آفْرُودِيتْ 🦢

الحلقة الخامسة و السبعون🦢

🔸️حلقة 75
🔸️آنيا_تحكي
حليت عينيا شوية و جبدت روحي منو بالسيف أصلا وصلنا مأخر برشا...وين رقدنا أول ما رجعنا...قعدت على طرف السرير و خذيت نفس طويل قبل ما نقوم لبيت البانو...كبست على الرخامة بيديا زوز و تقييت مرة أخرى...تكرر الأمر مرتين معايا وقت كنا في طريقنا للقصر...حسيت بيه كي دخل ورايا...بعدلي شعري من وجهي...و حط يدو على كرشي يحكي
نوح:شبي صغرونتي ؟
أنا:منعرفش...ظاهر إني مزلت تاعبة من السفر
نوح:هاني باش نخلي ماري تجي تشوفك
حطيت يدي على يدو و تكيت عليه شوية...نحكي
أنا:لااا..مش لازم...جيست لازمني نرتاح شوية و كهو
نوح:باهي إيجا عندي تراه
تبسمت أول ما هزني بين يديه و رجع للبيت...حطني في بلاصتي يحكي
نوح:خليك هوني...و ماري باش تطمن عليك مش أكثر...منحبكش تخااف
أنا:باااهي
قعد بجنبي و كبس على يدي...قبل ما يطلب ماري و عدا صوابعو على خدي يحكي
نوح:أنا معااك يا روحي
أنا:لازمني نتحسن بسرعة باش نجم نمشي للمعهد
نوح:تمشي وقت تحسي أنك بخير
أنا:و أنت ماكش باش تمشي للخدمة ؟
نوح:مانيش باش نخليك وحدك
تبسمت و كبست على يدو...أصلا تعودت نعدي كل أوقات مرضي وحدي...أكا علاش وجودو خفف عليا برشا...حتى بعد ما جات ماري...قعد معايا...كملت فحصتني و غزرتلي تحكي
ماري:يمكن تعبت من السفر...أما إذا بقيت على الحالة هاذي...لازمك تشوف دكتور أحسن
نوح:شتقصد ؟
ماري:مفما حتى شي يخوف سيد نوح..أما التحليلات ضرورية باش نعرفو سبب حالتها بالظبط
نوح:باهي
ماري:هاني باش نحطلك سيروم و إذا مرتحتش لازمك تتقيد بكلامك
أنا:بااهي عيشك
أول ما خرجت..قربت منو شوية و حطيت راسي على صدرو نحكي
أنا:أنا باش نكون لبااس..مش لازم منها حكاية الدكتور
نوح:هدي روحك..حتى ماري قالت أنو مفما حتى شي يخوف
جبدت روحي منو شوية و تكيت لتالي..حتى ريحتو خنقتني...ضيق عينيه مستغرب و غزرلي يحكي
نوح:إنتي لباس ؟
أنا:عالأغلب...مش لازم تتحير عليا...تنجم تمشي لخدمتك
نوح:والله منجمش نخليك ورايا
أنا:ملا أنا باش نرقد شوية
هزلي براسو إيه...تسطحت لتالي و عطيتو بظهري جبد روحو شوية مني و غطاني..فرد وقت قعد بجنبي...وين ريحتو غمتني أكثر...عاودت قعدت نحكي
أنا:أنت باش تبقى هوني ؟
نوح:آنيا شفما يا روحي ؟
أنا:حتى شي
نوح:والله مش هذا الظاهر
أنا:كان نقلك توا ماكش باش تتغشش مني ؟
نوح:أكيد لا يا عمري
أنا:ريحتك خايبة عاللخر و موجودة حتى على الفرش زادة
نوح:ريحتي ؟
أنا:وعدتني ماكش باش تتغشش مني
نوح:مش هكا...أنا جيست إستغربت و كهو...شنوة الحل توا ؟
أنا:شقولك تاخو دوش توا ؟
نوح:باهي...اذا كان هذا يخليك ترتاح و هاني باش نوصي أولجا تبعث الأكل...خاطرك من أمس ما حطيت شي في فمك
تبسمت و هزيتلو براسي إيه...باسني من جبيني و دخل لبيت البانو...هزيت روحي وقفت و خرجت من البيت تسطحت على الفوتاي و غرقت في النوم خاصة إني حسيت روحي تفرهدت عكس قبيل لدرجة محسيتش بالوقت كيفاش تعدا...فقت على صوابعو لي كانت تمشي و تجي على خدي...حليت عينيا شوية و تبسمت...حط يدو على جبيني يحكي
نوح:شحالك توا ؟
أنا:منعرفش كيفاش غفيت هوني
نوح:مزلت موجوعة ؟
أنا:لا...نظن إني تحسنت على قبل
نزل عليا شوية و باسني من شفايفي...فرد وقت بعدلي خصلات شعري يحكي
نوح:مدام هكا...لازمك تقوم باش تاكل شوية
أنا:باهي
حط يدو ورا ظهري و قعدني بالوقت...مكنتش نعرف إني باش نتعب لهدرجة بعد العطلة هاذي...عديت عينيا على الطاولة و غزرتلو نحكي
أنا:معينيش باش ناكل توا
نوح:بالله ؟ ياخي تحب تمرض بالسيف ؟
أنا:أنت شبيك تكش عليا هكا ؟
نوح:خاطر هكا باش تتعب أكثر
خذيت نفس و سكت...منعرفش كيفاش نفهمو أنو حتى الأكل ريحتو خايبة عاللخر...و مع هكا حاولت نغصب روحي عليه...أما حبست بعد لقمتين و هزيت صحن الغلة نحكي
أنا:نظن باش نكتفي بهذا كهو
غزرلي مستغرب...و قعد بجنبي...حتى هو ما بقى من غير أكل...غزرتلو نحكي
أنا:تحب تاكل معايا ؟
نوح:والله يكفي أنك تاكل شوية...عالأقل نطمن عليك
أنا:مقصدتش نخليك تضيع وقتك جرايري
قرب مني شوية و حط يدو على جنبي..جبدني عندو شوية يحكي
نوح:معادش نحب نسمع الكلام هذا منك..إنتي بنتي مستحيل نخليك وحدك و إنتي تاعبة هكا
أنا:والله أنا مش متعودة بالإهتمام هذا الكل وقت نمرض
نوح:ملا باش تتعود عليه من توا...خاطر ماكش وحدك
أنا:نعررف..أصلا أنا حياتي تبدلت الكل بوجودك معايا
تبسم و باسني من راسي..نزلت على شفايفي شوية و غزرتلو نحكي
أنا:هكا ريحتك ولات أحلى
نوح:والله شككتني في روحي عزيزتي
أنا:المهم أنك متفهمنيش بالغالط
نوح:أكيد لا يا عمري..المهم عندي توا أنك ترتاحي
أنا:والله هاني أحسن من قبل..يكفي أنك بقيت معايا و مخليتنيش وحدي
عدا يدو على ظهري و كبس عليا..خذيت نفس طويل و غمضت عينيا...رغم إني إرتحت شوية أما نح في بدني تاعب عاللخر و معرفتش السبب...غير هكا فرحت بوجودو معايا و معاملتو ليا...خاطرني عديت أغلب حياتي وحدي..خاصة بعد وفاة صديقتي الوحيدة متوقعتش بعدها باش تتحسن حياتي بالطريقة هاذي إني نلقى الحب و نبني عيلة كانت أحلام مستحيلة بالنسبة ليا...خاصة إني كنت مجرد نكرة بالنسبة للكل دورت يديا زوز عليه و دخلت في حضنو...هاربة من كل ذكريات الماضي لي هدت عليا في لحظة.