آفْرُودِيتْ 🦢

الحلقة الرابعة و الثلاثون🧚‍♀️

🔸️حلقة 34
فقت من سرحتي على صوت تليفوني...عديت يديا زوز على وجهي و قربت من التابل دونوي...أصلا هو الوحيد لي يملك رقمي...قعدت على طرف السرير و حليت الميساج متاعو نقرا فيه
نوح:مهما كان اللي صار ماهوش مجرد رغبة و كهو كيما مستحيل نتعدا حدودي معاك أكثر من هكا و لا نطلب منك شي...ماهوش من حقي...أكا علاش منحبكش تخاف مني كاندي...غير هكا حضر روحك باش نمشيو ويليام في القصر إذا كان يهمك
كبست على التليفون في يدي و قريت كلامو مرة أخرى...إذا مكانش مجرد رغبة و كهو...ملا شنية يقصد بقربو مني...كيما علاش ما حكى حتى شي بخصوص الطفلة لي معاه و لا حتى أنكر أنو مرتبط خذيت نفس طويل و هزيت روحي بالسيف...خذيت دوش و حضرت روحي...نظن أحسن شي يصير توا هو أنو نمشيو من هوني...خاطر وجودنا مع بعضنا طول الوقت باش يخلي الوضع بيناتنا يدخل بعضو أكثر...خاصة وسط مشاعري لي حسيتها تمردت عليا و غلبتني...منحبش نتكشف قدامو أكثر من هكا و لا حتى نحط روحي في وضع أسوء...هزيت راسي شوية مع صوت الباب...طل عليا يحكي
نوح:حاضرة ؟
سكرت الفاليز و هزيتلو براسي إيه...قرب مني بالوقت للحظة حسيت إني باش ندخل بعضي من جديد جبدني من يدي بالوقت و كبس على يدي لأخرى زادة يحكي
نوح:منقصدش لي فهمتو إنتي...غير هكا منحبش نشوفك في الحالة هاذي مرة أخرى
أنا:مفهمتكش
تبسم و مد يدو شوية...رجعلي خصلات شعري ورا وذني و عاود كتب الكلام لي قالهولي من شوية كبست على تليفونو و هزيت عينيا في وجهو نحكي
أنا:أما مجاوبتنيش
نوح:على شنوة ؟
جيت باش نحكي...أما سكت على صوت تليفونو نزلت راسي شوية و قريت إسمها...كأني خذيت الجواب من غير ما نسمعو منو...خذيت نفس و حطيت تليفون في يدو نحكي
أنا:أناا حاضرة
علق عليها و حط التليفون في مكتوب الفاست يحكي
نوح:ألبس بالقدا...الجو بارد برا
هزيتلو براسي إيه و جبدت روحي منو...لبست كبوطي و سكرتو...فرد وقت حطيت الكاشكول و خرجت وراه فك الفاليز من يدي...عديت عينيا على تفاصيل الدار لآخر مرة...كأني عديت شهور هوني مش أيامات..عالأقل إكتسبت ذكريات أحسن من اللي عشتها في الماضي متاعي...خذيت نفس طويل و خرجت...حلي الباب ركبت و رجع لدار...خلط عليا بعد دقايق...ركب بجنبي و حط في يدي صحن التوست لي حضرتو بكري و دبوزة العصير...غزرتلو مستغربة...ضحك يحكي
نوح:مقصدتش نقص عليك فطورك...كيما باش نحبسو عند أقرب مطعم
نزلت عينيا من وجهو و هزيت كعبة التوست في يدي مع أنو شهيتي تسكرت أما منحبش ندخل في إكتئاب جراير لي قاعد يصير معايا و مشاعري لي متضاربة مع نفسها...حتى إني لقيت روحي تحسنت شوية بعد ما طردت الأفكار لي في مخي...و غزرتلو نحكي
أنا:ويليام باش يبقى في القصر ديما ؟
نوح:توقعت سؤال أفضل
أنا:شقصدك ؟
نوح:مثلا أنو قداش باش يبقى
أنا:نفس الشي
نوح:ماهوش نفس الشي بالنسبة ليا...مدامك مهتمة بيه لهدرجة 
ضيقت عينيا شوية محاولة مني باش نلصق الحروف و نفهم كلامو بالقدا...قحرتلو نحكي
أنا:وين المشكلة ؟
نوح:المشكلة فيا خاطرني قررت نرجع توا
قحرلي و تلفت لثنية...تكيت لتالي و خذيت نفس نحكي
أنا:مدامك مش موزون عقليااا أكيد باش تطلع قراراتك غالطة
نوح:معاادش تحكي بالرووسية آنياا
أنا:قلت أنو عندك حق
تبسمت و دورت وجهي للبلار...خاطرني منحبش ندخل معاه في مناقشات أخرى...كبس على الفولون يحكي
نوح:من غير ما تطلع للجناح متاعو وحدك
أنا:مانيش نفهم عليك
نوح:توا وليت تلقى صعوبة باش تفهم
أنا:أنا روسية نووح و لتوا مزالني نتعلم
نوح:والله مفما حتى شي يخليني نرغب فيك قد تكسيرك للحروف كيما قاعدة تعمل توا
أنا:متقولش كلام طويل..مانيش باش ننجم نترجمو في راسي
نوح:أكهو عاد..هاك كسرتهم الكل ورا بعضهم
أنا:كسرت شنوة ؟
نوح:شي
أنا:معادش تحكي بالألغاز ملا
نوح:ماهوش لغز عزيزتي..جيست إنتي مزلت ضعيفة في اللغة
أنا:مزلت بحاجة وقت
خذيت نفس طويل..نلم في بقية الحروف و رجعت شعري لتالي نحكي
أنا:غير هكا وجود ويليام باش يعاوني الفترة هاذي
نوح:مفهمتكش ؟
أنا:نقصد ويليام أحسن واحد يتقن لغتي و باش يصححلي أغلاطي
نوح:إنتي قاعدة تقرا عند دكتور في اللغة الروسية
أنا:أما ويليام صديقي و باش نكون مرتاحة معاه أكثر
نوح:بالله ؟ شبيني منعرفش بيها الصداقة هاذي ؟
أنا:شبيك ؟ يعني طبيعي إحنا أصدقاء كيما أنا و أنت
نوح:أغزرلي هووني...رد بالك تخلي اللي يجي يبووسك..ساعة وليت نشك أنك مزلت صغيرة في مخك زادة
أنا:مفهمتكش
عدا يدو على وجهو...منعرفش علاش حسيتو توتر برشا...أما بالرسمي مفهمتش كلامو التالي و منجمتش نربط الحروف زادة...عاود غزرلي مرة أخرى و كبس على الفولون يحكي
نوح:آنيا عزيزتي...ما تخلي حتى حد يقرب منك و ما تخلي حتى حد يبوسك زادة
أنا:علاش ؟
نوح:الصبر يا ربي...ركز معايا شوية
أنا:مانيش نفهم فيك...ياخي أنت باش تبوسني مرة أخرى ؟
نوح:والله هذا اللي نحب نعملو توا...أما مش هذا اللي قصدتو آنياا
أنا:ملاا ؟
نوح:بالمختصر...حتى حد غيري ماهو باش يبوسك
أنا:نظن هذا أحسن قرار خذيتو..أنك معادش تبوسني مرة أخرى و هكا نكون مرتاحة أكثر..زيد أنت لي بستني مش أنا لي طلبت منك
نوح:مش هذا اللي قصدتو زادة
أنا:معاادش تحكي معايا و مدام مزالت الثنية طويلة أنا باش نرقد شوية
دورت وجهي للبلار و غمضت عينيا...منعرفش كيفاش عطا الحق لروحو باش يبوسني و بعد يقول أنو ماهوش باش يعملها مرة أخرى..على أساس أنا لي طلبت منو يقرب مني..بالرسمي معادش نحب نخوض معاه نقاش آخر و لا حتى نحكي معاه مرة أخرى