آفْرُودِيتْ 🦢

الحلقة الواحدة و الثلاثون🧚‍♀️

🔸️حلقة 31
🔸️نوح_يحكي:
خذيت نفس و كبست على البواني...دخلت عندها و نزلت راسي شوية نغزرلها...متوقعتش أنها باش تلحق ترقد...و لا بالأحرى قاعدة تتظاهر أنها راقدة بعد اللي صار بكري...خوفي عليها خلاني منجمش نخمم و لا حتى نحاول نفهم منها لي صار...كيما منعرفش علاش متقبلتش فكرة وجودها مع جوزيف...قربت منها أكثر و قعدت على طرف السرير...مديت يدي شوية و بعدتلها خصلات شعرها المبلول من خدها...نحكي
أنا:نعرف أنك تسمع فيا ومع أنك ماكش باش تفهمني أما نحبك تحل عينيك و تغزرلي
تبسمت و كملت بعدت خصلات شعرها لتالي و نزلت عليها شوية نحكي في وذنها
أنا:فيق تواا
حلت عينيها شوية و غزرتلي بالوقت...نعرف أنها تعلمت كلمات و ولات تفهم شوية على قبل...تبسمت نحكي
أنا:ماكش باش ترقد قبل ما تتعشى
آنيا:منحبش
أنا:مش على كيفك
مدت يدها و تبعد في خصلات شعرها لي لصقت على خدها...جات عيني على الجرح لي فيها...كبست عليها بالوقت نحكي
أنا:شنوة هذاا ؟
جبدت يدها و خباتها بالوقت و قحرتلي تحكي
آنيا:حتى شي
أنا:هيا قوم معايا توا
جبدت روحي منها و هزيت روحي وقفت نغزرلها وين بقات في بلاصتها من غير ما تتحرك...تنهدت بالقاوي و نزلت عليها في لحظة...هزيتها في حملتي دورت يديها زوز على رقبتي و كبست عليا تحكي
آنيا:فاااش تعمل ياخي ؟
أنا:قتلك قبل إني نحب لهجتك باليونانية و تكسيرك للحروف متاعها ؟
آنيا:مفهمتكش
أنا:تفهم في الوقت المناسب كاندي
حطيتها على الفوتاي و غزرت لأولجا لي دخلت مع الخدم بالعشا...غزرتلها نحكي
أنا:أولجا أبعثلي مرهم خاص بالجروح...كيما نحبك تبعث كأس شكولاطة لآنيا بعد العشا
أولجا:حاضر سي نوح
أول ما خرجت...غزرتلها و شاورتلها لطاولة...قحرتلي و حاولت تقوم...كبست على خصرها بالوقت من غير حتى حركة أخرى...قربت منها شوية نحكي
أنا:شبيك ؟
آنيا:موجووعة
أنا:باهي إيجا معايا تراه
كبست على يدها و وقفتها بالسياسة...قربت معاها لطاولة و طلبت أولجا باش تبعث مرهم آخر لظهرها بسبب الوقعة و قعدت بجنبها نتبع في تفاصيلها...لي عشتو جرايرها اليوم فكرني في النهار لي خطفها فيه إدوارد و كان باش يبعدها من هوني...خذيت نفس نحكي
أنا:شنية صاار بالظبط ؟
غزرتلي ندرا كيف...نعرف أنها فهمت سؤالي أما معرفتش تجاوب عليه...حطيت تليفوني في يدها جاوبتني و حطاتو على الطاولة...نزلت راسي نقرا في كلامها
آنيا:الحارس معندوش ذنب...مشيت للمكتبة و بعدها لقيت روحي ندور في شوارع أثينا...مشى في بالي باش نتذكر ثنية الرجوع...أما بعدت برشا و المطر دخلني بعضي و شحن تليفوني وفى زادة
أنا:فما حد عاارضك ؟ فما شكون حاول يقرب منك و لا يحكي معاك ؟ كيما نحب نعرف إذا جوزيف كان يتبع فيك و لا لقاك صدفة آنيا
قرات كلامي و غزرتلي ندرا كيف...كبست عليه باش تجاوبني...قص عليها إتصال لورا...هزت عينيها في وجهي و حطاتو على الطاولة...نزلت راسها لصحن لي بدات تاكل منو...علقت عليها و قريت شطر من كلامها لي لحقت تكتبو
آنيا:لااا ما صار شي
خذيت نفس طويل و كبست على المغرفة...خاصة أني حسيتها مش قد بعضها...يمكن بالرسمي حملتها فوق طاقتها بسبب لي صار...دوب كلات شوية و غزرتلي تحكي
آنيا:تصبح على خير
كبست على طرف الطاولة و وقفت بالسيف منجمتش
نمنعها...بقبت نغزرلها لين دخلت لبيتها...تنهدت بالقاوي و هزيت روحي وقفت بعد ما وصلت أولجا استلمت منها لي وصيتها عليه و خلطت عليها لبيتها حليت الباب نغزرلها...أحسن شي لبست بيجامتها حطيت الكأس من يدي و قربت منها شوية...وقفت وراها و فكيت ربطة الشعر من يدها...لميت شعرها في يدي و ربطتو بالوقت خاطر أي مجهود يخلي وجيعتها تظهر على ملامحها غزرتلها من المرايا نحكي
أنا:وين موجوعة بالظبط ؟
حطت يدها على آخر ظهرها...بعدت عليها شوية و مديت يدي ناحيتها هزيت مريولها شوية نثبت في الزروقية...متوقعتش أنها تتضرر لهدرجة...تهزت مع المرهم لي نزلت بيه على الضربة...و كبست على يدي بالوقت...قربت من وذنها نحكي
أنا:متخافش
غزرتلي من غير حتى كلمة...خذيت نفس و جبدت يدي منها...دورتها عندي و هزيت المرهم الخاص بالجروح حطيتو على يدها نزلت على شفايفها موجوعة...غزرتلهم و هزيت عينيا في وجها نحكي
أنا:باش تكون لباس..متخافش عزيزتي
هزتلي براسها باهي...سكرت الجرح باش ميقلقهاش و كبست على يدها ناحية سريرها..عاونتها تسطحت و غطيتها بالوقت...نزلت عليها شوية نحكي
أنا:إنتي باش تكون في أمان طول ما أنا موجود معاك
غزرتلي من غير جواب...الأحسن أنها متفهمنيش ساعات بستها من جبينها و جبدت روحي منها شوية...هزيت الكاميرا لي كانت على التابل دونوي و خرجت...كبست عليها في يدي نثبت فيها...واضح أنها شراتها بكري و تكسرت بعد ما وقعت...يمكن أكا علاش خذات في خاطرها برشا..حليت البيسي و حطيت على الموقع الخاص بيهم و عديت كموند على وحدة أخرى في لونها و أكبر منها شوية باش متعبهاش مدام طلعت تحب حاجة أخرى كيما التصوير...تبسمت على تقحيرتها ليا بكري..ساعة نهاري ولا مستحيل يتعدا من غيرها..كأني كنت فاقد شي طول السنين لي فاتت و لقيتو في اللحظة لي ظهرت فيها هي في حياتي...معادش نعرف إذا كانت مجرد صدفة و لا معجزة بالنسبة ليا..أما الأكيد توا إني مستحيل نجم نتخلى عليها و لا نخليها تغيب على عيني لحظة وحدة..أصلا وجودها جردني من التفكير في الماضي لي كان يسحب فيا لتالي كيما خلى عندي أولويات مكنتش نعرفها قبل...كلشي يهمني توا إني نجم نحميها من أي خطر يحوم بيها و نحتفظ عليها...كما لو كانت جزء مني و من كياني.
#آفروديت🧚‍♀