آفْرُودِيتْ 🦢

الحلقة التاسعة و السبعون🦢

🔸️حلقة 79
🔸️آنيا_تحكي:
عديت عينيا على وجهي...خذيت نفس طويل و  هزيت راسي شوية...غزرتلها نحكي
أنا:ميسالش تلمو ؟
هي:أكيد...إنتي جيست خبرني كيفاش تحبو
أنا:مش مهم...منحبوش يقلقني في الحفل
تبسمت و هزتلي براسها باهي...من غير شي نحس في روحي متقلقة من الجو و من الطاقم لي سلطو عليا باش يساعدني...رغم إني منحبش نمشي و معينيش في الحفل هذا جملة...عديت الوقت نتفحص في مجلات تخص الحمل لين كملو...هزيت روحي وقفت و عديت عينيا على الفستان لي بعثو...و لبستو بعد مساعدة منهم...تبسمت أول ما غزرت لروحي و حطيت يديا زوز على كرشي...فقت من سرحتي على صوتو يحكي
نوح:خلونا وحدنا
هزيت عينيا في وجهو...وين وقف يغزرلي مستغرب محسيتش بيهم كيفاش إنسحبو و خرجو من الجناح قرب مني أكثر...و تبسم يحكي
نوح:محلااك جنيتي
بقيت نغزرلو من غير حتى كلمة...خاطرني لتوا مكرزة منو...خذيت نفس نحكي
أنا:نظن أنك كنت تحب اللون هذا عليها
عدا عينيه على الفستان و عاود غزر لوجهي يحكي
نوح:أنا نعشق اللون هذا عليك إنتي و كهو
أنا:المفروض إني نصدقك توا ؟
قرب مني أكثر...وين حسيت بأنفاسو لي ضربت في وجهي...و عدا صوابعو على وذني يحكي
نوح:المفروض هكاا...مع الوقت باش تفهم مشاعري و تصدقها زادة
دقات قلبي قوات مع شفايفو لي مسو شفايفي في لحظة...دورت وجهي بالوقت...تبسم و باسني من خدي يحكي
نوح:خلينا نمشيو
جبد روحو مني و بعد عليا شوية...مدلي يدو باش نشدو...خذيت نفس طويل و سبقتو من غير ما نحط يدي في يدو...تنهد بقوة...و خلط عليا...دخل ورايا للأصونصير و كبس على الزر...وقف ورايا...يحكي
نوح:متعبش روحك برشا
أنا:والله كان لازمك تخمم فيا قبل ما تجبرني نجي معاك لهوني
نوح:منجمش نحضر لحفل كبير هكا من غير مرتي
أنا:طلقني ملا...و أحضر وحدك
نوح:شنية قتلك على الكلام هذا ؟
أنا:محسوب باش نخاف منك توا ؟
قرب مني باش يحكي...تحل الباب بالوقت...خرجت و خليتو...خلط عليا من غير حتى كلمة...ركب بجنبي و خدم الكرهبة...حطيت يديا زوز على كرشي و تبسمت منحبش نخمم في الأفكار السلبية أكثر من هكا...خاصة أنو قاعد يظغط عليا في الفترة هاذي و أغلب الوقت يعديه معايا...حسيت بيدو لي تحطت فوق يديا...هزيت عينيا في وجهو بالوقت...تبسم يحكي
نوح:أنا باش نكون معاك ديما...نعرف أنو ثنيتي ليك صعيبة المرة هاذي...أما منحبكش تكرهني و لا حتى تبعد عليا زادة
نزلت على شفايفي شوية...معرفتش نجاوبو خاطرني
مزلت مجروحة منو لتوا...و منعرفش إذا كنت باش نتجاوز لي صار الكل...خاطر الشي الوحيد لي نخمم فيه بعد ولدي و لا بنتي...هو إني نتعلم كيفاش نعتمد على روحي من غيرو و نتعلم كيفاش نكون مستقلة زادة
بعد اللي صار الكل معاادش نجم ناثق فيه و لا في حبو لياا زادة...تنهدت بقوة و دورت وجهي للبلار..وين لمحت شكون يبيع في ذرة مشوية على الرصيف قلبي خض بقوة و ريحتها ضربت في خشمي...و مع هكا لقيت روحي ساكتة من غير حتى كلمة...خاطرني منجمش نطلب منو حاجة هكا توا و إحنا في طريقنا للحفل اللي منعرفش علاش يحبني نكون حاضرة معاه...خاصة في وضعي هذا...كبست على كرشي و تكيت لتالي.. غزرلي مستغرب و ضيق عينيه يحكي
نوح:إنتي لبااس ؟
هزيتلو براسي إيه و غمضت عينيا...محاولة مني باش نتخلص من الشهوة لي سيطرت عليا و من ريحتو لي تجبد فيا لعندو...متوقعتش باش نلقى روحي في وسط الصراعات بسبب الصغير هذا و منعرفش شنوة لازمني نعمل بالظبط...كبس على يدي في لحظة و غزرلي يحكي
نوح:آنيا جاوبني عزيزتي...ياخي موجوعة ؟
أنا:لاا...أما ريحتك خنقتني
نوح:إنتي قلتلي قبل أنك تتفرهد بالبرفان هاذي
أنا:و توا معادش تعجبني و ولات تقلقني
نوح:الصبر يا ربي...ياخي إنتي حامل بعدو ليا ؟ معاد يعجبك أي شي مني ؟
أنا:والله...لازمك تتحمل بالسيف عليك...ماهوش ولدي  وحدي
نوح:مقلتش العكس عزيزتي...من غير ما تقلق روحك توا...عالأقل بنتي تكون مرتاحة
قحرتلو و جبدت يدي منو...ضحك و كبس على الفولون يحكي
نوح:ساعة بنتي هي الشخص الوحيد لي ممكن يفك بلاصتك
هزيت عينيا في وجهو و قحرتلو بالوقت...منعرفش شبيه يخمم بالطريقة هاذي و لا حتى كيفاش ناوي يبعدني عليه بعد ما نولد...ياخي معقول مشاعرو باش تنقص أكثر ناحيتي...خذيت نفس نحكي
أنا:علاش كانت فما بلاصة ليا عندك ؟ اللي باش تعملو بعد توا ماهوش مهم بالنسبة لياا...خاطر ماكش باش تنجم تكسرني أكثر من هكاا
نوح:أنا ولا مرة حاولت نكسرك و إنتي تعرف هذا بالقدا عزيزتي...نعرف إني غلطت في حقك و يمكن ضعت في مرحلة من مراحل علاقتنا...أما ولا مرة نويت إني نضرك و لا حتى نجرح مشاعرك...معادش تقول كلام من راسك
سكت و عاودت دورت راسي للبلار...شريط حياتي تعدا قدام عينيا في لحظة...نوح كان العوض بالنسبة ليا على كلشي خايب تعديت بيه و فكرة أنو هو معايا جيست خاطرني نشبه لحبيبتو السابقة جرحتني عاللخر و وجعتني زادة...خاطر هو الشخص الوحيد لي دخل لحياتي من غير ما يضرني و توقعت أنو هو مستحيل يستغلني...أما صار العكس و لقيتو استغل الشبه اللي بيني و بينها و إستغل ضعف مشاعري قدامو و ربطني بيه للأبد بالصغير لي بيناتنا...و بسببو هو لقيت روحي في دوامة غريبة...مهما حاولت نخرج منها...نلقى روحي ضعت فيها أكثر...غير هكا منعرفش كيفاش باش نواجه الدنيا هاذي مرة أخرى حتى عيلتي معرفتش نلوج عليها وحدي و متأكدة إني مستحيل نوصل لحاجة تخصهم...و أنا بعيدة على بلدي و عليهم زادة.