آفْرُودِيتْ 🦢

الحلقة العاشرة🧚‍♀️

🔸️حلقة 10
جبدت روحي منو شوية و هزيت عينيا في وجهو مد يدو ناحيتي و عدا صوابعو على خدي...وين لقيت روحي ساكتة من غير حتى كلمة...ضيق عينيه يحكي
أركان:وين كنت ؟ و شبي حالتك هكا ؟
بقيت ساكتة...خاطرني معرفتش نجاوبو...مديت يدي شوية...نزل راسو مستغرب و فك الكارت من عندي..غزر لصورتي و للمتاهة فرد وقت...خذيت نفس نحكي
أنا:هزني من هوني توا
نزل بيدو لآخر ظهري و قرب معايا للكرهبة...تحلت الباب بالوقت...ركبني و خلط عليا...قعد مقابلني يثبت في التصويرة من غير حتى كلمة...تكيت لتالي و دورت راسي لشباك...لتوا منجمتش نستوعب لي صار...مزلت نحس في روحي خايفة من الفازة لدؤجة محسيتش بالوقت كيفاش تعدا و لا حتى كيفاش وصلنا...نزلت في جرتو...قرب منا نوح يحكي
نوح:هيا إيجا نوصلك لسويت متاعك
أركان:إلينا باش تبقى عندي
هزيت راسي شوية و غزرتلو مستغربة..خاطر متوقعتش الفازة...كيما منحبش نمشي معاه و أنا منعرفش فاش قاعد يخمم...فرد وقت منجمش نرفض بعد اللي صار و نخلق مشكلة جديدة...خلطت عليه من غير حتى كلمة أصلا نحس في روحي فاشلة عاللخر...دخلت وراه و قعدت على الفوتاي بالوقت...منعرفش علاش بردت لهدرجة...رجع عندي بعد شوية و حط ملحفة على أكتافي...باقي يدور من غير ما يحكي معايا و لا يغزرلي قرب من الكنتوار و جبد كأس باش يفرغ المشروب نزلت على شفايفي شوية نحكي
أنا:أركاان
عبى الكأس متاعو و تلفت عندي...خذيت نفس نحكي
أنا:نحب نرجع لسويت متاعي
قرب ناحيتي و قعد مقابلني...عدا عينيه على وجهي يحكي
أركان:هكاا ؟ من غير ما تعلمني شنية لي صار بالظبط
أنا:أنت كيفاش تصدر أوامر ضدي و متخلينيش نبقى خارج السويت متاعي
أركان:خاطرك كنت باش تطلب تخرج من المنتجع جملة و توقعي كان صحيح
أنا:حبيت نبدل جو و كهو
أركان:شكون قابلت ؟
أنا:مريتش وجهو...حط الظرف في يدي و بعد عليا
أركان:التصويرة كانت في تونس
أنا:صحيح و منعرفش شكون وراها...مريتهاش قبل
أركان:مدام الصورة من الماضي...معناها عندها علاقة بغالي
أنا:لااا غالي معندوش علاقة بالموضوع هذا جملة
أركان:شنية لي يخليك متأكدة ؟
أنا:خاطر مات من سبع سنين
أركان:صاار ؟ مدام طلع ميت معناها فما معجب آخر من الماضي و خلط عليك حتى لهوني
أنا:منعرفش و نظن لازمني نمشي من هوني توا
هزيت روحي وقفت بالوقت...هز عينيه في وجهي و قحرلي يحكي
أركان:أقعععد
شديت بلاصتي من غير تردد...خاصة أنو نبرة صوتو كانت حادة غير العادة...كبست على يديا زوز نحكي
أنا:منحبش نحكي على الماضي
أركان:مدامك متحبش تحكي على الماضي...علاش تمشي عكس المطلوب منك
أنا:أنت معندكش حق باش تحبسني
أركان:محبستكش...أما عملت حسابي للي تعديت بيه ساعات لتالي...الصور لي وصلت في الحفلة تقول أنو الشخص هذا قريب منك و مع هكا مخفتش على روحك
أنا:مشات الحكاية من بالي و متوقعتش باش نتعرض لموقف هكا...زيد ما صارلي حتى شي
أركان:مش هذا اللي ريتو قبيل...أنا نجمت نتحسس خوفك من غزرتك و دموعك و كبسة يديك إلينا
أنا:مش بالعادة نتعرض لمواقف هكا...غير إني لقيت روحي نعيش في نفس الخوف من سنين
أركان:تعرف قداش من مرة عصيت أوامري لتوا ؟
أنا:منعرفش...خاطرني ما نتقيد بأوامر حتى حد
أركان:الخطوة هاذي باش تكلفك برشا صدقني...مش باش تتعدالك بالساهل كيما تتوقع
أنا:أكثر شي يخليني نتقزز منك هو تهديدك ليا...و مش لازم تحميني...مهما كان اللي باش يصير...أنا تعلمت نحمي روحي من كل راجل يعترض ثنيتي
أركان:إنتي ملكي توا و مجبورة أنك تمشي على أوامري و مدامك متعلمتش درسك لتوا...معناها باش تتعاقب عاللي عملتو
أنا:و كيفاش باش تعاقبني ؟ ساعة خليني نتعرف على أساليب التعذيب لي عندك
أركان:تتعرف عليهم كي تجربهم
أنا:نظن إني جربت الأسوء قبل توا
غزرلي ندرا كيف..خذيت نفس و هزيت روحي وقفت مرة أخرى...نحيت مريولي على غفلة...وين غزرلي مستغرب...عطيتو بظهري و مديت يدي شوية..بعدت شعري...حطيتو على جنب...و نزلت بصوابعي لآخر رقبتي نحكي
أنا:أنا إكتسبت الآثار هذوما من عند غالي
غمضت عينيا بالقاوي و عاودت حليتهم...نحكي
أنا:تعمد أنو يطفي سيجارتو في رقبتي كعقاب ليا و للأسف مطفاتش من أول مرة...لي خلاه يكرر الأمر ورا بعضو و هكا ولات آثار الحروق الثلاثة تشبه الوشم و لا عبارة على وحمة...تذكرني بتفاصيل الماضي الكل...كيما تخليني نحس روحي قوية خاطرني كيما تعديت الفترة هاذيكا...نجم نتعدا كلشي بعدها...فرد وقت مننكرش إني نخاف من فكرة لي أنا باش نعيش نفس الشي مرة أخرى
سكت كي حسيت بيه واقف ورايا...مديت يدي بالوقت و مسحت دموعي لي هبطو من غير ما نحس مد يدو شوية و عدا صوابعو على التراص متاهم لي كانو 3 طفيات ورا بعضهم في خط مستقيم...كأنو تعمد باش يخلي شي منو يرافقني طول السنين رغم إني كنت نتجاهل وجودهم في أغلب الوقت...تبسمت نحكي
أنا:هوكا طلع فما تشوهات في آفروديت الخاصة بيك
مد يدو شوية و حطها على كرشي بالوقت...جبدني عندو و فصل المسافة لي كانت بيناتنا من شوية جيت باش نحكي أما سكت كي حسيت بأنفاسو قوات على رقبتي...قلبي خض بالقاوي و مفهمتش شنية اللي قاعد يصير معايا بالظبط...أصلا ولا مرة نجمت نفهمو و لا حتى نفصل في تصرفاتو و كلامو...هزيت راسي شوية أما منجمتش نتلفت عندو و بالأحرى خفت من لحظة ضعف تجمعني بيه...منحبش ننسى السبب اللي يخليني معاه...كيما منجمش نستبعد فكرة إني مجرد رغبة و نزوة عابرة بالنسبة ليه...أفكاري الكل ضاعت في اللحظة لي حط فيها شفايفو على رقبتي...دخلت بعضي و دقات قلبي قوات أكثر..غمضت عينيا و كبست على يدو لي فوق كرشي...من غير حتى حركة أخرى...نزلت على شفايفي شوية...محاولة مني باش نهدي روحي...أصلا معرفتش و مفهمتش الشعور لي تملكني في اللحظة هاذي...خاطر أول مرة يقرب مني لهدرجة و يكسر الحدود لي بيناتنا...كبست على يدو أكثر مع كل بوسة تتحط على تراص منهم...قرب شوية لوذني يحكي
أركان:إنتي ملكي أنا فينوسي...و مفما حتى حد في الدنيا يتعدا على أملاكي
جيت باش نحكي...باسني مرة أخرى جنب وذني فوق بوسة الخال بالظبط...خذيت نفس طويل و تلفت عندو شوية...مد يدو من كرشي لآخر ظهري و عدا عينيه على وجهي فرد وقت...الكلام وحل في حلقي و منجمتش ننطق...أصلا منعرفش كيفاش وصلت معاه للموقف هذا و لا حتى كيفاش نتصرف هو بالذات خلاني نعيش تناقضات منعرفهاش قبل و قد ما نحب نبعد عليه في اللحظة هاذي...شي أقوى مني يخليني عاجزة من غير حتى حركة...كيما كانت أول مرة نغزر لعينيه بالطريقة هاذي...مد يدو شوية عدا صوابعو على خدي و نزل بيهم لشفايفي...يحكي
أركان:نحب نعرف اللي تعديت بيه في الماضي الكل من غير ما نظطر نعرفو وحدي
أنا:أنت مزلت تهدد فياا
أركان:مانيش نهدد فيك...أما إذا طلب الأمر إني نداويك من الماضي و الكوابيس متاعو...لازمني نعرف اللي عشتو بالظبط
أنا:منحبش...منحبش نحكي على الماضي أكثر من هكا و منحبكش تفركس ورايا زادة...أنت وعدتني قبل توا...يمكن في الوقت المناسب نجم نحكيلك كلشي...كيما إني نحب نحتفظ بأسراري ليا...خاطر اللي بيني و بين يمكن يوفى في أي لحظة...في الأخير إحنا مش لبعضنا
كبس على ظهري أكثر و نزل عليا شوية...يحكي
أركان:صاار...ملا لتوا ماكش ناوية تحبني
أنا:منجمش نحب شخص كيفك أنت و لا حتى نعيش حياتي الكل تحت التهديد
أركان:والله أنا لتوا ما نفذت حتى تهديد...خاطرك تعرف كيفاش تنقذ روحك في كل مرة
مديت يدي شوية و حطيتها على جنبو...نحكي
أنا:و ماكش باش تنفذهم زادة
نزل بصوابعو لرقبتي و عدا عينيه على وجهي يحكي
أركان:للأسف ماكش باش تفلت من العقاب جملة هوكا كل مرة الدين متاعك يكبر أكثر
أنا:أنت معندكش حق تحاسبني خاطرني مانيش وحدة من النسا متاعك
أركان:ماكش منهم...إنتي خطفت قلبي إلينا
عديت عينيا على وجهو مروهجة...خاطرني متوقعتش الجملة هاذي منو..دقات قلبي قوات أكثر لدرجة حسيتها ضربت في صدرو...غير هكا منجمتش نزل عينيا من وجهو و لا حتى نخلي فرصة إني نضيع في تفاصيل وجهو...كبست على جنبو من غير ما ناخو بالي...خذيت نفس و نزلت على شفايفي شوية نحكي
أنا:و مع هكا متنجمتش تتخلى على النسا متاعك
هز حاجبو شوية...رجعلي خصلات شعري ورا وذني يحكي
أركان:ملا هذا اللي مقلقك طول الوقت
أنا:لاا مش لهدرجة...جيست نحب نفهم التناقض متاعك و كهو
كبس على آخر ظهري أكثر و نزل على شفايفي في لحظة من غير ما يبوسني...تبسم يحكي
أركان:والله منظنش إني نجم نغزر لمرا أخرى بعد توا
أنا:تتوقع إني نصدق كلامك
أركان:باش يجي نهار و تصدقو...كيما باش تكون ملكي بإرادتك
أنا:مستحيل...مش كلشي يصير كيما تحب أنت..غير هكا أنا مناثقش في الحب و منأمنش بيه
أركان:و أنا مكنتش نأمن قبل ما نشوفك...غير هكا
سكت شوية و نزل بصوابعو من خدي...لرقبتي و وصل بيهم للشق متاع صدري...كأني بديت نستوعب إني واقفة قدامو شبه مغطية...غزرلي ندرا كيف و كمل يحكي
أركان:غزرتك...تصرفاتك...دقات قلبك و حتى تجاوب بدنك معايا...يقول العكس فينوسي...مهما هربت من مشاعرك ناحيتي...مستحيل تنكرها
أنا:منجمش ننكر جاذبيتك و تأثيرك عليا...كيما منجمش نحبك زادة و لا حتى نكون ليك
أركان:ميجيش تندم على الكلام هذا مبعد
أنا:والله إذا طلعت في الأخير مجرد رغبة و ضحية لجمالي...مستحيل نندم...أصلا أنت معايا توا خاطرك مغروم بجمالي و كهو...وقت تلقى شكون تملي عينك أكثر تتخلى عليا
أركان:ريت و جربت أكثر من اللي يتصورو مخك الصغرون...أما حتى وحدة ما حركت مشاعري كيما عملت إنتي
أنا:و أم إبنك...أنت لتوا ما حكيت عليها حتى شي منظنش أنت تجيب صغير من مرا متحبهاش و لا تكون مجرد إسم في القائمة متاعك
أركان:نظن باش نحتفظ بالماضي كيما عملت إنتي
أنا:حبيتها ؟
أركان:يهمك برشا تعرف ؟
ضيق عينيه و هو يغزرلي...و رغم إني نحب نعرف جوابو...أما محبيتش نركز برشا...خذيت نفس نحكي
أنا:لاا...مش لازم تجاوبني
أركان:متأكدة
أنا:يززي كهو...متغزرليش هكااا
أركان:هاك متقاومش جملة
حاولت نجبد روحي منو...كبس عليا أكثر و نزل عليا على غفلة...وين أنفاسو قوات في وجهي...كبست على جنبو نحكي
أنا:أركاان
أركان:شبي فينوسي ؟
أنا:خليني نمشي توا
أركان:بالسرعة هاذي
سكت كي حسيت بشفايفو لامسو شفايفي في لحظة حتى إني منجمتش نتكلم و لا نقوم بردة فعل أخرى غمضت عينيا مروهجة...خاطرني تحصرت بين يديه و لي هربت منو طحت فيه...فرد وقت محبيتش نخمم في الدقايق الجاية...يمكن للحظة حبيت نعيش معاه بقية التفاصيل...رغم إني بالطريقة هاذي نأكد كلامو متاع بكري...غرس يدو في شعري...و حبس في آخر لحظة قبل ما يبوسني مع صوت الباب حليت عينيا بالوقت و غزرتلو...كبس على شعري و غمض عينيه بالقاوي...أصلا منجمتش نبعد عليه و لا نستوعب اللي كان باش يصير...و لا حتى نركز مع صوت الباب..للحظة حسيت روحي مزلت ضايعة فيه و بين يديه و في تفاصيلو الكل...زعمة يطلع كلامو صحيح و حطيت أول خطوة في عشق أركان القايد.
#آفروديت🧚‍♀️