آفْرُودِيتْ 🦢

الحلقة السبعون🧚‍♀️

🔸️حلقة 70
قرب مني شوية و غزرلي مستغرب...خذيت نفس طويل و دخلت لبيتي...رضعت ويليام و لا مكانش باش يسكت حتى إني حسيت روحي هديت أول ما شميت ريحتو بستو من جبينو و حطيتو في وسط السرير...و رجعت عندو...حط الكادر من يدو و غزرلي يحكي
أيان:كاثرين كانت هوني ؟
أنا:منظنش حاجة هكا تتخبى عليك
أيان:إلينا شنية صااار ؟
أنا:أنت خبرني شنوة اللي قاعد يصير...فهمني علاش كذبت عليا بخصوص أركان و جينا و خبيت عليا كلشي لازمني نعرفو منك
أيان:مفهمتكش
أنا:أنت تعرف بالقدا على شنوة نحكي أياااان...أنت خبيت عليااا أنو أركان كان يلوج عليا طول الفترة لي فاتت
أيان:و أنا ممنعتكش عليه إليناا...كان إنتي حبيت تحل الثنية لأركان باش يقرب منك...مكنتش باش تاخو إذني أما بينك و بين روحك ماااكش مستعدة تساامحو و البعد الشي الوحيد لي كان يعاون فيك باش تتغلب على نفسك و متسامحوش
عديت عينيا على وجهو من غير حتى كلمة...يمكن كلامو صحيح...لولا البعد مكنتش باش نقاوم قربو مني و لا رجوع إيما لحياتو...خذيت نفس نحكي
أنا:و بخصوص جينا ؟ علاش خبيت عليا لي صار معاها ؟
أيان:حياتك و حياة صغارك كانت في خطر...راحتك كانت أهم من أنك تعرف اللي صاار
أنا:شنية علاقتك بيها ؟ أركان قالي أنو هي شخص مهم برشا بالنسبة ليك و متحاولش تكذب عليا المرة هااذي
أيان:جينا تكون أختي
هزيت عينيا في وجهو مستغربة...خاطر هذا آخر شي توقعت إني نسمعو منو...قربت منو شوية نحكي
أنا:أختك ؟
أيان:أختي بالتبني...غير هكا هي مش مجرد ممرضة هي دكتورة و لولا ثقتي فيها مكنتش باش نخليها تقرب منك
أنا:علاش خبيت عليا هذا الكل ؟
أيان:كنت باش نخبرك بكلشي في الوقت المناسب
أنا:و كاثرين شنية علاقتك معاها ؟
أيان:علاقة خدمة و كهو
أنا:تحب تفهمني أنو أنت تعرفت عليها صدفة
أيان:أنا نعرف كاثرين من سنين...حتى قبل ما نعرف أنها أمك
بعدت عليه شوية و رجعت شعري لتالي...نحكي
أنا:شنوة اللي قاعد يصير يا ربي...علاش الكل قاعد يعامل فيا بالطريقة هاااذي...ياخي أنا شنوة عملت باش نلقى الكل يستغل فيا لمصلحتو...أصلا هي شتحب مني بعد السنين هذوما الكل...علاش رجعت في الوقت لي أنا موليتش بحاجتها معاياا
أيان:إليناا أسمعني
أنا:متقرربش مني
وقفتو بيدي و وخرت خطوة لتالي...نحكي
أنا:متقربش مني أياان...معاد نحب حتى حد منكم يقرب مني...و أنت زادة كذبت عليا كيفهم...مع أنك كنت قريب مني طول الشهور لي فااتت
أيان:أنا مكذبتش عليك...أنا عملت لي شفتو منااسب ليك إلينااا...و إذا تشوف فيا غااالط...باهي ميسالش مانيش باش نبرأ روحي جملة...أنا باش نعطيك الوقت الكافي لي يخليك تكتشف أنو هو ماهوش باش يتخلى على إيما...مهما قال و مهما نفى علاقتو بيها...هي باش تبقى بيناتكم ديمااا...و كلشي عملتو معاك لتوا...هو إني حاولت نسحبك من الوحل لي خلاك أركان تغطس فيه و من مجرد عشيقة وليت أم ولدو مش أكثر...و إنتي تعرف بالقدا أنو كلامي صحيح و أنو إنتي متفرقش على أي مرا فااتت عليه و إلا راك مرتو و على إسمو زادة...صدقني أنا أكثر واحد نعرف أركان و نعرف أنو هو مستعد يتخلى على الكل إلا على نفسو و مستحيل يربط روحو بيك و لا بغيرك...و مهما كانت مشاعرو ناحيتك ماهوش باش يبدل نمط حياتو جرايرك إنتي هو باش يخليك على الهامش...وقت يحب يرجع ليك يسحبك لعندو بويليام و إنتي ماكش باش ترفض جملة خاطر رضيت على روحك تعيش معاه بالطريقة هاذي و يا ريت تخمم في كلامي بالقدا و إلا باش تخسر روحك أكثر من هكا
بقيت نغزرلو من غير حتى كلمة...وخر لتالي و خرج بعد ما نطر الباب وراه...عديت دقايق واقفة في بلاصتي مصدومة من طريقة كلامو معايا...يمكن عندو حق أنا لي رضيت نعيش مع أركان على حساب نفسي و من غير ما نخمم في العواقب لي ممكن تصير...قعدت على طرف الفوتاي لي كان بجنبي و كبست على يديا زوز معادش نعرف شنوة نعمل بالظبط و في اللحظة إستفقدت ويليام أكثر من أي وقت فات عليا...خاطر هو الوحيد  اللي يفهمني و يحس بيا و يعرف كيفاش يواسيني و يخليني نتعدى كل أزمة في حياتي...فقت من سرحتي على صوت الباب...مسحت دموعي بالوقت أصلا عديت ساعتين و أنا في بلاصتي...حتى ويليام معاودتش تفقدتو خذيت نفس و هزيت روحي وقفت حليت الباب و عديت عينيا على وجهو...ضيق عينيه مستغرب يحكي
أركان:شبي حالتك هكا ؟
عديت عينيا على وجهو و قربت منو من غير حتى كلمة...دخلت في حضنو و دورت يديا زوز على ظهرو رغم كلشي سمعتو من أيان بكري...أما عملت الشي الوحيد لي حسيت روحي بحاجتو...مهما صار بيناتنا مزلت نحس أنو هو الملجئ الوحيد لي عندي بعد ويليام عدا يدو على شعري و كبس عليا يحكي
أركان:إلينا...شنية صار يا روحي
أنا:منحبش نبقى وحدي...نحس في روحي باش نهبل من الأفكار اللي قاعدة تدور في راسي
أركان:اللطف عليك...هيا إيجا
باسني من راسي و جبد روحو شوية مني...كبس على يدي و دخلني معاه...سكر الباب و هز راسو مع صوت ويليام يحكي
أركان:تعب من جديد ؟
أنا:يمكن فاق توا ؟
مسحت دموعي مرة أخرى و سبقتو للبيت...قعدت على طرف السرير و هزيتو في حضني...حاولت نرضعو من جديد...رغم إني نحس في روحي تاعبة عاللخر و معادش نجم نعتني بيه أكثر من هكا و قاعدة نقصر في حقو من غير ما نحس...رغم أنو الشخص الوحيد لي بقى عندي في الدنيا هاذي الكل كبست على يدو الصغرونة و بستو منها...كأني نستمد في القوة منو هو...باش نواجه كلشي يصير معايا بعد توا...هزيت راسي شوية...كي حسيت بيه دخل عندنا غزرلي ندرا كيف و هزو من حضني بعد ما رضع باسو من جبينو و تبسم يحكي
أركان:جرايرك معاد نجم نعمل حتى شي...خاطرني نتوحشك بسرعة
حطو من يدو في وسط السرير و شدني من يدي يحكي
أركان:هيا إيجا
أنا:مانيش باش نخليه وحدو قبل ما يرقد
أركان:مدام شبع ماهوش باش يبكي و مش بالضرورة يرقد كل شوية
كبس على يدي و وقفني معاه...خرجت معاه لصالة و قعدت على الفوتاي...حط كأس الما في يدي و قعد بجنبي يحكي
أركان:كاثرين كانت هوني ؟
هزيتلو براسي إيه...مد يدو شوية و بعدلي خصلات شعري من وجهي يحكي
أركان:شنية صار عزيزتي ؟
أنا:ويليام كانت عندو مذكرة خاصة...يكتب فيها كلشي يصير معاه...أما ملقيتهاش هوني...هي أكيد في القصر متاعك توا
أركان:باهي خلينا نمشيو و نفركسو عليها
أنا:منجمش ندخل للجناح هذاكا مرة أخرى
أركان:كان تحب نخلي أولجا تفركس عليها
أنا:ويليام مكانش يحب شكون يمس أي شي يخصو من غيري...جيبهالي أنت أماانك...أكيد المرا لي كانت هوني قاعدة تكذب عليا...ويليام مستحيل يخبي عليا حاجة و لا حتى يكون فما أسرار بينا
قرب مني شوية و حط يظو على كتفي...جبدني عندو لي خلاني نحط راسي على حضنو و كبس عليا يحكي
أركان:ششش...يزي كهو...هدي روحك توا
أنا:علاش رجعت توا ؟ شنية تحب مني ؟ و وين كانت طول السنين لي فااتت
أركان:أكيد عندها تفسير لكلشي صار
أنا:ما نحب نسمع منها حتى شي...و لا حتى نشوفها مرة أخرى
أركان:باهي يا روحي..لي تحب عليه باش يصير..هدي روحك توا
أنا:نحس في روحي تاعبة عاللخر...و معادش نعرف شنوة نعمل من غير خوياا و لا وين نمشي...كأنو حياتي وقفت الكل
أركان:أنا هوني معاك
هزيتلو براسي لا و جبدت روحي منو...مسحت دموعي نحكي
أنا:لااا...أنت هووني على خاطر ولدك و كهو...لولا ويليام ماكش موجود معايا تواا
مد يدو شوية و بعدلي شعري من وجهي يحكي
أركان:وجود ويليام ما يبدل حتى شي...إنتي متاعي و باش تبقى متاعي مهما كانت الظروف
أنا:أنت حبيتني قبل توا ؟
هزيت عينيا في وجهو بالوقت...نستنى فيه يجاوبني نزل بصوابعو لخدي يحكي
أركان:توقعت أنك تعرف الجواب هذا أكثر من أي حد آخر
أنا:جاوبني عليه أنت
أركان:أنا حبيتك من أول لحظة جات عيني عليك
أنا:مش صحيح...أنت كان حبيتني بالحق مكنتش تخليت عليا و لا خليتني نبعد عليك جملة...غير هكا أنا كنت نعرف أنو اللي بيناتنا الكل وفى وقت ريت الملف متاعها على طاولتك
كبست على يديا زوز و عاودت غزرتلو...نحكي
أنا:أنت ملقيتهاش صدفة...كنت تلوج عليها في الوقت لي بعدتني عليك...خبرت ويليام وقتها و هو لي خبرني نبعد عليك...و نمشيو من هوني لمكان آخر خاص بينا إحنا و كهو...أما حتى هذا مصارش و لقيت روحي وحدي...غير هكا الكل قاعد يكذب عليا...أيان و كاثرين و حتى أنت زاادة
تنهد بقوة و مسحلي بقية دموعي...منعرفش علاش قاعدة نلوم فيه بالطريقة هاذي...خاصة بعد اللي سمعتو من أيان قبيل...قرب مني أكثر و جبدني عندو يحكي
أركان:إيجا عندي ترااه
أنا:كي تعرف روحك باش تبعد في أي لحظة...علاش أنت موجود هوني تواا
أركان:أنا مستحيل نتخلى على فينوسي...مهما كان اللي قاعد يدور في راسك توا ماهوش باش يصير مااكش وحدك و مستحيل نخليك وحدك بعد توا
مديت يدي شوية و حطيتها على صدرو...وين جبدني عندو أكثر...يحكي
أركان:مهما كانت مشاعرك و لي تخمم فيه...نحبك تشاركني بيه و ما تخلي حتى شي داخلك...غير هكا مفما حتى شي بيني و بين إيمااا...خاطرني مستحيل نمس مرا أخرى من بعدك
أنا:أنت أركان القايد...مستحيل تبقى من غير مراا
ضحك و باسني من جبيني...فرد وقت غرس يدو في شعري يحكي
أركان:جرايرك بدلت كل العادات متاعي
أنا:مممم باهي برشا...عالأقل تكون أب صالح و ميظطرش ولدي يتعلم الحاجات الخايبة هاذي الكل منك
أركان:باااهي أنا نعرف كيفاش ناخو حقي منك
هزيت راسي شوية و عديت عينيا على وجهو نحكي
أنا:أنت باش تبقى هوني ليلة زادة ؟
أركان:للأسف إنتي باش تتحمل وجودي في حياتك و تتعود عليه أكثر من قبل
أنا:و تنسحب في الوقت لي تحب عليه زادة
أركان:معادش نحبك تخاف مني و من فكرة أنو أنا باش نتخلى عليك...وااضح
غزرتلو من غير حتى كلمة...نزل راسو شوية و باسني جنب شفايفي...لي خلاني نحط راسي على صدرو من جديد...لتوا نحس في روحي مش مستعدة باش ناخو أي خطوة أخرى معاها...يكفي أنو هو معايا توا خاطرني معادش نحب نبقى وحدي أكثر من هكاا غرس صوابعو في شعري يحكي
أركان:رقدت ؟
أنا:لااا...أنا مزلت نخمم في كلامها لتوا
أركان:مهما كان اللي سمعتو منها...متخليهش يأثر عليك مدام فما إحتمال أنو ويليام ذكر الحقيقة في المذكرة متاعو
أنا:خويا الوحيد لي مكانش يكذب عليا و لا يستغلني زادة
أركان:هدي روحك توا...أصلا مستحيل نخليها تقرب منك إذا كانت ناوية تأذيك...هيا أرقد توا و ما تخمم في حتى شي
أنا:أنا هملت ويليام اليوم...أكيد هو بحاجتي
أركان:إرتاح توا عزيزتي و هاني باش نكون معاه إذا فاق مرة أخرى
كبس على يدي لي فوق صدرو و باسني منها...خذيت نفس من ريحتو و غمضت عينيا...من غير ما نخمم في كلام أيان و لا كاثرين...كلشي نحب عليه هو إني نرقد من غير خوف...و رغم كلشي صار بيناتنا قبل و رغم الوضع لي إحنا فيه...أما حسيت براحة غريبة و أمان كنت بحاجتهم طول الفترة لي فاتت...لي خلاني نرقد مع أنو الأحداث الكل تراكمت في راسي و معادش نعرف في شنوة لازمني نخمم و لا حتى شنوة لازمني نعمل بالظبط