آفْرُودِيتْ 🦢

الحلقة الخامسة و الثمانون 🦢

🔸️حلقة 85
🔸️إلينا_تحكي:
كبست على ويليام و عديت عينيا على الجناح متاعو مزلت نحس في روحي متوترة و مش مستعدة باش نستقر هوني...دورت راسي شوية كي حسيت بيه ورايا...قرب مني شوية و هز ويليام من حضني يحكي
أركان:طمنت على نوح و بالصدفة لقيت آنيا معاه
أنا:آنيا رجعت ؟ وين كانت طول الفترة لي فاتت ؟
أركان:ظاهر ناوية تحتفظ بمكانها السري في حالة نوح كرر عملتو معاها
أنا:فكرة حلوة
أركان:بالله ؟
تبسمت و هزيتلو براسي إيه...كبس على ويليام و قرب مني شوية يحكي
أركان:إنتي علاش مزلت هوني ؟
عديت عينيا على وجهو من غير حتى كلمة...خاطر مكانتش عندي إجابة ليه...مد يدو شوية و عدا صوابعو على خدي يحكي
أركان:إيجا معايا
كبس على يدي و جبدني معاه...خلطت عليه و أنا ساكتة...دخلت معاه لبيتو و هزيت عينيا في وجهو نحكي
أنا:أركاان
كبس على ويليام و حطو في وسط السرير متاعو و عاود قرب مني...حاوط وجهي بيديه زوز يحكي
أركان:روح أركان
أنا:ماكش مظطر تشاركني غرفتك طول الوقت
أركان:أنا هوني باش نشاركك حياتي الكل فينوسي أنا نحبك تكوني موجودة في كل تفاصيل حياتي بعد توا
تبسمت و حطيت يديا زوز على يديه...كبست عليهم و نزلتهم شوية نحكي
أنا:تقصد باش نبداو حياة جديدة من هوني
أركان:نعرف أنو أنا وجعتك برشا و لي القصر آخر مكان تحب تعيش فيه...أما نحبك تعطيني فرصة أخرى و تاثق فيا و كان تحب نعيشو في بلاصة أخرى
كبست على يديه أكثر و هزيتلو براسي لا...نحكي
أنا:ماكش مظطر تتخلى على قصرك بسببي...يكفي أنك توفي بوعدك ليا و ماكش باش تتخلى عليا مهما كان السبب و باش تتحمل غيرتي عليك لي مزلت منعرفش كيفاش نتحكم فيها لتوا
ضحك و مد يدو شوية...عدا صوابعو على خدي و نزل بيهم شوية لشفايفي يحكي
أركان:باش نتحمل يا روحي...أصلا معنديش حل آخر
أنا:بالله ؟ تنجم تتراجع من توا ملا
جبدت روحي منو و عطيتو بظهري...عنقني من تالي و باسني من رقبتي يحكي
أركان:أنا نضيع من غيرك إنتي يا روحي...معادش نحبك تبعد عليا مهما كان السبب
عديت صوابعي على يديه لي فوق كرشي و تكيت راسي على صدرو نحكي
أنا:و أنا باش نضيع من غيرك...رغم كلشي صار بيناتنا قبل...و رغم إني كنت نشوف إرتباطنا مستحيل أما مكانش عندي إستعداد نعدي حياتي من غيرك
أركان:أنا غلطت وقت خليت علاقتنا تاخو منحى آخر و خليتك تعيش أوجاع إنتي مش قدهاا
أنا:يعني لو ويليام مكانش موجود بيناتنا...كنت باش تاخو نفس القرار هذا ؟
أركان:أنا مكنتش باش نربط روحي بيك جيست خاطر عندي صغير منك إليناا...وجود ويليام من عدمو ميخلقش فرق في قراراتي...أنا نحبك ليا...نحب نعيش معاك حياتي الكل...سواء كان عندنا صغار و لا لا...و بالنسبة لويليام كان أجمل هدية جاتني منك هدية مكنتش نستنى فيها جملة خاصة بعد موت دانيال...و منعرفش شنية كان باش يصير لو بنتي معانا حتى هي
أنا:أنا حاولت نحمي صغاري لآخر لحظة...أما القدر كان أقوى مني و خلاني نخسر قطعة أخرى من روحي
أركان:منحبكش تلوم روحك على وفاة نينا...هذا قدرها و حتى حد فينا ما عندو القدرة باش يبدلو غير هكا...أنا نحب على صغرون آخر منك
أنا:ويليام مزال صغير...أنا نحب نرجع لوظيفتي..غير هكا أنا لتوا منعرفش كيفاش نهتم بويليام وحدي خاصة كي يمرض
نزل بيديه لأجنابي و دورني عندو في لحظة...غزرلي ندرا كيف يحكي
أنا:ماكش وحدك توا و مسؤولية ويليام باش تكون لينا الزوز...أنا باش نكون موجود معاك في كل لحظة بعد توا و مستحيل نخليك تحير بتربيتو وحدك
تبسمت و هزيتلو براسي باهي...نزل عليا شوية و باسني من شفايفي...يحكي
أركان:أنا باش نوصي أولجا تهتم بدبشك و أي شي تحتاجو...الغرفة هاذي باش تكون لينا الزوز...نحب نرقد و نفيق على صورتك و صوتك و ميسالش إذا كان ولدك حاضر معانا مؤقتاا
ضحكت بالوقت و عديت صوابعي على خدو نحكي
أنا:والله ماهوش ولدي وحدي...زيد على هكا أنت مجبور تتحملو خاطر مزال صغير
أركان:نظن لازم نلقى شكون تنجم تهتم بيه و هكا معادش يبعدك عليا طول الوقت
أنا:أنت باش تخلي مربية تعيش معانا في الجناح ؟ يعني تحبني نولي مجرمة بسببك ؟ غير هكا أنا ما ناثق في حتى وحدة غريبة علينا
أركان:هدي روحك عزيزتي
عدا صوابعو على خدي و نزل بيهم لرقبتي...يهدي فيا و كمل يحكي
أركان:مقصدتش لي فهمتو...غير هكا مش لازم منها المربية هاذي جملة...تو نهزوه معانا لأي بلاصة نمشيو ليها
أنا:باش تفركهم عليا توا ؟
أركان:وين باش نخليوه عزيزتي...إذا إنتي تحب ترجع لوظيفتك
أنا:كاثرين...يعني هي الوحيدة لي نجم نخلي معاها ويليام...خاطر حفيدها و ماهيش باش تضرو
أركان:سامحتها ؟
أنا:أنا و هي محكيناش مرة أخرى في الموضوع هذا و مع أنو ما عندها حتى ذنب في اللي صار بالماضي أما مزلت نحس في روحي مش مستعدة باش نتقبلها كأم ليا...خاطرني عشت حياتي الكل من غيرها و من غير ما نعرف دورها في حياتي زادة
عدا صوابعو على خصلات شعري و رجعها لتالي يحكي
أركان:ماكش مجبورة تظغط على روحك...و أنا متأكد أنو كاثرين باش تتفهم موقفك ناحيتها و ماهيش باش تبعد عليك مرة أخرى
تبسمت وحطيت راسي على صدرو...غمضت عينيا مع يديه لي دارو عليا...يمكن كنت بحاجة نسمع آخر جملة منو...خاصة إني لتوا منجمش نخمم في موضوع كاثرين...يمكن هاذي فرصتي توا باش نخمم في مستقبلنا...خاطر ولا مرة توقعت أنو باش تكون عندي فرصة إني نعيش الحياة اللي نحب عليه مع الراجل الوحيد لي حبيتو في الدنيا هاذي.