آفْرُودِيتْ 🦢

الحلقة السابعة و العشرون🧚‍♀️

🔸️حلقة 27
🔸️إلينا_تحكي:
حطيت تصويرة بابا من يدي و تلفت على صوت تليفوني..غزرت لرقمو و تنهدت بالقاوي...بعد آخر مرة ريتو فيها و حكيت مع ويليام و أنا حاسة روحي في حلقة مفرغة..خلاتني عاجزة لدرجة منجمتش حتى نخرج من الدار و لا نقابل حد..خاطر بعد ما خممت في كلامو بالقدا لقيت عندو حق...يمكن لو وصلت ليها نضيف جرح جديد لجروحنا..أما في نفس الوقت نحس في قلبي مزال ينزف..مزال عندي أمل بعيد في إني نشوفها و نحفظ تفاصيلها...عالأقل مرة وحدة كهو خذيت نفس و هزيت عليه...نسمع فيه يحكي
أركان:أخرج عندي توا
ضيقت عينيا مستغربة و قمت من بلاصتي...قربت ناحية الشباك و هزيت الريدو شوية..نغزرلو و هو متكي على كرهبتو..مكنتش نعرف باش يرجع ليلة خاصة بعد ما جاوبت على ميساجات متاعو و طمنتو عليا...علقت عليه من غير حتى كلمة و خرجت من بيتي...غزرتلو نحكي
أنا:أركاان برااا...تو شوية نرجع
ويليام:ألبس حاجة تدفيك
أنا:مانيش باش نطول
هزلي براسو باهي...خذيت نفس و خرجت عندو قربت منو بخطوات سريعة و عنقتو قبل ما نسمع حتى كلمة منو...كبسة يديه على ظهري و ريحتو خلاوني نكبش فيه أكثر..باسني من راسي و جبدني من عندو شوية حاوط وجهي بيديه زوز يحكي
أركان:شبي فينوسي ؟
أنا:أنا لبااس...جيست تعبت شوية و كهو
أركان:معناها باش تخبي عليا حاجة أخرى ؟
سكت و جبدت روحي منو شوية..تنهد بالقاوي يحكي
أركان:هيا إيجا باش نمشيو
أنا:شوف حالتي كيفاش..منظنش إني نجم نرافقك
أركان:أنا حاجتي بيك بكل حالاتك...باهيشي هكا
قربت منو و عنقتو مرة أخرى...منعرفش علاش حسيت روحي بحاجتو...أكثر من أي وقت فات في اليومين هذوما...خذيت نفس نحكي
أنا:يا ريتك بقيت هوني
عدا يدو على شعري و نزل راسو شوية...يحكي
أركان:والله كان عرفت هذا باش يصير في غيابي راني مخليتكش ورايا...شقولك نمشيو لبقعتنا توا ؟
هزيتلو براسي إيه...جبد روحو مني شوية..نحى الفاست متاعو...حطها على أكتافي و حلي الباب ركبت...خلط عليا و خدم الكرهبة...تكيت لتالي و سرحت في الثنية و بالأخص في كلام ويليام..لي واجهت بيه روحي..في كل ثانية عديتها وحدي..فقت من سرحتي كي حط يدو على يدي و جبدني عندو شوية...حطيت راسي على صدرو نحكي
أنا:أنت رجعت ليلة بسببي ؟
أركان:علاش خليتلي حل آخر ؟ الفضل يرجع لنوح لي طمني عليك..مدامك مرديتش عليا
أنا:مكنتش نجم نحكي..هذا هو السبب
أركان:شنية صار إلينا ؟
أنا:كانت فما مشكلة مع ويليام
غرس يدو في شعري من غير ما يسألني مرة أخرى شد الفران بعد ما وصلنا...جبدت روحي منو و نزلت المنظر من هوني...يخليني نرتاح شوية...خاصة مع النسمة الباردة...كبست على الفاست متاعو و دورت راسي شوية غزرتلو...وقف قدامي يحكي
أركان:مانيش باش نسأل على مشكلتك مع خوك...أما تأكد إني باش نكون معاك ديما و ماكش باش تلجأ لحتى حد غيري زادة
أنا:عديت سنين بأسئلة منعرفش جوابها...أسئلة تتعلق بأمي...من وقت كنت صغيرة..كنت نسأل روحي زعمة كيفاش هو شكلها في الحقيقة و كيفاش تعامل الأم صغارها...زعمة كانت باش تحضرلنا وجباتنا أنا و ويليام ؟ توصلنا للمدرسة ؟ زعمة كانت باش تسمع على معاناتي مع غالي و تخفف عليا و لا تحميني منو..أنا ما لقيت جواب لحتى سؤال منهم
مديت يدي شوية و مسحت دمعتي لي هبطت على خدي و خذيت نفس باش نتغلب على الغصة لي تمكنت مني و كملت نحكي
أنا:أنا مرة قتلك أنو أمي توفات بعد ولادتنا...هذا مش صحيح...خاطر بابا اللي حبنا نصدقو الكلام هذا و نتقبلو حقيقة أنها ماتت و ماهيش باش ترجع...أما الحقيقة هي تخلات علينا و مشات...أكا علاش بابا رجع بينا لمسقط رأسو...خاطر السنين لي حاول يتأقلم فيها هوني من غيرها و مع مسؤوليتنا زادة خلاتو ضعيف برشا...و مع أنو كان لازمني نكرها خاطرها السبب المباشر في كلشي تعديت بيه في الماضي...خاطر لولا تخليها علينا...مكنتش عشت الكابوس الأسود مع غالي...أما اول ما رجعت لأثينا كان عندي هدف إني نلوج عليها و نلقاها...خاطر هي الوحيدة اللي تنجم تجاوب على أسئلتي...أما في كل مرة نقول وصلت نرجع لتالي بخطوات و قبل يومين من توا...سيرتها كانت هي المشكلة بيني و بين ويليام
قرب مني و مدي يدو شوية...عدا صوابعو على خدي و غزرلي ندرا كيف يحكي
أركان:إنتي أطلب كهو و صدقني باش نخليك تلقاها في 24 ساعة و تطفي كل جمرة حزن شاعلة في قلبك لتوا
أنا:كنت باش نوافق على طلبك قبل يومين من توا أما ويليام عندو حق...يمكن هي بدات حياة جديدة إحنا مستحيل نكونو فيها...كيما يمكن باش نضيف جروح جديدة لحياتنا..ماهوش باش يسامحني عليها خاطر هو إقتنع أنها ماتت من اللحظة لي بعدتنا على حضنها و تخلات علينا و أنا لازمني نعمل نفس الشي لازمني ننسى إحتمالية وجودها و رجوعها لحياتنا خاطر أي رفض منها ناحيتنا..ماهوش باش يبرا جملة
أركان:يا ريت كنت نجم نخفف عليك..أما جروح هكا ماهيش باش تبرا بمرور الوقت و لا حتى تنجم تتخلص منها...للأسف إنتي مظطرة تاخو قرار من أعماقك..بين أنك تحقق حلمك و تلقى أمك من جديد و لا تحط مشاعرك هذوما في أعماقك و معادش تستحضرهم من جديد
أنا:مانيش باش نعمل حاجة ضد رغبة ويليام...خاطر ماهيش أهم منو في حياتي..في الأخير عندو حق إحنا عشنا أسوء أيام حياتنا وحدنا و وجودها معانا ماهو باش يغير حتى شي و لا حتى باش يداوينا من جروح الماضي
أركان:إيجا عندي تراه
جبدني من يدي و عنقني مرة أخرى..غمضت عينيا و غطست في حضنو..من غير ما نحاول نخمم في الموضوع هذا أكثر من هكا...كبس عليا أكثر و تكى على الكرهبة...فرد وقت يعدي في يدو على شعري...كأنو قاعد يهدي فيا...وين لقيت روحي نخمم في كلامو..كأنو حتى هو يملك نفس الجرح بخصوص أمو...مديت يدي شوية و حطيتها على صدرو نحكي
أنا:أنت تتذكر ملامح أمك ؟
أركان:هذا اللي نعمل عليه طول الوقت...صوتها الشي الوحيد لي مزال في ذاكرتي لتوا..عالأغلب كنت مشاغب كبير...أكا علاش كانت تنادي عليا في كل لحظة نغيب فيها على عينها
تبمست و كبست على صدرو أكثر...نحكي
أنا:تتذكر ريحتها ؟
أركان:كانت تحط من عطر الياسمين...حسب ما نتذكر ملامحها كانت هادية برشااا...و أكثر شي كان يميزها لون شعرها الأسود
هزيت راسي شوية و عديت عينيا على ملامح وجهو نحكي
أنا:كيفك بالظبط و دانييل زادة...تتوقع أنو فما إحتمال أنك تشوفها مرة أخرى
تبسم و عدا صوابعو على خدي بالوقت...يحكي
أركان:لاا...خاطر أمي توفات بالحق و ماهيش باش ترجع مرة أخرى
نزلت على شفايفي شوية و حطيت راسي على صدرو مرة أخرى...نحكي
أنا:مقصدتش إني نقلقك بأسئلتي
أركان:نتوقع أنو حياتنا ولات مشتركة توا...أكا علاش إحنا باش نلجأو لبعضنا ديما
أنا:أنت خممت في مصير علاقتنا ؟
أركان:يكفي أنك تكون ليا و كهو...غير هكا مانيش نخمم في مصير علاقتنا...خاطرك باش تكمل بقية حياتك بجنبي
أنا:كأنك تهدد فيا سيد أركان ؟
أركان:بالله ؟ توقعت أنك تحب نفس الشي...ساعة خبرني من توا...بلكشي نلقى شكون تقبل بياا
هزيت راسي شوية و قحرتلو...خاطر يعرف بالقدا أنو موضوع النسا...هو آخر مشكلة بالنسبة ليه و ينجم يحلها في ثانية وحدة
تبسم و نزل عليا شوية...دوب باسني من شفايفي يحكي
أركان:متغزرليش هكاا فينوسي
حاولت نجبد روحي منو...كبس عليا أكثر...و عدا عينيه على وجهي يحكي
أركان:أنا نستنى في جواب منك...مش أنك تاخو موقف و تتخلى عليا
أنا:والله كان أنت حاجتك بيا بالحق...معادش نحبك تحكي على حتى وحدة أخرى
أركان:لحظة تراه...شنية نفهم من كلامك هذا ؟
أنا:شنية ؟
نزلت عينيا من وجهو...خاطرني حسيت روحي باش نضيع في غزرتو أكثر...مد يدو شوية...كبس على يدي و رجعني عندو يحكي
أركان:أغزرلي هوني تراه
أنا:خلينا نمشيو توا
أركان:باش نمشيو أما مش قبل ما تفهمني اللي قصدتو من كلامك
أنا:ما قصدت حتى شي...خاطر مشاعري ناحيتك ولات واضحة و قاعدة تظهر في كل مرة تبدا قريب مني على خاطر حتى حد ما حاول يسندني كيما عملت أنت معايا من غير خوياا...أما فرد وقت منحبش نتعلق بيك أكثر خاطرني نخاف نحل عينيا على نهار أنت ماكش موجود فيه
أركان:معناها مزلت خايفة مني
هزيتلو براسي لا و خذيت نفس طويل...نحكي
أنا:لاا...مانيش خايفة منك...أما منجمش نأمن في الماضي متاعي أركان
أركان:نظن حكينا في الموضوع هذاا...غير هكا الماضي ماهوش باش يتحكم في علاقتنا مع بعض
غزرتلو من غير حتى كلمة...مد يدو لأخرى و حطها على آخر ظهري تحت الفاست و جبدني عندو أكثر يحكي
أركان:نظن كلامي واضح...اللي باش نعيشوه بعد توا خاص بينا إحنا و كهو
أنا:اللي باش نعيشوه مع بعضنا يبقى ناقص ديما و أنت تعرف هذا بالقدا
أركان:أنا مستعد نعطيك العالم الكل إليناا...يكفي أنك تكون معاايا و كهو و حتى شي ماهو باش يكون ناقص بوجودك
أنا:أنت متنجمش تكون معايا من غير شروطك الخاصة
أركان:موضوع الصغار منجمش نحكي فيه توا...مش قبل ما ناخو حق دانييل و لا عالأقل بعد ما تخمد النار لي داخلي
أنا:و أنا منحبش على صغار زادة...منظنش إني مستعدة باش نكون أم تواا و نحمي صغيري في حين أني دوب قاعدة نحمي في روحي
أركان:الموضوع مجرد وقت و كهو...نوعدك...غير هكا باش يكون عندي صغير منك و يحمل نفس لون عينيك كيما مستحيل نخلي شكون يضرك و لا يضرو و لا حتى يحرمني منك
أنا:أنت قاعد تخطط لمستقبل بعيد
أركان:أما باش يكون موجود
أنا:و مع هكا أنت مستحيل ترتبط بيا بشكل رسمي خاطر فما إحتمال أنك تاخو وحدة من المستوى متاعك في الأخير
غزرلي مستغرب و قرب مني شوية...حاوط وجهي بيديه زوز يحكي
أركان:أغزرلي هوني...أنا عمري ما خممت في المستويات لي تحكي عليها...كيما مستحيل تكون مرا أخرى في حياتي من غيرك إنتي...هذا وعدي ليك
أنا:تقصد أنك باش تكون ليا وحدي ؟
أركان:لآخر نهار في عمري
أنا:مهما كان اللي باش يصير بيناتنا ؟
أركان:معادش نحبك تخاف مني و لا من علاقتنا زادة  تذكر إني باش نكون معاك ديما...تذكر أنو ماكش وحدك أنا وراك و باش نكون معاك في كل خطوة بعد توا...و مهما كانت الحاجات السلبية لي إنتي تشوفها فيا صدقني باش تتبدل على خاطرك إنتي و كهو
مديت يدي شوية و حطيتها على خدو...نتحسس في لحيتو و تبسمت نحكي
أنا:فما إحتمال أنو علاقتنا تكون متكاملة ؟ نقصد أنو كيما أنت واقف بجنبي توا و تحمي فيا...باش تخليني نكون في حياتك بنفس الطريقة..يعني باش تشاركني
كلشي يخصك...باش تلجأ لعندي في كل مرة تحس فيها أنك بحاجتي
أركان:و هذا اللي باش يصير ديما فينوسي
تبسمت و كبست على خدو أكثر...نزل عليا شوية نزلت بصوابعي لشفايفو...مكنتش نتوقع أني نحس على غيابو لهدرجة...كأنو بالرسمي مشاعري تمردت عليا و ولات خاصة بيه وحدو...عدا صوابعو على خدي..دوب رجعلي خصلات شعري لتالي و نزل على شفايفي..قربت منو أكثر و غطست معاه...أصلا وجودو معايا خفف عليا برشا حاجات...جبدت روحي منو شوية و عنقتو بالوقت خذيت نفس من ريحتو مرة أخرى...كبست عليه و استقريت في حضنو من غير ما نخمم في حتى شي آخر...يكفيني لي تعديت بيه لتوا.
#آفروديت🧚‍♀️