آفْرُودِيتْ 🦢

الحلقة الثانية و السبعون🦢

🔸️حلقة 72
عدا يدو على شعري و جبدني من عندو شوية غزرلي و حاوط وجهي بيديه زوز...يحكي
أركان:شقولك تقوم ترتاح شوية و أنا باش نحضرلك حاجة تاكلها
أنا:كأنك بديت تتعود على عيشتي بسرعة
أركان:أنا نتعود على كلشي يخليني بجنبك
عدا صوابعو على شفايفي و تبسم مع صوت ويليام يحكي
أركان:ياخي هو قاعد يعس فياا ؟
أنا:ممم لازمك تتعود عليه حتى هو ملا
غزرلي ندرا كيف و تبسم...فرد وقت بعدلي شعري لتالي يحكي
أركان:نحبك تاخو بالك على روحك أكثر...و مهما كان اللي تحب تعملو...أنا باش نكون معاك فيه المرة هاذي
أنا:أنا نحب مساعدة من إسكندر...نظن هو المحقق الوحيد لي ينجم يعاوني...خاطرني نحب نعرف حقيقة موت صوفي زادة...يمكن القاتل يكون نفس الشخص لي تخلص من ويليام
أركان:بااهي...مدام هذا اللي تحب عليه باش يصير و حتى باش نكلف محقق داخل القصر زادة
أنا:كيفاش باش تعمل هكا ؟
أركان:نخليه يكون واحد من الخدم...يعني باش يكون محقق خاص يخدمني بالمعلومات لي نحب عليها من كل واحد عايش في القصر
أنا:بااهي
كبس عليا و باسني من جبيني...فرد وقت وقفني معاه يحكي
أركان:متخليهش يبكي أكثر من هكا...غير هكا تأكد من موعد الدكتور متاعو...منحبش نغفل عليه
هزيتلو براسي باهي و هزيت المذكرة في يدي دخلت للبيت و تبسمت...هزيتو في حضني نحكي
أنا:صباح النور...ياخي هذا الكل جووع ؟
قربتو ليا و بستو...ضحكت خاطر ريحتو طلعت من الحفاظة...رضعتو و بدلتلو دبشو زادة...عديت وقتي معاه وين حسيت روحي تفرهدت شوية...كبست عليه و خرجت...تبسمت و أنا نغزر للفطور...هزيت عينيا في وجهو نحكي
أنا:تعدا برشا وقت على طاولة هكا...كأنو صباحنا توا في رودس
قرب مني شوية...حط يدو على جنبي...يحكي
أركان:ملا شقولك في رحلة سريعة
أنا:نظن في وقت آخر يكون أحسن
تبسم و باسني من خدي...فرد وقت باسو...يحكي
أركان:ياخي أنت عندك موعد ؟
تبسمت خاطر لبستو كانت متناسقة...هزو من حملتي و جبدلي الكرسي قعدت...فرد وقت قعد مقابلني وين فطرت براحتي...هزيت عينيا في وجهو نحكي
أنا:كاثرين كان عندها حق...هي جات لهوني مرة و ويليام طردها
أركان:عرفت السبب ؟
أنا:لاا و مش مهم نعرف بعد توا...نظن الوقت لي أنا كنت بحاجتها فيه معادش موجود...يعني لو تبقى بعيدة...يكون أحسن لينا الزوز
مد يدو شوية و كبس على يدي فوق الطاولة يحكي
أركان:حاول أنك تاخو القرار الصحيح فيما يخص الموضوع هذا
هزيتلو براسي باهي...و تلفت مع صوت الباب...وقف و حط ويليام في حضني يحكي
أركان:خليك...أنا طلبت حاجات منهم
أنا:باهي
نزلت راسي لويليام...لي ضحك بالوقت..أصلا قليل برشا وين نشوف ضحكتو...تبسمت و بستو من جبينو و دورت راسي نغزر للكابة في يدو و ملفات زادة ضيقت عينيا نحكي
أنا:شنوة هذا ؟
أركان:نظن أنو إنتي باش تستقبلني أيامات عندك و أكيد من هوني لوقتها لازمني دبش جديد
أنا:أنت متأكد ؟ يعني ماكش مظطر تبقى هوني خاصة أنو الوضع ميناسبكش برشاا
تبسم و قرب مني شوية...حط الملفات على الطاولة يحكي
أركان:الملفات هاذي فيها كل المعلومات...عليك و على ويليام و قضية غالي و حتى كاثرين زادة
أنا:أنت طلبتهم بعد ما أنا خبرتك الحقيقة
أركان:كنت بحاجة إني نعرف السبب لي يخليهم يستغلوك ضدي...غير هكا نظن فما معلومات باش تفيدك و تنقص من الفضول لي عندك
نزلت على شفايفي شوية و سلمتو ويليام...فرد وقت جبدت ملف كاثرين عندي...حليتو بالوقت...نقرا في المعلومات لي مكتوبين عليها...و غزرتلو نحكي
أنا:طلعت سيدة أعمال ملا
ضحكت و عاودت نزلت راسي...خاطر هاذي حاجة أخرى متوقعتش نعرفها عليها...جبدت الورقة الثانية نقرا في تاريخها الطبي...واضح أنو عدات سنين تتعالج...خذيت نفس نحكي
أنا:شنوة مرضها ؟
أركان:نظن تاريخها الطبي طويل و نظن هي الوحيدة لي تنجم تجاوبك على كلشي صار معاها بالظبط
أنا:معنديش إستعداد إني نشوفها مرة أخرى...يعني مهما كانت ظروفها مكانش لازم تتخلى عليا أنا و ويليام...أنا عديت حياتي الكل من غير أم أركان و ما نعرف حتى شي على الحياة بوجودها...حتى إني نخاف نكون كيفها و نقصر في حق ويليام من غير ما نحس
قرب مني شوية و عدا صوابعو على خدي...يحكي
أركان:ماكش كيفها...و متأكد أنو إنتي باش تكون أم مثالية...أنا و ولدي محظوظين بيك
تبسمت و دورت راسي للملف مرة أخرى...غزر لويليام يحكي
أركان:أنا باش نحطو في سريرو مدامو باش يرقد
أنا:متنساش السوسات متاعو و لا باش يفيق بسرعة
هزلي براسو باهي و وقف...حطيت الأوراق قدامي محاولة مني باش نعرف عليها أكثر...فرد وقت لقيت روحي نقرا في قضية غالي لي تحلت من جديد و تأكدت أنو نورا بقات مدة 5 سنين محبوسة بسبب موت غالي و رغم أنو التحقيق تحل من جديد أما مفما حتى دليل ملموس من غير أقوالها ضد ويليام و يمكن نفس هاذي المعلومات هاذي لي هددني بيها إسكندر و خلاني قيد تصرفاتو...لميت الطاولة و أنا نقرا فيهم فرد وقت نفخت بقوة كي تكب عليا فنجان القهوة...حطيت كلشي من يدي و مشيت لبيت البانو...نحيت مريولي قبل ما نحل الباب...طيشتو من يدي و دورت راسي مع صوت الما لي تسكر في لحظة...هزيت عينيا فيه مصدومة خاطر متوقعتش أنو كان يدوش...في بالي مزال في البيت مع ويليام...عاودت هزيت مريولي و غطيت صدري بالوقت...أصلا دخلت بعضي و معرفتش شنوة لازمني نعمل بالظبط...لا نجمت نبقى نغزرلو و لا نخرج زادة رغم أنو الموقف تكرر معانا قبل أما توا بالظبط كلشي مختلف بيناتنا...مد يدو شوية...جبد المنشفة متاعي...لفها عليه و قرب مني شوية...عديت يدي على رقبتي نحكي
أنا:مكنتش نعرف أنك هوني...توقعتك مع ويليام...أنا باش نخرج...تنجم تاخو راحتك
خذيت نفس و رجعت خطوة لتالي باش نخرج...قرب مني قبل ما نخرج و كبس بيدو على الباب...نزلت على شفايفي شوية و تلفت عندو...عديت عينيا على صدرو و طلعت راسي شوية...غزرلي ندرا كيف و عدا صوابعو على خدي...نزل بيهم شوية لشفايفي و تبسم يحكي
أركان:خلييك
أنا:أركاان
غمضت عينيا كي نزل عليا شوية و عضني من وذني يحكي
أركان:روح أركان
نزلت على شفايفي.. محاولة مني باش نسيطر على مشاعري قدامو...وين كبس عليهم مرة أخرى يحكي
أركان:نظن إني خبرتك أكثر من مرة أنو حركتك هاذي تستفزني برشا
أنا:أركان...أنا
أركان:ششش
سكتني و عدا شفايفو على خدي و نزل بيهم لشفايفي من غير ما يبوسني...وين لقيت روحي داخلة بعضي أكثر...مع صوابعو لي حسيت بيهم على كتفي...جبد المريول لي بين يديا و طيشو عالأرض فرد وقت بعد عليا شوية...يحكي
أركان:معاادش نحبك تحشم مني و لا تخلق حدود بيناتنا
أنا:إحنا معاد فما حتى شي بيناتنا
حاوط وجهي بيديه زوز في لحظة و غزر لعينيا يحكي
أركان:معناها إنتي مستعدة تتخلى عليا ؟
أنا:أنت لي تخليت عليا
أركان:علاش أنا لي طلبت منك تبعد عليا ؟
أنا:أنت محاولتش أنك تلقاني
أركان:معناها مزلت مقتنعة بكلامو ؟
نزلت عينيا من وجهو...هزلي راسي مرة أخرى يحكي
أركان:مانيش نلوم فيك...مهما كان اللي صار طول الفترة لي فاتت أنا المسؤول عليه و أنا لي باش نصلحو زادة
عديت عينيا على وجهو من غير حتى كلمة...نزل على شفايفي شوية...دوب باسني منهم و نزل لرقبتي غير يديه لي سرحت فوق أكتافي و نزل بيهم لصدري و أجنابي...وين حسيت بدني رعش في لحظة...قرب لوذني يحكي
أركان:بدنك تعرف عليا بسرعة
أنا:بدني مش متعود على غيرك
غزرلي بالوقت و تبسم...فرد وقت عاود باسني من شفايفي و جبد روحو كي مس الجرح بصوابعو نزل راسو شوية يحكي
أركان:مزلت موجوعة منو ؟
هزيتلو براسي لاا...عدا صوابعو عليه مرة أخرى يحكي
أركان:كأني ضيعت كل التفاصيل اللي كان من الضروري تواجدي فيها...أنا ضيعت فترة حملك و ولادتك زادة ضيعت حاجات مانيش باش نرجعها حتى لو عديت عمري الكل نصلح في اللي صار...يا ريت كنت موجود في أكثر وقت إنتي كنت بحاجتي فيه
عديت عينيا على وجهو من غير حتى كلمة...رغم إني نحب نخبرو بكل التفاصيل لي غابت عليه...بما فيهم بنتنا...أما نعرف أنو الموضوع باش يحل مشكلة بيناتنا مانيش باش نتحملها و أنا في الوضع هذا...هز عينيه في وجهي يحكي
أركان:سامحني إلينااا...كلشي نجم نطلبو منك هو أنك تغفرلي على كلشي خليتك تعيشو في غيابي
مديت يدي شوية و حطيتها على صدرو...نزلت بصوابعي لآثار الجرح لي كان تحت الوشم متاعو عديت ثواني و أنا نلمس فيه...نزلت على شفايفي شوية نحكي
أنا:الجرح كان قريب برشا لقلبك
أركان:أما نجمت نمنع منو
أنا:يعني كنت باش تموت وقتهاا
أركان:أنا موجود هوني تواا
هزلي راسي شوية...و عاود باسني قبل ما ننطق بكلمة أخرى...كبست على صدرو أكثر من غير ما نحاول نبعدو عليا و لا نخمم في وضعنا و لي صار معانا قبل توا خاصة أنو مشاعري الكل تمردت عليا في لحظة...كبس على أجنابي أكثر و جبد روحو شوية يحكي
أركان:و مستحيل نتخلى عليك مرة أخرى
عديت عينيا على وجهو من غير حتى كلمة..معرفتش
نجاوبو و لا حتى شنوة نقول...خاصة أنو برشا حاجات تبدلت بيناتنا و لتوا منجمتش نتقبل رجوع المرا لي عشقها في الماضي لحياتو...خاطر مهما كانت علاقتو بيا...متأكدة أنو مستحيل يتخلى عليها هي.. مد يدو شوية و بعدلي خصلات شعري من وجهي فرد وقت نزل بصوابعو لشفايفي يحكي
أركان:أنا نحبك تحكي كلش تحس فيه توا إلينا..نحب نلقى ثنيتي لقلبك مرة أخرى أما من غير نكرر نفس الأغلاط لي صارت في الماضي
أنا:أناا
هز حاجبو شوية و هو يستنى فيا باش نجاوبو..نزلت يدي من صدرو و كملت نحكي
أنا:و..ويليام
أركان:شبيه ؟
أنا:أنا نسمع فيه يبكي
ضيق عينيه مستغرب و جبد روحو شوية مني حسيتو مش قد بعضو شوية...غزرلي يحكي
أركان:شبيه ميرقدش ساعتين على بعضهم
أنا:منعرفش...مدامو نسخة منك...معناها طلع ليك
أركان:بالله ؟
أنا:والله
ضحك بالوقت و نزل عليا مرة أخرى...باسني جنب شفايفي...يحكي
أركان:هاني باش نشوفو أنا
تبسمت و هزيتلو براسي باهي...بعدت شوية على الباب و خليتو خرج...تكيت لتالي و خذيت نفس طويل خاطرني معملتش حساب للي صار معانا من شوية خذيت دوش بعد ما تأكدت أنو هو سكت و عديت يديا زوز على بدني...أول ما تذكرت كلامو أصلا اللي عشتو معاه...ما عشتو مع حتى قبلو و لا بعدو زادة...لبست الكاب متاعي و خرجت...وقفت جنب الباب و عديت عينيا عليهم...شدو بيدو و يدو الثانية يفركس بيها في وسط فرشو...قربت منو شوية نحكي
أنا:على شنوة قاعد تلوج ؟
أركان:السوسات متاعو ملقيتهاش
أنا:أركاان
أركان:مممم
أنا:السوسات معلقة في رقبتو
هزو شوية و جبدها...حطها في فمو...يحكي
أركان:شد يا روحي...جراير أمك باش نفقد عقلي على بكري
تبسمت و قربت ناحية الخزانة...جبدت دبشي و غزرتلو مع صوت ويليام لي بدا يبكي من جديد قربت منو و وقفت قدامو نحكي
أنا:ماهوش باش يسكت...ملا هزو لين نبدل دبشي و نرجع
غزرلي ندرا كيف...عديت عينيا على وجهو و تبسمت نزل بعينيه لشفايفي..وين إنسحبت قبل ما يقرب مني خاطر مانيش مستعدة نتحط معاه في نفس الموقف متاع بكري مرة أخرى.