت حمايتي توا...لا هي و لا أي حد آخر ينجم يمس شعرة منك و لا من ولدي...واااضح ؟
هزيتلو براسي إيه...باسني من جبيني و عاود عنقني كبست عليه و غمضت عينيا...بديت نسترجع في الأحداث الكل لي صارت معانا آخر فترة...أنو نورا تكون متورطة مع غالي و يمكن ورا اللي صار معايا آخر شي كنت نخمم فيه...هذا غير المعلومات لي مزلت مقريتهاش في المذكرة متاعو...فقت من سرحتي على صوت ويليام...جبدني من عندو شوية و عدا صوابعو على خدي يحكي
أركان:ماكش باش تخلي الحكاية هاذي تأثر عليك و لا حتى تخاف منها
أنا:أنا منجمتش نحمي خوياا...رغم اللي عملو الكل على خاطري...أما أنت موجود توا و باش تحمي ولدك من كلشي
أركان:و إنتي قطعة مني فينوسي...مستحيل نخلي أي شي يضرك
قرب مني أكثر باش يبوسني...دوب لامس شفايفي ويليام صوتو زاد أكثر...نزلت على شفايفي شوية و جبدت روحي منو نحكي
أنا:هو ديما هكا...يعني باش يبقى يرقد و يفيق
أركان:طلع يعرف إمتى يفيق بالظبط
ضحكت و هزيت روحي وقفت...طليت عليه بالوقت يحرك في يديه زوز و يبكي...نزلت عليه شوية و هزيتو بين يديا و عاودت قعدت...مد يدو شوية و شدو من يدو يحكي
أركان:شبيه سكت توا ؟
عديت صوابعي على خدو و ضحكت مستغربة كي ريتو ضحك...غزرتلو نحكي
أنا:مش بالعادة يضحك
أركان:يمكن حس أنو أمو تاعبة و يحب يفرهدها
تبسمت و هزيت عينيا في وجهو...نحكي
أنا:أحسن شي أنك بقيت معانا ليلة زادة
أركان:أنا نحبك تكون معايا في كل لحظة من حياتي و في كل ليلة زادة...مش ليلة هاذي كهو
بقيت نغزرلو من غير حتى كلمة...أصلا ولا مرة خممت إني نرجعلو بعد اللي صار معانا الكل...خاصة بوجود إيما في حياتو...عدا صوابعو على خدي و قرب مني أكثر باسني من جبيني و نزل عليه شوية باسو من يدو يحكي
أركان:أنت باش تعاود ترقد و تخلي أمك ترتاح
تبسمت و عطيتو بظهري...رضعتو و رجعتو لبلاصتو بعد ما تفقدت الحفاظة متاعو...تنهدت براحة كي عاود غطس في النوم...رجعت لتالي و قعدت بجنبو نحكي
أنا:أنا مانيش باش نخليها تتخلص مني و لا حتى نخلي حق ويليام يضيع زادة
أركان:و أنا باش نكون معاك في كل خطوة يا روحي مدلي يدو بالوقت...جبدني أول ما حطيت يدي عليها و رجعت لحضنو...وين غفيت مع يدو لي كانت تمشي و تجي على شعري...بعد الظغط لي حسيت بيه اليوم كنت بحاجة وجودو معايا...و لا مكنتش باش نعرف كيفاش نرتاح جملة.