آفْرُودِيتْ 🦢

الحلقة الثالثة عشر🧚‍♀️

🔸️حلقة 13
عديت ليلة أخرى ضايعة في أفكاري...منجمتش ننسى لي صار و لا حتى في اللي حكينا فيه بكري هزيت روحي بالسيف و خرجت من بيتي بعد ما عملت دوش لقيت الفطور حاضر في الصالة...كليت شوية و قربت من الشباك...ضيقت عينيا مستغربة و أنا نغزرلها تطل من السويت متاع نوح..أول ما لمحتني نزلت راسها و دخلت بالوقت..إستغربت وجودها هوني..خاطرني توقعت ماهوش باش يرضى يجيبها للمنتجع متاعو منعرفش علاش حسيت إني كرزت عليه أكثر...رجعت للداخل و طلبت وحدة من الخدم...دخلت عندي تحكي
هي:تفضل آنسة
أنا:نحب على دوا لوجيهة راسي
هي:باهي...تو نرجعلك
أنا:لحظة...ياخي مريتش أركان برا ؟
هي:سيد أركان في المسبح الخلفي
هزيتلها براسي باهي و عديت صوابعي على رقبتي لي لتوا نحسها توجع فيا و رجعت لبيتي..حليت الدرسينغ نغزر لأنواع المايوات لي معلقين...مديت يدي و جبدت واحد منهم في الأسود...منعرفش فاش قاعدة نخمم بالظبط...خاطرني أصلا منعرفش نعوم لبستو و عديت عينيا على روحي..لبست أول جيلي جا على يدي و خرجت...استلمت الدوا منها...شربتو و خذيت نفس طويل...قبل ما نخرج...وين ضعت خاطرني لتوا ملحقتش باش نكتشف المنتجع هذا و عدد المسابح لي فيه...وقفت واحد من رجالو لي محبش يدلني قبل ما يعطيه خبر...قحرتلو و مشيت من غير ما ناخو جواب منو..خاطرني من غير شي نحس في روحي على أعصاابي...عديت دقايق نفركس عليه...هزيت راسي شوية لمحتو خارج من الما...خذيت نفس طويل و قربت منو...غزرت للبنات لي موجودين...كلهم لابسين بياس وحدة من فوق مع شورت قصير عاللخر...رجعت شعري لتالي و وقفت مقابلاتو...عديت عينيا على وجهو و نزلت بيهم لبدنو من غير ما نتحرك من بقعتي...نتبع في قطرات الما لي نازلة منو على الوشم لي في بدنو مسح الما من وجهو و تبسم يحكي
أركان:ضعت مرة أخرى ؟
أنا:منظنش...مدامك واقف قدامي توا...معناها مزلت ندور في أملاك أركاان 
أركان:و إنتي ملكي زادة يا عشق أركااان
أنا:في أحلاامك
مد يدو شوية و شاور لطفلة لي قربت منو..هز الكأس من الصينية و خذا رشفة منها يحكي
أركان:معنديش بلاصة للأحلام..كلشي نحب عليه نملكو
أنا:هذا في إعتقاادك أنت كهو
غزرلي ندرا كيف...قحرتلو بالوقت...خاطرني لتوا منجمتش نفهم التناقض لي فيه...أركان متاع أمس مختلف على لي واقف قدامي توا...كأنو الدنيا الكل تمشي كيما يحب هو و كهو...نزلت عينيا من وجهو و مديت يدي شوية..حليت سيول الجيلي طاحت عالأرض بالوقت...عدا عينيه على ساقيا و طلع بيهم لوجهي يحكي
أركان:هذا حد جرأتك ؟
قربت منو شوية و وقفت قدامو بالظبط...وين حسيت بأنفاسو ضربت في وجهي...عديت صوابعي على صدرو نحكي
أنا:مانيش هوني باش نبهرك...حتى أنو النسا متاعك الكل لابسين نفس الشي..جرأتي معاك ماهيش مهمة برشا
أركان:أصلا جرأتك متحضرش قدامي فينوسي
أنا:جربني ملاا
أركان:نحييه...هوني و توااا
عدا عينيه على وجهي و نزل بيهم لبدني...فهمتو يقصد في المايو...هز حاجبو شوية يستنى في ردة فعلي ضيقت عينيا مستغربة...خاطر متوقعتش الوقاحة متاعو توصل بيه لهوني...أنو يطلب الشي هذا مني مرة أخرى..غير هكا نعرف أنو طلب الشي هذا خاطر يعرفني مانيش باش نعملو...خاصة أنو شافني من قبل...باقي يغزرلي بتحدي واضح بعد ما شاور لطفلة أنها تمشي خذيت نفس طويل و مديت ورا ظهري جبدت سيول المايو لي تحلت ورا بعضها و نزلتو بالوقت و حبست بيه عند خصري...هز حاجبو شوية و هو يغزر لصدري و كرشي فرد وقت...وين حسيت بأنفاسي ضاقت شوية أما بقيت ثابتة من غير حتى حركة...عينيه وساعت في لحظة و قحرلي يحكي
أركان:ألبس الجيلي متاااعك توااا...أزرب رووحك
دورت راسي شوية نغزر لرجالو لي جايين ناحيتنا و نوح معاهم زادة...تبسمت بالوقت نحكي
أنا:هاني باش نوريك جرأتي أكثر سي أركاان
كبست على أجنابي باش نهبطو أكثر...خطفني من جنبي في لحظة...لصقني فيه و نزل بيا لوسط المسبح بقوة وين غطسنا الزوز في الما...غمضت عينيا مروهجة من اللطخة لي حسيت بيها...أصلا متوقعتش يعمل معايا هكا...دورت يديا زوز على ظهرو و كبشت فيه...خاطر كان يسيبني توا مستحيل نجم نخرج من القاع...كبس عليا و خرجني معاه حليت عينيا و مديت يدي نبعد في شعري لتالي...فرد وقت نغزر لتعابير وجهو لي تبدلت نزل على ظهري و لصقني فيه أكثر...مد يدو شوية و شاورلهم باش يرجعو...دورت راسي نغزرلهم من بعيد و عاودت غزرتلو...نزل بعينيه لصدري و عاود قحرلي رخف يدو عليا باش يبعد..دورت يديا زوز على رقبتو عنقتو و كبشت فيه بكل قوتي نحكي
أنا:متخلينيش هووني...منحبش نغرق
عدا يدو على ظهري بالوقت و كبس عليا..جبدت روحي شوية و عديت عينيا على وجهو...ضيق عينيه يحكي
أركان:شنعمل فيك توا ؟
كبشت فيه أكثر تحسبا لأي محاولة منو باش يخليني نغرق و خذيت نفس نحكي
أنا:م..منعرفش نعوم...خرجني من هووني تواا
أركان:ملا فاش تعمل هوني ؟
أنا:أ.أنت دخلتني...مش أناا
أركان:علاش جيت للمسبح من أصلو
أنا:هكا و كهوو
رخف يدو على ظهري مرة أخرى...كبشت فيه أكثر نحكي
أنا:أركاان..أماانك والله نخاااف
دخلت في حضنو أكثر من غير ما نعمل حساب للوضع لي أنا فيه...اللي يهمني توا إني نخرج من هوني و كهو نزلت على شفايفي أول ما كبس على ظهري مرة أخرى لدرجة أنو وجعني...جبدت روحي شوية و عديت عينيا على وجهو...غرس يدو في شعري و جبدني عندو أكثر أنفاسو قوات في وجهي و شفايفو لامسو شفايفي في لحظة...عديت يدي على ظهرو و هزيت عينيا في وجهو نحكي
أنا:و..وصلني لغديكا
أركان:معينيش
أنا:الما بارد برشا و منعرفش نرجع وحدي
غزرلي ندرا كيف و كبس على شعري أكثر...جيت باش نحكي...غطسني معاه في الما بالوقت...وين حسيت أنفاسي تقطعت..طلعني في آخر لحظة..دوب استرجعت أنفاسي و ضربتو لصدرو نحكي
أنا:ف..فاش تعمل ياخي ؟
رخف يديه شوية و جبد روحو مني..قربتلو و عنقتو بالوقت نحكي
أنا:أ..أركاان 
كبشت فيه أكثر...للحظة حسيت روحي باش نبكي من الموقف لي تعديت بيه...خاطرني بالرسمي نخاف من الما و البحر...قربت لوذنو نحكي
أنا:م..متخلينيش...أنا بالرسمي نخاف برشا...أماانك
عدا شفايفو على رقبتي و كبس عليا يحكي
أركان:أنا مستحيل نخليك...حط هذا في مخك
أنا:وصلني لغديكا ملا
أركان:متحبش تعمل غطسة أخرى
عنقتو أكثر...ضحك و نزل بيا لوسط الما...لدرجة منعرفش كيفاش وصل بيا للحافة...جبدني معاه و تكاني لتالي...بعدلي خصلات شعري لتالي يحكي
أركان:هدي روحك
أنا:نحب نخرج توا
أركان:بالبساطة هاذي
أنا:بردت
أركان:ماكش باش تخرج من هوني...قبل ما تفهمني لي كنت باش تعملو
أنا:شنوة ؟
أركان:إنتي تعرف بالقدا على شنوة نحكي إلينا..ساعة كيفاش يصورلك مخك تخلي الكل يشوفك ؟
أنا:هاك أنت شفتني
أركان:مش نفس الشي ●●●● ياخي تتوقع أنااا باااش نشاارك حاجتي مع الناس الكل ؟
أنا:و انا مانيش متااعك..زيد أنت لي طلبت مني نحي المايوو
أركان:هااك وليت تسمع الكلام و تنفذ أوامري زادة
سكت خاطرني نعرف روحي تسرعت بالفازة...جيست باش نتحداه...نزل راسو شوية..يغزر لصدري...قربت منو أكثر نحكي
أنا:يززي متغزرليش هكاا
أركان:هاني وليت نحس بيه زادة
جبدت روحي بالوقت...تبسم و مد يديه زوز حطهم على أجنابي و نزل بيهم لحروف المايو لي حابس عند خصري يحكي
أركان:هاني باش نكمل نشوف الباقي وحدي...غزرلي ندرا كيف و كبس عليه...دوب هبطو شوية...حبستو كي حطيت يديا زوز فوق يديه نحكي
أنا:منحبش...أصلا مكنتش باش نحيه قبيل...جيست حبيت نستفزك و كهو
جبدني عندو أكثر و لصقني فيه...عدا عينيه على وجهي يحكي
أركان:شنية نعمل فيك توا ؟
أنا:جنبي مزال يوجع فيا و رقبتي زادة...من غير ما تحاول تضرني أكثر
أركان:متوقعتش أنك باش تخاف لهدرجة
أنا:مانيش خايفة..أما أنت تستعمل في العنف معايا
أركان:العنف ؟
هزيتلو براسي إيه...غزرلي مستغرب و ضحك بالوقت مد يدو شوية و بعدلي خصلات شعري لتالي يحكي
أركان:متخافش مني...أنا مستحيل نضرك
عديت عينيا على تفاصيل وجهو و حطيت يديا زوز على أجنابو نحكي
أنا:أوعدني ملا
أركان:منظنش...خاطرني مزلت نخلص في الوعود لي قطعتها و ندمت
أنا:باهي خرجني من هوني و كهو...وصلني لدروج و أنا نمشي وحدي
أركان:تمشي كي نحب أنا
أنا:قتلك لي أنا بردت
سكت كي حسيت بأنفاسو قوات في وجهي من جديد...غير يدو لي تمدت من خصري لصدري في لحظة...قرصني بالوقت يحكي
أركان:ريت كان تفكر برك...تخلي شكون يشوفك و لا يحط يدو عليك...صدقني نهايتك تكون على يدي
أنا:أماا أنت تعمل لي تحب عليه و مفما حتى حد ينجم يحاسبك
أركان:والله كي تعطيني قلبك تنجم تحاسبني مبعد
أنا:أكا علاش جبتها معاك لهوني...باش ترضي رغبتك بيها
أركان:على شكون تحكي ؟
أنا:العذراء الروسية...منتوقعش أنك تكون نسيتها بالسرعة هاذي
أركان:هذا لي خلاك تجي عندي ؟
أنا:لاا
أركان:بالله...ملا شنية تفسر وجودك معايا توا
أنا:حتى شي...حبيت نتعلم السباحة أكا علاش جيت لهوني
أركان:وحدك ؟
هزيتلو براسي إيه...بعد عليا شوية و مدلي يدو يحكي
أركان:وريني ملا
كبست على يدو كي حسيت روحي باش نفقد توازني رجع عندي بالوقت و كبس على جنبي...نزل عندي شوية يحكي
أركان:على أساس تحب تتعلم
أنا:مش تواا...الما بارد برشاا أركان
خذيت نفس بالسيف خاطرني بالرسمي حسيت روحي باش نجمد...فرد وقت لقيت روحي مركزة مع أنفاسو السخونة لي ضربت في وجهي مرة أخرى أصلا منعرفش كيفاش باش نقاومو أكثر من هكا حصرني بيديه زوز...وين منع عليا إني نتحرك..خذيت نفس نحكي
أنا:أ..أركاان
صوتي تقطع من غزرتو ليا..نزلت على شفايفي شوية أما محسيتش بيهم...خاطرني نحس في روحي باش نجمد فرد وقت مديت يدي نبعد في خصلة من شعري قلقتني مد يدو بالوقت و بعدها من وجهي و و نزل بيها تحت الما يتحسس في بدني...كبست على صدرو بالوقت خاطر بالرسمي نحس في روحي تحصرت بين يديه و مانيش باش نجم نمنع روحي منو...غمضت عينيا كي حسيت بشفايفو فوق خدي على غفلة..نزل بيهم شوية شوية...لين وصل لشفايفي..حليتهم و عديت صوابعي على الوشم متاعو...لي لتوا منعرفش سر تركيزي معاه كيما لقيت روحي عجزة باش نحكي مرة أخرى و لا حتى نبعدو عليا...كبست على صدرو أكثر...نلم في الحروف لي ضاعت مني...دوب حليت شفايفي باش نحكي لقيت الرد منو وقت حط شفايفو عليهم بالوقت كبست عليه مروهجة...دوب باسني منهم و جبد روحو شوية...بقيت نغزرلو مصدومة..خاطرني لتوا مفهمتش لي صار...جبدني عندو أكثر..سكر المايو من تالي و كبس على أجنابي و هزني في لحظة قعدني على الحافة و جبد روحو مني..غطس في الما وين معادش لمحتو مرة أخرى و لا حتى نجمت نتحرك من بقعتي..حتى شفايفي حسيتهم نملو في لحظة و معادش حسيت بيهم..أصلا منعرفش علاش قربلي و بعد عليا في نفس اللحظة هزيت براسي لا..منعرفش شبيني نخمم فيه بالطريقة هاذي..هزيت روحي أكثر باش نخرج..زلقت بالوقت و لقيت روحي في وسط الما مرة أخرى...مديت يديا زوز...محاولة مني باش نطلع من جديد أما سلمت في اللحظة لي كبس عليا و خرجني من الما...غزرلي مستغرب...حتى أنا معرفتش شنية نعمل في الحالة هاذي..على خاطر كان لازمني نبعد عليه أول ما خرجني ضيق عينيه مستغرب يحكي
أركان:فااش تعمل ياخي ؟
أنا:طحت
أركان:إلينا...ياخي ناوية عليا إنتي...مش خرجتك باش تمشي ؟
أنا:قتلك طحت...من غير ما تكش عليا هكا
غمض عينيه بالقاوي...و عدا يدو على وجهو بالوقت خذيت نفس نحكي
أنا:و..وصلني لدروج...هكا أحسن
أركان:والله منعرفش شنوة الأحسن في الموضوع
أنا:خرجني...هيا أمانك...والله بردت عاللخر...منحبش نمرض...باش نجم نحضر للعروض الجاية
ضيق عينيه شوية و كبس عليا في لحظة...جيت باش نحكي...غطسني معاه...لدرجة منعرفش كيفاش وصلنا لنص المسبح...كبشت فيه مروهجة نحكي
أنا:أركااان علااش هكا يااخي ؟
أركان:والله تستهل بعد اللي عملتو فيا الكل
أنا:خرجني توااا
أركان:والله كان نسمع صوتك مرة أخرى...ماكش تنفذ بالساهل
أنا:شعندك تعمل ؟
رخف يدو شوية...فقدت توازني بالوقت و منجمتش نشد روحي أكثر...لي خلاه يجبدني عندو مرة أخرى قحرتلو نحكي
أنا:س..سيبني
أركان:إيجا عندي
دور يدو علل ظهري و عنقني بالوقت...حطيت يديا زوز على أكتافو من غير حتى كلمة خاطرني بالرسمي منحبش نوحل هوني...حتى إني لعنت روحي أكثر من مرة على الموقف لي وصلت روحي ليه..مد يدو شوية يعدي فيها على ظهري...وين حسيت بدني ترخف شوية و تخلصت من الستراس لي تملكني بكري...حط شفايفو على كتفي دقايق...لي خلاني نكبس عليه من غير ما نحس...هز راسو شوية يحكي
أركان:شنية عملت فيا ياخي ؟
أنا:حتى شي...شعند عملت أنا...زيد أنت لي بستني من غير إرادتي
أركان:بالله...علاش إنتي تسميها بوسة هذيكا منظنش أنك حسيت بيها و شفايفك جامدين 
أنا:يززي كهو
بعدت عينيا من وجهو باش مندخلش بعضي أكثر و حتى هو معادش تكلم معايا...كبس عل ظهري و رجعني معاه...وصلني لدروج...جبدت روحي منو و طلعت..خلط عليا بالوقت...بردت أكثر و معرفتش شنوة نعمل بالظبط تلفت عندو كي حط منشفة على أكتافي...كبست عليها و عديت عينيا على وجهو رجعلي خصلات شعري لتالي يحكي
أركان:هيا إيجاا
هز المنشفة متاعو يمسح في شعرو و كبس على تليفونو...خلطت عليه مروهجة...خاطرني منجمتش نمشي...تلفت عندي في لحظة...مديت يدي نبعد في خصلات شعري...نحكي
أنا:شبيك تغزرلي هكا ؟
هزني و حطني و قرب مني على غفلة...جيت باش نحكي...قص عليا كي هزني في حملتو...دورت يديا زوز على رقبتو نحكي
أنا:أركاان
أركان:إلينا...يززي كهو...أسكت شوية
كبست عليه أكثر و سكت...عديت عينيا على شفايفو و نزلتهم أول ما غزرلي...وين حسيت دقات قلبي قوات أكثر...أصلا معادش فاهمة شنوة اللي قاعد يصير معايا خاصة في قربو مني...اللي يخليني نركز عليه ديما...أول ما دخلنا لسويت حطني في الصالة و طيش المنشفة من يدو يحكي
أركان:حضر روحك فيسع
أنا:وين باش نمشيو ؟
أركان:لأثينا
أنا:مخبرتنيش أنو باش نرجعو اليوم
أركان:هاك عرفت توا
نزل عينيه من وجهي و دخل لبيتو...رجعت شعري لتالي و دخلت لبيتي مستغربة...خاطر عالأغلب خذا القرار هذا في آخر لحظة...محاولتش نركز برشا خاطرني توحشت ويليام...كيما توحشت إني ناقف على المسرح من جديد بعد الأحداث لي تعدات الكل على راسي...خذيت دوش تفرهدت بيه...بعد البرودة لي تعرضتلها بكري مديت يدي شوية نتحسس في شفايفي..أصلا دوب باسني منهم و بعد...أما منجمتش نتخلص من الإحساس لي تملكني و لا حتى نتعدا لي صار...خرجت و بدلت دبشي حضرت الفاليز متاعي و مشيت لصالة...هزيت راسي شوية نغزرلو...حتى هو لحق باش يحضر روحو كيما يلزم...جيت باش نحكي قص علينا صوت الباب...دخل واحد من رجالو لي خرج لي فاليز و خبرو أنو كلشي حاضر...تنهدت بالقاوي و خلطت عليه...منعرفش علاش فضل يسكت بعد اللي صار الكل...كيما منجمتش نحكي معاه و لا نسألو على شي..أول ما دخلت لشركة الطيران لمحتها وقت نزلت من الكرهبة متاع نوح...تبع فيه من غير ما تحكي معاه...ضيقت عينيا مستغربة و عاودت غزرتلو...كمل ثنيتو من غير ما يركز في اللي قاعد يصير قربت من نوح شوية نحكي
أنا:باش تجيبها للقصر هاذي ؟
نوح:توقعت ميهمكش الموضوع
أنا:جااوبني نووح
نوح:تهنى...حتى لو جبتها للقصر ماهوش باش يغزرلها مدامو مغروم بيك
أنا:مجرد فضول و كهو...ميهمنيش برشا إذا كان باش يغزرلها و لا لا
نوح:متأكدة ؟ ساعة نظن على قريب باش تولي تعتبر أركان القايد متاعك وحدك و ما تخلي حتى وحدة تقرب منو
عديت عينيا على وجها و قحرتلو...ضحك بالوقت خذيت نفس و عطيتو بظهري...طلعت لطيارة و قربت منو قعدت مقابلاتو...مديت يديا زوز نربط في الحزام أحسن شي قعدت هي و نوح في القسم الثاني...كبست على الكرسي من الشيرتين و غمضت عينيا...حليتهم بعد ما حسيت الخطر نقص...طلعت راسي شوية...لقيتو يغزرلي...نزلت على شفايفي بالوقت...تكى لتالي يحكي
أركان:حاول تاخو نفس
هزيتلو براسي إيه و خذيت نفس طويل...وين حسيت روحي هديت شوية...عديت عينيا على وجهو من غير حتى كلمة...بعد الأحداث لي تعدات علينا الكل في سانتوريني...معادش نجم نحدد مشاعري ناحيتو و لا حتى نتوقع شنوة باش يصير معانا زادة خاصة إني كل مرة نتأكد أنو مهما كان إهتمامو بيا كبير و حتى كان هو مغروم بيا كيما يقول ديما مستحيل يسامحني كان يحس إني معاه لمصلحة معينة و كهو.