آفْرُودِيتْ 🦢

الحلقة السابعة🧚‍♀️

🔸️حلقة 7
🔸️إلينا_تحكي:
قعدت على حافة البيسين و حطيت ساقيا في الما أصلا الجرح إرتاح على قبل...كيما حسيت إني بحاجة راحة بعد الظعط لي عشتو الكل...مع إني متوقعتش جملة أنو أحلامب تكون السبب في مشكلتي...رغم السنين لي تعدات الكل مزال غالي يأثر عليا...مزال جزء من كوابيسي و مخاوفي...و معرفتش نتخلص منو و لا حتى ننسى الماضي...جرايو هو عرفت كل أنواع الخوف ملاحقتو ليا و أنا في سن صغيرة هوسو بيا و تهديداتو خلاتني محصورة في بلاصة مهجورة...بلاصة معرفتش نخرج منها رغم قوتي و رغم إني معاد خلين حتى حد يضرني معنويا و لا جسديا بعدو هو...كيما إني عرفت إمتى و كيفاش نستغل جمالي لصالحي و كهو من غير ما نخلي أي حد يستغلني و لا يمسني و لا حتى يقربلي من غير إرادتي...إلا هو و لي لتوا منجمتش نعرفو و لا حتى نفهمو و نفهم طبيعتو و لا طبيعة القصر هذا لي مزال ما إكتشفتش النصف الآخر منو...كأني في مغارة عجيبة...كل مرة نقول هوني حدو...نكتشف جزء آخر أحلى من اللي ريتو قبل...الشي الوحيد الغريب هوني هو الهدوء...الهدوء لي يسيطر عليه هو بالأخص و على رجالو زادة و حتى الخدم هدوئهم مش طبيعي لدرجة إني ولا مرة ريتهم غلطو و لا إخترقو أي قانون في القصر...من غير زمردة...زمردة لي متأكدة أنها أكثر وحدة تفرح بنهاية أركان القايد و عالأغلب تكون تحفرلو باش تتخلص منو...كيما مسنتغربش إذا كان عندها يد في موت ولدو...غير نوح لي ميظهرش أنو ولدها جملة...و مع هكا كل الإحتمالات قابلة لشك مدام الكل يحب يكون في المكانة لي هو فيها و يملك القوة متاعو لي تخليه يسيطر على الكل..خذيت نفس طويل...هاربة من كل الأفكار لي قاعدة تدور في مخي و هزيت راسي شوية...نغزر لحركة غير عادية من بعيد...هاذي أول مرة نشوف رجالو يتحركو  كل شوية...مع أنو الوقت مأخر عديت دقايق نتبع فيهم بعينيا...لين لقيت روحي نجري ورا الفضول متاعي...هزيت روحي وقفت...عدلت الجيلي متاعي و خلطت عليهم...الظلام خلاني نتسلل من غير ما يحسو بيا...و دخلت للمستودع لي كانو يخرجو منو وقفت ورا علب الشراب لي كانو مرتبين...و طليت من خلالهم...نغزر لراجل دوب واعي لروحو من الدم لي كان على وجهو...نوح كان واقف على جنب غير الرجال متاعو لي كانو ساكتين كي العادة...ظهر في وجهو على غفلة...لدرجة إني منعرفش كيفاش خرج مطلع أكمام سوريتو...غزرت ليديه لي كانو ملطخين بدمو...ضربو مرتين ورا بعضهم..غمضت عينيا بالوقت و عاودت حليتهم...نثبت فيه و في كل ضربة يوجها ناحيتو من غير ما يشفق عليه...كبس على شعرو و هزلو راسو يحكي
أركان:أنت في كل الأحوال وقعت على نهايتك..تحب تموت توا و لا تعدي أيامات تحت يدي ؟
نيكولاي:س..سيد أركاان...ص..صدقني أنا بعت السلاح لأكثر من شخص...م..منتذكرهمش و منعرفش ش..شكون عندو م..مصلحة في أنو يقتل ولدك
أركان:أنت هربت بعد الحااادث...هذا دليل كافي أنو يدينك...غير هكا انت مجبور تتذكر لشكون بعت السلااااح هذا...و إلا مش أنت لي باش تموت توا حتى عيلتك باش تخلص حق عملتك
دور راسو شوية و شاورلو لمرتو و زوز صغار...كانو طفلة و طفل صغار...دخلو على غفلة...حطيت يدي مروهجة...خاطرني متوقعتش أنو يخلي زوز صغار يحضرو لهذا الكل..غير هكا مجاش لبالي لحظة وحدة
أنو يكون منعدم الرحمة...قلبي خض بالقاوي بعد ما إستلم السلاح من رجالو و كبس عليه يحكي
أركان:تحب تجرب الوجيعة لي أنا عشتها ؟ تحب تحس بالحرقة لي عديت بيها سنين ؟ ساعة نظن أنو هذا أحسن عقاب ليك
نيكولاي:أ..أماانك سيد أركان...خليهم يمشيو من هوني و أعمل فيا لي تحب عليه
أركان:شكون تحب تودع منهم
نيكولاي:لااا...هوما ما عندهم حتى ذنب
أركان:و ولدي ما عندو حتى ذنب في لعبتكم المسخة
كبس على السلاح أكثر...صوتو لي خرج مغوصر في آخر كلام ليه...خلاني نتأكد أنو فقد آخر قطرة صبر كانت عندو...خاصة أنو بالرسمي ولدو ما عندو حتى ذنب باش يموت بالطريقة هذيكا...أما حتى الصغار هذوما ما عندهم حتى ذنب و لا أمهم لي خباتهم وراها...بعد ما مد يدو و وجه السلاح ناحيتهم...فازة خلاتني نشهق من غير ما نحس...وين كان صوتي مسموع وسط الهدوء لي حل فجأة و منجمتش نتراجع خاطر خوفي خلاني نفقد تركيزي و نتعثر سندني واحد من رجالو بالوقت و كبس على يدي جبدني معاه و قرب بيا ناحيتو...غزرتو ليا و ملامح وجهو لي أول مرة نشوفهم هكا...خلاوني نحس برجة في قلبي...رجة قوية خلاتني نستشعر العاصفة لي قادمة ناحيتي...يمكن هذا اللي كان يقصد بيه الوجه الثاني...وجه من غير رحمة...خاطر حتى غزرتو ليا كانت خالية من أي تعبير...يمكن خاطرني كسرت قاعدة من القواعد متاعو و تدخلت في حاجة مش متاعي...شاور لراجل باش يبعد عليا...و قدم ناحيتي بخطوات ثابتة خطوات كانت مسموعة في وذني و خلاتني عاجزة حتى باش نوخر لتالي و لا ننطق بحرف واحد...جيت باش نحكي...شدني من رقبتي بالوقت...كبي عليا و دزني على العلب لي ورايا و عدا عينيه على وجهي للحظة حسيتو شخص آخر شخص مريتوش قبل و ما نعرف عليه حتى شي...مد يدو شوية و عدا السلاح على خدي و نزل بيه لشفايفي...و ظغط عليهم حكي
أركان:شتعمل هوني ؟
غزرتلو من غير حتى كلمة...إذا كان الراجل هذا ينجم يقتل زوز صغار...معناها ينجم يعمل أكثر من هكا كبس على رقبتي أكثر...كأنو تعمد باش يقطع أنفاسي و يخليني عاجزة باش نرد عليه...و رغم هذا الكل منجمتش نزل عينيا من وجهو...الوجه الثاني لأركان القايد لي كان عبارة عن حقير...مجررم و قاااتل.
مديت يديا زوز و حطيتهم على يدو...محاولة مني باش نلقط أنفاسي و نبعدو عليا فرد وقت..خاطرني بالرسمي نحس في روحي أول مرة نشوفو...غمضت عينيا موجوعة...رخف يدو في لحظة...لي خلاني نفقد توازني فوق العلب...شديت روحي قبل ما نطيح و حطيت يدي على رقبتي نكح بكل قوتي و هزيت عينيا في وجهو قحرتلو نحكي
أنا:ح..حقييير
أركان:أخرج من هوني و إلا الليلة هاذي باش تتحول لكابوس ليك إنتي زادة
دورت راسي شوية غزرتلهم..للحظة ريت نفس الخوف في عينيهم لي حسيت بيه سنين لتالي و نفس الشعور بالعجز زادة...غزرت زادة للفرد لي كان في يدو...كبس عليه و غزر لنوح يحكي
أركان:خرجها من هووني
غمضت عينيا مع صياحو و تعدلت في وقفتي و غزرتلو شاور بيدو لطفل الصغير يحكي
أركان:إيجا هووني
كبش في أمو أكثر...شاور لواحد من رجالو باش يجيبهولو...فكو من عندها بالقوة...لي خلى نظاراتو الصغيرة تطيح عالأرض...قرب مني نوح يحكي
نوح:هيا إيجا معايا
عديت عينيا على وجهو و وخرت لتالي...منعرفش على روحي كيفاش قربت منهم...جبدت الطفل من يدو...قبل ما يسلمهولو و حطيتو ورا ظهري..هز عينيه في وجهي كبست عليه أكثر...رغم الخوف لي حسيت بيه من الوضع لي أنا فيه و عديت عينيا على وجهو نحكي
أنا:مستحيل نخليك تضرو
هز حاجبو شوية و تبسم بإستهزاء...يحكي
أركان:وريني كيفاش باش تمنعني
أنا:إذا كنت باش تقتل أي حد منهم...لازمك تقتلني قبلهم
مد يدو شوية...و عدا الفرد على رقبتي...يحكي
أركان:تتوقع مانيش باش نعملها ؟
أنا:متترددش ملا
ضحك و نزل على الزناد...غمضت عينيا بخوف و حليتهم مروهجة...هزلي راسي شوية يحكي
أركان:هاك منعت المرة هاذي فينوسي...شقولك في الطلقة لي بعدها ؟
عديت عينيا على وجهو مصدومة...متوقعتش باش نلقى روحي في النوع هذا من الخوف و مع هكا منجمتش ننسحب...منجمتش نسلم في كبسة يدو الصغرونة على يدي...خذيت نفس نحكي
أنا:مانيش باش نتراجع...مستحيل نخليك تضرهم أصلا معندكش حق تتصرف هكا مع طفل صغير...هو مع عندو حتى ذنب في اللي صار...زيد أنت كنت باش تعمل أكثر من هكا...في حالة حد تعامل هكا مع ولدك
قرب مني شوية و شدني من شعري...لدرجة حسيت بأنفاسو ضربت في وجهي...قحرلي يحكي
أركان:هاااذي آخر مرة تجبد سيرة ولدي...واااضح ؟
أنا:لا ماهوش وااضح...متنجمش تخلي صغير آخر يكون ضحية...حتى لو كان مجرد تهديد...أنت هكا باش تأثر على نفسيتهم و باش تولي الكابوس متاعهم طول حياتهم...يزي كهو...أنت مستحيل توصل للي تحب عليه بالطريقة هاذي
خذيت نفس طويل و كبست على يدو الصغرونة أكثر و كملت نحكي
أنا:خليهم يمشيو...صدقني هوما ما عندهم حتى ذنب في اللي صار و لا في اللي باش يصير أركاان
أركان:مانيش بحاجة محاضرتك توا...تخرج و لا تنظم ليهم و تكمل العرض للأخير ؟
أنا:باش نخرج...أما مش وحدي...أصلا مستحيل مزلت نبقى في قصر وحش كيفك أنت
نزلت راسي شوية و عديت يدي لأخرى على شعرو نحكي
أنا:هيا إيجا معايا
كبست على يدو و عاودت غزرتلو...عديت عينيا على وجهو نحكي
أنا:إذا كنت باش تنفذ تهديدك أقتلني معاهم
غزرلي من غير حتى كلمة...منعرفش على روحي كيفاش قربت من المرا و بنتها...هزيت نظاراتو من الأرض و خذيت نفس نحكي
أنا:خلينا نمشيو
غزرتلي مترددة...مننكرش إني حسيت بنفس خوفها أما مفماش حل آخر..غزرتلها نحكي
أنا:في الحالتين يمكن تموت إنتي و صغارك
هزتلي براسها باهي و خلطت عليا..وقفو رجالو في وجهي...دورت راسي شوية و عديت عينيا على ملامح وجهو لي منجمتش نفهمها و لا نفسرها..مد يدو و شاورلهم باش يبعدو...خرجت بالوقت..نتبع في الطريق لي جيت منو باش منضيعش و نضيعهم معايا..دخلت للبركينغ متاعو و عديت عينيا على الكم الهائل من الكراهب لي موجودين..غزرتلها نحكي
أنا:تعرف تسوق ؟
هزتلي براسها إيه...قربت لأول كرهبة..حليت الباب من تالي ركبت الصغار و تلفت عندها نحكي
أنا:أمشي من هوني...أمشي لأي بلاصة تحس فيها بالأمان و لا لأي حد ينجم يحميك من غير الشرطة
هي:و إنتي ؟
أنا:متخافش عليا...يكفي أنك تحمي صغارك توا...هما أهم من كلشي
هي:متأكدة ؟
هزيتلها براسي باهي و سلمتها نظارات ولدها مسحت دموعها و ركبت..خرجت لبرا نتبع في الكرهبة بعينيا تنهدت براحة كي ريتها بعدت..رجعت شعري لتالي و دخلت للقصر..كبست على يديا زوز...باش نهدي الرعشة لي تمكنت مني...كيما حسيت ساقيا معادش باش يهزوني أكثر...بقيت نمشي و نجي داخل الأصونصير محاولة مني باش نتغلب على الخوف لي حسيت بيه أول ما تحل الباب..خرجت بالزربة و دخلت للجناح متاعي منعرفش كيفاش هديت عليه لبيتو..هز راسو شوية من اللوحة لي كان يرسم فيها و غزرلي مستغرب قربت منو نحكي
أنا:إحنا لازمنا نمشيو من هوني توااا
وقف من بلاصتو و قرب مني شوية..كبس على يديا زوز و ضيق عينيه يحكي
ويليام:شبيك ترعش هكا ؟ شنية صار ؟
أنا:ك..كان باش يقتلني
ويليام:شنووة ؟
أنا:أ..أركان..الحقيير طلع قاااتل..كان باش يقتلني و يقتل زوز صغار زادة..ويليام صدقني أمانك
ويليام:هدي رووحك إلينا
أنا:و..ويليام...منحبش نبقى هوني..منحبش نعيش نفس الشي مرة أخرى...منحبش وحش كيفو يتغلب عليااا
مد يدو بالوقت حطها على ظهري و كبس عليا..عنقتو بكل قوتي...خاطر هو الأمان الوحيد ليا في الدنيا هاذي خاصة الخوف اللي عشتو ليلة...أصلا مستحيل نبقى هوني بعد اللي ريتو و اللي خلاني نعيشو...مهما كان اللي باش يعرضني مبعد..خاطر الإنسان لي ريتو الليلة مستعد يعمل كلشي باش يوصل للي يحب عليه في الأخير...جبدت روحي منو شوية...بعد ما حسيت إني هديت و نجمت نسترجع أنفاسي...حاوط وجهي بيديه زوز يحكي
ويليام:فهمني شنية صار بالظبط إلينا ؟
أنا:ك..كان في المستودع...يحقق مع شكون بخصوص قضية موت ولدو...حتى أنو جاب عيلة الراجل و حاول يبتزو بيهم ويليام...كان باش يقتل طفل صغير من غير رحمة
ويليام:إنتي علاش مشيت لغديكا ؟
أنا:حبيت نفهم اللي قاعد يصير و منعرفش كيفاش تدخلت بيناتهم...حتى أنو خنقني و حاول يقتلني و مع هكا خلاهم يخرجو معايا
ويليام:وينهم توا ؟
أنا:عطيتهم كرهبة من البركينغ و خليتهم يمشيو
ويليام:إلينا ياخي إنتي هوني باش تكون المنقذة ؟
أنا:مانيش منقذة ويليام...أما مستحيل نخليه يضر الصغار بالطريقة هاذي...خاطر إحنا زادة عشنا الظلم و الشعور بالعجز...منعرفش إذا لي عملتو صحيح و لا
غالط...أما باش نخرج من هوني..و منزيدش ثانية أخرى مع مجرم كيما هو
ويليام:السنين متغيرش حقيقة أنو إحنا كيفو بالظبط
جبدت روحي منو و وخرت خطوة لتالي...بعدت خصلات شعري من وجهي و غزرتلو نحكي
أنا:إحنا ما عملنا حتى شي...غالي يستحق لي صار فيه الكل...أصلا لتوا ميحبش يتخلى عليا...لتوا نحس بيه قريب مني
مديت يدي و ضربت راسي بالوقت...نحكي
أنا:لتوا ميحبش يخرج من راسي...و لا من حياتي
خذيت نفس طويل نهدي في روحي و عاودت قربت منو شوية...كبست على يدو نحكي
أنا:ويليام خلينا نمشيو من هوني...اللي ريتو قبيل كافي باش يأكدلي أنو هو أسوء من غااالي و يمكن يجي نهار و يعمل فيا نفس الشي...منحبش نخسر روحي وسط اللعبة هاذي و لا نخسرك أنت زادة
ويليام:إحنا بالفعل دخلنا في أعماق اللعبة هاذي و منظنش الخروج باش يكون سهل المرة هاذي...خاطر مش الماضي كهو اللي باش يلاحقنا...أركان القايد باش يكون أقوى من الماضي بحد ذاتو
غزرتلو من غير حتى كلمة...مد يديه زوز...كبس على أكتافي و دورني للمرايا...نزل عليا شوية و حط راسو بجنبي يحكي
ويليام:أغزر هوني...إنتي تنجم تدمر أي حد بمجرد أنو يقرب منك...حتى لو كان أركان القايد و الدليل أنك مزلت حية لتوا...مع أنك خرقت قوانين القصر و قوانين المالك مع بعض
عديت عينيا على ملامح وجهي...كبس عليا أكثر تبسم و كمل يحكي
ويليام:إنتي إلينااا...تنجم تأثر على أي حد و تخليه تحت أمرك...خروجك من القصر هذا باش يزيد مشاكلك مش أكثر...خمم بعقلك
مد يدو شوية و ضربني بصبعو على طرف جبيني يحكي
ويليام:إستخدم ذكائك...إذا كنت باش تمحي الماضي و توصل للقمة...لازمك تتخلى على عواطفك الكل و ما تخلي حتى شي يأثر عليك...حتى كان قتلهم قدامك واضح ؟
بقيت نغزر لروحي...مع إني دفنت مشاعري من ليلة هاذيكا...أما اللي صار قبيل كان أقوى مني...غزرتهم ليا و خوفهم منجمتش نتعداه و نخليهم ورايا و مع أنو كلامو صحيح...أما الليلة إكتشفت أنو جزء مني مزال حي...مزال عندي قلب ينبض و يحس...خذيت نفس نحكي
أنا:كلامك صحيح...أما منظنش ذكائي و جمالي باش ينفع مع وحش كيما هو
ويليام:مدام حررهم بأمر منك معناها نفع عزيزتي غير هكا اللي صار في مصلحتك...تنجم تاخو موقف منو و تربح الوقت لصالحك...كيما لازمك تتعلم و تفهم ردات فعل الشخص إتجاه أي موقف يصير معاك
أنا:منجمش نقرا العباد كيفك أنت
ويليام:ملا نظن لحق الوقت باش تتعلم
جبدت روحي منو و حطيت يدي على قلبي لتوا منجمتش نتعدا لي صار...خذيت نفس و غزرتلو نحكي
أنا:شنوة لازم يصير توا ؟ تتوقع باش يعديلي لي عملتو ؟
ويليام:منظنش خاصة أنك ما تعاقبت على حتى شي من اللي عملتو
أنا:بالله ؟ المرة هاذي باش يخلص عليا ضربة وحدة مش يعاقبني
ويليام:متخافش...خاطر أركان القايد مغروم بيك و مستحيل يتخلص منك...خاصة أنك تعتبر الممنوع المرغوب إلينا
أنا:نعرف هذا الكل سي ويليام...أما مش أنت لي واجهتو اللوطة...كان ريت وجهو تفهم وضعي توا أصلا كان باش يقتلني...أكا علاش لازمني حل سريع في حالة أنو قرر يضرني و لا يعاقبني...خاصة إني هربت المرا من هوني
ويليام:و بكرهبتو زادة
أنا:ويليااام يززي كهوو...أنا بالرسمي خفت و مزلت خايفة منو و من غزرتو لياا...زيد مدام نجم يعاقب الراجل بصغارو...ينجم يعاقبني بيك أنت
ويليام:متخافش عليا و حتى كان صار الشي هذا في النهار من النهارات...إختار روحك عليا...خاطرني مانيش مهم كيفك و ما عندي وين نوصل في في الأخير...أنا حتى منعرفش ندور في الشارع وحدي إلينا و لا حتى نقوى على الكلام مع أي شخص غريب
أنا:أنت قطعة مني ويليام...صدقني مستعدة نحرق الكل على خاطرك يا روحي
قربت منو شوية و عاودت عنقنو...عدا يدو على شعري يهدي فيا...جبدت روحي منو مع صوت الناقوز لي جا من خارج القصر...خرجت من بيتو و غزرت لأولجا...لي قربت مني شوية تحكي
أولجا:سيد أركان طلب أنو يشوفك في قاعة التماثيل
تواا
هزيتلها براسي إيه...وخرت لتالي و خرجت...دورت راسي شوية نغزر لويليام لي قرب مني...يحكي
ويليام:متخافش
أنا:بلكشي حاول يقتلني
ويليام:ماكش باش تموت إلينا...يكفي أنك تخمم قبل ما تنطق و تعرف كيفاش و إمتى تستغل دموعك هذوما واضح
عديت يدي على خدي...مسحت دموعي و هزيتلو براسي باهي...خذيت نفس طويل قبل ما نمشي للأصونصير...من غير ما ننكر الخوف لي حسيت بيه و دقات قلبي لي باش تاقف في لحظة...منعرفش علاش إختار القاعة هاذي بالظبط و منعرفش شنوة باش يصير زادة...أما باش نحاول نعمل بكلام ويليام و نبقى ثابتة لآخر لحظة...في الأخير أنا إلينا دايون و نجم نأثر على أي حد...حتى لو كان أركان القايد بحد ذاتو...أكا علاش لازمني نتغلب على خوفي الكل...مديت يدي مترددة و ظغطت على الزر...تحل الباب بالوقت...خذيت نفس و دخلت...إستغربت كي ملقيتوش...كيما دخلت بعضي أكثر خاطرني منعرفش لشنوة قاعد يخمم بالظبط عديت عينيا على التماثيل مرة أخرى و غزرت للمرايا الكبيرة لي مقابلتهم...غير الفوتاي لي منصوب تحت لوحة تظم نفس رسمة التماثيل...عديت دقايق على أعصابي...منعرفش إذا نستنى فيه و لا في اللي باش يصير فيا...غزرت لتمثال آفروديت...نثبت في تفاصيلها المنحوتة...قلبي خض بالقاوي كي حسيت بالباب تحلت لدرجة إني منجمتش نتلفت عندو قبل ما نظم أنفاسي مع أنو صوت خطواتو وترتني أكثر...عديت يدي على رقبتي و درت عندو...هزيت عينيا في وجهو بالوقت مزال مسيطر عليه الغش...كيما ملامح وجهو مزالت قاطعة كيما قبيل و أكثر...وين لقيت روحي نخمم في مخرج جديد من القصة..حتى الباب سكرها وراها..هزني و حطني أكثر من مرة...نفس الغزرة لي نحسو يعري فيا بيها...كأنو يكتشف في تفاصيل بدني من غير ما يقربلي كيما أنو بقى واقف في بلاصتو من غير حتى حركة..من غير عينيه لي كانو يتنقلو من وجهي لبدني...خذيت نفس طويل و قحرتلو نحكي
أنا:علاش طلبتني لهوني ؟
قرب مني بخطوات ثابتة...وخرت لتالي بالوقت...لين ضربت في التمثال لي ورايا...وقف قدامي بالظبط و مد يدو شوية و بعدلي خصلات شعري من وجهي يحكي
أركان:متوقعتش أنك تخاف بعد اللي عملتو
أنا:ما عملت حتى شي...مش من حقك تهدد طفل صغير بالطريقة هاذيكا
أركان:ملا جبتك هوني باش تعلمني الصحيح من الغالط ؟
أنا:لااا...و مش من عادتي ندخل في أمور متخصنيش أما الخوف اللي ريتو في عينيه...أنا عشتو من قبل
أركان:مع غالي
بعدت عليهم شوية و هزيت عينيا في وجهو نحكي
أنا:مش لازم تعرف مع شكون...زيد منظنش أنت طلبتني هوني باش نحكيو في الماضي
أركان:صحيح
أنا:أنت تنجم تحل الموضوع من غير ما دخل صغار في الوسط و لا حتى تكون بالوحشية هاذي...في الأخير أنت كنت أب زادة
أركان:إنتي تعرف نتيجة اللي عملتو و شنية باش يكلفك ؟
أنا:منعرفش...و مانيش خايفة منك زادة
هز حاجبو مستغرب و تبسم على جنب...يحكي
أركان:أما هاني نشوف في العكس
أنا:شبيك تحل كلشي بالعنف ؟
أركان:أنا لتوا ما عملت شي إليناا
أنا:شنية ناوي تعمل ؟
أركان:على أساس ماكش خايفة مني ؟
عديت عينيا على بقع الدم لي كانت على يدو و سوريتو و عاودت غزرتلو نحكي
أنا:يعني أنت بالحق مجرم ؟
أركان:متخافش...مانيش ناوي نقتلك توا
أنا:مانيش خايفة...زيد أنا ما عملت حتى شي غالط باش تقتلني و حط في مخك إذا جربت تهز يدك عليا و لا تعاقبني...ماهيش باش تتعدا بالساهل
أركان:هااك تعرف تهدد زادة
أنا:أكيد...مستحيل نخليك تعمل فيا كيما صوفي راميز
أركان:يمكن يصير فيك الأسوء عزيزتي
قحرتلو و جبدت روحي منو أكثر...منحبش نضيع مع كلامو و طريقة إستفزازو ليااا...خذيت نفس نهدي في روحي و عاودت غزرتلو نحكي
أنا:شنية تحب مني توا ؟
أركان:تعرف قداش من غلطة ترتبت عليك من وقت دخلت للقصر هذا ؟
أنا:والله حد ما قلك ضيفني عندك سي أركان
أركان:نظن أنو القوانين كانت واضحة من الأول...غير
هكا مفما حتى حد لتوا غلط كيفك
أنا:ما عملت حتى شي غالط
قرب مني شوية و مد يدو لعندي...عدا صوابعو على خدي و غزر لعينيا يحكي
أركان:ملا باش تتعاقب على حاجة معملتهاش
أنا:أنت وعدتني و مستحيل تحط يدك عليا
أركان:متخافش اللي تخمم فيه ماهوش باش يصير هوني 
أنا:ما خممت في حتى شي...أنت لي مخك ناقص
أركان:والله أنا نحب نكتشف جرأتك أكثر
أنا:شقصدك ؟
أركان:إنتي باش تقدملي عرض خاص بيا ليلة
أنا:عرض شنية ؟
أركان:عرض يخليني نقرر إذا كنت بالرسمي تستحق أنك تتعاقب
أنا:مزال مفهمتكش
نزل بصوابعو لشفايفي و جبد روحو مني في لحظة وخر خطوة لتالي و هز راسو شوية...غزر لتمثال آفروديت و كل تفصيلة فيه و عاود غزرلي يحكي
أركان:إنتي باش تاقف كيفها بالظبط و من غير حتى قطعة على بدنك
دورت راسي مروهجة...غزرت لتفاصيلها كأني أول مرة نشوفها و عاودت غزرتلو مصدومة...خاطرني متوقعتش أنو يطلب حاجة هكا و مجاش لبالي أنو يستغل قاعة التماثيل باش يطلب مني حاجة هكا حتى إني منعرفش كيفاش هزيت يدي في وجهو و أنا نحكي
أنا:مجرم و حقير و متحشمش زادة
جبدني من يدي بالوقت...لصقني فيه و قحرلي يحكي
أركان:معندكش حل آخر...إنتي وصلت روحك لهوني غير هكا تنفذ الأمر و لا باش تظطر تواجه حاجات أكبر منك
أنا:مستحيل نخليك تمسني
أركان:مانيش باش نمسك...عالأقل ليلة
أنا:مستحيل نخليك تعاقبني بالطريقة هاذي
أركان:ماهوش عقاب...العقاب يبدا في حالة أنك رفضت العرض هذا...كيما باش تختلف درجتو حسب اللي باش نشوفو
أنا:نحب نخرج من هوني تواا
أركان:وقتك اللي بدا من توا
جبد روحو مني و قعد على الفوتاي...تكى لتالي و حط ساقو على الساق لأخرى...هزيت راسي مرة أخرى و غزرت لتمثال...حدة صوتو و غزرتو كانت واضحة أنو مصمم على رايو و ماهوش باش يتراجع عليه...فرد وقت لقيت دقات قلبي ماشية و تقوا خاطر منجمتش نتقبل اللي قاعد يصير...غير أنو يعتبر تحدي جديد لازمني نثبت فيه جرأتي و قوتي فرد وقت...كيما باش تكون خطوة أكبر في إني نخليه متعلق بيا و يهبل عليا أكثر و مع هكا لقيت روحي نخمم في حل آخر...يمكن نوصل بيه لمخرج من هوني...عديت عينيا على تفاصيل وجهو...على الهدوء لي سيطر عليه من جديد...وين لقيت روحي ضايعة أكثر...خذيت نفس و نحيت الجيلي رميتها جنب ساقيا و هزيت عينيا في عينيه...باقي يغزرلي من غير حتى كلمة و لا ردة فعل...نزلت على شفايفي شوية...و خذيت نفس طويل نحكي
أنا:نحب نعرف نوع العقاب لآخر
هزني و حطني...كبست على يديا زوز...من غير ما نبعد عينيا من وجهو...فرد وقت نستحضر في كلام ويليام بكري...تبسم عل جنب يحكي
أركان:العقاب لآخر يكون على سريري...إذا معندكش مشكلة
قحرتلو و كبست على يديا أكثر...نحكي
أنا:ياخي ديما تفكيرك منحرف هكا ؟ زيد أنا ما عملت حتى شي يستهل أنك تتصرف معايا بالطريقة هاذي
أركان:متأكدة ؟
هزيتلو براسي إيه...دقات قلبي قوات في اللحظة لي وقف فيها...تخبيت ورا التمثال قبل ما يقرب مني نسمع فيه يحكي
أركان:إيجا هوني
أنا:نحكيو هكا أحسن...زيد أنت مفيكش أماان
أركان:بالله ؟ محسوب هكا تحمي في روحك مني
أنا:أنت قتلي ماكش باش تسامح لي يكذب عليك و يخونك كهو و أنا ما عملت حتى شي من هذوما
أركان:هاك قلتها منسامحش...أما ميعنيش أنك ماكش باش تتعاقب بعد اللي عملتو...تخرج توا و لا ناوية تزيد مشكلة جديدة لرصيدك ؟
حطيت يدي على قلبي...فرد وقت نسب فيه داخلي خاصة أني تحصرت معاه هوني و منعرفش شنية ممكن يعمل فيا..خذيت نفس طويل و طليت عليه باقي واقف في بلاصتو يستنى فيا...غزرتو ليا خلاتني نتنازل و نخرج...خاطر اللي قاعدة نعمل فيه ماهوش باش يفيدني في الحالة هاذي...قربت منو أكثر و وقفت قدامو بالظبط...نزلت على يديا من جديد و غزرتلو نحكي
أنا:اللي تطلب فيه ميجيش
أركان:و اللي عملتو إنتي يجي ؟
أنا:مش نفس الشي...زيد أنت قاعد تهدد فيا و قبيل كنت باش تقتلني زادة
أركان:هاك تتنفس لتوا...معناها لتوا مقررتش إني نقتلك
عديت عينيا على تفاصيل وجهو و هزيت حاجبي شوية نحكي
أنا:معناها أنت تنجم تتخلص مني كيما عملت مع صوفي ؟
أركان:متخافش ماكش باش تموت كيفها
أنا:أركان من غير ما تبقى تهدد فيا...منحبش هكاا
أركان:ملا شنية تحب فينوسي ؟
أنا:مانيش كيما التمثال متاعك زادة...كيما منحبكش تعاقبني بالطريقة هاذي
أركان:ساعة من إمتى تتصرف بهدوء هكا ؟ ساعة هاذي الخطة متاعك باش تهرب من هوني ؟
نزلت على شفايفي بالوقت...خاطرني حسيتو شلق بتصرفاتي...مد يدو شوية و نزل على شفايفي بصوابعو يحكي
أركان:الحركة هاذي باش تكلفك برشا
نزلت راسي و غمضت عينيا مع دموعي لي هبطو و لي أصلا منعرفش كيفاش...خاطر كلشي خممت فيه هو كلام ويليام و كهو...هزلي راسي شوية يحكي
أركان:شنية هذا ؟
أنا:م..ماهيش خطة مني...أما أنت قاعد تتصرف معايا بطريقة خاايبة برشاا
أركان:ملا هذا حد جرأتك ؟
أنا:لا مش هذا حدها...أما منحبكش تتصرف معايا هكا و لا حتى تهددني بالطريقة هذيكا مرة أخرى
أركان:عندك أوامر أخرى ؟
أنا:معاادش تتصرف مع الصغار أكاكا...حرام عليك
مد يدو شوية و عدا صوابعو على خدي...يتحسس في دموعي...فرد وقت يغزر لشفايفي...أصلا نستغرب كان يخمم في حاجة أخرى من غير الشي اللي قاعد يدور في مخو...فرد وقت منحبوش يشلق لي أنا مزلت نمثل عليه...ضيق عينيه يحكي
أركان:يزي كهو 
هزيتلو براسي باهي...و خذيتنفس طويل...نحكي
أنا:نجم نمشي توا ؟
أركان:مممم و حضر روحك...عندنا سفرة بعد يومين و من هوني لوقتها متخلينيش نشوفك...يكون أحسنلك
أنا:وين ؟
أركان:تعرف في الوقت المناسب
أنا:منجمش نجي معاك و نخلي ويليام وحدو...زيد أنا معنديش ثقة فيك
أركان:ويليام باش يكون في أمان هوني
أنا:مع زمردة ؟
أركان:منحبش نكرر كلامي...أخرج توا و رد بالك تعمل عكس اللي أنا نطلبو منك
جيت باش نحكي...قحرلي بالوقت...كبست على يدي نهدي في روحي...منحبش نغلط معاه أكثر و ندخل في مشكلة جديدة منجمش نخرج منها مبعد...أصلا مش مصدقة إني نجمت نمنع منو و نخليه يتراجع...غير هكا مستحيل نرضخ لأوامرو و نعمل حاجة أنا مش راضية عليها...مديت يدي شوية...رجعت شعري لتالي و عطيتو بظهري...قربت من الباب نحل فيها...ضربتها بساقي نحكي
أنا:علاش متحبش تتحل ؟
قرب مني من غير حتى كلمة...تكيت عليها بالوقت حط يدو جنب راسي و نزل عليا شوية يحكي
أركان:مزال مشفعتش ؟
أنا:نحب نمشي من هوني و كهو
أركان:نظن لازمك تاخو دروس في التمثيل بجانب الرقص
أنا:مفهمتكش ؟
أركان:نقصد أنك منعت مني خاطرني أنا نحب هكا مش أنتي لي نجحت في أنك تمثل عليا...واضح ؟
بقيت نغزرلو من غير حتى كلمة...أصلا معرفتش شنية نحكي و أنا في الوضع هذا...خذيت نفس نحكي
أنا:حلي الباب
مد يدو شوية...نزل على الأرقام على جنب و غزرلي يحكي
أركان:أمشي توا
أنا:أبعد أنت ساعة
غزرلي من غير حتى كلمة و وخر خطوة لتالي...حليت الباب بعد ما كتب الكود و خرجت بالزربة...لدرجة إني معادش تلفت ورايا...فرد ةقت نسب فيه بكل كلمة على لساني...خاطر متوقعتش يصير معايا هذا الكل...ضربت في نوح بالوقت...شدني من يدي و وقفني يحكي
نوح:لباس ماهو ؟
أنا:لا مانيش لباس
نوح:شنية صار ؟
أنا:ما صار شي...أما عرفك وااطي و ميحشمش زادة غير هكا ننصحك أنك تلقالو مرا أخرى في بلاصة صوفي قبل ما يضيع أكثر
نوح:منظنش باش يوافق على وحدة أخرى غيرك في الوقت الحالي
قحرتلو و كملت ثنيتي للأصونصير...أصلا مع شكون نحكي...كيما منعرفش علاش مزلت نحس في روحي على أعصابي...إذا من اللي صار و لا من الغباء متاعي قدامو...خاطر بالرسمي منعرفش كيفاش نجمت نبكي و لا نرتب الكلام لي كنت نقول فيه...كلشي خممت فيه إني نمنع منو و من الطلب متاعو...فرد وقت لقيت روحي نخمم في حكاية السفر لي خرج بيها و وين باش تهزنا هي زادة...و لا حتى كيفاش باش نتحملو و نتحمل قربو طول الفترة الجاية.