آفْرُودِيتْ 🦢

الحلقة الواحدة و الأربعون 🧚‍♀️

🔸️حلقة 41
🔸️إلينا_تحكي:
هزيت راسي شوية و عديت عينيا عليه...منعرفش علاش حسيت أنو دخولو بالطريقة هاذي معتمد باش يلفت الإنتباه من اللي موجودين هوني..للحظة غاب على عيني وسط الحضور..محاولتش نركز برشا معاه و لا حتى إهتميت نعرف شكون..تبسمت مع صوابعو لي حسيت بيهم من فوق القفازات و هزيت عينيا في وجهو نحكي
أنا:تفضل سيد أركان
مد يدو شوية..حطها على جنبي و قرب مني شوية يحكي
أركان:روح أركاان
مديت يدي شوية و عديت صوابعي على صدرو نحكي
أنا:ساعة فما سؤال محيرني
أركان:تفضل ملا
أنا:علاش نسبت آنيا لأملاكك ؟
أركان:خاطر إدوارد قدمها كهدية ليا و مدامني باش نحميها أكيد ننسبها ليا..غير هكا مفما حتى شي تقلق بسببو خاطر مفما حتى شي من اللي قاعد يدور في راسك
أنا:منظنش تتوقع شنوة اللي قاعد يدور في راسي توا
غزرت لعينيه من ورا القناع لي خلى حدتهم تظهر أكثر و تبسمت..كبس عليا قبل ما نبعد عليه و غزر لشفايفي يحكي
أركان:رد بالك تخدم مخك خاصة توا
أنا:باهي..أصلا ما عملت شي
هزيت راسي شوية مع صوت اللي جا من المكبرات و اللي يعلن بداية الحفلة رسميا و منها الرقصات لي بدات...كبست على يدو و دورت راسي نتفرج عليهم وين لقيت روحي إستمتعت برشا بالرقصة الإفتتاحية لي قدموها مجموعة من راقصين واللي كانت على إيقاع سيمفونية موزارت...هزيت راسي شوية و ضيقت عينيا مستغربة كي ريت نفس الراجل لي دخل بكري مركز معاايا من بعيد..حاولت نتجنب غزراتو لي كانت تلاحق فيا..خذيت نفس و جيت باش نقول لأركان..أما غاب على عيني في لحظة لدرجة حسيت إني نتخايل فيه و كهو..رجعت بتركيزي للرقصة من غير حتى كلمة وين وفات بعد دقايق و بدات الرقصات الفعلية للحضور مد يدو شوية و غزرلي..خذيت نفس و حطيت يدي في يدو قدمت معاه بخطوات ثابتة و وقفت مقابلاتو بالظبط مديت يدي مع يدو..مدام الخطوات الأولى ممنوع اللمس..فرد وقت هزيت عينيا في وجهو نحكي
أنا:نظن نعرفها الرقصة هاذي
أركان:باش يكون فما تبديل
أنا:تقصد أنك باش تستقبل شريكة رقص جديدة ؟
مديت يدي لأخرى و حطيتها مقابلة يدو الثانية غزر لعينيا يحكي
أركان:نوح وراك...معناها باش تكون معاه
أنا:و أنت مع آنيا
أركان:مظطر باش ناخو محادثة صغيرة معاها
هزيتلو براسي باهي...مد يدو بالوقت و حطها على آخر ظهري..جبدني ليه أكثر يحكي
أركان:منعرفش لشنوة قاعد يخطط إدوارد أما وعدت نوح و مانيش باش نخليه يأذيها
كبست على يدو و قدمت خطوة ناحيتو مع الموسيقى و غزرتلو نحكي
أنا:شنية تقصد بوعدك لنوح ؟ ياخي هوما مع بعضهم ؟
أركان:منعرفش..أما فما إعجاب واضح بيناتهم
أنا:أنت إستلمتها كهدية و قدمتها لولد عمك
أركان:أنا حررتها و كهو..أكيد مانيش باش نتاجر بحرية العباد
أنا:نعرف
جبدني عندو أكثر...مديت يدي لأخرى و حطيتها على كتفو..وين حسيت بأنفاسو لي ضربت في وجهي و بشفايفو لي لامست شفايفي في لحظة..تبسمت نحكي
أنا:على أساس حد فينا ماهو باش يخدم مخو ليلة
أركان:أما سحرك قوي عليا فينوسي
عديت صوابعي على رقبتو من تالي و غزرت لعينيه نحكي
أنا:و مع هكا تحب تبعد عليا
أركان:مجرد محادثة صغيرة ملاكي..يكفي أنك تبقى قدام عيني و كهو
أنا:علاش يحب يسترجعها ؟
أركان:منعرفش...أما أكيد باش يستغلها كطعم جديد لأي حد آخر و الأسوء إذا قدمها لواحد كيما هو
أنا:شنوة ممكن يعمل فيها ؟
أركان:يمكن يعذبها أو حتى يقتلها
غزرتلو مصدومة وين دقات قلبي قوات بالوقت خاطرني نعرف شعور هذا و عشت كيفو من قبل طلع فما برشا من صنف غالي..غزرلي يحكي
أركان:لباس عزيزتي ؟
أنا:أنت باش تمنعها ؟ مهما كان اللي صار أركان خاطر منحبهاش تواجه لي عشتو أنا قبل سنين من توا
أركان:إنتي مزلت تخاف منو حتى بعد ما مات ؟
أنا:شي أقوى مني..منجمش نتحكم فيه
أركان:مزلت بحاجة فرصة منك باش نخليك تتخلص
منو و من الهاجس متاعو..رغم أنك كسرت كل الحدود بيناتنا أما مزلت متاثقش فيا
أنا:صدقني الموضوع ميتعلقش بالثقة..أما فما أمور نخجل إني نحكي فيهم...حتى لو معاك أنت أركان
كبس على ظهري و نزل عليا أكثر...أنفاسو هداتني و دخلتني بعضي فرد وقت..باسني جنب شفايفي من غير ما يقص على خطوات الرقصة و غزر لعينيا يحكي
أركان:صدقني إنتي ملاكي..مهما كان اللي عشتو قبل توا و مهما كان اللي باش نسمعو منك ماهوش باش يبدل نظرتي ليك و لا حتى يخليني نبعد عليك لحظة وحدة..يكفي أني نسمع كلشي عليك منك إنتي و كهو
كبست على يدو أكثر و جبدت روحي شوية...للحظة حبيت نخبرو بالحقيقة الكل و الأهم السبب لي خلاني نكون معاه من الأول..يمكن ياخو موقف أما ميتخلاش عليا في الأخير..خذيت نفس نحكي
أنا:أركاان أناا
سكت مع الموسيقى لي قوات..كأنها تعلن تبديل شركاء مع بعضهم..تبسم يحكي
أركان:نكملو حديثنا بعد شوية..رد بالك تبعد على نوح
هزيتلو براسي باهي و جبدت يدي منو شوية..غزرت لآنيا لي قربت منو...خذيت نفس و تلفت لنوح وين قص الضو في لحظة...أصلا طول الرقصة كان ينقص و يقوى حسب الخطوات و الأجواء..تبسمت كي جبدني من يدي و حط يدو لأخرى على ظهري كبست على يدو نحكي
أنا:كأنك تأخرت شوية
ضيقت عينيا كي ملقيتش إجابة منو..غير خطوات الرقص لي تعمدها باش يبعد على البلاصة لي كنا فيها..عوجت فمي نحكي
أنا:نووح ؟
هزيت راسي شوية مع الضو لي رجع خااافت لدرجة أنو يخليك تشوف الشخص لي قدامك و كهو..قلبي خض بالقاوي لدرجة منعرفش كيفاش جبدت روحي منو و غزرتلو مصدومة من غير حتى حركة أخرى...خذيت نفس طويل و دورت راسي شوية.. محاولة مني باش نلمح أي حد منهم..أما ما نجمت نشوف حتى حد غيرو هزيت عينيا في وجهو وين لقيت روحي محصورة مع غزراتو لي كانت تلاحق فيا من بكري..تبسم و مدلي يدو بالوقت...يحكي
هو:آنسة دايون ؟
غزرتلو من غير حتى كلمة و نزلت راسي شوية نغزر ليدو...منجمتش نألف ملامحو من ورا القناع و لا حتى صوتو لي كان غريب عليا..حرك يدو شوية يحكي
هو:بعد إذنك سوان (swan_بجعة)
أنا:أكيد مانيش باش نشارك الرقص مع حد غريب
هو:يمكن مانيش غريب لهدرجة
نزل يدو شوية و جبدني من يدي على غفلة و حط يدو لأخرى على ظهري...وين لقيت روحي مظطرة نتحرك مع خطواتو...حطيت يدي على كتفو نحكي
أنا:شنية تستخايل في روحك تعمل ؟
هو:وقوفنا من غير حركة هوني يعمل مشكلة
أنا:سيبني ملااا
هو:منظنش أنك تلقى ثنيتك في الوضع هذا
أنا:أنت تعمدت تحطني في الوضع هذا
هو:مكنتش باش نضيع فرصة وجودي معاك
أنا:و تعرف أنو الفرصة هاذي لي تحكي عليها شنوة ممكن تكلفك ؟
كبس على يدي أكثر..دورني و رجعني عندو...يحكي
هو:إذا قصدك على أركان القايد..نتوقع باش تكون التكلفة كبيرة..خاصة أنو ممنوع حد يغزر لأملاكو
أنا:توقعت باش تكون أذكى من أنك تخاطر بروحك بالطريقة هاذي
هو:نظن اللحظة هاذي تستحق المخاطرة الكبيرة من غير تفكير
غزرت لعينيه مع الضو لي ضرب في وجهو..لحظة و بعد عليه...نزلت على شفايفي شوية نحكي
أنا:أنت تعرفني من قبل ؟
تبسم على جنب و كبس على آخر ظهري أكثر محاولة منو باش يفسخ المسافة لي بيناتنا و نزل عليا شوية وين حسيت بأنفاسو في خدي و هو يحكي
هو:الكل هوني يعرف البجعة الضائعة..الفرق الوحيد بيني و بينهم أني منجمتش نتخلص من ملامحها و لا غزرة عينيها
جبد روحو شوية و حركني معاه خطوة أخرى و غزر لعينيا يحكي
هو:و لا طريقة سطوعها على المسرح..إنتي أسرتني مع كل حركة تعملها و كل خطوة منك إلينا دايون
هزيت عينيا في وجهو مصدومة..محاولة مني باش نثبت فيه مع الضو الخافت لي ضارب فينا..فرد وقت  حاولت نستوعب الكلام لي قالو و لي متوقعتش إني نسمعو جملة..غير هكا منجمتش نتعرف عليه لا من شكلو و لا من صوتو زادة و لا ريحتو لي سيطرت عليا في لحظة و منجمتش نشم غيرها..حاولت نجبد روحي منو...كبس عليا أكثر يحكي
هو:مزال موفاتش الرقصة
أنا:سييبني و كهوو
هو:كأنك مستمتعتش بحديثنا
أنا:لا...للأسف منجمش نشارك الحديث مع واحد مختل كيفك أنت
هو:نظن الكل مجنون بيك آنسة سوان...أولهم أركان القايد...اللي المدينة الكل راضخة ليه
أنا:أنت من طرف إدوارد ؟
هو:إدوارد مجرد بيدق..ينفذ اللي يسمعو و كهو
أنا:تقصد أنو الحفلة هاذي من تخطيطك أنت ؟
غزرتلو مصدومة و حبست في بلاصتي...كبس عليا و جبرني على آخر خطوة يحكي
هو:منظنش فما فرصة أحسن من هاذي باش نقابلك
أنا:يعني آنياا مجرد سبب مش أكثر
هو:يمكن فرصة لإدوارد باش يسترجعها
أنا:ماهيش عبد عندو و لا عندك باش تحكي عليها بالطريقة هاذي
هو:نقدم إعتذاري ملا...مكانش لازم نستنى الوقت هذا الكل...باش ناخو الخطوة هاذي...متوقعتش أنو الفضل باش يكون لأركان القايد
أنا:أنت معتذرتش على الكلام لي قصدتو...غير هكا أنا مانيش لشخص لي يلحق الأول..ببساطة أنا نعشق أركان و منتوقعش حياتي من غيرو
هو:نظن لازمك تخلي مسافة أمان..خاصة إذا كان الموضوع يتعلق بأركان القايد..متعرفش على نهايتك كيفاش باش تكون وقتها
أنا:هذا قراري و نعرف كيفاش نتحمل مسؤوليتو
هو:يا ريت تكون قد قرارك و تعرف مصلحتك
أنا:مانيش بحاجة نصيحة من شخص مجهول
هو:تتعرف على الشخص هذا في الوقت المناسب
أنا:آخر شي يهمني إني نتعرف عليك
هو:يمكن تبدل رايك مع الوقت
أنا:تنجم تسيبني توا
هو:من غير لحظة وداع ؟
أنا:تتوقع أنا مهتمة برشا باللحظة هاذي ؟
هو:نظن لازمك تكرس إهتمامك لبرشا حاجات إنتي غافلة عليها آنسة دايون ؟
أنا:كيما شنوة ؟
هو:كيما أنك تلقى مخرج من الماضي متاعك و من قضية مقتل صوفي راميز
أنا:أنت من وين تعرف هذا الكل ؟
هو:اللي نعرفو في اللحظة هاذي..أني قدام أجمل إمرأة في اليونان و أذكى وحدة بيناتهم زادة..إمرأة ضمت كل عظمة اليونان في ملامحها..ساعة متوقعتش باش نشوف جمال يضاهي جمال كاثرين و سحرها
أنا:كاثرين ؟ أنت من وين تعرف الإسم هذا ؟
هو:الإسم هذا مهم ليا كيما هو مهم ليك و إذا كنت مستعدة باش تحافظ على سلامتها و حياتك و حياة خوك زادة..مظطرة باش تتستر على محادثتنا الصغيرة و معادش تاثق في أي حد يقرب منك و تذكر ديما أنو مفما حتى حد يضرك و أنا مووجود
أنا:والله غالط برشا..الإسم هذا ما يعنيلي حتى شي باش نخاف عليه و معنديش إستعداد باش نحميه زادة
هو:أما إسم ويليام كافي بالنسبة ليك little swan نظن أنك مدينة لخوك بكلشي وصلت ليه...في الأخير هو الملاك الخفي اللي يحميك ديما
هزيت عينيا في عينيه بالوقت و جبدت روحي منو شوية نحكي
أنا:شكووونك أنت ؟
هو:تعرف في ظروف أخرى little swan
قال آخر كلمة و كبس على يدي أكثر..دورني مع إيقاع الموسيقى بالظبط و جبد روحو منو بالوقت كملت آخر دورة و تلفت عندو وين لقيت روحي واقفة وحدي حاولت نلوج عليه في الأنحاء أما غاب في لحظة
هزيت الروبة من الأجناب و حاولت نخرج من وسط الحضور لي كنت كل مرة نضرب في واحد منهم..بسبب الأضواء الخافتة..دوب لمحتو من بعيد يمشي بخطوات ثابتة و مع هكا منجمتش نخلط عليه خاطر الفستان ثقيل وين بقيت واقفة في بلاصتي مصدومة من اللي صار الكل.