آفْرُودِيتْ 🦢

الحلقة السابعة و الخمسون🦢

🔸️حلقة 57
هزيت راسي شوية...كي حسيت بيديه زوز فوق يديا منعرفش إمتى قرب مني و لا حتى شنوة باش يقول لأول مرة نحس روحي بعيدة عليه...رغم قربو مني عدا عينيه على وجهي يحكي
أركان:منعرفش شنية لي صار بالظبط...أما مستحيل نخلي أي شي يضر خووك
جبدت يديا منو و كبست عليهم بالوقت...نحكي
أنا:إذا صار شي لويليام...أنت المتهم الوحيد بالنسبة ليااا...خاطرك وعدتني باش تحميه و ماكش باش تدخلو في مشاكلناا
أركان:إلينااا...صدقني منعرفش شنوة صااار و لا حتى شكون عندو مصلحة يضر خووك...أما مستحيل يتعدا هذا الكل بالساهل
أنا:ما نحب منك حتى شي...غير أنك تخليه بعيد على مشاكلنا كيما وعدتني...أنا مستعدة نتحمل ثمن كلشي صار وحدي...المهم هو يبقى بعييد
مد يدو شوية و عدا صوابعو على خدي...يحكي
أركان:أغزرلي هوني إلينا...تتوقع أنا نجم نضر خوك ؟
نزلت عينيا من وجهو...في اللحظة هاذي ما نجم نخمم في حتى شي و لا حتى نستوعب فكرة أنو هو بعيد على الحادثة هاذي...خاصة أنو علاقتنا تبدلت برشا على قبل...هزيت راسي مع صوت الدكتور يحكي
هو:شكون إليناا ؟
أنا:أنااا
هو:الممرضة باش تساعدك في إجراءات الوقاية قبل ما تدخل عندو...خاطر طلب أنو يشوفك
جبدت روحي من أركان و وقفت بالزربة...نحكي
أنا:شنوة وضعو تواا ؟
هو:مستقر نوعا ماا
هزيتلو براسي إيه و خلطت عليه...حضرت روحي بالزربة و دخلت للغرفة لي هو فيها...دقات قلبي تسارعت مع كل خطوة كنت نقرب بيها ناحيتو تبسمت كي ريتو يغزرلي...مديت يديا زوز و كبست على يدو نحكي
أنا:خفت عليك برشااا
ويليام:أنا لباس
أنا:موجوع ؟
غزرلي من غير حتى كلمة...قعدت على طرف السرير بجنبو و حطيت يدي على خدو نحكي
أنا:ساامحني ويليام...سامحني خاطرني مكنتش نعرف أنو الفونتولين متاعك مسمومة
ويليام:متلومش روحك على حاجة معندكش ذنب فيها...في الأخير الحقيقة مصيرها باش تظهر
أنا:أنت أرجعلي و أنا نوعدك باش نعرف شكون ورا هذا الكل
كبس على يدي شوية و عدا عينيه على وجهي يحكي
ويليام:إليناا...ملااكي الحاارس...إنتي كنت الدافع الوحيد لي يخليني نستمر في حيااتي...مهما كان اللي صاار الليلة نحبك تفوتو و تخرج من قصر أركاان
سكت شوية...يرد في النفس ورا بعضو...و عاود غزرلي يحكي
ويليام:أخررج من غديكاا...و من المدينة هاذي جملة إنتي تنجم تحقق حلمك بعيد من هووني...إنتي تنجم ترسم بداية جديدة مع ولدك
أنا:نبداو مع بعضنا...أنا مستحيل نتخايل حياتي من غيرك...و منحبس نجيب صغير منوو زاادة
ويليام:إذا طلعت حبلة...إنتي باش تحافظي على الصغير هذا إليناا...أوعدني
هزيتلو براسي لاا...منحبش نخمم في الإحتمالات لي يحكي عليهم...حطيت راسي على صدرو نحكي
أنا:ما نحب حتى شي...غير أنك تقوم بسرعة باش نمشيو من هووني
مد يدو بالسيف و حطها على ظهري...يحكي
ويليام:من غيري أنا...إنتي باش تكون حرة و مفما حتى يعيق ثنيتك
هزيت راسي شوية و عديت عينيا على وجهو نحكي
أنا:أنت باش تتحسن...و وقتها نخرجو من المتاهة لي إحنا فيها و نبعدو على الناس هذوما الكل...مهما كانت مكانة أركان في قلبي أنا مستحيل نسامحو إذا صارلك شي
ويليام:أبعد على كلشي يضرك و يجرحك...لحق الوقت باش تتعلم تحمي روحك و تاخو قرارات صحيحة في حياتك...خاصة إذا وليت أم
أنا:إذا صار و تحقق الأمر...نحبك تعلم ولدي الرسم و اللغات لي تعرفها الكل
ويليام:توقعت أنك تجيب توأم كيفنا
ضحكت و عاودت عنقتو...فرد وقت بستو من خدو كبس على يدي يحكي
ويليام:شقولك تمشي تتأكد من الموضوع توا و تخبرني
أنا:منجمش نخليك وحدك
ويليام:مانيش صغير...نجم نهتم بروحي...غير هكا أنا في تحسن
أنا:أوعدني أنك باش تعدي الأمر هذا زادة و ترجعلي مرة أخرى
ويليام:وعد يا روحي
تبسمت و عاودت بستو مرة أخرى...فرد وقت وقفت نحكي
أنا:إذا كان الحمل حقيقة...ما نحب حتى حد يعرف من غيرنا...منحبش أركان يربطني بالصغير هذا طول حيااتي
ويليام:متخاافش...غير هكا إنتي باش تكون أحلى أم في الدنيا
أنا:مانيش باش نشبه أمي جملة
ويليام:إنتي مستحيل تكون نسخة منها...متخليتش عليا و ماكش باش تتخلى على قطعة من لحمك و دمك
تبسمت و هزيتلو براسي إيه...كبست على يدو أكثر و بستو من جبينو نحكي
أنا:تو نرجعلك بسرعة يا روحي
ويليام:نستنى فيك
خذيت نفس طويل و جبدت روحي منو بالسيف دخلت الممرضة تتفقد فيه...نحيت الشارلوت من راسي و عديت عينيا عليهم...قرب مني يحكي
أركان:شحالو توا ؟
أنا:قاعد يتحسن...أنا باش نمشي لتوالات توا
أركان:خليني نرافقك
أنا:لااا...أنا باش نكون لبااس وحدي
جبدت روحي منو و زربت في خطواتي...طلبت تاست من الممرضة...رجعت عندي بعد دقايق و دلتني على التوالات...جربت التاست و قعدت بعد ما نزلت الغطا منجمتش نتخلص من التوتر لي سيطر عليا الدقايق لي عديتهم نستنى في نتيجة الفحص كانو اطول من اللي توقعت...غمضت عينيا و حليتهم نغزر لنتيجة...نزلت على شفايفي مع دموعي لي هبطت بالنسبة ليا كان إحتمال بعيد برشاا...غير هكا غريب برشا الإحساس لي سيطر عليا...كان مخلط بفرحة و خوف...إحساس مش متعودة عليه جملة و مكنتش عاملة حسابو...بالرسمي منعرفش كيفاش باش نكون أم و نتحمل مسؤولية صغير وحدي...دخلت بعضي و معرفتش نخمم...كلام ويليام الشي الوحيد لي يخليني نبقى قوية...نتقبل اللي صار و نواجه اللي جاي...و إذا قررت إني نخلي الصغير هذا...لازمني نكون مستعدة باش نحميه من الدنيا الكل.