آفْرُودِيتْ 🦢

الحلقة الثالثة و الثمانون 🦢

🔸️حلقة 83
#آنيا_تحكي:
جبدت الكرسي و قعدت بعد ما طلبت عصير الليمون كي العادة...هزيت راسي شوية و غزرتلها...دخلت و تكات على الكنتوار تحكي
مادلين:أولجا نحب على قهوة توا
أولجا:لحظة و تكون حاضرة آنسة مادلين
كملت نشرب من غير ما نركز معاها...عدات عينيها على وجهي و تبسمت تحكي
مادلين:شنية حكايتك مع عصير الليمون ؟
أنا:علاش فما مانع إني نشرب منو ؟
مادلين:أكيد لا عزيزتي...أما إذا كنت حامل يمكن يضرك
غزرتلها مستغربة...منعرفش من وين سمعت بخبر حملي دوب تبسمت من غير ما نرد عليها...شدت القهوة متاعها و جات قعدت معايا...غزرتلي تحكي
مادلين:مكانتش عندنا فرصة باش نتعرفو على بعضنا
أنا:نظن مش لازم منها الحكاية
مادلين:نعرف...أما جيست عندي فضول ناحيتك
أنا:بخصوص شنوة ؟
مادلين:يعني...اللي كنت نعرفو...هو أنو نوح يحب مرا أخرى و تفاجأت كي عرفت أنها صوفي...نفس الطفلة لي كانت مع أركاان
أنا:نظن الحكاية هاذي وفات ؟
مادلين:أكيد...مجرد فضول خاطر متوقعتش أنو نوح يرتبط و يعرس زادة...خاصة أنو متعلق بيها لتوا
أنا:شتقصد ؟
مادلين:ما نقصد حتى شي عزيزتي...قاعدة نسأل على خاطرني ريتو أكثر من مرة يتردد لجناحها و يبقى بالساعات غديكا...نظن أنك تعرف بالموضوع هذا
بقيت نغزرلها من غير حتى كلمة...معرفتش نجاوبها و مستوعبتش كلامها أصلا...خاطر ولا مرة جا الإحتمال هذا في مخي...فقت من سرحتي على صوت زمردة لي دخلت تحكي
زمردة:شفما هوني ؟
مادلين:كنا نحكيو شوية مع بعضنا ؟
زمردة:في شنوة ؟
مادلين:حتى شي مهم
هزيت روحي وقفت و بعدت عليها بالسيف...خاصة أنو الدوخة سيطرت عليا و منجمتش نثبت في الحاجات لي قدامي...مدت يدها و سندتني بالوقت تحكي
زمردة:إنتي لباااس ؟
مادلين:يمكن الحمل أثر فيها ؟
زمردة:إنتي حاامل ؟
أنا:لاا
حاولت نجبد يدي منها...كبست عليا و غزرتلي تحكي
زمردة:هدي روحك و إيجا معاياا
أنا:منحبش..سيبني
زمردة:آنيااا...ريت وضعك ياخي ؟
أنا:أناا لبااس
مادلين:خليها تمشي وحدها
زمردة:خليك خارج الموضوع هذا مادلين
غزرتلها مستغربة و خلطت عليها بعد ما كبست على يدي...تحكي
زمردة:أولجا...خلي ماري تجي لجناحي
أنا:فاش تعمل ياخي ؟ أنا مستحيل نجي معاك لجنااحك
زمردة:ملا خليها تجي لجناح نوح
خذيت نفس و مشيت معاها من غير حتى كلمة خاطرني نحس في روحي مش قد بعضي...دخلت معايا لبيتي...و بقات واقفة لين فحصتني ماري و تبسمت تحكي
ماري:لازمك تهتم بروحك أكثر...و لا ظغطك باش يهبط ديما
هزيتلها براسي إيه...قربت مني أول ما خرجت و غزرتلي تحكي
زمردة:إنتي حامل ؟
أنا:صحيح
زمردة:من إمتي ؟
أنا:تقريبا 3 أشهر
زمردة:علاش معنديش علم لتوا ؟
أنا:نعرف أنك باش ترفض...و أنا جيست نحب نبقى بعيد على المشاكل
زمردة:صحيح...أنا رفضتك و منجمتش نتقبل فكرة أنو ولدي ياخو مرا ما يعرف عليها حتى شي و مش معروف أصلها زادة...أما حب نوح ليك غلبني و خلاني نتأكد مع الوقت أنو الأمور هاذي ماهيش مهمة مدام هو مقتنع بيك و فرحان معاك...صراحة ولا مرة حسيت ولدي مرتاح كيما المرة هاذي
أنا:غريبة...متوقعتش نسمع الكلام هذا منك
زمردة:نعررف و مننكرش إني كنت أنانية معاك و مع أركان زادة..خاطرني كنت نشوف أنو نوح أحق من أركان بكلشي
أنا:شنية لي خلاك تبدل رايك ؟
زمردة:أنا منحبش نخسر ولدي أكثر من هكا...كيما منحبش حفيدي يكرهني زادة
أنا:أنا منجمش ناثق في كلامك..نعرف لي إنتي متحبنيش و مستحيل تتقبل وجودي مع ولدك
زمردة:نعرف أنك مستحيل تصدقني و نعرف أنو اللي نقول فيه ميتصدقش..أما باش نحاول نتبدل للأحسن هذا وعد
أنا:هذا قرار مهم و نظن نوح باش يفرح بيه..أما للأسف يمكن توقعك كان صحيح من الأول
زمردة:شقصدك ؟
أنا:نقصد أنو علاقتنا أنا و نوح باش توفى و السبب الوحيد لي يخليني نبقى هوني هو الحمل هذا
زمردة:مفهمتكش ؟ علاش حتى توفى علاقتكم...اللي نعرفو ولدي مغروم بيك و إنتي الوحيدة لي كانت علاقتو معاها جدية
أنا:إنتي تعرف علاش إرتبط بيا ؟
زمردة:في الأول توقعت أنو إرتبط بيك بسبب الشبه لي بينك و بين صوفي..أما توا متأكدة أنو هو يحبك و هذا واضح للكل زادة
تبسمت و هزيت عينيا في وجها...نحكي
أنا:نوح مزال يحبها
زمردة:علاش تقول في الكلام هذا توا ؟
أنا:أنا متأكدة من اللي نقول فيه...و أنا منجمش نكمل في اللعبة متاعو..هو كان خبرني من الأول مكنتش باش نوافق نكون معاه جملة
زمردة:هدي روحك..ياخي مادلين هي لي قالتلك هكا ؟
أنا:لاا..أنا سمعتو و هو يحكي مع أركان
زمردة:متأكدة ؟
هزيتلها براسي إيه...غزرتلي مستغربة...تحكي
زمردة:منصدقش..يعني نعرف انو هو كان يحبها أما توقعت لي الحكاية هاذي وفات بعد ما تعرف عليك
أنا:إنتي تعرف لي هو يتردد لجناحها ؟
زمردة:لا...غير هكا نظن لازم موضوع صوفي يتسكر جملة بيناتكم
أنا:أنا جيست بحاجة إني نبعد من هوني و كهو...رغم نعرف أنو حتى حد منكم ماهو باش يوافق أنو الصغير هذا يتربى بعيد عليكم
زمردة:شبيك تخمم بالطريقة هاذي...أول حاجة نحي صوفي من راسك توا...الطفلة ماتت و ماهيش باش ترجع...إنتي لي موجودة توا و لازمك تخليه يخاف من خسارتك
أنا:صراحة متوقعتش نسمع الكلام هذا منك متكونش
لعبة أخرى تحب توقعني فيها
زمردة:متخاافش..خاطر صدقني أكثر شي يهمني هو إني نشوف ولدي فرحان مع عيلتو الصغيرة و باش نحاول نحبك مع الوقت
غزرتلها و تبسمت..خاطر بالرسمي مستغربة غيها و في موقفها معايا..فرد وقت معادش نعرف في شنوة لازمني نخمم بالظبط...عديت يديا زوز على وجهي و تكيت راسي لتالي قربت مني شوية و غزرتلي تحكي
زمردة:إنتي لباس توا ؟
غزرتلها و هزيتلها براسي إيه...تبسمت تحكي
زمردة:باهي...أنا باش نمشي لجناحي توا...و تو نوصي أولجا باش تهتم بيك أكثر...غير هكا منحبكش تحكي مع مادلين و لا تعطيها فرصة أنها تقرب منك واضح كلامي
أنا:وااضح
زمردة:رد بالك على روحك
أنا:باهي عيشك
حطيت يدي على كرشي بعد ما خرجت و تكيت لتالي حسيت روحي في دوامة أخرى بسبب اللي سمعتو متوقعتش أنو مزال متعلق بيها لدرجة هاذي...عديت الوقت في بلاصتي...ملقيتش جهد باش نقوم...غزرت لأولجا لي دخلت عندي باش تتفقدني...تبسمت تحكي
أولجا:تحب تاكل حاجة معينة مدام آنيا
أنا:لا عيشك
أولجا:براحتك
تلفتت باش تخرج...خذيت نفس و وقفتها نحكي
أنا:أولجاا
أولجا:تفضل مدام
أنا:نحب نسألك و يا ريت تجاوبني بصدق
أولجا:أكيد
أنا:ياخي فما شكون هوني في القصر يتردد لجناح صوفي
أولجا:لااا...الجناح فارغ و ما يدخل ليه حتى حد..أما سيد نوح كان غديكا اليوم
أنا:باهي أولجا...عيشك
خذيت نفس طويل و هزيت روحي وقفت...حسيت روحي تخنقت بعد كلامها...وقفت جنب البلار و كبست على كرشي...محسيتش بيه وقت رجع...قرب مني و باسني من راسي يحكي
نوح:شبي جنيتي ؟
خذيت نفس طويل و تلفت عندو...عديت عينيا على وجهو نحكي
أنا:مفما شي...جيست كنت نخمم و كهو
نوح:في شنية ؟
أنا:في وضعناا
نوح:مفهمتكش
أنا:أنا وصلت لقرار و نظن باش يكون مناسب لينا الزوز
هز حاجبو مستغرب و غزرلي من غير حتى كلمة إستجمعت أنفاسي و غزرتلو نحكي
أنا:خلينا نطلقو و ننهيو الحكاية هاذي هوني
نوح:آنيا ياخي قاعدة تسمع في روحك ؟
أنا:هذا أحسن حل لينا
نوح:شنية صاار ؟
أنا:حتى شي...أنا نحب نمشي من هوني و كهو
نوح:تعرف أنو هذا الشي مستحيل يصير
أنا:أنت متنجمش تخليني هوني بالسيف علياا
نوح:آنيااا...يززي كهو...الموضوع هذا معادش نحبك تخمم فيه جملة...خاطرني مستحيل نطلقك و لا حتى نخليك تبعد عليا
أنا:مش على كيفك
قرب مني شوية...وخرت لتالي بالوقت...قحرلي يحكي
نوح:متلزنيش باش نغلط معاااك
أنا:معاادش يهمني اللي باش تعملو معايا بعد توا
نوح:آنيااا...لآخر مرة باش نسألك...شنية صاار ؟
أنا:أسأل روووحك
بعدت عليه باش نمشي...جبدني من يدي و كبس عليا يحكي
نوح:آنياااا...علاااش التصرفاات هذوماا ؟ ياخي ناوية تجهلني تواا ؟
أنا:سيبني و كهوو
جبدني عندو أكثر...وين حسيت بيدي تخلعت من بلاصتها و قحرلي يحكي
نوح:مانيش باش نسيبك...مش قبل ما نفهم اللي قاعد يصير معااك...شعندي عملت المرة هاذي زادة ؟ 
أنا:ما عملت شي...أما أنا معاادش نجم نستمر معاك و لا نبقى هوني أكا علاش أنت مجبور طلقني
نوح:تعرف أنو هذا الشي مستحيل يصير
أنا:معندكش حق تخليني هوني بالسيف عليا
نوح:والله هذا اللي باش يصير...متنساش أنك حامل و باش تضر روحك زادة
أنا:ملا هذا اللي يخليك متردد ؟ ملا أنا معادش حاجتي بيه الحمل هذا و منحبش نخليه زادة
غزرلي مصدوم...حاولت نجبد روحي منو...كبس عليا أكثر و دزني لتالي...هزو يدو لأخرى في وجهي يحكي
نوح:جرب برك...جرب تعمل حاجة هكا...و لا حتى تحاول تضر اللي في كرشك بسببي...صدقني وقتها باش تشوف الوجه الآخر مني و مانيش باش نسامحك جملة ياا آنيااا
أنا:سيبني توا
حسيت صوتي ضاع بعد ردة فعلو معايا...رخف يدو عليا في لحظة...و غزرلي يحكي
نوح:اللي صار توا و اللي سمعتو منك ماهوش باش يتكرر...واضح كلاامي ؟
بقيت نغزرلو من غير حتى كلمة...بعدت عليه بعد ما حسيت معدتي قلبت...زربت في خطواتي لبيت البانو و سكرت الباب من داخل بالمفتاح خاطر نعرف لي هو ينجم يعطل النظام و يدخل عندي..رديت كلشي كليتو بكري و غسلت وجهي..نسمع فيه يحكي
نوح:آنياا...حل الباااب هذا تواا
أنا:نحب نبقى وحدي
نوح:تعرف لي أنا مانيش باش نخليك و إنتي في الحالة هاذي...حل الباب خليني نطمن عليك و نحكيو في الموضوع هذا مرة أخرى...هيا عزيزتي
قربت شوية ناحية الباب و حطيت يدي عليها..نحكي
أنا:خليني وحدي أماانك
نوح:مقصدتش لي صار بكري و إنتي معندكش حق تخمم بالطريقة هذيكا...متنجمش تتخلى على قطعة مني و منك
بقيت نسمع فيه من غير حتى كلمة..رغم إني نعرف لي مستحيل نعمل حاجة هكا و لا حتى نفرط في ولدي و لا بنتي...أما حبيت نوجعو بأي طريقة..يمكن وقتها يتخلى عليا و يخليني نبعد..قعدت على الأرض و تكيت على الباب...حسيت طاقتي فرغت و معادش نجم نحكي معاه أكثر...ضرب الباب يحكي
نوح:آنيااا رد عليااا..إنتي لباااس ؟ جاااوبني ؟
أنا:أناا لباااس..أمشي من هوني و كهو
نوح:حل الباب و نوعدك باش يصير لي تحب عليه يا روحي
أنا:منحبش نشوفك و لا حتى نحكي معاك...خليني وحدي أماانك
نوح:خليني نشوفك عالأقل...نطمن عليك و بعد نمشي
أنا:أناا لباس و الجنين لباس عليه زادة...تنجم تمشي توا
تكيت راسي على الباب من غير ما نرد على حتى كلمة منو...مع أنو عدا دقايق و هو يحكي معايا حطيت يديا زوز على كرشي مع دموعي لي هبطت للحظة لقيت روحي ضايعة أكثر...وين إظطريت نخمم في أكثر من حل..إذا رجعت لروسيا إدوارد باش يلاحقني من جديد و منظنش أنو عيلتي باش تتقبل وجودي معاها بعد السنين هاذي و حتى هوني معنديش مخرج و ما نجم نمشي لحتى بلاصة أخرى نجم نبدا فيها من جديد..من غير نوح و من غير خوف زادة. .ساعات نحس أنو الخوف هذا ولا جزء مني و منجمش نعيش من غيرو جملة..غير هكا منعرفش شنوة مزال باش يصير أكثر من اللي صار معايا في الفترة هاذي...حليت عينيا بعد ساعتين تقريبا...منعرفش على روحي كيفاش غفيت على الأرض...هزيت روحي بالسيف و حليت الباب...وين لقيتو قاعد على الأرض حتى هو...وقف أول ما حس بيا و غزرلي يحكي
نوح:آنياا...لبااس ماهو ؟ كيفاش تحس في روحك ؟
نزلت عينيا من وجهو و قربت ناحية السرير...شديت بلاصتي و غمضت عينيا...كنت بحاجة إني نكمل رقادي قعد بجنبي و عدا يدو على شعري يحكي
نوح:أنا مقصدتش لي صار بكري يا روحي...علاش حتى تعملي فيا و في روحك هكا
غمضت عينيا من غير ما نجاوبو...و رغم وضعنا ريحتو خلاتني نغفى بسرعة...و محسيتش بالنهار كيفاش طلع حليت عينيا مروهجة و غزرتلو بالوقت بعدت يدي منو لي كانت فوق صدرو...رقد من غير ما يبدل دبشو أصلا هزيت روحي بالسيف...تعديت لبيت الدبش بدلت الروبة متاعي و خرجت...هزيت لوسي من الفوتاي و غزرتلها نحكي
أنا:هيا إيجا باش نمشيو من هوني...خليه عايش وحدو الساقط
دخلت للأصونصير و تكيت لتالي...في اللحظة هاذي منعرفش في شنوة كنت نخمم بالظبط...جات عيني عليها أول ما تحل الباب...كملت طريقي من غير ما نحكي معاها و خرجت من القصر...قربت ناحية ليو نحكي
أنا:نحب نمشي من هوني توا
ليو:باش نخلي السائق متاعك يجي توا
أنا:لاا...وصلني أنت
ليو:إنتي لباس مدام آنيا ؟
أنا:نحب نبعد من هوني و كهو..أما منعرفش وين لازمني نمشي بالظبط
ليو:صارت حاجة ياخي ؟
زمردة:ليو...أنا نحل الموضوع
تلفت عندها مستغربة...ضيقت عينيه بالوقت و غزرتلي تحكي
زمردة:وين باش تمشي ياخي ؟
أنا:مش هذا لي تحب عليه إنتي زادة ؟ أنا باش نبعد على ولدك جملة
زمردة:شنية الكلام هذا صباح ربي ؟ ياخي تعاركتو ؟ و يعرف أنك خرجت وحدك ؟
أنا:مانيش صغيرة...نعرف ندبر أموري وحدي
زمردة:إيجا معايا قبل ما يشوفك أي حد
أنا:وين باش نجي معاك ؟
زمردة:يا بنتي إيجاا...مش وقت أسئلتك توا
خلطت عليها مستغربة...دخلتني لجناحها لي كان أول مرة نحط ساقي فيه...غزرتلي تحكي
زمردة:فهمني شنية اللي قاعد يدور في راسك توا ؟
أنا:أنا باش نمشي من هوني و خلي ولدك يطلقني و الصغير يبقى بيناتنا
زمردة:تعرف لي نوح ماهوش باش يطلقك و ماهوش باش يقتنع بالكلام هذا زادة
أنا:ياخي باش يخليني معاه بالسيف عليا ؟
زمردة:للأسف هذا هو الإحتمال الوحيد
أنا:معادش نجم نبقى هوني...مانيش مظطرة نعيش مع راجل مزال متعلق بحبو الأول
زمردة:إنتي ماكش مقتنعة من حب نوح ليك
أنا:أنا متأكدة أنو يحب النسخة اللي من صوفي متاعو مش أنا
زمردة:باهي آنياا...إنتي باش تبقى في جناحي و نوح ماهوش باش يعرف بالموضوع هذا جملة و بالنسبة لليو أنا نحكي معاه
أنا:إنتي لشنوة قاعدة تخطط ؟
زمردة:متخافش مني..يعني في كل الأحوال منجمش نأذيك خاطر إنتي حامل بحفيدي...خلينا نشوفو شنية باش يعمل سيد نوح كي يعرف أنو مرتو مشات و خلاتو
أنا:شنية لي يخليني ناثق فيك ؟
زمردة:تعرف مع الوقت
أنا:باهي و لوسي ؟
زمردة:خليها معاك...أما رد بالك تخرج من الجناح و لا باش تفضحك
أنا:أما مش هذا لي نحب عليه أنا...نحب نعيش حياة جديدة بعيد على الظغط هذا الكل
زمردة:مش مشكلة...أما لازمك ترتاح في الأول و تتأكد من قرارك هذا...و إذا كان ولدي يحبك بالحق صدقني هذا أنسب وقت باش يثبت حبو ليك
أنا:إنتي زمردة بالحق ؟ متفهمنيش بالغالط أما متعودتش عليك هكا...و منجمتش ناثق فيك زادة ياخي نسيت الكلام لي كنت تقولهولي ؟
زمردة:منسيتش...أنا غلطت و نتوقع إذا حاولت نصلح شوية من اللي عملتو إنتي تنجم تغفرلي مع الوقت
كبست على لوسي من غير حتى كلمة...تبسمت و قربت مني تحكي
زمردة:إيجا نوريك بيتك
خلطت عليها بالوقت...حلتلي الباب و مدت يدها تحكي
زمردة:تفضل
غزرتلها بشك و دخلت مترددة...قربت مني تحكي
زمردة:كي يخرج نوح نجيبلك شوية من حوايجك و إذا تشهيتي حاجة خبريني...من غير ما تتصرف وحدك و لا تطلبها من الخدم...منحبش مادلين تعرف بوجودك هوني
أنا:شنية لي يخليني ناثق فيك ؟
زمردة:ماكش مجبورة تاثق فيا...أما تأكد أنو أنا مانيش سيئة لدرجة إني نأذي مرا حاامل
أنا:بااهي
خذيت نفس و دخلت للغرفة...بعد ما مشات هي قعدت على طرف السرير و كبست على لوسي نحكي
أنا:أنا منجمش ناثق فيها...أما توا معندناش حل آخر أصلا معندناش بلاصة أخرى نمشيو ليها
حطيتها بجنبي و تكيت لتالي...نسترجع في الأحداث لي صارت أمس...متوقعتش أنو هو باش يتصرف معايا بالطريقة هذيكا..مع أنو يعرف أنو كل مشاكلنا بسبب صوفي متاعو..حطيت يديا زوز على كرشي و نزلت على شفايفي نحكي
أنا:أنا مستحيل نتخلى عليك..أنت قطعة مني و الحاجة الوحيدة لي ربحتها من الدنيا..منحبكش تتغشش مني و لا حتى تتخلى عليا أنت زادة..الحق عليه هو و كهو..كي يعرف روحو مينجمش ينساها علااش حتى يعرس بياا
فقت من سرحتي كي دقت الباب و دخلت تحكي
زمردة:الأكل حاضر...إيجا تفطر
أنا:معينيش بش ناكل توا
زمردة:إنتي حامل و لازمك تهتم بالصغرون زادة
أنا:فما عصير ليمون ؟
زمردة:إنتي إيجا تفطر و أنا تو نجيبلك منو
أنا:و أكل لوسي زادة
زمردة:باهي...هاني باش نرجعلك مبعد
هزيت روحي و خرجت وراها..جبدت الكرسي و قعدت من أمس ما كليت شي و توا بالظبط شهيتي تحلت لدرجة إني نسيت كلشي صار معايا و غطست في الأكل لي قدامي..أصلا مانيش باش نسامحو جملة و تو يندم على كلشي عملو معايا زادة..غزرت في لوسي لي قعدت على الكرسي بجنبي و تبسمت كان لازم نخليها تنتقم منو قبل ما نخرج من الجناح متاعو...خاطر يستهل اللي باش يصير فيه الكل.