آفْرُودِيتْ 🦢

الحلقة الثالثة و الخمسون🧚‍♀️

🔸️حلقة 53
🔸️أركان_يحكي:
حليت الباب و نزلت...غزرت لنوح لي خلط ورايا بالوقت قرب مني واحد من الرجال و وقف قدامي يحكي
هو:سيد أركان...فما موضوع لازمك تعرف بيه توا
أنا:شنية صار ؟
هو:مدام إلينا خرجت...من غير كرهبتها
أنا:وحدها ؟
هو:للأسف منجمتش نمنعها...أما لي اللي كلفتهم بحراصتها مشاو وراها
أنا:خليها تخلط عليا للمستودع...أول ما توصل لهوني
هزلي براسو باهي...قرب مني نوح بالوقت يحكي
نوح:أركاان...فاش تخمم ياخي ؟
أنا:نظن وقيت باش تتعلم درس صغير...باش تولي تسمع الكلام
غزرلي مستغرب و خلط عليا...الغش لي ركبني منها و من فكرة خروجها من غير إذن في الأوضاع هاذي ماهوش باش يتعدا بالساهل...وصلت للمستودع و غزرت لنوح نحكي
أنا:فيكتور عندو علم ؟
نوح:أكيد...خاطر هو اللي بعثلي العنوان متاعو
هزيتلو براسي باهي و دخلت...أول ما شافني وقف كبس على كتفو واحد من الرجال و رجعو لبلاصتو تبسمت نحكي
أنا:كأنو ضيفنا مزروب باش يمشي
أرون:علااش أنا هووني ؟
مديت يدي شوية و شاورتلهم باش يبعدو عليه قربت منو شوية و قعدت مقابلو نحكي
أنا:أنت هوني باش تجاوب على أسئلتي...بالطريقة لي تحب عليها
أرون:أسئلة شنوة ؟
أنا:أسئلة من الماضي...تتعلق بولدي
مديت يدي شوية لنوح...قرب مني و حط الفرد في يدي...كبست عليه و خذيت نفس طويل نحكي
أنا:تتذكر القطعة هاذي ؟
أرون:لااا...أنا مجرد تاجر مش أكثر
أنا:بالظبط و أنت أفضل تاجر في المجال هذا و نعرف بالقدا لي أنت تتذكر القطعة هاذي...خاطر الكمية لي دخلت من سنوات لهوني...أنت كنت المسؤول عليها
أرون:قبل سنوات...دخل أكثر من نوع و توزع لأكثر من شخص و نظن أنت صاحب أكبر كمية في اليونان
أنا:المجموعة كان فيها 30 قطعة...دخلتها من روسيا لليونان...نحب نعرف لشكون سلمت الباقي إذا كان فيكتور استلم 23 قطعة كهو
أرون:فيكتور هو اللي اختار ياخو 23 قطعة...أكا علاش ظطريت نبيع الباقي بشكل انفرادي...خاطر النوع هذا نادر برشا
أنا:هاك بديت تتذكر ملا...مدام تتذكر فيكتور شنية كان يحب...ملا تتذكر بالقدا لشكون بعت القطع هذوما
أرون:قتلك إني بعتهم بشكل انفرادي...أكيد مانيش باش نتذكر الأشخاص هذوما الكل بعد سنوات
أنا:فما طرق أخرى هوني تنعش ذاكرتك بسرعة
أرون:صدقني سيد أركان...أنا نخبرك في الحقيقة أصلا منعرفش علاش قاعد تستجوب فيا بخصوص الموضوع هذا
أنا:هاني باش نبسطلك المعلومة...قبل سنوات ولدي الوحيد توفى بطلقة نارية...و نوع الرصاصة تنتمي للقطعة هاذي لي في يدي
غزرلي مستغرب...كبست عليه في يدي و كملت نحكي
أنا:إذا مكنتش طرف مساعد...للأسف باش تخسر برشا خاطر أي شخص عندو يد في موت ولدي باش يدفع الثمن في آخر الحكاية
أرون:فيكتور كان يملك الحصة الأكبر يمكن هو ورا الموضوع هذا الكل...بلكشي اختار يشري 23 قطعة كهو باش يرمي التهمة على شخص آخر
أنا:وجهة نظرك صحيحة...يمكن فيكتور هو ورا هذا الكل...خاصة أنو عطاني إسمك...غير أنك تاجر أسلحة أنت واحد من أهم الرجال عندو...أما رغم هكا أنت مجبور تذكر الأسماء لي بعتلهم القطع الباقية و بعدها أنا نقرر الخطوة التالية
أرون:كيفاش نتذكر الأسماء هاذي الكل بعد سنين ؟
أنا:اللي نعرفو عليك...عندك ذاكرة قوية...خاصة كي يتعلق الموضوع بالأسماء
أرون:أنا منجمش نعاونك بخصوص الموضوع هذا
أنا:أنت باش تعاون روحك...خاطر مهما كان الشخص لي أنت تحمي فيه...هو بالذات لي باش يرسم نهايتك خاطرني قبل ما نوصل ليه...أنت أول واحد نقضي عليه و على عيلتك كاملة...على حسب معلوماتي عندك طفلة مزيانة في الصف الثالث
أرون:بنتي ما عندها حتى ذنب في هذا الكل
أنا:و ولدي بريئ زادة و ما عندو حتى ذنب باش يموت بالطريقة هاذيكا
أرون:صدقني أنا ما نعرف حتى شي بخصوص الموضوع هذا و منعرفش علاش فيكتور ذكر اسمي بعد السنوات هاذي الكل
أنا:بالعكس...فيكتور ذكر اسمك من سنوات...أما الإسم لي أنت كنت تمشي بيه هوني و توا وقتك بدا يوفى و صبري ماهوش باش يطول..أنت باش تذكر الأشخاص اللي بعتلها الأسلحة الكل بدون إستثناء و لا باش تشوف الأسوء
عديت عينيا على الفرد لي في يدي...القطعة هاذي خذيتها من عند فيكتور بعد الحادثة...خاطر التحقيق أثبت أنو دانييل تقوص بعيار ناري من النوع هذا و اللي أقسمت أنو اللي دبر هذا الكل و اللي نفذ الجريمة باش يموت بنفس الطريقة هاذي
هزيت راسي شوية كي قرب واحد منهم و نزل عندي يحكي
هو:سيد أركان...مدام إلينا وصلت للقصر
أنا:هي لباس ؟
هو:نتوقع لباس..باش تكون هوني بعد شوية حسب أوامرك
أنا:خليها تدخل أول ما توصل
هو:حاضر سيد أركان
كبست على الفرد في يدي و غزرتلو بالوقت نحكي
أنا:استرجعت ذاكرتك ؟
هو:صدقني أنا منجمش نفيدك في الموضوع هذا
تبسمت و هزيت روحي وقفت..فرد وقت وجهت الفرد ناحيتو نحكي
أنا:شقولك بنتك تلقى نفس المصير متاع ولدي ؟
أرون:سيد أركاان أمااانك...بنتي ما عندها حتى ذنب حسابك معايا أناا
حاول ياقف...قعدو واحد من رجالي بعد ما كبس على كتفو مرة أخرى..غزرلي يحكي
أرون:صدقني أنا ما نتذكر حتى حد منهم
أنا:بااهي
نزلت يدي شوية و ظغطت على الزناد..لي خلى الطلقة تجي على طرف فخذو...صوت صياحو خلاني نقرب منو بالوقت..نزلت عليه شوية و كبست على الجرح بكل قوتي نحكي
أنا:الجرح سطحي..أما ياخو وقت طويل شوية باش يبرا..وقت كافي باش تنعش ذاكرتك و تعطيني لي نحب عليه
دورت راسي شوية كي ريت تركيزهم ورايا..وين لقيتها واقفة..تغزرلي مصدومة..من غير حتى حركة