آفْرُودِيتْ 🦢

الحلقة السادسة و الثمانون🦢

🔸️حلقة 86
🔸️إلينا_تحكي:
هزيت روحي شوية و قعدت على طرف السرير كي ملقيتوش بجنبي...قربت شوية من سرير ويليام و طمنت عليه...فرد وقت غزرت للبيبرون لي كان فارغ عرفت أنو رضعو و يمكن مرقدش جملة مدام سمعو يبكي...هزيت روحي و خرجت من الغرفة...لوجت عليه في بقية الجناح و غرفة دانيال...كنت متأكدة أنو مزال هوني...خاطر تليفونو كان على الطاولة برا...توجهت للمكتب متاعو و حليت الباب على غفلة..مد يدو شوية و مسح دموعو بالوقت...خذيت نفس نحكي
أنا:كأني جيت في وقت غالط
وخرت خطوة لتالي باش نخرج...هز عينيه في وجهي يحكي
أركان:إيجا عندي
نزلت على شفايفي شوية و قربت منو...كبست على يدو لي مدهالي و قعدت في حضنو...عنقتو بالوقت و كبست على شعرو من تالي...عدا يدو على ظهري و باسني من كتفي يحكي
أركان:أنا بحاجتك معايا أكثر من أي وقت فات يا روحي
جبدت روح منو شوية و حطيت يدي على خدو نحكي
أنا:أنت باش تخبرني شنية لي صار بيناتكم بالظبط ؟
أركان:أيان شبه متأكد أنو أدريان...الشخص لي كان بابا بريئ من مقتل أمي
أنا:يمكن كلامو صحيح...يعني أنت حاولت تتأكد ؟
أركان:أنا شفت كلشي بعينيا ليلتها
أنا:شنية صار ليلتها ؟
عدا عينيه على وجهي و تنهد بقوة...يحكي
أركان:أمي طلبت الطلاق منو ليلتها...و قالت أنو العرس يدمر العلاقات...خاطر كان يشك فيها و يتهمها بالخيانة
أنا:و شنية صار بعدها ؟
أركان:وقت خرجت من غرفتي...كانت أمي مذ-بوحة و هو كان قاعد بجنبها
عديت عينيا على وجهو مصدومة...متوقعتش نسمع الكلام هذا منو...كيما متوقعتش أنو الحادث كان بالبشاعة هاذي...دورت يديا زوز على رقبتو و عنقتو مرة أخرى...نحكي
أنا:مقصدتش نخليك تحكي على حاجة هكاا
أركان:يمكن لازمني نحكي عليها مرة وحدة على الأقل خذيت نفس و جبدت روحي منو شوية...نحكي
أنا:أركان...أنت متأكد أنو هو المجرم ؟
أركان:مكانش فما حد آخر معانا في الدار
أنا:ملا شنية لي يخلي أيان متأكد من كلامو ؟
أركان:أياان كان صغير برشا و أكيد باش يصدق الكلام اللي يسمعو منو...خاطر تربى عندو
أنا:إذا كان هو المجر-م علاش متحاسبش وقتها ؟
أركان:منعرفش...يمكن أنقذ روحو بالمعرفة لي عندو
أنا:يمكن الموضوع مش هكا و أيان عندو حق...يعني بلكشي فما تفاصيل أنت غفلت عليها في الليلة هذيكا و خذيت حكم مسبق عليه بسبب اللي شفتو و كهو
أركان:مستحيل...أنا نتذكر أنو مفما حتى كان معانا في الدار ليلتها
أنا:باهي...حاول تسترجع تفاصيل الحادثة شوية مع روحك...أنت خرجت من غرفتك و لقيت أمك مقتو-لة يعني مكنتش حاضر في وقت الجريمة
أركان:أكيد مفماش شكون يدخل علينا في دقايق جيست باش يقت-ل أمي و السيد أدريان موجود
عديت صوابعي على خدو...نهدي فيه...و غزرت لعينيه نحكي
أنا:أكيد فما حلقة مفقودة يا روحي...نظن أنو أنت لازمك تقعد مع أيان و تحكي معاه مرة أخرى
هزلي براسو باهي...بستو من شفايفو و غزرت لصور لي كانو فوق المكتب...جات عيني عليها بالوقت هزيت صورتها و عديت عينيا على تفاصيل وجها بالرسمي جمالها مكانش طبيعي...يعني مكانش يبالغ في وصفها مديت يدي لصورة أخرى ليها معاه هو وقت كانت حامل بأيان...و تبسمت نحكي
أنا:والله دانيال و ويليام نسخة منك بالحق
تبسم و باسني من رقبتي...هزيت صورة ليه كي كان صغير و غزرتلو نحكي
أنا:شوف حتى أنت كنت سمين زاادة
أركان:هذاا أياان
ضيقت عينيا مستغربة و نزلت على شفايفي شوية عدا يدو على ظهري يحكي
أركان:يعني ولدك كان سمين كيفك إنتي
أنا:ميزيتش توا
غمضت عينيا أول ما حط شفايفو على رقبتي من تالي باسني فوق كل أثر من الحرق...كبست على يدو لي فوق كرشي و تلفت عندو بالوقت...غزرلي ندرا كيف و باسني من شفايفي...كبست على خدو و غرقت معاه أكثر...حسيت بيديه تحت مريولي..كبست على شعرو أكثر...حتى أنا توحشتو رغم أنو معايا جبد روحو مني شوية مع صوت ويليام لي جا من الأبراي لي كانت فوق المكتب متاعو...هز حاجبو شوية يحكي
أركان:ياخي قاعد يعس فيا ؟
أنا:يمكن جاع...تقريبا هو يرضع كل ساعتين
أركان:نعرف يا روحي...الواضح إني باش نقضي أموري بعد ما يرضع مباشرة
ضحكت و بستو من شفايفو...فرد وقت كبست على يدو نحكي
أنا:هيا إيجا معايا
هزيت روحي وقفت و جبدتو معايا...خلط عليا من غير حتى كلمة...هز ويليام في حضنو أول ما دخلنا للغرفة وين سكت بالوقت...عدا يدو على ظهرو يحكي
أركان:هكا تعمل في بوك...ياخي ناوي تبقى وحدك من غير إخوة
ضحكت بالوقت و مديت يديا لعندو...حطو في حضني باش يرضع...غزرتلو نحكي
أنا:أنت باش تبقى معانا
أركان:لازمني نمشي توا...فما برشا حاجات تستنى فيا يا روحي
أنا:أنت مزلت تاعب...أكا علاش منحبكش تمشي توا أماانك
أركان:باهي...أنا باش ناخو دوش لين يشبع أميري
نزل عليا شوية و باسني من جبيني...فرد وقت عدا صوابعو على خد ويليام...تنهدت براحة بعد ما دخل لبيت البانو...خاطرني منحبوش يخرج في الوضع هذا...خاصة أنو تفكيرو مشوش بسبب اللي صار معاه غير هكا مزلت مصدومة من اللي سمعتو منو...ولا مرة توقعت أنو وجيعتو كبرت معاه طول السنين هاذي كيما فهمت السبب اللي يخليه يكره العرس و الإرتباط الرسمي...مزال خايف لتوا يعيش نفس التجربة لي عاشها من سنين...غزرت لويليام...لي طلق صدري بعد ما شبع...وقفتو على ساقيه...ضحك بالوقت...تبسمت و خذيت نفس من ريحتو..فرد وقت كبست عليه في حضني...هو الوحيد لي نجم نستمد منو قوتي مهما كان الوضع اللي إحنا فيه.