آفْرُودِيتْ 🦢

الحلقة الرابعة و الخمسون 🧚‍♀️

🔸️حلقة 54
🔸️إلينا_تحكي:
جبدت روحي منو شوية...و قعدت على طرف السرير لبست مريولو بعد ما تأكدت أنو غاطس في النوم و خرجت للبالكون...كنت بحاجة إني ناخو نفس و نفكر أكثر...خاصة إني معادش نجم نرقد بعد الأحداث اللي تعدات على راسي الكل...كيما منجمتش نتعدا كلام إسكندر بخصوص التحقيق لي تحل من جديد بعد السنين هذوما الكل...معادش نحب نخلي ويليام يعيش نفس الشي مرة أخرى...أصلا خذينا برشا وقت باش نتعداو الأزمة النفسية و موت بابا...معنديش إستعداد نعيش نفس الشي مرة أخرى...كيما معنديش إستعداد إني نخسرو...بعد ما سلمت في قلبي و روحي ليه..أركان كان و باش يبقى الشخص الوحيد لي قلب كل الموازين في حياتي و خلاني نعشق روحي أكثر و مع هكا منجمش ننكر خوفي منو و من ردة فعلو لي تخليني نتردد في كل مرة نحب نحكي معاه في كلشي...ضيقت عينيا مستغربة كي سمعت صوتو...رجعت لتالي و قربت منو بالوقت...كان يهتري بطريقة غريبة..لدرجة أنو صاح بقوة و قعد فرد وقت طلعت على السرير بجنبو و عديت عينيا على وجهو نحكي
أنا:أركاان...لباس ماهو ؟
مد يدو شوية...مسح على وجهو و تلفت عندي يحكي
أركان:وين كنت ؟
أنا:في البالكون
قربت منو أكثر و مديت يدي مترددة حطيتها على جبينو نحكي
أنا:أنت لباس ؟
كبس على يدي...نزلها و جبدني عندو فرد وقت عنقني و تسطح لتالي يحكي
أركان:لبااس يا روحي
مديت يدي شوية...حطيتها على خدو...نعدي في صوابعي عليه و نحكي فرد وقت
أنا:أنت شفت كابوس ؟
أركان:مش مهم
أنا:يخص دانييل ؟
أركان:لااا...الموضوع بعيد على دانييل
أنا:فما حكاية أخرى ؟
أركان:شقولك نحكيو في الموضوع مبعد
أنا:حرارتك مرتفعة
أركان:متخافش عليا
عديت عينيا على تفاصيل وجهو و نزلت بصوابعي لشفايفو نحكي
أنا:ياخي ديما تعاني منها الكوابيس هاذي ؟
أركان:مممم و نقصت شوية في الشهور الأخيرة
أنا:أكا علاش تحب ترقد وحدك ؟
أركان:هاك إنتي وليت لاصقة فيا و عودتني بريحتك ساعة كيفاش تقوم و تخليني وحدي ؟
أنا:كنت بحاجة نشم شوية هوا
أركان:فاش كنت تفكر ؟
انا:في كلشي...الماضي و علاقتنا زادة
مد يدو من آخر ظهري و غرسها في شعري من تالي يحكي
أركان:نحبك تشاركني بكلشي يدور في مخك
أنا:كنت نخمم في ردة فعلك معايا...بعد ما نحكي كلشي عندي بخصوص الماضي
أركان:اللي يخص المحقق ؟
أنا:مفما حتى ماضي عاطفي بيني و بينو أركان...غير الموضوع لي يخص أمي...إسكندر طلب مني خدمة خاصة و كنت مجبورة نفذها..خاطر كان يعرف بموضوع غالي و كان ينجم يورطني من جديد خاصة أنو فما شكون حرك القضية مرة أخرى و تحل تحقيق آخر بخصوص الجريمة في تونس و مش بعيد نولي مطلوبة من جديد
أركان:مدامني عايش مفما حتى حد ينجم يضرك و لا يثبت عليك حاجة
أنا:أنا خايفة منك أنت أركان...خاطرني نجم نواجه الدنيا الكل و أنت معايا...أما مانيش باش نجم نواجهك أنت...خاطرني معاك خسرت قلبي و روحي و كلشي عندي سلطة عليه
أركان:شنية طلب منك ؟
عديت عينيا على تفاصيل وجهو و خذيت نفس طويل نحكي
أنا:طلب مني نكون جاسوسة عندك
غزرلي ندرا كيف...الصدمة لي ظهرت على ملامح وجهو كانت أقوى من اللي توقعت...حتى إني بردت و أنا في وسط حضنو و بين يديه...منعرفش كيفاش خبرتو بكلشي عندي من غير تردد و من غير ما نخمم في وضعي و وضع دانييل...أما كنت بحاجة إني نرتاح من الحمل هذا و نبدا ثنية جديدة مهما كانت النتائج متاعها...كبست على خدو نحكي
أنا:وافقت على عرضك ليا بطلب من إسكندر...وقتها كلشي كنت نخمم فيه هو إني نحمي روحي و خويا من الماضي متاعي و من غضب إسكندر عليا...أما هذا الكل تغير في اللحظة لي عشقتك فيها أركان و في اللحظة لي قررت فيها إني نسلم في كلشي باش نكون معاك نعرف روحي غلطت و دخلت لقصرك بهدف إني نضرك أما ما عملت حتى شي من هذا الكل و ما خرجت حتى كلمة سمعتها و لا أي شي ريتو هوني...نعرف إني كذبت عليك و خبيت عليك الموضوع هذا طول الشهور لي فاتت أما مخنتكش و مكنتش باش نخونك مهما كان الثمن
نزلت على شفايفي شوية...نمنع في رعشتهم لي قوات مع دموعي لي هبطت و غرقت في وسط المخدة...وين كان هو يغزرلي من غير حتى ردة فعل منو...كأنو مزال مستوعبش الكلام لي سمعو مني كبست على خدو مع دقات قلبي لي قوات أكثر من غزرتو...قربت منو أكثر غمضت عينيا مع أنفاسو لي ضربت في وجهي و عاودت حليتهم نحكي
أنا:أنت حبيت تسمع مني و أنا مكانتش عندي الجرأة الكافية باش نخبرك...خاطرني خفت من ردة فعلك أما توا وليت خايفة من خساارتك
نزلت بيدي لرقبتو شوية و قربت باش نبوسو...جبد روحو مني في لحظة و قعد على طرف السرير...كبس عليه بيديه زوز...من غير حتى كلمة و لا ردة فعل منو كأنو قاعد يغزر للفراغ و كهو...أصلا هو يعتمد الصمت فترة قبل أي حاجة يعملها...تقعدت في بلاصتي و عديت عينيا على ظهرو...في اللحظة هاذي أنا بحاجة قوة...قوة كافية باش تخليني نواجهو و نواجه اللي باش يصير...نعرف لي هو ماهوش باش يستقبل الموضوع بالساهل...كيما ماهوش باش يسامحني و لا يغفرلي سمعو مني...أما عالأقل يكون سمع مني و مش من غيري...يمكن هكا ينجم يسامحني مع الوقت  و يحميني زادة...الأفكار هاذي لي كنت نقنع في روحي بيها و أنا نغزرلو كيفاش جامد في بقعتو من غير حتى حركة..لي خلاني عاجزة باش نقرب منو و لا حتى نكمل الكلام لي عندي زادة...إحساس الخوف زاد عندي لدرجة معرفتش شنوة لازمني نعمل بعد الخطوة هاذي خاصة بعد حلقة الصمت لي لقيت روحي محصورة فيها معاه.
خذيت نفس طويل و هزيت راسي شوية كي شفتو قام من بلاصتو...لبس سروالو بالزربة و خرج من البيت منعرفش على روحي كيفاش خلطت عليه وقفت في وجهو نحكي
أنا:أركااان...كمل أسمعني أمااانك
نزل راسو شوية و غزرلي...غزرة كافية باش تخليني نعرف أنو هو مستحيل يسامحني بعد اللي سمعو مني و مع هكا منجمتش نتراجع...مديت يديا بالسيف و حطيتهم على صدرو...نحكي
أنا:أنت قلت باش تسمعني و تحاول تفهمني مهما كان الموضوع أركاان
مد يدو بالوقت...شدني من رقبتي و دزني لتالي في لحظة...ضربت في العرصة لي ورايا و هزيت عينيا في وجهو بالوقت...قحرلي يحكي
أركان:كان جات وحدة أخرى غيرك...ماهيش باش تعيش ثانية وحدة بعد اللي سمعتو
كبست على يدو...بيديا زوز و هزيتلو براسي إيه نحكي
أنا:ن..نعرف...أما حاول تسمعني أماانك
كبس عليا أكثر و عدا عينيه على وجهي...يحكي
أركان:أناا أمنتك على روحي...عشقتك لدرجة وليت نخاف عليك كيما نخااف على ولدي..حطيتك في مكاانة عااالية عليييك و إنتي واافقت تقررب مني بطلب من الساااقط هذااكاااا...إنتي كيفااااش تتجرأ على خطوووة كيمااا هاااذي ؟
دزني على الفوتاي و بعد عليا...عديت يدي على رقبتي و غزرتلو مصدومة...أصلا معرفتش شنوة لازمني نعمل بالظبط و لا كيفاش نهديه...خذيت نفس نحكي
أنا:أ..أنااا ماا عملت حتى شي من اللي طلبو مني و مكنتش باش نعملهااا...أنااا مستحييل نخوونك
أركان:اللي عملتو أسوء من الخياااانة
هزيت روحي وقفت و قربت منو شوية...نحكي
أنا:أنا ما عملت حتى شي يضرك...وقت حسيت قلبي تعلق بيك خرجت من قصرك و بعدت عليك باش ما نخلي حتى حد يستغلني ضدك...و ثاني مرة رجعت بإرادتي...رجعت خاطرني عشقتك و معرفتش نكمل ثنيتي من غييرك
ضرب يدو على الكنتوار و طيش الكيسان الكل على الأرض بعد ما كان راح يشرب...وخرت خطوة لتالي مروهجة...تلفت عندي و قحرلي يحكي
أركان:أناااا خلقت ألف طريق باش نوصل ليك و نكسر كل حااجز واقف بيناتنا...باش تجي إنتي في الأخير تعمل اللي ما عملو حتى حد قبلك ؟
أنا:لقيت روحي مجبورة...اللي طلبو مني إسكندر كان أهون من إني نرجع للجحيم لي عشت فيه سنين لتالي...أما بعد اللي عشتو معاك مستعدة لأي شي من غير إني نخسرك...حااول أنك تفهمني أركاان أماانك
أركان:شنية طلب منك بالظبط ؟
كبست على يديا زوز...محاولة مني باش نسترجع أنفاسي و أنا نحكي
أنا:حتى شي محدد...طلب مني نتقرب منك في الأول و نحاول نعرف عليك أي شي خاص و ما يتجم أي حد يوصل ليه
ضحك و عطاني بظهرو مرة أخرى..عدا يدو على وجهو أكثر من مرة...كأنو يهدي في روحو..وقف جنب البلار و سكت مرة أخرى..قربت منو شوية و عنقتو من تالي نحكي
أنا:حبيتك تسمع مني الكلام هذا و تصدقني زادة تصدق أنو أنا نحبك و عشقي ليك أكبر من إني نضرك
أركان:عشقك لي مرهون بكلمة من المحقق لي حطك في ثنيتي ؟
أنا:أنا عمري ما كذبت عليك بخصوص مشااعري و إلا مكنتش سلمت في كلشي باش نكون معاااك
تلفت عندي في لحظة و جبدني من يدي..دزني على البلار يحكي
أركان:بلكشي هذا الكل لعبة منك باش تخليني نصدقك ؟
أنا:أنا منبيعش روحي في سبيل أي شخص...مدامني شاركتك كلشي و رقدت على فرشك...تأكد أنو هذا الكل كان بإرادتي و من غير ظغط من أي حد
مديت يدي باش نحطها على صدرو..شدني منها بالوقت و قحرلي يحكي
أركان:الغلطة متاعك هي أنك خممت تستغل عشقي ليك باش تحمي روحك من الماضي متاعك و غلطت أكثر وقت قررت تسكت طول المدة هاذي و تستمر في الكذبة متاعك
أنا:أنا كنت بحاجة شوية وقت منك..خاطرني كنت ضايعة و معرفتش نختار القرار الصحيح
أركان:إنتي كان جيت تاثق فيا كيما كنت تقول ديما مكنتش خذيت الوقت هذا الكل..في الأساس أنا الغالط خاطرني خليتك على راحتك و وثقت فيك
نزلت عينيا من وجهو مع دموعي لي هبطت...أصلا مكنتش نستنى فيه يفهمني و لا حتى يستوعب الموقف بسهولة..عدا صوابعو على خدي و هزلي راسي مرة أخرى يحكي
أركان:أول مرة نلقى روحي عاجز لدرجة منعرفش شنوة لازمني نعمل فيك
أنا:أ..أركاان
أركان:منحبش نسمع حسك أكثر من هكا...تنزل لجناحك و متورينيش وجهك و قبل ما نفهم شنوة قاعد يصير بالظبط و نحل الموضوع هذا..إنتي ماكش باش تحط ساقك برا الجناح مهما كان الوضع مفهوم كلامي
أنا:أنت باش تحبسني عندك ؟
أركان:أحمد ربك ما عملت فيك حتى شي لتوا و جرب كسر كلامي المرة هاذي و شوف شنية اللي باش يصير فييك
نطرلي يدي و بعد عليا شوية..خلطت عليه بالوقت نحكي
أنا:أنا مكذبتش عليك و مهما كان اللي باش تسمعو عليا من غيري أنا مانيش مسؤولة عليه
أركان:أخررج من هوني توااا
وقفت وراه بالظبط...أما الكلام خاني المرة هاذي و معرفتش شنوة نعمل بالظبط...خذيت نفس باش نحكي مد يدو و وقفني بالوقت...أصلا محبش يغزرلي خلي يسمعني...وخرت خطوة لتالي و بعدت عليه...مديت يدي بالسيف نمسح في دموعي منعرفش إذا اللي عملتو صحيح و لا غالط...بعد ما سمع مني و كانت ردة فعلو هكا...ملا شنوة كان باش يعمل فيا...لو سمع الكلام هذا من غيري..دورت راسي شوية و غزرتلو..مزال واقف كيما خليتو...أصلا هاذي أول مرة يتصرف معايا بالطريقة هاذي..لدرجة أنو منجمش يغزر لوجهي..بعدت خصلات شعري من وجهي و كملت خطواتي ناحية الأصونصير...غريبة برشا الوجيعة لي حسيت بيها في اللحظات هذوما منحبش نخمم في فكرة أنو علاقتنا وفات و اللي ماهوش باش يكون معايا بعد توا و لأول مرة منحبش نخمم في المستقبل متاعي و لا حتى شنوة باش يصير بعد هذا الكل..كلشي يهمني هو أنو يبقى معايا و كهو.