آفْرُودِيتْ 🦢

الحلقة الرابعة عشر🧚‍♀️

🔸️حلقة 14
🔸️أركان_يحكي:
نزلت عليها شوية...خذيت نفس من ريحتها و جبدتها من عندي..عديت صوابعي على خدها نحكي
أنا:خلينا نمشيو توا
إلينا:لازمني نبدل دبشي قبل
أنا:باهي نستنى فيك ملا
تبسمت و هزتلي براسها إيه...رغم إني حسيتها مش قد بعضها...أما محبيتش نسألها أكثر...جبدت روحها مني و بعدت عليا..بقبت نتبع فيها لين غابت على عيني..مديت يدي و شاورت لأطلس لي قرب مني بالوقت و غزرلي يحكي
أطلس:سيد أركاان
أنا:نجم نعرف شنية صار مع المحقق ؟
أطلس:تحدثو شوية مع بعضهم..جنب بيت صوفي
أنا:علاش غديكا بالظبط ؟
أطلس:من وقت الحادثة إلينا تتردد لغديكا من غير ما تدخل...يعني نظن أنو لتوا منجمتش تتعدا الحادث حتى أنو مزالت تلقى صعوبة على المسرح
أنا:باهي أطلس..يكفي أنك تاخو بالك عليها و تعلمني بكلشي يصير هوني كي العادة
أطلس:أكيد سيد أركان
أنا:تنجم تمشي توا
تبسم و مشى...حتى صوفي قبل كان ياخو بالو منها تنهدت بالقاوي و رجعت لتالي...نغزر لطفلة صغيرة تعثرت في الخيط متاع صباطها...و منجمتش تقوم تبسمت خاطرها مزالت صغيرة برشا على التدريبات هذوما و منظش عمرها يتعدا الخمس سنين...نزلت عليها شوية و هزيتها من أجنابها...حطيتها على الكرسي نحكي
أنا:لباس ماهو ؟
ميلا:أنت تعرف تربطلي هذا ؟
أنا:مممم نعرف
ميلا:أربطهولي ملا...تو نتأخر أكثر
أنا:شنوة اسمك ؟
ميلا:أنا ميلاا و أنت ؟
أنا:أركاان
نزلت عندها شوية...كبست على ساقها و ربطتو ضحكت بالوقت تحكي
ميلا:هكا معاادش نطيح مرة أخرى
أنا:ملا ركز في تدريباتك
ضحكت و قربت مني على غفلة باستني من خدي قلبي خض بالقاوي و غمضت عينيا مروهج...للحظة صورة ولدي تعدات قدامي...تبسمت و جبدت روحي منها نزلتها من الكرسي و وقفت نغزرلها...تمشي و تتكعبر في الفستان الصغرون متاعها...هزيت راسي شوية...لقيتها واقفة تغزرلي...قربت مني شوية تحكي
إلينا:هاك مطلعتش خايب و تنجم تتعامل مع الصغار
أنا:سكر الموضوع و خلينا نمشيو
إلينا:أنت مكنتش باش تأذي صغير هذاكا ليلتها
أنا:إلينااا
حطت يدها على يدي و قربت مني أكثر...تحكي
إلينا:أنا لتوا منعرفكش...يمكن هاذي أول مرة نشوف نسخة أخرى منك
أنا:نظن إني قتلت النسخة هاذي من سنين طويلة
إلينا:مش صحيح...زيد تعاملك مع ميلا يثبت العكس معادش تلوم روحك على الماضي أكثر من هكا
أنا:خلينا نمشيو و كهو
هزتلي براسها باهي...غزرت لصندوق الموسيقى لي في يدها لأخرى...نزلت على شفايفها شوية...تحكي
إلينا:منحبش نخليه هوني...خاطر يعتبر هدية قيْمة بالنسبة ليا
كبست على يدها لي مزالت في يدي و جبدتها معايا فرد وقت لقيت روحي نخمم في دانيال...و حسيت برغبة في إني نحملو و نشم ريحتو مرة أخرى..قربت من الكرهبة و حليتلها الباب.. غزرتلي مستغربة تحكي
إلينا:ياخي أنت لي باش تسوق ؟
أنا:عندك مانع ؟
دورت راسها في الإتجاهات الكل و عاودت غزرتلي تحكي
إلينا:رجالك وينهم ؟
أنا:إلينا أركب
إلينا:فهمني شنوة اللي قاعد يصير قبل
أنا:على أساس مكنتش تحب رجالي...شنية صار ؟
إلينا:هاذي أول مرة ميكونوش معاك
أنا:المرة هاذي إستغنيت عليهم..خاطرني ما نحب نشوف حتى حد غيرك
عدات عينيها على وجهي و ركبت...سكرت الباب و خذيت نفس طويل قبل ما نخلط عليها..ركبت بجنبها
و خدمت الكرهبة..قلبت صندوق الموسيقى و ضيقت عينيها تحكي
إلينا:أركان شنية هذا ؟
غزرت لإسمها لي محفور على جلد الصندوق من اللوطة و عاودت غزرتلها..تبسمت تحكي
إلينا:مريتوش قبل
أنا:متضيعش المفتاح ملا...خاطر ماهوش باش يتحل من غيرو
إلينا:مانيش باش نضيعو
حطت صوابعها على رقبتها تتحسس فيه...تنهدت بالقاوي و تلفت لثنية..غزرتلي تحكي
إلينا:أركاان
فقت من سرحتي على صوتها..دورت راسي و غزرتلها
نحكي
أنا:نسمع فيك
إلينا:أنت لباس ؟
أنا:عالأغلب
إلينا:أنت مش قد بعضك من وقت بعدت على ميلا
أنا:من غير ما نحكيو في الموضوع هذا توا
إلينا:تذكرت ولدك..أكا علاش أنت في الحالة هاذي
شديت الفران بالوقت و كبست على الفولون بيديا زوز نحكي
أنا:مش قتلك سكر على الموضوع ؟
إلينا:متغزرليش هكا..خاطرني مقصدتش نجبد موضوع ولدك
أنا:صحيح...أنا تذكرت ولدي
عديت يدي على وجهي و خذيت نفس طويل...نهدي في روحي...حطت يدها على يدي و غزرتلي تحكي
إلينا:معادش تلوم روحك أكثر من هكا...زيد أنا تأكدت أنك عطيت كلشي لولدك و هو كان محظوظ بوجود أب كيفك في حياتو
أنا:أب منجمش يحميه ؟
إلينا:القاتل عرف كيفاش يستغل الفرصة...يعني حتى كان خلطت عليه ماكش باش تكون أسرع من الكرتوشة لي تضرب بيها..أما مزلت مجبور تلقى شكون عمل هذا الكل و حرمك منو
هزيتلها براسي باهي و مديت يدي شوية...عديت صوابعي على خدها نحكي
أنا:هاك بديت تكبر و تعقال
إلينا:بالله باش تفركهم عليا توا ؟
أنا:والله مش قد ما نحب نغطس في قطعة الفرولة  لي قدامي
إلينا:يززي عااد...خلينا نمشيو توا
أنا:هكا من غير ما ناخو شي
إلينا:على أساس ماكش قد بعضك
أنا:نظن أنو حياتي باش تتبدل بوجودك معايا
إلينا:منحبش نخمم في اللي ممكن يصير مبعد
أنا:يكفي أنك تاثق فيا و أنا باش نعطيك العالم الكل
إلينا:يكفي أنو مصيري ميكونش كيما صوفي
أنا:مدامني حي..حتى حد في الدنيا ما ينجم يضرك واضح
هزتلي براسها إيه...كبست على يدها و جبدتها عندي عنقتها بالوقت و خذيت نفس من ريحتها...منعرفش لأي مدى تعلقت بيها في حياتي أما كأني وليت نحسها قطعة و مستحيل نجم نتخلى عليها و لا نجم نعيش من غيرها.