آفْرُودِيتْ 🦢

الحلقة السادسة عشر🧚‍♀️

🔸️حلقة 16
جبدت روحها مني بعد ما تحل الباب و تكات على الحيط...غزرتلي تحكي
إلينا:منحبش ندخل للجناح متااعك
أنا:هيا إيجاا...هكا باش تتعب أكثر
إلينا:شيهمك فيااا...نتعب و لا نقعد...أموري
أنا:تدخل توا و لا ندخلك بطريقتي ؟
إلينا:شنية تحب مني...علاش جبتني هوني ؟
قربت منها شوية...حطيت يدي جنب راسها و نزلت عليها شوية نحكي
أنا:الليلة تعديها عندي
إلينا:باش تستغل الوضع و تعريني ؟
ضحكت بالوقت و عديت عينيا على وجها...نحكي
أنا:والله المرحلة هاذي مش بعيدة برشاا...الفرق الوحيد أنها باش تكون بإرادتك
إلينا:في أحلامك يااا
أنا:ششش...منظنش تحب تضاعف عقابك
إلينا:تتوقع باش نخاف منك ؟
مديت يدي شوية و حطيتها على خدها...نتحسس في سخانتها لي قوات أكثر...و خذيت نفس نحكي
أنا:سخانتك طلعت أكثر...هيا إيجا معايا
إلينا:طلعت بسببك أنت
أنا:شعندي عملتلك يااخي ؟
إلينا:أبعد عليا شوية
جبدت روحي منها شوية...خرجت من الأصونصير تمد في الخطوة بالسيف...خلطت عليها و هزيتها في حملتي على غفلة...نحكي
أنا:إيجا هوني تراه
دورت يديها زوز على رقبتي و غزرتلي مستغربة تحكي
إلينا:فااش تعمل يااخي ؟
أنا:أعفيني من كل أسئلتك الليلة
إلينا:مدامك متنجمش تتحمل أسئلتي علاش تجيب فيا لهوني
أنا:خاطر هاذي الطريقة الوحيدة لي تخليني نطمن عليك أكثر
إلينا:كنت تخاف على النسا متاعك هكا زادة ؟
أنا:شنية قلنا على الأسئلة هاذي
إلينا:جاوبني و كهو...أنت مجبور باش تجاوب على كل أسئلتي
قربتلي شوية لين حسيت بأنفاسها في وجهي...غير شفايفها لي نزلت عليهم شوية و هي تغزرلي..خذيت نفس نحكي
أنا:لاا إلينااا...لااا...و مكنتش نعرف أنو حياتي باش تتقلب بالطريقة هاذي بعد ما تظهر إنتي
إلينا:ملا مش عاجبك الوضع هذا
تنهدت بالقاوي و دخلت لبيتي...حطيتها في وسط السرير و نحبت الفاست متاعي...تقعدت في بلاصتها تحكي
إلينا:علاش جبتني هوني ؟
سكت و كملت نحيت الشوميز متاعي...قحرتلي تحكي
إلينا:و فااش قاام تنحي في دبشك زاادة ؟
قربت منها شوية...وخرت لتالي و وقفتني بيدها تحكي
إلينا:رد باالك تحااول...أصلاا مستحيل نحي الفستان هذا هووني...و لا حتى نخليك تشوفني مرة أخرى
حبست في بلاصتي و عديت عينيا عليها...نحكي
أنا:فااش قام حتى تنحيه ؟
إلينا:منعرفش...يمكن هذا اللي يدور في راسك أنت
أنا:والله كنت باش نتأكد من سخانتك...عالأقل نطلب ماري باش تعمل اللازم
إلينا:منحبش...آخر مرة زرقتلي بالسيف علياا
أنا:عالأقل طلعت تخاف من حاجة
إلينا:ساعة وليت نشك أنك تخااف عليا
تبسمت و قعدت بجنبها...عديت عينيا على وجها نحكي
أنا:شقولك ترتاح شوية...كيما تنجم تبدل دبشك و كان تحب نحيهولك أنا زادة معنديش مشكلة
إلينا:زاايد متحشمش على روحك...نحب نمشي للجناح متاعي توا
أنا:للأسف ماكش باش تخرج من هوني
قحرتلي و عدات يديها زوز على وجها...تحكي
إلينا:بااهي
تسطحت لتالي و سكرت عينيها...خذيت نفس و جبدت روحي منها...طلبت قلاص و دوا متاع السخانة و دخلت لبيت البانو...خذيت دوش خفيف و إستلمت الطلبية من أولجا...و رجعت لبيتي...قعدت بجنبها نحكي
أنا:هياا قووم تواا...لازمك تشرب دواك
إلينا:س..سيبني أركاان
أنا:إليناا سخاانتك مزاالت طالعة...متنجمش ترقد و إنتي في الحالة هاذي
حلت عينيها شوية و غزرتلي...مديت يديا زوز كبست على أجنابها و قعدتها...حطت راسها على صدري تحكي
إلينا:ماكش باش تخليني معناها
أنا:هيا عزيزتي...من غير ما تظطر تزرق مبعد
إلينا:معاادش تهتم بياا هكا...خاطرني منحبش نستانس بالوضع هذا
تبسمت و عديت يدي على شعرها...نحكي
أنا:والله لازمك تستانس بيه...خاطر ماهوش باش يكون عندك سبيل آخر من غيري
هزت راسها شوية و غزرتلي ندرا كيف...تحكي
إلينا:أنت باش تتخلى عليا...إذا قلبك تعلق بوحدة أخرى
أنا:هذا اللي خايفة منو ياخي ؟
إلينا:منحبش نعيش معاك في حلمة...نجم نفيق منها في أي لحظة
أنا:ماهيش حلمة فينوسي...أنا باش نكون ليك كيما إنتي باش تكون ليا بالظبط
إلينا:مش صحيح...أنت مستحيل تربط روحك بيا و أنا مانيش باش نستنى منك أكثر من هكا...حتى الرقصة متاع بكري...كانت تشبه الحلم و أنت ضيعتها بكلامك معايا
أنا:صار متغشة على هاذي زادة
عديت صوابعي على خدها و تبسمت نحكي
أنا:باهي...ملا هاك تساالني رقصة أخرى...أما باش تكون في ظروف أحسن نوعدك
غزرتلي من غير حتى كلمة...شربتها دواها...بستها من راسها و عاونتها باش تتسطح من جديد...غزرتلي تحكي
إلينا:على أساس ممنوع أي وحدة ترقد على فرشك حضرة أركان القايد
نزلت عليها شوية...رجعتلها خصلات شعرها لتالي و نزلت بصوابعي لشفايفها نحكي
أنا:مااكش أي وحدة فينوسي...معادش تقارن روحك بيهم
إلينا:تقصد أنو حتى وحدة ما دخلت لبيتك ؟
أنا:لاا
مدت يدها شوية و حطتها على خدي من غير حتى كلمة...تنهدت بالقاوي خاطرني نعرف الصراع لي عايشة فيه و مستحيل نلومها عليه...خاصة بعد اللي سمعاتو مني...فرد وقت معنديش إستعداد باش نبعد عليها لحظة وحدة...أنا قصدت كل كلمة قلتها لتوا باش نعطيها كلشي تحرمت منو و نعيش معاها لي تحرمت منو زادة...نزلت عليها أكثر و بستها جنب شفايفها نحكي
أنا:هيا حاول أنك ترتاح توا و ما تخمم في حتى شي آخر...أنا معاك و باس نبقى معاك لآخر لحظة في عمري
كبست على خدي أكثر...بستها من يدها و تبسمت أصلا منظنش إني نجم نتحرك من بقعتي و نفوت فرصة إني نضيع في ملامحها الهادية لي تخليني في عالم آخر.