آفْرُودِيتْ 🦢

الحلقة الثالثة و السبعون🦢

🔸️حلقة 73
🔸️نوح_يحكي:
مديت يدي شوية و حليت الباب مع صوت الموسيقى لي خارج من الغرفة...غزرت لعلبة الموسيقى و دورت راسي شوية نثبت في تفاصيلها...من الفستان الأسود لرقصة الخاصة بيها على المسرح...إستغربت أنو هي قدامي بعد الشهور لي فاتو الكل...كأنو ما تبدل فيها حتى شي...قربت منها من غير ما نحس و غزرتلها نحكي
أنا:صووفي ؟
دارت عندي في لحظة و حبست قدامي بالظبط غزرتلي و تبسمت تحكي
صوفي:نووح...أنت هوني
أنا:وين كنت ؟ و فاش تعمل هوني ؟
صوفي:توقعت أنو وجودي باش يفرحك
أنا:مقصدتش لي فهمتو...أما إنتي ماكش موجودة بعد تواا
مدت يدها شوية و حطتها على خدي...قربت مني أكثر وين حسيت بأنفاسها لي ضربت في وجهي و تبسمت تحكي
صوفي:أنا مزلت موجودة نوح...أما أنت تخليت علياا
أنا:أنا ولا مرة تخليت عليك و إنتي تعرف هذا بالقدا
صوفي:ملا وين كنت نوح ؟ علاش منقذتنيش وقتها علاش نسيتني بالطريقة هاذي ؟
مديت يدي شوية و عديت صوابعي على خدها نحكي
أنا:مكنتش نعرف شنوة اللي كان يصير معاك و إنتي محاولتش تخبرني زادة
صوفي:أنت سلمتني لأركان...أنت ضحيت بيا باش تنقذ ولد عمك و من وقتها معادش يهمك شنووة باش يصير فيا
هزيتلها براسي لا و عديت عينيا على تفاصيل وجها نحكي
أنا:توقعت أنو انا باش نعطيك فرصة أفضل مني و نخليك تحقق كل أحلامك زادة
صوفي:أنا ما كنت نحب على حتى شي من غيرك أنت  و كهوو...أما محاولتش تفهمني و لا تقدر مشاعري ناحيتك زادة
أنا:صووفي أناا
صوفي:أنت تنجم تعمل معاها نفس الشي ؟
أنا:مفهمتكش
صوفي:سؤالي واضح نووح ؟ أنت مستعد تضحي بيها في سبيل أركان ؟ مستعد تخليه يرقد معاها و يمسها زادة ؟
أنا:آنياا مرتي و علاقتي بيها مختلفة زادة
صوفي:بالمختصر أنت حبيتها لدرجة أنك مستحيل تسلم فيها لشخص آخر حتى لو كان أركان القايد
أنا:كان يرجع بيا الوقت لتالي مكنتش باش نعملها و لا حتى نضحي بيك...أنا جيست منجمش نكرر نفس الغلطة مرة أخرى معاها و لا حتى نضحي بحبي من جديد
صوفي:تأخر الوقت برشا على الكلام هذا نووح
وخرت خطوة لتالي و عطاتني بظهرها...خلطت عليها و دورتها عندي في لحظة...فرد وقت جبدت روحي مصدوم...من الدم لي كان نازل من خشمها و عينها مديت يدي شوية نحكي
أنا:صووفي...شبيك ؟
صوفي:هاذي آثار الوقعة...تتذكر نوح ؟ أنا وقعت من مكان عالي برشااا و أنت مكنتش موجوود باش تنقذني
هزيتلها براسي لا و قربت منها شوية باش نمسها تبسمت تحكي
صوفي:أنا مانيش موجودة نووح...أنا مشيت من مدة طويلة و أنت نسيتني وقت دخلت هي لحياتك..أنت حتى مكلفتش روحك باش تعرف شكون قتلني..أنت بكل بسااطة نسيت كلشي يتعلق بيااا
بعدت عليا أكثر و وقفت قدام الشباك...وين كان الريح يضرب بقوة...وقفتها بيدي نحكي
أنا:صوووفي لحظة
صوفي:الودااع نووح
هزيتلها براسي لااا و قربت منها بسرعة قبل ما ترمي روحها و مديت يدي باش ننقذها...شديت منها كان الوشاح لي كان على رقبتها...و ناديت عليها
أنا:صوووووفي
حليت عينيا مروهج و هزيت روحي تقعدت منجمتش نصدق أنو هذا الكل مجرد حلم...حتى إني مزلت نسمع في صوتها و نحس بدقات قلبي...دورت راسي شوية و غزرت لآنيا...غمضت عينيا بقوة و عاودت حليتهم باش نتخلص من صورتها...و قعدت على طرف السرير..كبست على راسي بيديا زوز باش نهدي روحي...قربت مني شوية تحكي
آنيا:أنت لباااس ؟
أنا:نحب نبقى وحدي شوية
هزتلي براسها باهي و خرجت من غير حتى كلمة خذيت نفس و عديت يديا زوز على وجهي...مش مصدق اللي ريتو في الحلم...ولا مرة توقعت نواجه صوفي في حلم ؟ و نسمع الكلام اللي كنت هارب منو طول الفترة لي فاتت...منعرفش على روحي كيفاش نجمت نقوم لبست الشورت متاعي و خرجت من البيت...وقفت نغزرلها...كانت تدور في الزر متاع ماكينة القهوة...قربت منها شوية و دورتو من ناحية لأخرى...حسيت بتوترها حتى و هي ساكتة...عبيت كأس الما و هزيت راسي شوية نحكي
أنا:مقصدتش لي صار من شوية...كنت مشوش من الحلمة لي ريتها
آنيا:أنت قمت تعيط بإسمها
عديت عينيا على وجها من غير حتى كلمة...مكنتش نعرف أنو الكابوس هذا رافقني للواقع...قربت منها شوية نحكي
أنا:آنياا...أناا
آنيا:ماكش مظطر تبررلي...يبقى مجرد حلم و كهو
أنا:أنا بالرسمي مقصدتش لي صاار و لتوا منعرفش كيفاش لقيت روحي وسط الكابوس هذا
هزت الفنجان متاعها من غير حتى كلمة و بعدت عليا خلطت عليها نحكي
أنا:ماكش باش تقول حتى كلمة ؟
آنيا:الطفلة لي تخدم معايا في المطبعة سألتني إمتى باش نرجع...شنوة باش نقولها ؟
أنا:مش هذا موضوعنا توا
آنيا:منحبش نحكي عليها...أكا علاش جاوبني على سؤالي و كهو
أنا:منعرفش...إنتي إمتى تحب ترجع ؟
آنيا:اليوم
أنا:مش هذا كلامك أمس
آنيا:بدلت رايي تواا
أنا:باهي كيما تحب
عديت عينيا على تفاصيل وجها...وين تعمدت أنها متغزرليش...مقصدتش إني نجرح مشاعرها خاصة انو العطلة هاذي كانت خاصة بينا و بعيد على كلشي رجعت لتالي و دخلت لبيت البانو...حليت الما و وقفت تحتو...كنت بحاجة إني نفيق من الكابوس لي ريتو و من اللي صار قبل شوية...منحبش الماضي يسيطر عليا و يأثر على علاقتي بيها...متوقعتش أني نغطس في حلم لدرجة حسيت لي هو حقيقي...وين لقيت روحي نخمم في اللي صار مع صوفي بسببي من ناحية و في علاقتي بآنيا من ناحية أخرى و في الحالتين..مانيش مستعد نخسرها على خاطر الماضي و لا حتى نخليها تواجه حاجات أكبر منها بسببي و بسبب الماضي متاعي زادة خاطر هي الشي الوحيد لي نحب عليه من الدنيا هاذي الكل.