آفْرُودِيتْ 🦢

الحلقة التاسعة و الأربعون🧚‍♀️

🔸️حلقة 49
🔸️آنيا_تحكي:
حطيت الأوراق من يدي و هزيت روحي وقفت غزرت للوقت مرة أخرى و قربت من البلار...نغزر للمطر لي قوات أكثر...مش بالعادة يتأخر للوقت هذا بعد اللي صار آخر مرة...لتوا نحس في روحي مش مستوعبة الوضع كيما إني رجعت لهوني بعد تفكير كبير...منحبش لي صار يتعاود معايا...رغم إني خايفة من فكرة أنو هذا الكل مجرد حلم ينجم يوفى في أي لحظة...غزرت لأولجا لي دخلت مع زوز من الخدم يحطو في العشا قربت منها نحكي
أنا:نوح مزال مجاش ؟
أولجا:وصل من بكري...نظن هو في جناح آنسة مادلين
أنا:ماادلين ؟
ضيقت عينيا مستغربة...أول مرة نسمع بالإسم هذا في القصر..كيما معرفتش شكونها و فاش يعمل عندها..دخل بعد ما خرجو هوما بالوقت...نحى الفاست متاعو...حطها على أقرب فوتاي و قرب مني باسني من خدي...وين بقيت واقفة من غير حتى حركة...جبد روحو شوية و ضيق عينيه يحكي
نوح:شبي صغرونتي ؟
أنا:وينك لتوا ؟
نوح:كنت مع مادلين
أنا:شكون مادلين ؟
غزرلي ندرا كيف و عدا يدو على وجهو...يحكي
نوح:كأني غفلت على الحكاية و مخبرتكش بيها كاندي
أنا:شكونها ؟
نوح:بنت عمي
غزرتلو مستغربة..خاطرني مسمعتش عليها قبل و هزيت عينيا في وجهو نحكي
أنا:مكنتش نعرف أنو فما شكون يسكن في الجيهة الثانية من القصر...نقصد أنو الخدم ميمشيوش برشا لغديكا
نوح:صحيح...خاطرها جات اليوم...هي في الجناح الأول توا
أنا:تقصد باش تولي تعيش هوني ؟
نوح:عالأغلب باش تبقى فترة مليحة
بقيت نغزرلو من غير حتى كلمة...منعرفش في شنوة قاعدة نخمم بالظبط...خاصة أنها هوني مش في الجيهة لأخرى من القصر...فقت من سرحتي كي حط يدو على ظهري و جبدني عندو...باسني من جبيني و غزرلي يحكي
نوح:أعفيني من أي فكرة تدور في راسك توا...خاطر
أنا حاجتي بيك إنتي و كهو
عديت عينيا على وجهو و خذيت نفس طويل نحكي
أنا:يعني علاقتكم أخوية ؟
نوح:عالأغلب هكا عزيزتي...أصلا هي تاعبة توا و القصر أحسن مكان ليها باش تسترجع عافيتها
أنا:بااهي...يكفي أنك متحولش كل إهتمامك ليها هي
نوح:والله بعد توا مفما حتى حد أهم منك
تبسمت و حطيت راسي على صدرو كأني لقيت بلاصتي لي كنت نلوج عليها من بكري...هو الشخص الوحيد لي يحتويني بالطريقة هاذي و يخليني نحس بالأمان فرد وقت...نزل عليا شوية...باسني من رقبتي و جبد روحو شوية يحكي
نوح:نظن فما شكون توحشني أكثر منك
دورت راسي شوية نغزر في لوسي لي كانت تطل عليه من ورا الطاولة...تبسمت بالوقت و حطيت يدي على خدو نحكي
أنا:تحيرت عليك برشا...خاصة أنو تليفونك كان مسكر أنا لتوا منعرفش كيفاش نتحكم في مشاعري و أفكاري كلشي جديد بالنسبة لياا...مشاعري و علاقتنا توا...أكا علاش منعرفش نتصرف و لا نتحكم في طريقة تفكيري و غيرتي عليك
باسني من يدي و عدا صوابعو على خصلات شعري يحكي
نوح:و أنا نحبك هكا...خليك على طبيعتك معايا..مهما 
كان اللي يدور في راسك...شاركني بيه و كان تحب تشتكي مني نجم نتحول لصديق...نسمع منك و نصلح من روحي...غير هكا حتى أنا نعيش في مشاعر مختلفة معاك...مشاعر حبيتها و مرتاح بيها
تبسمت مع كلامو...لي خلاني نرتاح أكثر و نزلت بيدي لصدرو نحكي
أنا:يعني أنا نجم نحكي عليك...ليك أنت...أي شي يدور في راسي و ماكش باش تتغشش مني
نوح:أكيد...هاو باش يولي عندي إنفصام متعمد باش إنتي ترتاح و ما تصادق حتى حد من غير حبك
أنا:باهي برشااا...حبيت الفكرة هاذي
تبسم و نزل عليا شوية...دوب باسني من شفايفي و جبد روحو يحكي
نوح:قبل ما ننسى...أنا إستلمت أوراقك من الميتم لي كنت فيه...و هما تنجم تقيد في دورات جديدة و لا حتى تقرا من أول و جديد من غير حتى مشكلة
أنا:توقعت انو إدوارد تخلص من كلشي يخصني غديكا
نوح:إدوارد معادش عندو سلطة عليك...إنتي حرة توا يا روحي...و تنجم تعمل لي تحب عليه...خمم بالقدا و خبرني شنية تحب بالظبط...و أنا باش نعاونك
تبسمت مصدومة من كلامو...خاصة أني عديت سنين من غير هوية...اللي كانت بإسمي اللي خذيتو من الميتم...بالرسمي و لا مرة توقعت أنو ممكن يجي نهار و تستقر حياتي بالطريقة هاذي...قربت منو شوية و دخلت في حضنو من غير حتى كلمة...محاولة مني باش نستوعب اللي قاعد يصير معايا...غير هكا هو الشخص الوحيد اللي نحب عليه من الدنيا هاذي الكل عدا يدو على شعري و باسني من راسي بالوقت يحكي
نوح:بعد توا باش تحقق كلشي كنت تحلم بيه
أنا:أنت باش تكون معايا في كل حلمة
نوح:أنا باش نكون معاك لآخر نفس في حياتي
تبسمت و جبدت روحي منو شوية...كبست على يدو نحكي
أنا:قصدك باش تكون متاعي وحدي
نوح:والله من أول مرة ريتك حسيت روحي وقعت و كذبت نفسي
أنا:يعني حاجة مليحة و لا لا ؟
نوح:إيجا هوني...إيجااا
مد يدو قرصني من خدي و عاود عنقني...يحكي
نوح:أول مرة نعرف روحي شنية نحب بالظبط و مرتاح في كل خطوة نعملها ليك و معاك
نزلت على شفايفي من غير حتى كلمة و دورت يديا زوز على ظهرو...حتى أنا مرتاحة معاه و بقربو مني و حاسة بفرحة غريبة بالنسبة ليا...معشتش كيفها قبل توا...فرحة تخليني مستعدة نتخلى على كلشي إلا عليه هو...حتى إني نسيت العشا اللي باش يبرد و موعد أكل لوسي و الوظيفة متاع جوزيف لي تستنى فيا...أصلا من بكري نستنى فيه على أعصابي خاطر تأخر...و في اللحظة هاذي بالظبط...منحبش نبعد عليه و لا حتى نخمم في المستقبل و الحاجات اللي ممكن تعرضنا في علاقتنا كلشي نحب عليه هو إني نعيش كل لحظة بوقتها معاه و كهو