آفْرُودِيتْ 🦢

الحلقة الخامسة و الأربعون🧚‍♀️

🔸️حلقة 45
🔸️آنيا_تحكي:
كبست على الأوراق في يدي و عديت عينيا عليه مع ضو الفيوز لي مد يدو و شعلو..غزرت للوشم لي تحت كتفو شوية..غير غزرتو ليا لي حسيتها طولت..هز روحو بالسيف و تقعد شوية...يحكي
نوح:آنيااا
دخلت بعضي أكثر...خاصة كي لقيتو غاطس في النوم...وقف و قرب مني شوية يحكي
نوح:آنيا...شنية صاار ؟ شفما ياخي ؟
أنا:م..منجمتش نحلهم وحدي..إذا منجحتش ينتقل الكل للمستوى الثاني و هكا أنا نقرا مع مجموعة جديدة منعرفهاش جملة
غزرلي مستغرب...و بعد عليا شوية...شعل ضو البيت و عاود قرب مني مرة أخرى..ضيق عينيه يحكي
نوح:ياخي كنت تبكي ؟
أنا:لاا
مد يدو شوية و بعدلي خصلات شعري لتالي يحكي
نوح:آنيا ياخي ناوية تهبلني..تو الموضوع هذا يستهل تبكي عليه ؟
أنا:أنا نحب نكون مع نفس المجموعة..والله وحلت في المقطع هذا و كهو
نوح:والله إنتي لي رفضت تخليني نعاونك
نزلت عينيا من وجهو و كبست على الأوراق لي في يدي أكثر...تنهد بالقاوي و فكهملي يحكي
نوح:يززي كهو...تو نحلوه مع بعضنا
أنا:باهي...خليني نجيب البيسي متاعي ملا
نوح:ميسالش..تنجم تستعمل متاعي
هزيتلو براسي باهي و خلطت عليه..قعدت بجنبو على الفوتاي...حط الأوراق على الطاولة و تفقد المقاطع لي ترجمتهم قبل..تبسم و غزرلي يحكي
نوح:هاك تتعلم بسرعة
أنا:و مع هكا منجمتش نكمل الباقي..خاطر فما كلمات ملقيتش ترجمة متاعهم
نوح:باهي...هاني باش نحاول معاك
عديت عينيا على وجهو و نزلت بيهم لصدرو..كبست على يديا زوز نحكي
أنا:باش تبقى هكا ؟
غزرت لصدرو و أنا نحكي..ضيق عينيه و هز راسو شوية يحكي
نوح:وين المشكلة ؟
أنا:حتى شي...يمكن تاخو برد
نوح:الجناح الكل سخون
أنا:صحيح
كبست على يديا أكثر و سكت..تكى لتالي شوية يحكي
نوح:وريني المقطع لي وحلت فيه
هزيت الأوراق الأخيرة و حطيتهم في يدو..هز حاجبو شوية يحكي
نوح:هذوما الكل ؟
قربت منو أكثر و مديت يدي شوية..حطيتها على الورقة نحكي
أنا:اللي لونتهم بالأصفر..ملقيتش الترجمة متاعهم
نوح:باهي عزيزتي..يكفي أنك تنطق الجمل بشكل صحيح...خاطرني ما فهمت حتى شي منها و أنا تو نحاول نفهمك بعد ما تظهر ترجمتها
أنا:كي أنت متفهمش الروسية..شبيك مخليتنيش نمشي عند ويليام
هز عينيه في وجهي و قحرلي من غير حتى كلمة دورت وجهي و هزيت البيسي في يدي...حليت المترجم و قريت أول الكلمات..ضيقت عينيا كي لقيت نفس المشكلة...غزرلي يحكي
نوح:فما بعض الحروف تتكتب على شكل رموز لي إنتي لتوا منجمتش تحفظهم
أنا:شنوة الحل توا ؟
نوح:هاني باش نكتبلك الكلمات بالشكل الصحيح يكفي أنك تستمر في الإملاء
أنا:تقصد باش تكتبلي النص هذا الكل ؟
نوح:باش نكتبو بطريقة إنتي تنجم تقراها و هكا متلقاش مشكلة في العرض
تبسمت و هزيتلو براسي باهي...رغم حسيتو تاع إلا أنو كمل معايا الساعتين الكل و كتبلي كل المقطع لي في الصفحتين...حط الأوراق في يدي يحكي
نوح:تنجم تقراهم هكا
أنا:ممم نجم...أما ميسالش نقراهم توا ؟ نحبك تصححلي النطق زادة...عالأقل ناخو نقطة مليحة
نوح:نسمع فيك..هيا أبداا
كبست على الأوراق...و خذيت نفس قبل ما نقرا وين رصاتلي نعاود النص لخامس مرة باش نجمت ننطق كل الكلمات بشكل صحيح تقريبا...تبسم يحكي
نوح:توا وليت حااضرة
ضحكت و قربت منو بالوقت..عنقتو و بستو من خدو نحكي
أنا:أنت أنقذذذتني كي العادة
نزلت على شفايفي شوية كي حسيت بيدو تحطت على جنبي...غير هكا حسيتو تكبس من الفازة..خذيت نفس و جبدت روحي منو شوية نحكي
أنا:منقصدش لي صاار
هزلي براسو باهي و عدا يدو على وجهو...هزيت الأوراق في يدي بالزربة...نرتب فيهم باش نرجع لبيتي...ضيق عينيه يحكي
نوح:لحظة آنيا
أنا:شنوة ؟
نوح:ياخي كنت باش تعمل معاه نفس الشي ؟
أنا:شكوون ؟
نوح:نقصد في ويليام...كان عاونك هو..كنت باش تشكرو بالطريقة هاذي ؟
أنا:منعرفش...خاطر ويليام ميحبش شكون يقرب منو
نوح:معناها إنتي معندكش مشكلة تشكر أي حد بالطريقة هاذي
أنا:نووح...شبيك تحكي معايا هكا ؟
نوح:آنيااا...لآخر مرة نقلك...متنجمش تصاحب أي حد يقرب منك...كيما متنجمش تشكر الكل بالطريقة هاذي زاادة
أنا:بااهي...قتلك منقصدش لي صاار و مانيش باش نقرب منك مرة أخرى...إذا كاان هذا يقلقك
نوح:مقلتش هكاا و مانيش نحكي على روحي
أنا:أنا ما قصدت حتى شي وااضح و سامحني خاطر قلقتك معايا في الوقت هذا
كبست على الأوراق في يدي و هزيت روحي وقفت وين وقف معايا بالوقت..عطيتو بظهري باش نمشي قرب مني بالزربة و جبدني من يدي..دورني عندو في لحظة...جا باش يحكي..أما سكت كي شاف دموعي لي منعرفش أصلا كيفاش غلبوني و هبطو مديت يدي لأخرى و عديتها على خدي من غير حتى كلمة كبس عليا أكثر يحكي
نوح:آنيااا
أنا:ن..نحب نمشي لبيتي
نوح:ياخي باش تفسر الأمور ديما كيما تحب إنتي
أنا:فهمت اللي لازم نفهمو
تبسم و مد يدو شوية...فكلي الأوراق من يدي و حطهم على الطاولة..فرد وقت كبس عليا أكثر و جبدني عندو عنقني بالوقت و حط يدو على ظهري وين حسيت دقات قلبي قوات أكثر...و معرفتش شنوة نعمل بالظبط خاصة أني لتوا مفهمتش علاش عصب عليا بالطريقة هذيكا و فاش قام يعنق فيا توا كل مرة نقرب منو..نلقى روحي قدام أكثر من إحتمال و مشاعري تدخل بعضها لدرجة..منعرفش نفرق بين الصحيح و الغالط و مرة أخرى فقت من أحلامي اللي كانت تجبد فيا على صوت تليفونو اللي كل مرة يرجعني للواقع و يذكرني بحقيقتي اللي مستحيل نجم نهرب منها...خذيت نفس طويل و جبدت روحي منو شوية...من غير ما نغزر لوجهو مرة أخرى...كبس على يدي أكثر لي خلاني نهز راسي شوية...وين جات عيني في عينو...جبدت يدي منو نحكي
أنا:م..مانيش باش نعطلك أكثر من هكا
مد يدو باش يمسني...وخرت خطوة لتالي...نحكي
أنا:فما شكون تستنى فيك
بعدت عليه و قربت من الطاولة...نزلت شوية نلم في أوراقي بالزربة...وين جبدني على غفلة و رجعني عندو...حط يدو على خدي و حط شفايفو على شفايفي لي خلاني نغمض عينيا بالوقت...غير صوت تليفونو لي وليت نسمع فيه بعيد قدام صوت دقات قلبي لي كنت نسمع فيها و حسيتها باش تفضحني معاه...حطيت يدي على صدرو و نزلت بيها لكرشو مع كبسة يدو على خدي غير أنفاسو لي ضربت في وجهي أول ما جبد روحو عديت عينيا على وجهو من غير حتى كلمة...عدا صوابعو على شفايفي لي مزالو محلولين..فقت من سرحتي على صوت تليفونو مرة أخرى...جبدت روحي منو بالوقت و قحرتلو...وخرت لتالي و هزيت أوراقي في يدي...منعرفش على روحي كيفاش قربت من الباب خلط عليا بالوقت و حط يدو عليها قبل ما نحلها كبست على أوراقي أكثر و جبدت يدي من البواني نحكي
أنا:ن..نحب نمشي لبيتي توا
غمضت عينيا كي قرب مني أكثر و عدم المسافة لي بيناتنا في لحظة...نزل عليا شوية و حط شفايفو عند وذني يحكي
نوح:ماكش باش تمشي...مش قبل ما نحكيو مع بعضنا
أنا:مفما حتى شي نحكيو فيه
نوح:متأكدة
هزيتلو براسي إيه و مديت يدي مرة أخرى للبواني وين حط يدو فوق يدي و وقفني..أنفاسو لي حسيتها في رقبتي وترتني أكثر و خلاتني عاجزة قدامو لدرجة معرفتش كيفاش نتصرف...خذيت نفس و جبدت يدي منو...تلفت عندو شوية..وين لقيت روحي محصورة بين يديه...نزلت عينيا من وجهو نحكي
أنا:لازمني نمشي لبيتي توا و أنت إهتم بأمورك
نوح:مفما حتى شي أهم منك توا
أنا:نظن أنك مزلت دايخ خاطرني فيقتك من النوم
نوح:صحيح...مزلت داخل بعضي...أما من حاجة أخرى
أنا:يمكن من تليفونك لي مزال ينوقز
نوح:شبيني مانيش نسمع في حتى شي من غير صوتك كهو
أنا:منعرفش...بلكشي وليت تعاني من النقص في السمع خلي ماري تفحصك
نوح:باهي...باش ناخو بنصيحتك
أنا:باهي...أبعد عليا توا باش نجم نمشي
ضيقت عينيا كي نزل عليا أكثر...قحرتلو نحكي
أنا:متحاولش تبوسني مرة أخرى 
نوح:إذا باش تواصل تكسر الحروف بالطريقة هاذي في كل مرة تحكي معايا...لازمك تعذرني وقتها
أنا:شقصدك ؟
نوح:أحسن شي أنك متفهمش قصدي
أنا:ملا شبيك تحكي معايا ؟ 
لصقت في الباب أكثر...مع أنفاسو لي قوات في وجهي...غزرلي ندرا كيف يحكي
نوح:أنا عمري ما تقلقت من فكرة وجودك معايا و مقصدتش لي فهمتو إنتي...يعني تصرفاتك العفوية معايا منحبكش تعملها مع غيري...سواء ويليام و لا ليو و لا أي حد آخر
أنا:وين المشكلة ؟ 
نوح:المشكلة هي إني منحبش نشوفك قريبة من شخص آخر
غزرتلو مستغربة و عوجت فمي شوية...نحكي
أنا:تنجم توجه الكلام هذا لصحبتك يكون أحسن ياخي شمدخلك فيا أناا ؟
غمضت عينيا بالقاوي و عاودت حليتهم مع صوت تليفونو لي نوقز مرة أخرى...قحرتلو نحكي
أنا:براا هز عليهااا و أبععد عليااا 
نوح:شكون قلك أنو هي لي تطلب فيا توا ؟
أنا:مكنتش نعرف أنو فما غيرها زادة
نوح:مكنتش نعرف أنو الموضوع يقلقك
أنا:أمورك متهمنيش
نوح:متأكدة...هاك من بكري مش قد بعضك
أنا:خاطرني محصورة هوني بسببك
نوح:توقعت أنو فما سبب آخر
أنا:سبب شنوة ؟
نوح:متوقعتش أنك تغير من لورا ؟
أنا:أناا ؟ نغير منها ؟
نوح:عندك تفسير آخر ؟
أنا:علاش حتى نغير منها ؟
نوح:منعرفش...جاوبني إنتي
هزيت عينيا في وجهو من غير حتى كلمة...للحظة حسيت روحي دخلت بعضي أكثر...خاصة مع صوابعو لي تعدات على خصلات شعري و نزل بيهم لشفايفي سكتني قبل ما نقول حرف واحد و عدا عينيه على تفاصيل وجهي يحكي
نوح:اللي تحس فيه إنتي توا...قاعد يصير معايا أنا زادة 
مديت يدي شوية و كبست على أطراف مريولي محاولة مني باش نهدي دقات قلبي لي حسيتها باش تفضحني قدامو...فرد وقت لقيت روحي نعاود في آخر جملة قالها...يمكن أنا فهمتو بالغالط...أنفاسو قوات في وجهي أول ما نزل على شفايفي مرة أخرى لي دوب حسيت بلمسة شفايفو...وقفتو نحكي
أنا:نووح
عدا صوابعو على خدي و هز عينيه في وجهي من غير ما يبعد عليا...نزلت على شفايفي نحكي
أنا:م..متقربش مني أكثر من هكا...أنت شخص مرتبط تواا
غزرلي ندرا كيف...جبدت روحي منو أكثر و كبست على أوراقي فرد وقت...منحبش نضيع معاه وسط الحلمة هاذي و ننسى الواقع لي يفرض عكس اللحظات اللي جمعتنا توا...قرب مني باش يحكي خذيت نفس و قصيت عليه نحكي
أنا:خليني نمشي لبيتي توا
وخر خطوة لتالي و هزلي براسو باهي...عطيتو بظهري و حليت الباب...منعرفش كيفاش وصلت لبيتي...حطيت الأوراق من يدي و غزرت لروحي في المرايا...للحظة حسيت كل الأفكار تدور في مخي بسرعة كبيرة...خاصة مع كلامو الأخير...نزلت راسي شوية و غزرت في لوسي عوجت راسها شوية و هي تغزرلي...نزلت على شفايفي شوية لي مزلت مش حاسة بيها و ضيقت عينيا نحكي
أنا:ياخي إنتي زادة مغرومة بيه ؟
نفخت بالقاوي و غزرت لروحي مرة أخرى..فرد وقت حطيت يدي على قلبي..نهدي في دقات قلبي لي مزالت تنبض بقوة..رجعت خطوة لتالي و قعدت على طرف السرير...نحكي
أنا:أنسى لي صاار الليلة زادة...إنتي مجبورة تنسى
تسطحت لتالي و غزرت لسقف..مرة أخرى لقيت روحي ضايعة في أحلامي..لدرجة منعرفش كيفاش هزني النوم و غفيت.