آفْرُودِيتْ 🦢

الحلقة السادسة و الثلاثون🧚‍♀️

🔸️حلقة 36
🔸️آنيا_تحكي:
حليت عينيا كي حسيت بلوسي قربت مني شوية تبسمت و بعدتها من وجهي..فرد وقت هزيت تليفوني و حليتو...إستغربت كي ما لقيت حتى مكالمة منو أصلا معاودتش كلمتو بعد ما علق عليا...غير هكا حسيت أنو رحلتنا لباروس بعدتنا على بعضنا أكثر و لا يمكن أنا لي توهمت أنو فما شي قاعد يصير معانا خذيت نفس طويل و هزيت روحي لبيت البانو خذيت دوش و شيحت شعري...فرد وقت عديت عينيا على الدرسينغ اليوم بالظبط نحب نعدي نهاري من غير ما نظغط على روحي و لا نفكر في شي مديت يدي شوية و خذيت روبة في الأسود قصيرة مع بوت طويل...كيما لقيت روحي نغزر لأدوات الزينة لي منستعملهاش بالعادة حطيت مكياج خفيف و روج غامق شوية...تبسمت بالوقت خاطر منعرفش إمتى آخر مرة إهتميت بروحي و غزرتلها بالطريقة هاذي ...غزرت للوقت و خرجت لصالة بالزربة...نلم في أوراقي بالزربة...خاطرني باش نتأخر على الدرس معادش نحب نضيع وقتي جملة كيما أمس إستغليت وجود ويليام لي خلاني نصحح أكثر من كلمة و ننطقها بالقدا...نفخت بالقاوي كي فلت ورقتين من يدي...نزلت هزيتهم في يدي و وقفت مرة أخرى وين جات عيني في عينو بالوقت...غزرتلو من غير ردة فعل...توقعت أنو يكون رجع مأخر أما ظاهر فيه عدا ليلة معاها هي...هزني و حطني يحكي
نوح:صباح الخير
أنا:صباح الخير
نوح:خارجة ؟
أنا:الكور متاعي باش يبعد بعد شوية عند جوزيف منجمش نتأخر أكثر من هكا
هزلي براسو باهي...خذيت نفس و رجعت لتالي من غير ما نحاول نحكي معاه أكثر...غزرت في لوسي لي قعدت على الكرسي متاعي و عوجت فمي نحكي
أنا:تتوقع أنا الغالطة خاطرني صدقت الأوهام لي بنيتها وحدي ؟ أصلا هو الخاسر الوحيد
سكت شوية و قربت منها...هزيتها في حملتي نحكي
أنا:و يمكن ماهوش خاسر زادة..إذا كانو يحبو بعضهم
أصلا إنتي مريتش آخر فترة كيفاش كان مهتم بيها و بالإتصالات متاعها و هوكا عدا ليلة معاها زادة...غير هكا أنا مانيش باش نتعلق بيه خاطرو شخص سااقط يا لوسي و لا مكانش باش يبوسني و هو مرتبط بأخرى
ضيقت عينيا و كبست عليها أكثر...تبسمت بالوقت نحكي
أنا:إنتي باش تعاوني ننتقم منو...في الأخير يستهل اللي باش يصير فيه
هزيت صاكي في يدي و كبست عليها فرد وقت خرجت من بيتي و قدمت ناحية بيتو...حليت الباب شوية و دخلت...كنت باش ندبر أي كذبة خلاتني نجي لهوني..أما وجودو في بيت البانو ساعدني برشا...تبسمت و حطيتها في وسط سريرو نحكي
أنا:خليك هووني و كهو
طمنت أكثر كي ريتها تمدت بالقدا...تبسمت و رجعت لتالي...زربت في خطواتي للأصونصير و نزلت اللوطة أصلا ملحقتش نفطر خاطر معادش عندي وقت غزرت لسائق لي حلي الباب...ركبت من تالي و كبست على يديا زوز...للحظة حسيت روحي ندمت على الفازة...خاطر وجودها برك في بيتو تخليه يتحسس خلي أنها تقعد على فرشو...فرد وقت يستهل مدام عدا  ليلة معاها من غير ما يحاول حتى يطمن عليا بعد إتصالي بيه...نزلت أول ما شد الفران و غزرت لراجل المسؤول على حمايتي لي دخل ورايا للمدرسة منعرفش كيفاش وصلت للقاعة خاطر بالرسمي تأخرت غير العادة...مديت يدي دقيت الباب...هز راسو شوية و غزرلي بالوقت منعرفش علاش غزرلي كيما نوح بكري...للحظة حسيت حاجة مش ظابطة فيا...تبسم يحكي
جوزيف:تفضل آنيا
أنا:أعذرني على التأخير
جوزيف:مش مشكلة...إحنا بدينا توا
تبسمت و قربت من طاولة متاعي...قعدت و حطيت أوراقي...فرد وقت كبست على القلم متاعو في يدي منعرفش علاش متخلصتش منو مع أنو عندي برشا غيرو...فرد وقت سرحت في أفكاري مرة أخرى و خفت من فكرة أنو باش يتعب جراير لوسي و لا حتى أنو يحرمني منها خاطر ديما ينبه عليا باش نخليها بعيدة عليه...فقت من سرحتي كي حسيت بيه واقف قدامي هزيت راسي شوية و غزرتلو...عدا عينيه على وجهي يحكي
جوزيف:آنيا...لباس ماهو ؟
هزيتلو براسي إيه و حطيت القلم من يدي...نحكي
أنا:سرحت شوية و كهو
جوزيف:متأكدة ؟
أنا:نظن ضيعت شوية من الشرح لي كنت تقول فيه
جوزيف:هاني باش نعاودو توا...حاول أنك تركز المرة هاذي
أنا:باهي...عيشك جوزيف
عدا عينيه على وجهي مرة أخرى و تبسم...وين لقيت روحي نتبع فيه من غير ما نخمم في نوح أكثر خاطرني منحبش الملاحظة تتكرر مرة أخرى...غزرلي يحكي
جوزيف:آنيا شقولك تحاول تعرف على روحك باليونانية...خاصة أنك مجربتش لتوا
هزيت روحي وقفت و كبست على القلم في يدي أكثر بعد ما لقيت روحي واقفة مقابلتهم...غزرلي يحكي
جوزيف:متخافش
تبسمت و هزيتلو براسي باهي...بالنسبة ليا كانت أول مرة نتواصل مع العدد هذا و نحاول نعرف على روحي رغم أنو مفما حتى شي نحكي عليه بخصوص الماضي وين لقيت روحي نحكي على إسمي و عمري و الميتم لي تربيت فيه و على بيلا لي رافقتني طول السنين لي فاتت..غريبة كمية الراحة لي حسيت بيها...مع أني كسرت شطر الحروف و ضيعت أكثر من كلمة في التعبير...تبسمت كي غزرلي يحكي
جوزيف:براافو آنياا...متوقعتش أنك تقدمت برشا
كبست على القلم أكثر و ضحكت خاصة أنو المجموعة لي نقرا معاها خلاتني نحس بالدعم من أول مرة تواجدت فيها معاهم...فكرة أني باش نعيش حياة طبيعية وسط ناس تحبني و نكون جزء منها تخليني نقاوم أكثر و نحاول أكثر...من غير ما نفشل خاطر بالنسبة ليا أنا قاعدة نصنع في بداية جديدة ليا من العدم...مانيش باش ننكر الدعم لي تلقيتو من نوح...أما بطريقة و لا أخرى لازمني نبدا من جديدة و نخلق لروحي حياة مستقرة بعيدة على كل الظغط و الخوف لي عشت بيهم طول حياتي...هزيت روحي خرجت بعد ما وفى الدرس و عديت بقية وقتي في المكتبة لي قريبة من المدرسة..غير هكا تعديت للكافيتيريا زادة منعرفش علاش محبيتش نرجع للقصر...كيما منجمتش لتوا لقيت روحي نخمم فيه...أصلا عالأغلب ميكونش حس بيها إذا كان باش يدوش و يخرج...فقت من سرحتي على الراجل لي من بكري معايا...وقف قدامي يحكي
ليو:آنسة آنيا...سيد نوح طلب مني باش نرجع بيك توا للقصر
هزيتلو براسي باهي و حليت تليفوني...استغربت كي مطلبنيش أنا...خلصت قهوتي و خلطت عليه...حلي الباب ركبت و ركب هو جنب السائق...تكيت لتالي و نزلت على شفايفي شوية...منعرفش السبب لي يخليه يتهرب مني لهدرجة...أصلا واضح أنو رجعو مع بعضهم خاصة بعد الميساجات اللي كانت بيناتهم و لأول مرة لقيت روحي نحب نتعدا التفكير هاذي و منخممش برشا في اللي باش يصير...خاطرني نبقى مجرد دخيلة على حياتو و معنديش حق باش نلوم عليه و على تصرفاتو فقت من سرحتي بعد ما وصلنا...هزيت روحي نزلت و طلعت للجناح متاعو...دقات قلبي قوات مع باب الأصونصير لي تحل...دخلت من غير ما نعمل صوت يكفي الباب لي عطا إنذار بوصول شكون...نزلت راسي شوية نفركس على لوسي لي مظهرتش جملة..للحظة خفت من فكرة أنو هو تخلص منها...قربت من بيتي باش ندخل وقفني يحكي
نوح:شبيك لتوا ؟
خذيت نفس طويل و تلفت عندو...هزيت عينيا من صدرو لوجهو مصدومة...وين بقيت نغزرلو من غير حتى كلمة...خاصة بعد ما ريت صدرو لي أحمر عاللخر خلي عينيه لي واضح أنهم يحرقو فيه لتوا قربت منو شوية نحكي
أنا:أنت لباس ؟
نوح:عالأغلب
سكت خاطرني معرفتش شنوة نقول...خاصة أنو الحالة لي هو فيها توا بسببي أنا...رجعت خصلة من شعري ورا وذني و غزرتلو نحكي
أنا:وينها لوسي ؟
نوح:والله ماخذة راحتها على فرشي...خاطر حتى بعد ما طردتها رفضت أنها تخرج
غزرتلو مصدومة...متوقعتش أنها باش تبقى في بيتو طول الوقت هذا...حطيت صاكي على الفوتاي...نحيت كبوطي و قربت ناحية بيتو...نغزرلها و هي ممدودة في وسط فرشو...تلعب بالخيط لي بين يديها...قربت منها شوية و هزيتها في حملتي نحكي
أنا:فاش تعمل هوني...على أساس باش تخليه يتحسس شوية و تخرج
نوح:متحكيش بالروسية و أنا موجود معاك
أنا:هاني باش نخرجها توا
كبست عليها في حملتي و زربت في خطواتي لبيتي أول ما حطيتها قربت ناحية سريرها باش تاكل حطيت يدي على فمي مروهجة...منعرفش إذا كان باش يرتاح خاصة أنو كان يحك في صدرو و رقبتو مع أنو حط المرهم عليهم...نحيت البوت و لميت شعري و عاودت خرجت...استغربت كي ريت أولجا لي دخلت لبيتو خلطت عليها بالوقت...غزرتلها و هي تحل في الشباك و تبدل في الفرش مع وحدة من الخدم...رجعت لتالي و مشيت ناحية البيرو متاعو مديت يدي شوية و حليت الباب...غزرتلو بالوقت..رجع غطس في الخدمة...واضح أنو عدا بقية نهارو هوني...هز راسو شوية و غزرلي قربت منو شوية نحكي
أنا:أولجا هوني
نوح:أنا طلبتها...مدامك جيت و خرجت قطوستك
أنا:كنت تنجم تحطها في بيتي
عدا عينيه على وجهي و نزل راسو...أصلا الحق عليه أنو خلاها في بيتو...مع إني نعرفها كي تلقى راحتها في بلاصة ترفض أنها تقوم منها...مد يدو شوية يحك في رقبتو من تالي...و عطس فرد وقت...قربت منو أكثر نحكي
أنا:ياخي نجم نعاونك بحاجة ؟
نوح:لاا
أنا:زايد معاك...الحق عليا خاطرني حبيت نعاونك أصلا تستهل لي صار فيك الكل
نوح:شنية قتلك قبيييل ؟
أنا:نحكي كيمااا نحب...مش مشكلتي أنك متفهمش اللغة متااعي
قحرتلو و وخرت لتالي...نطر الكرسي لتالي و وقف بالوقت...عطيتو بظهري باش نمشي...جبدني من يدي بقوة و دزني لتالي على غفلة...وين لقيت روحي محصورة بين يديه..كيما حسيت بأنفاسو لي ضربتني
في وجهي...للحظة حسيت روحي دخلت بعضي من ردة فعلو..غير هكا منجمتش نجبد روحي منو..عديت
عينيا على تفاصيل وجهو و نزلت بيهم لرقبتو متوقعتش باش يتحسس لهدرجة...غير هكا هاذي أول مرة يغزرلي بالغش هذا الكل...قلبي خض بالقاوي و معرفتش شنوة نعمل بالظبط...كبس على يدي أكثر يحكي
نوح:مانيش باش نعاود كلامي معاك
أنا:وجعتني
نوح:اللي صار اليوم ماهووش باش يتكرر و آخر مرة تخليها تخرج من بيتك...واااضح ؟
أنا:وااضح...سيبني تواا
نوح:برا شد بيتك تواا
عدا عينيه على وجهي و نزل بيهم لرقبتي...جبدت روحي منو بالوقت و بعدت عليه...فرد وقت هزيت عينيا في وجهو مستغربة من تصرفاتو...خاطرني منتذكرش إني غلطت معاه قبل توا...باش يتقلب بالطريقة هاذي فقت من سرحتي على صوت تليفونو نزل عينيه من وجهي و رجع للبيرو متاعو...هز عليها يحكي
نوح:شفمااا لورااا ؟ شنووة تحب إنتي زاادة ؟
مد يدو فرد وقت يحك في رقبتو...كأنو مش حامل روحو جملة...هز راسو شوية و قحرلي بالوقت...لي خلاني ننسحب و نخرج من المكتب متاعو...هزيت كبوطي لبستو و رجعت لبيتي...لبست البوت مرة أخرى و هزيت لوسي في يدي نحكي
أنا:خلينا نمشيو توا
كبست عليها في حملتي و دخلت للأصونصير من غير ما نخمم لحظة وحدة في الخطوة لي عملتها...أول ما وصلت لبرا...حبسني ليو بالوقت...يحكي
ليو:وين باش تمشي آنسة آنيا ؟
أنا:شمدخلك فيا ؟
ليو:هذا واجبي ناحيتك
أنا:سيد نوح طردني من القصر...يعني بعد توا ماكش مكلف بحمايتي
ليو:شنوة السبب ؟
أنا:أسألو هو...أنا لازمني نمشي توا
جبدت روحي منو و خرجت من غير ما نرد لأسئلة الرجال لي برا...حتى منعرفش وين باش نمشي بالظبط كلشي خممت فيه..في اللحظة هاذي إني نبعد من هوني و كهو خاطرني معادش نحب نشوفو مرة أخرى.