آفْرُودِيتْ 🦢

الحلقة الرابعة و العشرون🧚‍♀️

🔸️حلقة 24
🔸️إلينا_تحكي:
كملت فطوري بالزربة و هزيت الفاست متاعي في يدي منحبش نتأخر أكثر من هكا...خاصة أنو لازمني نكمل ساعات الدوام بكري خاطر لازمني نتعدا للمسرح بخصوص التدريبات للعرض الجديد...بستو من خدو نحكي
أنا:رد بالك على روحك و إذا إستحقيت شي أطلبني باهي
ويليام:و إنتي زادة رد بالك على روحك ملاكي
تبسمت و هزيتلو براسي باهي..حليت الباب و خرجت
لبرا...حبست كي ريتو نزل من كرهبتو...ضيقت عينيا نحكي
أنا:أركاان
قربت منو مستغربة...خاطر متوقعتش نشوفو توا خاصة أنو آخر مرة حكينا فيها كانت من يومين و توقعت باش طول المدة هاذي أكثر...عدا عينيه على وجهي يحكي
أركان:صباح الخير
أنا:صباح النور...تفضل سيد أركان...شنية سبب الزيارة في الوقت هذا ؟
أركان:خممت إني نعدي شوية وقت مع فينوسي
أنا:والله أنا نخدم توا و بعدها عندي تدريبات في المسرح...يعني معنديش الوقت لي تحكي عليه أنت
أركان:جون يعرف أنو ماكش باش تجي اليوم و بالنسبة لتدريبات...المسرح ملكك يا روحي...حد ما يقرر الوقت في بلاصتك
أنا:لحظة...أنت من وين تعرف جون ؟
أركان:الكل يعرف شكون صاحب المحل
أنا:أركااان
أركان:باهي متغزرليش هكا...مجرد تحقيق صغير عليهم باش نطمن عليك
أنا:أنا باش نكون لباس أركان...الناس هذوما عديت معاهم سنين من حياتي...يعنس مستحيل أي حد منهم يضرني
أركان:و مع هكا معنديش إستعداد نخاطر بيك
أنا:أنا باش نكون لباس...حتى رجالك لي معايا طول الوقت مش لازم يكونو هوني...غير هكا منحبش نكون في المسرح بالحاجات لي وصلتلها مش على خاطرك أنت ورايا
أركان:تألقك على المسرح أنا ما عندي حتى يد فيه فينوسي...إنتي تستحق اللي وصلتلو الكل...غير هكا أنا بحاجة نهار واحد منك...خلينا نعرفو بعضنا أكثر مش هذا اللي حبيت عليه ؟ نظن كلامك صحيح..بعد توا باش نتعرفو على بعضنا من غير حتى ظغط مني يكفي أنو مشاعرك ناحيتي تبقى موجودة ديما خاطر أنا منعرفش نعيش من غيرك 
أنا:أنت قاعد تعترف من جديد سيد أركاان 
أركان:نظن أنا بحاجة مساعدة صغيرة منك...خاطر بالرسمي كلشي قاعد نعمل فيه توا...مجربتوش قبل
أنا:صوفي كانت أقرب وحدة ليك...معناها عملت برشا حاجات على خاطرها
أركان:إنتي الوحيدة لي قاعد نتنازل على خاطرها على هذاكا...إلينا دايون تقبل ترافقني في رحلة صغيرة ؟
غزرت لكرهبتو لي جا بيها وحدو و لرجالو لي واقفين قدام داري...ضيقت عينيا نحكي
أنا:تقصد أنو باش نمشيو وحدنا من غير رجالك ؟
أركان:ما نحب نشوف حتى حد غيرك فينوسي
أنا:منجمش نغيب فترة طويلة و نخلي ويليام وحدو
أركان:ويليام باش يكون في أمان...غير هكا عرفت من نوح أنو آنيا تحب تشوفو إذا مفماش مانع
أنا:منظنش باش يرفض يشوفها...أصلا هو طلب منها تجي عندو قبل
أركان:متغزرليش هكا مرة أخرى...خاطر وضحت كلشي عندي بخصوص آنيا..كيما أنا لتوا مزلت نستنى في جواب منك
عديت عينيا على وجهو...تقريبا هاذي أول مرة يتصرف بطريقة صحيحة...أصلا مننكرش إني توحشتو طول المدة لي فاتت...و مغابش من بالي جملة رغم كلشي قاعد يصير...كيما لتوا منعرفش شنوة لي مزال مخبي لينا زوز...خذيت نفس نحكي
أنا:منجمش كل مرة نلبي دعوتك...خاطر أنا بالرسمي نحب نتقيد بمخططاتي...خاطر فما برشا حاجات تستنى فيا
أركان:و أنا مستحيل نكون عقبة في طريقك..صدقني باش تحقق كل أحلامك بالطريقة لي تحب عليها..غير هكا أنا باش نكون موجود ديما معاك
أنا:معناها قاعد تقول أنك مستعد تخليني نعرفك أكثر 
أركان:هذا اللي باش يصير مدام باش نكملو حياتنا مع بعضنا
أنا:إنتبه سيد أركان...أنا لتوا موافقتش نكمل حياتي معاك
أركان:خلينا نمشيو توا
مدلي يدو بالوقت...خذيت نفس و قربت منو شوية حطيت يدي في يدو...كبس عليها و باسني منها..فرد وقت حلي الباب ركبت...تبسمت و تكيت لتالي خاطر بالرسمي منعرفش علاش وافقت...أما مدام علاقتنا باش تكون محدودة و تخلينا نعرفو بعضنا من غير ظغط خلط و عليا و خدم الكرهبة...غزرتلو نحكي
أنا:وين باش نمشيو ؟
أركان:لبلاصة نتوقع باش تعجبك برشااا
تبسمت و هزيتلو براسي باهي...تكيت لتالي و خذيت نفس طويل...فرد وقت نسترجع في الذكريات لي عشتها معاه شهور لتالي...لدرجة إني محسيتش بالوقت كيفاش وصلنا لشريكة الطيران الخاصة بيه
غزرتلو نحكي
أنا:أركاان...وين باش تهزني ياخي...ساعة مخبرتنيش أنو إحنا باش نبعدو برشا
أركان:نعرف...أما وعدتك إني نرجعك في الوقت المناسب...يكفي أنك تاثق فيا
أنا:باش نمشيو لسانتوريني مرة أخرى ؟
أركان:المرة هاذي وجهتنا إلى رودس
أنا:رودس
أركان:نظن باش تحبها هي زادة...هيا خلينا نمشيو
هزيت روحي نزلت من الكرهبة و خلطت عليه محطيتش إحتمال إني باش نركب في الطيارة متاعو من جديد و مع هكا منجمتش نتراجع...مدام الوضع بيناتنا مختلف على قبل...غير هكا مستغربة شوة في تصرفاتو خاطر متوقعتش أنو باش يحاول على خاطري بالسرعة هاذي...طلعت قبلو و قعدت...مديت يديا زوز باش نربط الحزام...نزل عليا شوية...ربطو بالطريقة الصحيحة و قعد مقابلني...توقعت إني تعديت مغامرات أركان القايد...أما الظاهر مش بالسرعة لي توقعتها...أصلا مهما نكرت مانيش باش نبدل حقيقة أنو الوحيد اللي نجمت نغزر لروحي في عينيه...و نخلي قلبي يتحكم عليا في حضورو..يمكن بالرسمي أنا بحاجة إني نعرفو أكثر...مدام ماهوش باش يظغط عليا و لا يحاول يسلب حريتي كيما عمل قبل...نتوقع أنو إحنا زوز بحاجة الفرصة هاذي مع بعضنا...دورت راسي لشباك و خذيت نفس طويل...منعرفش شنية باش تكلفنا الرحلة هاذي زادة...حتى إني فضلت نحتفظ بأسئلتي ليا...عالأقل لين نوصلو...أصلا الرحلة خذات منا ساعة وحدة...و كنا في جزيرة رودس حتى هي تعتبر إكتشاف...خاطر عديت السنين لي فاتت الكل في أثينا و مخممتش إني نبعد على الدار بالقدر هذا...كبست على يدو و نزلت معاه إستلم الكرهبة و حلي الباب ركبت...خلط عليا بالوقت وين غزرتلو نحكي
أنا:ميطلعش عندك منتجع هوني زادة
أركان:لاا...باش تكتشف البلاصة بعد شوية
أنا:باهي
تبسم و شد الثنية...عديت عينيا على وجهو و تكيت لتالي...منحبش غزرتي ليه تفضحني أكث من هكا كيما منحبش نخمم في الكلام لي سمعتو من إسكندر خاطر محبش يخرج من راسي جملة...فقت من سرحتي كي شد الفران...غزرتلو نحكي
أنا:وصلنا ؟
هزلي براسو إيه...حليت الباب و نزلت...عديت عينيا مبهورة باللي نشوف...الحديقة هوني كأنها مأخوذة من الدفيئة لي في القصر...رغم أنو الجو بدا يبرد أما مخباش سحر المناظر لي هوني...فرد وقت غزرت لدار لي مقابلتنا و للبحر لي وراها...غير هكا مفما حتى دار قريبة من هوني...قرب مني شوية يحكي
أركان:تفضل إلينا دايون
أنا:هاذي ملكك أنت زادة ؟
أركان:صحيح...أصلا هاذي أكثر بلاصة نحب نعدي فيها وقتي...كي نبدا بحاجة راحة
أنا:من غير حراسة ؟
أركان:ممنوع أي حد يدخل لهوني...فما حراسة على الجوانب الأخرى...يعني ماكش باش تظطر تشوفهم اليوم
تبسمت و هزيتلو براسي باهي...شاورلي بيدو باش ندخل معاه...خلطت عليه و دخلت...تبسمت كي ريت أنو شطر الدار كانت من البلار...حطيت صاكي و قربت شوية...نغزر للجهة الثانية لي كانت طل على البحر...غير الطيور لي كانت تحلق من بعيد...تبسمت و غزرتلو بعد ما قرب مني...نحكي
أنا:المنظر من هوني سااحر
أركان:و هادئ زادة
أنا:مع شكون كنت تجي لهوني ؟
أركان:خذيت الدار هاذي لدانييل...كانت عندي خطط للعطل الصيفية...فكرت أنو هوني باش يكون في أمان و تحت عيني...حتى أنو فما غرفة ألعاب طل على نفس الوجهة هاذي...توقعت باش تعجبو...خاطر توفى قبل ما يجي لهوني...نظن هكا أحسن...خاطرني كان بنيت ذكريات معاه هوني...مستحيل نرجع مرة أخرى...غير هكا نعتبرها أكثر بلاصة تخليني نرتاح من أي ظغط في الدنيا
عديت عينيا على وجهو و نزلت على شفايفي شوية نحكي
أنا:منقصدش نحيرلك مواجعك...نعرف أنو الحديث على دانييل أصعب حاجة بالنسبة ليك
أركان:نظن لازمني نتعود...يمكن بالطريقة هاذي نجم نخرج شوية من الألم لي عديت بيه سنين...هيا إيجا معايا توا
تلفت باش يمشي...شديتو من يدو بالوقت...دور راسو غزرلي ندرا كيف...قربت منو و عنقتو من غير ما نخمم في وضعنا و لا في اللي جاي زادة...خاطر هذا اللي نحس أنو صحيح في الوقت الراهن...عدا يدو على شعري و باسني من راسي من غير حتى كلمة...خذيت نفس من ريحتو و جبدت روحي شوية
نحكي
أنا:أنت لباس توا ؟
أركان:نظن إني بحاجة عناق آخر...يمكن نرتاح أكثر
مديت يدي و ضربتو على صدرو بالوقت...نحكي
أنا:بليييد
ضحك و خلط عليا بعد ما بعدت عليه...قربت من الكنتوار و عبيت كأس الما نحكي
أنا:شكون يهتم بالمكان هوني ؟
أركان:فما شكون موكل بالشؤون هاذي
أنا:طلع كلامك صحيح...أنا حبيت كلشي هوني
أركان:شقصدك بكلشي ؟
هزيت عينيا في وجهو غمزني بالوقت...قحرتلو نحكي
أنا:أركاان...إحنا هوني مجرد أصحاب كهو...متنساش أنو قاعدين نتعرفو على بعضنا...معناها رد بالك تخدم مخك معايا
أركان:نفس الكلام موجه ليك عزيزتي
أنا:بالله ؟
أركان:إنتبه لتصرفاتك...خاطرك تعرف إني منجمش نقاومك...خاصة بالنسبة لشفايفك و هكا نجمو نعديو
نهارنا و إحنا أصحااب...من غير ما يصير حتى شي خارج القانون
تبسمت و عطيتو بظهري...حطيت كأس الما و تكيت على الرخامة نحكي
أنا:أنا جعت...مفماش خدم هووني...و أنا ما عندي حتى علاقة بالطبخ...واضح زادة قداش إحنا معزولين على الناس و نتوقع أقرب مطعم يوصلنا الأكل بعد ساعتين ملا تفضل خبرني شنية الحل توا سيد أركان
قرب مني شوية...وقف قدامي بالظبط...عدا عينيه على وجهي و حط يدو على الرخامة بجنبي...يحكي
أركان:شنية تحب تاكل فينوسي
أنا:أنت لي باش تطبخ ؟
أركان:نظن مفما حتى حد غيري معاك هوني
أنا:مستحيل
أركان:عندك حق...كان لازمني نخليك تتعرف عليا عن قرب أكثر...إنتي أكثر وحدة تصرفت معاها بأنانية إلينا خاطر مكنتش نخمم في إحتمالات أخرى و لا حتى نخمم في فكرة أنك ماكش باش تكون معايا
أنا:أنت تملك عالم خاص بيك أركان...منعرفش كيفاش و إمتى وليت جزء منو...أما معرفتش نتأقلم معاه معرفتش نتقيد بقوانينك لي كانت غريبة بالنسبة ليا حتى لو مشاعري ناحيتك حقيقية...نحب نكتشفها من جديد و أنا حرة...يعني مهما كان اللي باش يتعلق بينا ناخو قرارو من غير ظغط و لا خوف زادة
مد يدو شوية...بعدلي خصلات شعري لتالي و تبسم
يحكي
أركان:و هذا اللي باش يصير فينوسي...أما أنا باش نكون بحاجة شوية مساعدة...مدام صغرونتي تحب تاكل على بكري
أنا:باهي...نمشي نحي الفاست متاعي و نرجعلك و أنت أعمل نفس الشي زادة
ضحك و هزلي براسو باهي...خذيت نفس و جبدت روحي منو شوية...نحيت الفاست متاعي...حطيتها على الفوتاي...تبسمت كي ريتو يهز في أكمام الشوميز اليوم بالظبط...قررت إني نعدي نهاري من غير ما نحط إحتمالات لعلاقتنا و شنوة اللي باش يصير معانا بعد توا زادة...يكفي إني نعيش النهار هذا بتفاصيلو الكل و كهو.
لميت شعري و قربت منو شوية...هزيت السكين في يدي و خذيت نفس..نحكي
أنا:فما وصفات معينة ؟
أركان:إنتي شنية تحب ؟
أنا:موساكا...نظن هاذي أسهل وصفة
أركان:باهي...خلينا نضيفو معاها حساء و سلطة روسية
أنا:روسية ؟
أركان:سلطة عزيزتي...حتى متأكد باش تعجبك
أنا:باهي قولي شنية دوري توا
أركان:تنجم تقص الخضرة
أنا:باهي
وقفت قدامو بالظبط...مديت يدي نقص في الخضرة لي عندي...فرد وقت نغزرلو كيفاش كمل اللي كانت بين يديه بسرعة...ضيقت عينيا نحكي
أنا:وين تعلمت هذا الكل ؟
أركان:أيامات الدراسة...كنا أنا و نوح نستغلو أوقات الفراغ و نجربو أي حاجة جديدة
أنا:نتوما أصحاب من بكري
أركان:نوح أكثر من خوياا...يعني معنديش ذكريات ماهوش فيها
أنا:بالله و كيفاش نجمت تتحمل زمردة ؟
أركان:زمردة هي زمردة...يعني الحل الوحيد أنك تتجاهلها...كلشي يهمها أنها تعرف كلشي
أنا:مسكين نوح...قداش مزال باش يعاني منها
ضحك و كمل قص الخضرة لي كانت بين يديا...نزلت
على شفايفي شوية نحكي
أنا:أركاان
أركان:رووح أركاان
أنا:نجم نسأل لي نحب عليه توا
أركان:نسمع فيك
أنا:تعرف عيلتك الحقيقية ؟
غزرلي ندرا كيف..للحظة حسيت روحي تسرعت بسؤالي و حرقت المراحل الكل بيناتنا...حط السكين من يدو يحكي
أركان:نعرفهم
أنا:أما و لا مرة حكيت عليهم للإعلام...حتى أني سألتك مرة و إجابتك كانت عكس هكاا...توقعت أنك ما تعرف عليهم حتى شي
أركان:خاطر الواقع يقول أنو عندي أب واحد إسمو باتريك
أنا:معناها ولا مرة حنيت لعيلتك و لا حاولت ترجعلها ؟
أركان:العيلة هاذي معادش موجودة تواا...صحيح أنا خبيت عليك شوية تفاصيل منحبش نتذكرها..بالنسبة
لبابا الحقيقي نعرفو بالقدا و أمي مزلت نحاول باش نتذكر حتى شوية من ملامحها...نظن أحسن طريقة لقيتها باش نتعداهم إني نصدق حقيقة إني منعرفهمش جملة
أنا:أنت مجروح منهم
أركان:كنت صغير برشا على المصطلح هذا...لي نعرفو و متأكد منو أنو باتريك أنقذ حياتي و لا مكنتش واقف قدامك توا...عاوني باش نتناسى برشا حاجات كيما علمني حاجات وصلتني لي أنا فيه...يبقى هو الأب الوحيد لي عندي
أنا:و بابا عمل نفس الشي زادة...علمني كيفاش نكون قوية...رغم أنو هو ماهوش كيفي...ولدت أنا و ويليام في أثينا...أمي توفات بعد ما سماتنا زوز...ما نعرف عليها حتى شي...من غير بعض الصور لي بقات عندنا من بابا...كيما مكانش مسموح نسألو عليها و على حياتها ظروف العيش ولات مستحيلة خاصة مع المدارس الخاصة و الكرا متاع دارنا...أكا علاش رجع بينا لتونس كان عالم جديد بالنسبة ليا...ظطريت ناخو وقت أنا و ويليام باش نتعلمو العربية و باش نتأقلمو في المدرسة لي كنا فيها...طول الفترة هاذيكا ويليام كان يتجنب أي حد يقرب منو...لي خلاني نتصرف بعنف مع أي حد يحاول يضرو...ساعة كان صديقي الوحيد خاطر نعملو كلشي مع بعضنا...كيما كان يحل الواجبات متاعي زادة و يحضرلي دروسي حتى كنا نخبيو على بابا معظم مشاكلنا...لي كنت أنا سبب فيها...و رغم حالة ويليام إلا كان ديما في المرتبة الأولى في كل المواد و المسابقات لين تبدل كلشي في لحظة و رجعنا لأثيناا
أركان:بسبب غالي ؟
أنا:غالي كان أسوء كوابيسي...هو المالك للمنطقة لي كنا عايشين فيها...المصانع و الديور لي غديكا كلها ترجع ليه هو...بابا كان مصمم و خيااط...يعني هذا كان مصدر رزقنا و فرد وقت السبب اللي خلانا نكونو أقرب منو خاطر بابا كان يحضر طلبيات عمال المصانع و الطلاب لي في المدرسة متاعو
أركان:شنية صار بينكم ؟
أنا:طلب أنو يعرس بيااا
حط يدو على الرخامة و غزرلي ندرا كيف...يحكي
أركان:وافقت ؟
أنا:لااا...أصلا رفضي هو اللي خلاه يولي الوحش لي يطاردني من بقعة لبقعة...غير التهديدات لي كانت تلحقني منو و ت...تفااصيل منحبش نحكي فيها
مديت يدي شوية و حطيتها على رقبتي من تالي نتحسس في آثار الحرق لي بقات ذكرى منو...قرب مني شوية...حط يدو على آخر ظهري و جبدني عندو عنقني بالوقت يحكي
أركان:أنا نجم نخليك تنتقم منو و من كل حد كان السبب في وجيعتك هاذي
أنا:لاا...أنا بالرسمي نحب نبدا من جديد من غير ما نرجع نحط ساقي في الماضي مرة أخرى
تنهدت بالقاوي و جبدت روحي منو شوية...منحبش نكمل نحكي في التفاصيل الباقية و لا حتى ننجم نحكي على الحادثة لي صارت وقتها...خاطر نحس أنو السر هذا لازم يموت معانا أنا و ويليام و مهما كانت التهديدات لي قاعدة توصلني...أنا نعرف كيفاش نتعامل معاها و ننهيها...تبسمت نحكي
أنا:نظن إني حكيت برشااا...حتى أنك قصيت الخضرة لب باش نقصها أناا
أركان:والله مزال برشا حاجات تستنى فيك
أنا:و أنا قدها سيد أركاان
تبسم و عدا عينيه على وجهي...خذيت نفس طويل خاطر هاذي أول مرة نجم نحكي معاه بالطريقة هاذي إحنا بالرسمي كنا بعاد على بعضنا برشاا...كملت حضرت اللي طلبو مني و حضرت الطاولة لي جنب البلار...نظن إني بحاجة نغزر للمنظر هذا أكثر...هزيت راسي شوية و غزرتلو مرة أخرى...تبسمت خاطر هاذي أول مرة يكون عفوي و يتصرف عكس البرود متاعو المعتاد بيه...يمكن هذا اللي كنت بحاجة إني نعرفو...الجانب الثاني منو فرد وقت لقيت روحي نخمم في الكلام لي قالو على عيلتو خاطر متوقعتش أنو باش يتنازل و يحكي شوية من الماضي متاعو لي محبيتش نسألو عليه أكثر...يمكن باش يجي نهاار و يحكي كلشي يوجع فيه من غير ظغط مني...بلكشي وقتها الحواجز لي واقفة بيناتنا توا تسقط الكل...قعدت بعد ما حطينا كلشي على الطاولة و هزيت عينيا في وجهو مرة أخرى..وين لقيتو يغزرلي بالوقت...تبسمت نحكي
أنا:هذا أفضل جانب إكتشفتو اليوم في أركان القاايد
أركان:بالله...كأنو مركزتش برشا مع الجوانب الأخرى
أنا:صراحة لا...خاطر غزرتك و تصرفاتك معايا يخلوني نفقد تركيزي جملة
ضحك و و خذا رشفة من الكأس لي قدامو...كبست على الشوكة و ذقت من الصحن لي قدامي...بالحق طلع كلشي هوني مثالي...غير هكا..هاذي كانت أكثر اللحظات لي عديناها بهدوء من غير ما نخمم في اللي جاي..حتى السلطة الروسية متوقعتهاش بالبنة هاذي...خذيت نفس نحكي
أنا:فما سؤال آخر محيرني
أركان:نسمع فيك عزيزتي
أنا:صوفي كانت تعرف لي صار في الماضي متاعك نقصد مدام كنتو أصحاب مع بعضكم...أكيد راك نجمت تحكي معاها على كلشي
أركان:صحيح...أما مش الماضي متاعي إلينا...بالنسبة ليا هذا شي خاص بيا أنا...اللي قصدتو قبل أنو صوفي كانت شاطرة في أنها تفهم تقلباتي و تتعامل معاها و تخليني نعرف نرتاح زادة
أنا:و مع هكا محبيتهاش
أركان:كان فما شي ناقص طول الوقت...و توا ولا كامل بيك إنتي...اللي عشتو معاك...مختلف على أي شي تعدا في حياتي قبل توا
أنا:و نفس الشي صار معايا زادة...أنا كنت نسمع عليك قبل من عند البنات في المسرح...سيرتك كانت تتردد في كل مرة صوفي تكون موجودة...خاطر كلشي كانت تملكو سبيسيال عاللخر...و مع هكا محاولتش نفهم و لا حتى نعرف عليك زادة...فرد وقت كنت نمقت وجودك خاطرني كنت نشوف أنو نجاح صوفي ولا متعلق بيك مش بمجهوداتها على المسرح
أركان:بالعادة مكنتش ندخل في خدمتها...و هي كانت بعيدة على انو تطلب مني حاجة هكا...أما إرتباطها بإسمي هو اللي يخلي الكل يعطيها معاملة خاصة
أنا:كان إحنا تقابلنا في ظروف مختلفة...نقصد أنو صوفي مماتتش...شنية كان باش يصير ؟
أركان:مكنتش باش نتخلى عليك و مانيش باش نتخلى مهما كانت الظروف اللي تاقف بيناتنا و نتوقع أنك باش تعمل معايا نفس الشي
أنا:أنت مستعد تستناني أكثر من هكا ؟
أركان:لآخر لحظة في عمري
أنا:تقصد أنك مستعد تتخلى على كل النسا لي في حياتك على خاطري
أركان:تخليت عليهم بالفعل...من وقت جات عيني عليك و ماهيش باش تكون مرا أخرى في حياتي من بعدك
أنا:أنت بكلامك هذا تخليني نغرق في الحلمة هاذي أكثر...أنا عندي حياة نحب نعيشها أركان...منحبش علاقتنا تكون كيما قبل...منحبش نكون للإعلام مجرد إسم يتلاشى مع الوقت و يجي في بلاصتو إسم جديد
أركان:إنتي وليت مربوطة بيا فينوسي...و العالم الكل باش يعرف الحقيقة هاذي
عديت عينيا على وجهو و تبسمت...خاطر مزال فما جزء مني يصدق كل كلمة يقولها..خذيت نفس نحكي
أنا:أركاان...بالنسبة ليا فما برشا حاجات منجمتش نحكي فيها معاك لتوا...خاطر الماضي متاعي متعلق بويليام زادة...فما تفاصيل كان تعرفها مستحيل تخمم انك تكون معايا مرة أخرى
أركان:أغزرلي هووني
هزيت عينيا في وجهو...مدلي يدو بالوقت...لي خلاني نحط يدي عليها من غير ما نخمم...كبس عليا و كمل يحكي
أركان:مهما كان اللي صار في الماضي متاعك ماهوش باش يكون عائق بيناتنا جملة...بالعادة ما نحاسب حتى حد على الماضي متاعو...إذا مكانش يرتبط بيا شخصيا
أنا:ملا شنية تقصد بكلامك قبل...أنك مستعد تعاقب أي حد يغلط معاك...أنا منحبش نعيش وسط الخوف هذا الكل معاك و أنو مفماش مجال لأي حد أنو يغلط معاك
كبس على يدي أكثر...وقفني معاه و جبدني عندو شوية يحكي
أركان:إيجا معايا لحظة
كبست على يدو و خلطت عليه من غير ما نحاول نسألو...نزلت الدرجات الثلاثة و غزرت للباب لي حلها دخلت و هزيت راسي شوية...عديت عينيا على الألعاب لي موجودة و الألوان الهادية...غير لون البحر لي يظهر كان هو من البلار..جبد روحو مني و قرب من سبيدرمان كبير...محطوط على الكرسي...عدا صوابعو عليه يحكي
أركان:هاذي كانت اللعبة المفضلة عندو...فرد وقت يحب مل أنواع الكراهب...شاورلي بيدو ليهم...دورت راسي شوية نغزرلهم محطوطين في نفس الصف...جنب نفق صغير تخليه يستمتع باللعب...تبسمت من غير ما نحس نظن وجودو معاه...كان باش يخفف عليه الجرح لي ماهوش باش يتسكر جملة...هز راسو شوية و عدا عينيه على البحر يحكي
أركان:عينيه كانت تخالط لون البحر...كيفك إنتي بالظبط
هزيت عينيا في وجهو أول ما غزرلي...خاطر متوقعتش باش يقول الكلام هذا...قرب مني شوية و حاوط وجهي بيديه زوز...يحكي
أركان:إنتي كنت مرسومة في خيالي...حتى إني وقت نوصفك لولدي...نخبرو أنو عينيك كيما عينيه بالظبط
أنا:أ..أركاان
أركان:أول مرة ريتك...حسيت إني ريتو من جديد منعرفش علاش مخبرتكش هذا الكل قبل توا...أما بعد تصرفاتك و اللي عملتو فيا الكل يخليني منجمش
حتى نعاقبك...خاطرني نحسك كيما دانييل بالظبط أكا علاش وقت نضمك لصدري...خاطر وجودك بين يديا الشي الوحيد لي يخليني نتأكد أنك بأمان و حتى حد ماهو باش يقرب منك
عديت عينيا على وجهو و مديت يديا زوز...دورتهم على رقبتو...نحكي
أنا:و أنا كنت نحس بنفس الشي...في كل مرة نكون في حضنك
كبس عليا أكثر و باسني من راسي...في اللحظة هاذي بالظبط خممت إني نعنقو و كهو...أصلا جرح ولدة باش يبقى مرافقو طول حياتو...خذيت نفس من ريحتو و كبست عليه...نظن انو بالرسمي إحنا بحاجة بعضنا...و وضعنا توا باش يخلينا نتعرفو على بعضنا أكثر و يمكن نساعدو بعضنا زادة...هذا الشي الوحيد لي نحب نخمم فيه توا...من غير ما نخلي أي تفكير آخر يسيطر عليا.
جبدت روحي منو شوية و حطيت يدي على خدو فرد وقت عديت عينيا على وجهو نحكي
أنا:دانييل محظوظ أنو عندو أب كيفك أنت...متأكدة أنك كنت باش تعطيه أكثر من روحك..أكا علاش معادش تلوم روحك و لازمك تستمر مهما كانت الظروف
أركان:منجمش نجيب صغير آخر...مش قبل ما ناخو حق ولدي...نخاف نظلم صغير من صلبي و منعطيهش اللي يستحقو
أنا:مهما كانت ظروفك و الحرقة لي موجودة داخلك متأكدة أنك مستحيل تسلم في قطعة منك
أركان:و مع هكا انا بحاجة وقت...وقت كافي يخليني نتقبل وجود صغير آخر في حياتي...صغير نتأكد أنو حتى حد ماهو باش يسعى أنو يحرمني منو و باش يكون قطعة منك إنتي زادة
عديت عينيا على وجهو و نزلت على شفايفي...خاطر هاذي أول مرة نسمع منو الكلام هذا...خذيت نفس طويل و كبست على خدو نحكي
أنا:وقتها باش نكون محظوظة أنو ولدي يكون عندو أب كيفك...أما قبل هذا الكل انا مزلت عند راايي نحب نتعرف عليك و تعرفني أكثر...أنا بحاجة نشوف أركان متاع اليوم ديما...خاطر هاذي أول مرة نحس روحي حرة بوجودك
هزلي براسو باهي و باسني من جبيني...يحكي
أركان:اللي تحب عليه باش يصير ياا روحي
تبسمت و نزلت يدي شوية...خذيت نفس نحكي
أنا:نحب تخرج للحديقة مرة أخرى...ساعة حبيت نعدي فيها شوية وقت قبل ما نرجعو
أركان:هيا إيجاا
كبست على يدو و خرجت معاه...عدا عينيه على البيت قبل ما يسكر الباب وراه...و خرجنا مع بعض لبرا...وين لقيت روحي بين الورد لي موجود...حتى إني مشيت للمسبح لي كان في الجنب الآخر و غزرتلو نحكي
أنا:محلاه المكان هوني و نتوقع جزيرة رودس عندها نفس السحر زادة
أركان:كان تحب نعملو دورة فيها
أنا:تحكي بالرسمي ؟
أركان:تحب تمشي بالكرهبة و لا تكتشفها على ساقيك
أنا:من غير ما نمشيو بالكرهبة
أركان:إيجا هوني تراه
قربت منو شوية...مد يديه الزوز...سكرلي الفاست متاعي و خرجلي شعري يحكي
أركان:الجو باارد شوية...تو نشريو وحدة تكون أدفى منها
أنا:أنا مرتاحة هكا...خلينا منضيعوش الوقت أكثر
تبسم و مدلي يدو...كبست عليه بالوقت...خاطرني نحس أنو الخرجة هاذي باش تخليه يرتاح حتى هو كيما بالرسمي لقيت روحي مبهورة في سحر رودس رغم أنو الجو كان مقلوب شوية...كيما محسيتش بالوقت لي مشيتو...خاصة إني استمتعت بكل المناظر لي موجودة هوني...جبدت يدي منو على غفلة و وقفت جنب النافورة لي عرضتنا...نحكي
أنا:نحب ناخو صورة هوني
غزرلي ندرا كيف...رجعت شعري لتالي و قحرتلو نحكي
أنا:تواا أركاان
تنهد بالقاوي و جبد تليفونو...تبسمت أول ما صورني و مديت يديا زوز و طلعت راسي شوية...نتحسس في المطر لي بدات طيح نزلت على شفايفي نحكي
أنا:كأنو باش تقوا بعد شوية
أركان:هيا إيجا...تو نشوفو طاكسي هوني نرجعو بيها
أنا:لااا مش لاازم
أركان:بالله...تحب تمرض معناها
أنا:مانيش باش نمرض...ساعة نتوقع أنو ولا مرة جربت تمشي في المطر
قربت منو شوية...شديتو من يدو و هزيت عينيا في وجهو نحكي
أنا:مدامك تشوف فيا صغيرة برشا...مجبور باش تاخو بخاطري توا
مد يدو شوية و بعدلي خصلات شعري...وين المطر بدات تقوا في لحظة...لي خلى الناس الموجودة تزرب في مشيتها تبسمت نحكي
أنا:نتوقع أنو الذكرى هاذي باش ترافقك ديما
أركان:كل لحظة نعديها معاك...تبقى في ذاكرتي
تبسمت و مديتلو يدي...شدني بالوقت...وين ظطرينا نرجعو لدار تحت المطر...شخت عليه...خاطر بالرسمي  حسيت انو هاذي أول مرة يصير فيه هكا...خاصة أنو الدار بعيدة برشا على المدينة لي كنا فيها..حلي الباب دخلت و دخل ورايا...نحيت الفاست بالوقت نحكي
أنا:نظن لازمنا نرجعو لأثينا توا
أركان:ادخل لبيت البانو لي على اليسار...شيح شعرك بالقدا قبل ما تمرض
جيت باش نمشي..حبست على صوت الرعد لي ضرب
و قربت منو مرة أخرى نحكي
أنا:إيجا معايا
غزرلي ندرا كيف و ضحك...جبد تليفونو يحكي
أركان:ملا صغرونتي خاايفة
أنا:لاا...أما منجمش نتنقل هوني وحدي...منعرفش الدار
ضحك و خلط عليا...فرد وقت قاعد يتصل مع شكون هز عليه يحكي
هو:تفضل سيد أركان
أركان:باش نرجعو لأثينا بعد ساعة عالأقل
هو:أعذرني سيد أركان...الجو ميسمحش بالطيران توا هكا باش يكون خطر عليكم...مكنتش نعرف بالتقلبات الجوية اللي باش تصير و إلا راني علمتك
أركان:باهي...أول ما يصحى الجو أعطيني علم
هو:باهي
أنا:شنية صار ؟
علق عليه و قرب مني شوية...بعدلي خصلة من شعري لصقت على خدي يحكي
أركان:منجموش نرجعو توا...خاطر مش مسموح الطيران في الجو هذا
أنا:نرجعو بالكرهبة ملا
أركان:القيادة تكلفنا 19 ساعة عزيزتي
أنا:معناها إحنا عالقين هووني ؟
أركان:للأسف
أنا:معطيتش خبر لويليام إني باش نتأخر هكا...كيما منجمش نطمن و هو بعيد عليا
أركان:باش يكون مليح...الحراس موجودين و كان تحب نخليه يمشي للقصر مؤقتا
أنا:لاا...باش يكون مليح يكفي إني نتصل بيه و نطمن عليه
أركان:شيح شعرك قبل و أخلط عليا..لازمك تبدل دبشك و لا باش تمرض..غير هكا منستغربش أنك جعت مرة أخرى
أنا:صحيح
أركان:هيا فيسع ملا
تبسمت و هزيتلو براسي باهي..خرج و خلاني..هزيت راسي شوية و غزرت لروحي..تفاصيل اليوم كانت غريبة برشا بالنسبة ليا...خاطر متوقعتش باش نعيش كيفها و لا حتى توقعت أنو باش يتنازل و يسمحلي إني نتعرف عليه أكثر...تنهدت بالقاوي...لميت شعري و غسلت وجهي...صوت الرعد..خلاني نخرج من غير ما نحس..وين دخلت بعضي كي ملقيتوش يستنى فيا برا..كيما منعرفش وين مشى و لا كيفاش باش نقرب خطوة أخرى مع صوت الرعد لي قوا أكثر...خذيت نفس و مشيت شوية...فرد وقت قاعدة نادي عليه باش يرجع عندي...دورت راسي ورايا نتحسس في صوت الرعد وين ضربت فيه بالوقت...تنهدت براحة و ضربتو لصدرو نحكي
أنا:أركاان..فاش تعمل يااخي ؟
أركان:شبي وجهك أصفر هكا ؟
أنا:حتى شي
بعدت عليه شوية و عديت عينيا على صدرو..غزرت للوشم متاعو نحكي
أنا:وين مشيت ؟
أركان:كنت باش ناخو دوش و نبدل دبشي
أنا:عندك دبش هوني ؟
مد يدو و شاورلي للبيت لي خرج منها...يحكي
أركان:برا ألبس أي حاجة متبقاش هكا و لا باش تمرض و هاني أنا...باش ناخو دوش غديكا
أنا:لاا...مظطر باش تبقى قريب مني
قحرتلو و دخلت للبيت...هزيت حاجبي مستغربة كي ريت الجاكوزي جنب البلار لي يطل على البحر...و سرير كبير في وسط البيت...غير دبشو لي منظم في الجيهة الأخرى...دورت راسي غزرتلو نحكي
أنا:شبيها البيت هاذي هكا ؟
أركان:شبيها ؟
أنا:تفتقر للخصوصية
أركان:لاا عااد..مكنتش نعرف أنك باش تحشم مني نتذكر إني ريت كلشي قبل توا و إنتي دخلت عليا وقت كنت ندوش...معناها إحنا متعادلين توا
أنا:أركااان
أركان:باهي تنجم تاخو راحتك هوني و هاني باش ناخو دوش و نرجعلك
هزيتلو براسي باهي...هز دبشو من الدرسينغ...غمزني و خرج...نزلت على شفايفي شوية و كملت دخلت مديت يدي شوية و هزيت مريولو لي خلاه فوق القوتاي بعد ما نحاه و تبسمت...ظاهر هو اللي باش ياخو برد المرة هاذي..نحيت دبشي و دخلت تحت  الما...كنت بحاجة إني ناخو دوش حتى أنا...فرد وقت نغزر للمطر لي قاعدة طيح في البحر...لولا الإنارة لي برا مستحيل نلمح شي..لبست الكاب متاعو و قربت من الدرسينغ حتى هوني دبشو منظم حسب الألوان  فقت من سرحتي كي حل الباب..هزني و حطني مستغرب يحكي
أركان:توقعت أنك كملت
أنا:حبيت ناخو دوش دافي...خاطرني بردت...غير هكا قاعدة نخمم شنوة نلبس
هزلي براسو باهي و قرب مني شوية...عديت عينيا على صدرو نحكي
أنا:علاش جيت أنت ؟
أركان:باش ناخو بقية دبشي
وقف قدامي بالظبط..نزلت عينيا من وجهو و مديت يدي لي تلقات بيدو على نفس المريول..هزيت عينيا في وجهو مرة مرة أخرى و نزلت على شفايفي...حتى أنفاسي حسيتها تسارعت بوجودو قدامي..خذيت نفس و جيت باش نبعد..جبدني من حزام الكاب و دزرني لتالي عاى غفلة و نزل عليا يحكي
أركان:نتوقع أنو حكينا على التصرفات هاذي قبيل
أنا:و مع هكا ما تنجم تعمل شي...خاطرنا مجرد أصحاب مش أكثر
أركان:متأكدة ؟
دقات قلبي قوات مع أنفاسو لي قوات في وجهي مديت يدي و حطيتها على صدرو...فوق الوشم و نتحسس في دقات قلبو زادة...كأني توحشتو غير العاادة...حطيت يدي لأخرى على جنبو و دورتها على ظهرو...وقت عدا صوابعو على قطرات الما لي نازلة على خدي و وصل بيهم لرقبتي...كبست عليه أكثر من غير ما نحاول نبعدو عليا...طلع بصوابعو لشفايفي يتحسس فيهم...غمضت عينيا مع قربو و حليتهم شوية كي باسني جنب شفايفي و جبد روحو شوية يحكي
أركان:باش نلتزم بقوانين الصحبة ملا
خذيت نفس طويل و عديت يدي على رقبتي..جبد المريول و حطو في يدي يحكي
أركان:نظن باش يواتيك
كبست عليه من غير حتى كلمة...هز واحد آخر في يدو و تلفت باش يمشي..وقفتو نحكي
أنا:أركاان
أركان:روح أركاان
أنا:كان فما مجفف...نحب نحط دبشي فيه...عالأقل نلقاهم حاضرين مبعد
أركان:وينهم ؟
شاورتلو عالفوتاي..قرب منو و هزهم في يدو...و مد يدو لأخرى في وجهي يحكي
أركان:حتى هذااا فينوسي ؟ حتى هذا تختارو حسب لون عينيك ؟
عينيا وساعو و انا نغزر لسوتيان لي مزال يلوح بيه و يغزرلو فرد وقت..قربت منو بالزربة و فكيتو من يدو نحكي
انا:زاايد متحشمش
أركان:إنتي طلبت مني نحطهم في المجفف...أما ساعة شهيتني باش نشوفو عليك
أنا:أركاان...أحشم على روحك..ساعة أنا إخترتو صدفة أكيد مانيش باش نختار ملابسي الداخلية حسب لون عينيا
أركان:ماهيش فكرة خايبة...هذا اللي نحبك تأكد عليه في أياماتناا الجااية
أنا:أركااان
ضحك و هز روحو خرج..نزلت راسي شوية و طيشتو على الفوتاي...مش مصدقة اللي صار...شيحت شعري و لبست المريول لي كان في يدي و خرجت عندو لقيتو يحضر في العشا...غزرلي ندرا كيف قربت منو شوية نحكي
أنا:نجم نقدم مساعدة ؟
قرب مني شوية..حط يديه زوز على أجنابي...كبس عليا و هزني شوية...حطني على الرخامة يحكي
أركان:خليك هوني و كهو
تبسمت و عديت عينيا على وجهو..نحكي
أنا:أنت مختلف على أي مرة عرفتك فيها
قرب مني شوية...حط يدو على الرخامة بجنبي و عدا عينيه على وجهي يحكي
أركان:وجودك معايا يخليني نكتشف روحي من جديد
تبسمت و مديت يديا زوز عنقتو بالوقت...باسني من خدي يحكي
أركان:مدامنا حاصلين مع بعضنا فما مجموعة أفلام هوني تنجم تختار واحد منها
أنا:باهي سيد أركان...أنا باش نختار فيلم لين تكمل أنت
هزلي براسو باهي و نزلني من الرخامة...حطيت على الفيلم بعد ما كملنا تعشينا و قعدت بجنبو...غفيت قبل ما يوفى و حليت عينيا على الصورة لي تقطعت من الشاشة...ناديت عليه مردليش...دورت راسي و حليت فمي مروهجة...حطيت يدي على صدرو لي معبي دم فرد وقت نحرك فيه باش يقوم...دموعي نزلت كي ملقيتش إجابة منو...حتى صوتي تقص...خاطرني مفهمتش شنوة صار بالظبط..هزيت راسي على صوتو يحكي
غالي:ملااكي الضائع
أنا:غاالي ؟؟
نزلت عينيا من وجهو..نغزر للفرد في يدو و قربت من أركاان أكثر..محاولة مني باش نخليه يفيق و نتحمى بيه منو...نزل عليا في لحظة..شدني من رقبتي وقفني و جبدني عندو بقوة..كبس عليا لدرجة حسيت أنو أنفاسي تقطعت جملة.
#آفروديت🧚‍♀️
#سمر_القايد💜