آفْرُودِيتْ 🦢

الحلقة الثالثة و التسعون🦢

🔸️حلقة 93
🔸️آنيا_تحكي:
حطيت يديا زوز على كرشي و غمضت عينيا...زعمة باش تكون طفلة كيما يحب هو بالظبط...فقت من سرحتي كي عنقني من تالي و باسني من خدي يحكي
نوح:شبي جنيتي ؟
أنا:متحمسة عاللخر
نوح:و أنا أكثر...هيا إيجاا
كبس على يدي و خرجني معاه أول ما تحل باب الأصونصير...كبست على يدو أكثر و انا نغزر للممرضة لي وصلتنا عند الدكتور...وقفتو نحكي
أنا:نووح...شنية باش يصير إذا مكانتش طفلة ؟
نوح:مانيش باش نمانع إذا كان الصغرون نسخة مني
تبسمت و دخلت معاه...عديت دقايق على أعصابي قبل ما نتعدا للفحص...وقف بجنبي و كبس على يدي تبسمت و غزرت لشاشة...دقات قلبي قوات أول ما غزرلنا يحكي
هو:تحبو تسمعو دقات قلبها ؟
غزرت لنوح مصدومة...كبس على يدي و غزرلو يحكي
نوح:يعني باش تولي عندنا طفلة
تبسم و هزلو براسو إيه...نزل عليا شوية باسني من جبيني...يحكي
نوح:كنت متأكد من إحساسي
تبسمت و نزلت على شفايفي شوية...خاصة كي سمعت دقات قلبها...بعد علينا شوية...وين كبس على يدي و مسحلي كرشي يحكي
نوح:أنا فرحاان عاللخر و سعادتي توا ما نحب نسلمها لحتى حد يا روحي...هاذي أعظم هدية جاتني منك
أنا:و أنا فرحاانو عاللخر
عدا صوابعو على خدي و مسحلي دموعي بالوقت و عاوني باش نقعد...و قرب من الدكتور يحكي معاه و رجع عندي...كبس على يدي يحكي
نوح:خليما نمشيو
أنا:شاهية سمك توا
نوح:تدلل جنيتي
تبسمت و مشيت معاه للكرهبة...مد يدو بالوقت و حطها على كرشي يحكي
نوح:سمعت كلام الدكتور...لازمك تهتم بروحك أكثر
كبست على يدو لي فوق كرشي و هزيتلو براسي باهي...باسني من راسي و خدم الكرهبة...شهيتي تحلت أكثر بعد ما وصلنا للمطعم...وين طلب ثلاثة أطباق ضيقت عينيا مستغربة...تبسم يحكي
نوح:واحد لبنتي زادة
أنا:أنت المفروض تهتم بيا أكثر منها...و أنا تو نهتم ببنتي وحدي
ضحك بالوقت...و تكى لتالي...عدا عينيه على وجهي يحكي
نوح:متخاافش...ماهيش باش تفك بلاصتك
تبسمت و هزيتلو براسي إيه...فرد وقت نزلت راسي للأطباق لي حطها النادل...وين نسيت روحي جملة و غطست فيهم...مد يدو و بعدلي خصلات شعري لتالي يحكي 
نوح:إنتي عطيتني الدنيا الكل آنيا
نزلت على شفايفي شوية و خذيت نفس طويل نحكي
أنا:و أنت عطيتني كلشي تحرمت منو في حياتي الحب و العيلة و الأماان...هذوما الحاجات الكل عرفتهم معاك أنت و كهو
تبسم و باسني من خدي...كملت صحني و غزرتلو نحكي
أنا:شبعت
نوح:صحة لحبي
تبسمت و هزيت روحي وقفت...سبقتو لتوالات غسلت يديا و غزرت لروحي...حطيت يديا زوز على كرشي و تبسمت نحكي
أنا:بيلااا
خذيت نفس طويل و تنهدت براحة...حسيت بفرحتو بالخبر من ردة فعلو...غير هكا فرحانة بفكرة أنو عيلتي باش تكبر أكثر و باش نعيش كلشي تحرمتو منو في الماضي...حطيت خصلات شعري ورا وذني و خرجت لقيتو يستنى فيا...ضيق عينيه يحكي
نوح:لبااس عزيزتي ؟
أنا:أنا منعرفش كيفاش لازمني نتفاعل مع الفرحة هاذي...خايفة تكون مجرد حلمة و كهو
ضحك و قرب مني شوية...باسني من جبيني و حط يدو على كرشي يحكي
نوح:إنتي بحد ذاتك حلمة يا جنيتي
ضحكت و هزيت عينيا في وجهو...نحكي
أنا:أنت باش تعدي النهار هذا معاياا ؟
نوح:تتوقع باش نضيع وقت أكثر من هكا...أصلا إحنا باش نمشيو لبلاصة باش تحبها
أنا:وين ؟
نوح:مبعد تعرف...خاطر باش نمشيو لبلاصة قبلها
أنا:وين البلاصة هاذي ؟
نوح:إيجاا معايا و تو نجاوب على كل أسئلتك يا روحي
تبسمت و خلطت عليه للكرهبة...ركبت بجنبو و تكيت لتالي...حطيت يديا زوز على كرشي نحكي
أنا:باش يكون إسمها بيلاا مش هكاا ؟
حط يدو فوق يديا و عدا عينيه على وجهي...يحكي
نوح:حبيت الإسم...أما على شرط أنها تكون روجة كيما أمهاا
تبسمت و كبست على يدو...فرد وقت قربت منو شوية و حطيت راسي على كتفو...محبيتش نسألو على وجهتنا...خاطرني توا بالظبط نحب نكون معاه و كهو فقت من سرحتي كي وقف الكرهبة...و غزرلي يحكي
نوح:جنيتي خلينا ننزلو هوني شوية
هزيتلو براسي باهي و نزلت...غمضت عينيا مع النسمة الباردة لي ضربت في وجهي و قربت شوية نطل على البحر من فوق...قرب مني شوية و وقف بجنبي من غير حتى كلمة...هاذي أول مرة نجو للمكان هذا...غير هكا منحبش نسألو...خاطر متأكدة باش يجاوب على أسئلتي الكل وحدو...دور راسو شوية و عدا عينيه على وجهي يحكي
نوح:أنا جبتك لهوني...باش نرسم بداية جديدة لينا مع بعضناا
أنا:نوح...مفهمتش شنية تقصد بكلامك ؟
تبسم و مدلي يدو شوية...كبست عليها و قربت عندو مد يدو شوية و رجعلي خصلات شعري لتالي يحكي
نوح:أنا وقت ريتك أول مرة...حسيت بحاجة غريبة تحركت داخلي...حاجة خلاتني منجمش نستغنى عليك و لا حتى نعيش من غيرك...رغم إني مكنتش نفهم عليك و لا حتى نعرفك...و رغم الماضي متاعي اللي كان يلاحق فيا...أما منجمتش نتخطى الحكاية و لا نتقبل فكرة أنو إنتي باش تبعد علياا
أنا:نووح
نزل بصوابعو لشفايفي و سكتني قبل ما نكمل كلامي حط يدو لأخرى على خدي يحكي
نوح:أسمعني للأخير عزيزتي...نحب نقول كلشي عندي و بعد ما نمشيو من هوني...تكون خطوة جديدة لبداية جديدة لينا الزوز
هزيتلو براسي إيه و عديت عينيا على تفاصيل وجهو متوقعتش أنو هو باش يعاود يحكي معايا في كلشي تعدينا بيه من قبل...غير هكا حسيت روحي ضايعة مع غزرتو و منجمتش نحكي أكثر...تبسم و رجعلي خصلات شعري ورا وذني مرة أخرى...و غزلي مدة كافية خلاتني ننسى السبب اللي خلانا واقفين هوني من الأول.