آفْرُودِيتْ 🦢

الحلقة الثانية و الأربعون🧚‍♀️

🔸️حلقة 42
جبدت روحي منها شوية و نزلت بيديا زوز لظهرها كبست عليها و عنقتها و بالوقت...خذيت نفس من ريحتها الهادية و غمضت عينيا نتحسس في لمسة يديها على أجنابي...كنت نعرف انو اللحظات هاذي باش توفى و ماهيش باش ترجع مرة أخرى...يمكن كنت بحاجة طاقة منها و كهو...طاقة تخليني نكمل في الثنية لي مشيت فيها...حليت عينيا على صوتها تحكي
صوفي:أنا باش نحكي مع أركان
جبدتها من عندي شوية...تبسمت و مسحت دموعها تحكي
صوفي:أكيد باش يفهم وضعنا...نقصد انو هو ما عندو حتى مشاعر ناحيتي باش يخاف يخسرني
بقيت نغزرلها من غير حتى كلمة..شطر كلامها صحيح
يمكن أركان ما يملك حتى مشاعر ناحيتها...أما تعتبر أول وحدة نجم يتواصل معاها و يرجع شوية من روحو لي فقدها بعد موت دانييل...منعرفش علاش حطيت أملي عليها الكل في أنو هي عندها القدرة الكافية باش تعاونو...و تخليه يتخلص من علاقاتو الآلية مع النسا و يرجع إنسان من جديد...غزرتلي ندرا كيف تحكي
صوفي:نووح..أنت تسمع فيا ياخي ؟ نظن هذا أحسن
حل لينا الزوز...أركان باش يتفهم الوضع أكيد
أنا:نظن أنو إنتي لي لازمك تفهم أنو علاقتنا وفات صوفي...لا أركان و لا أي مخلوق آخر باش يسمع بيها
نزلت عينيا من وجها مع دمعتها لي هبطت...منعرفش من وين جبت القوة هاذي الكل باش نجاوبها و لا حتى باش نحط حد لعلاقتي معاها...خاطر من أول لحظة لمحتها خارج باب المسرح منجمتش نفارق صورتها و لا ملامح وجها زادة...أما زادة منجمش نخليه يمشي للهاوية أكثر...موت دانييل خلق فارق كبير في حياتنا...حزن أركان كان كبير لدرجة...أنو ما عاد يهتم بحتى شي و لا حتى كان يملك نظرة على المستقبل بالمختصر أي حد كان ينجم يستغل ضعفو و بعد السنين هاذي...هي الوحيدة لي خلات لمحة من أركان القديم تظهر...حليت عينيا مروهج و غزرت لآنيا مرة أخرى...البقعة هاذي حفرت داخلي جرح كبير و ندم أكبر...إني مسمعتش كلامها و مبعدتش بيها لأي مكان غير هوني...يمكن مزالت موجودة بيناتنا...في الأخير أنا السبب لي خلاها تعيش حاجات  أكبر منها و لتوا منعرفش كيفاش و علاش صار الحادث و شكون من مصلحتو يتخلص منها بالطريقة هذيكا..لتوا نسمع صوت وقوعها من الأعلى في وذني..غير صوت صياحها لحظة وحدة وقتها كانت كافية باش تخليني نسترجع كلشي عشتو معاها...كلامها و ضحكتها...لون عينيها...و تضحيتها لي قبلت بيها على خاطري...بعيد على الحادث أنا كنت المجرم الأساسي لي حول حياتها لجحيم و رسملها نهاية عكس لي حلمت بيها...خذيت نفس طويل و نحيت الفاست متاعي...قربت منها شوية..حطيتها على أكتافها و قعدت بجنبها...دورت راسها شوية و غزرتلي بالوقت عديت عينيا على ملامح وجها و مديت يدي بالوقت عديت صوابعي على خدودها الزوز مسحت دموعها و قربت منها أكثر...نحكي
أنا:إيجا هوني تراه
دورت يدي عليها و جبدتها عندي أكثر...حطت راسها على صدري بالوقت رغم اللي عشتو في الماضي الكل و رغم أنو نقاط التشابه بينها و بين صوفي أما ماهيش هي...طول المدة اللي عاشتها بجنبي...كان يظهر الإختلاف أكثر...صوفي كانت ناضجة كفاية أما آنيا مزالت مجرد طفلة ما شافت حتى شي من الدنيا غير هكا مشاعري ليها مختلفة على كلشي عشتو قبل توا يمكن هاذي أول مرة نحس أنو فما مرساة نجم نثبت عندها و منضيعش أكثر...كلشي يهمني توا أنو ما يصيرلها حتى شي...و تكون بأمان بعيد على اللي قاعد يصير الكل...كيما نحب نحافظ على توازن في حياتها و معادش نخليها تتأثر بالماضي أكثر من هكا نزلت عليها شوية و بستها من راسها نحكي
أنا:ماكش باش تخبرني شنوة صار ؟
مديت يدي شوية و حطيتها على يدها...باش نهديها أكثر...حسيت بأنفاسها لي ضربت في رقبتي و هي تحكي
آنيا:إدوارد خبرني أنو عيلتي الحقيقية متخلاتش عليا كيما كنت متوقعة طول السنين لي فاتت
جبدتها من عندي و غزرتلها مستغرب نحكي
أنا:مفهمتكش
آنيا:نقصد أنو عيلتي متخلاتش عليا..هو خبرني أنو فما شكون خطفني بعد ولادتي و خلى أختي التوأم  منعرفش إذا كلامو صحيح و لا مجرد كذبة كي العادة أما الغطا متاعي كان يحمل إسمي..يعني إذا أمي تخلات عليا بالحق علاش حتى تهتم بيا و تطرز إسمي على الغطا..كيما يمكن الغطا ماهوش متاعي و يطلع حتى الإسم هذا مش من حقي
مديت يدي شوية..حطيتها على خدها و كبست عليه أكثر...نحكي
أنا:ششش..هدي روحك توا و حاول تاخو نفس
آنيا:علاش حتى يخبرني بهذا الكل توااا..أصلا كيفاش يعرف أنو أنا مخطوفة و أنا تعرفت عليه من سنين كهو..معادش نعرف شكون أنا و لا شنوة لي قاعد يصير معايا نووح و لا شنوة يحب مني أكثر من هكاا
أنا:أغزرلي هووني عزيزتي...أنا باش نحاول نتحرى على الموضوع هذا أكثر نوعدك...أما بالمقابل نحبك تركز على أهدافك و خطوات حياتك لي بديت فيها من غير ما تتلفت للماضي..إذا طلع كلامو صحيح أنا باش نوصلك لعيلتك بيدي و إذا طلعت كذبة أخرى منو...نقضي عليه من غير ما نتردد لحظة وحدة
آنيا:منحبش نخسرك أنت زاادة
أنا:متخافش ماكش باش تتخلص مني..ساعة أنا الوصي عليك توا و ما تنجم تعمل حتى شي من غيري
آنيا:بالله ؟
أنا:ساعة مفما حتى حد يفهم عليك كيفي أنا و لا حتى يفرح بتكسيرك للحروف بالطريقة هاذي من غيري معناها باش ترضى بيا كوصي بالسيف عليك
تبسمت مع ضحكتها و جبدتها عندي مرة أخرى كبست عليها و بستها من راسها..تنهدت براحة مع أنفاسها لي هدات شوية..متوقعتش أنو خبى عليها أهم سر في حياتها باش يستغلو كنقطة ضعف ليها في الوقت المناسب