آفْرُودِيتْ 🦢

الحلقة الستون🧚‍♀️

🔸️حلقة 60
🔸️إلينا_تحكي:
قعدت على طرف السرير و عديت عينيا على تفاصيل الغرفة مرة أخرى..مزلت نحس انو اللي صار معايا الكل مجرد كابوس و كهو...وقفت بالسيف و قربت من المرايا لي متكية على الحيط..وقفت مقابلتها بالظبط و غزرت لروحي مستغربة من كمية الجروح لي على وجهي..غير الزروقية لي في جبيني...مش مصدقة أني نجمت نمنع روحي من اللي صار..نزلت راسي شوية و حطيت يديا زوز على كرشي..تبسمت نحكي
أنا:هاك هوني معايا...رغم كلشي صاار و رغم أنانيتي معاك أنت متخليتش علياا و بقيت معايا...صدقني منعرفش شنوة باش يصير فينا أكثر من هكا و لا حتى حقيقة المجهول اللي يستنى فينا...أما وعد مني باش نحميك لآخر لحظة في حيااتي
هزيت راسي شوية مع صوت الباب لي تحل..قربت مني شوية تحكي
جينا:أنا جينا...قبل كلشي نحب نعتذر منك على اللي صار أمس...مقصدتش نخوفك...جيست خفت عليك بعد ما قمت بالطريقة هذيكا
أنا:أنا ما نعرف حتى حد منكم
جينا:أنا ممرضة و باش تلقاني معاك ديما...عندك حق تخاف مني...أما صدقني أنا هوني جيست باش نعاونك و كهو
أنا:نحب نطمن على البيبي متاعي ؟
جينا:هو في حالة جيدة...أما لازمك ترتاح بالقدا و متعبش روحك و لا هذا باش ينعكس عليكم زوز
هزيتلها براسي باهي و غزرت لشكون دخلت بالأكل غزرتلي تحكي
جينا:و لازمك تاكل بالقدا و تاخو الفيتامينات متاعك
بقيت نغزرلها من غير حتى كلمة...تبسمت تحكي
جينا:أنا باش نخليك على راحتك توا
عديت عينيا على طاولة الأكل بعد ما خرجت و قربت ناحية الشباك...عديت عينيا على البحر لي كان هايج عاللخر و كبست على كرشي...ملحقتش باش نعيش حزني كامل على خويا و لقيت روحي في حاجات أكبر مني...ولا مرة توقعت باش نوصل لنقطة هاذي إني نكون تحت رحمة شخص مجهول ما نعرف عليه حتى شي...كيما لقيت روحي نخمم في أركان لي وعدت روحي باش نقطع علاقتي معاه و نتخلص من الصغير لي بيناتنا زادة...أما إكتشفت أنو هذا الكل مستحيل منجمش ننتزعو مني بين ليلة و نهار بعد كلشي عشتو معاه...دورت راسي شوية مع صوت الباب مرة أخرى منعرفش قداش عديت وقت و أنا واقفة هوني...دخل شوية و عدا عينيه على طاولة الأكل لي مزالت على حالها...غزرلي يحكي
أيان:كيفاش تحس في روحك اليوم ؟
أنا:حمد الله
أيان:علاش مفطرتش ؟
أنا:معينيش
أيان:باهي كيما تحب..أنا هوني جيست باش نعرف قرارك
أنا:فقت من ساعتين..أكيد مانيش باش نخمم و نقرر فيهم زادة
أيان:لازمنا نسافرو من هوني
ضحكت بالوقت و عديت عينيا على وجهو نحكي
أنا:تتوقع انا باش نقبل نسافر معاك ؟
أيان:هذا لي لازم يصير إذا خذيت قرار باش تبقى معايا
أنا:أنا باش نوضح أمر واحد قبل كلشي...مهما كان القرار متاعي..لازمك تعرف حاجة وحدة و تخليها في بالك اللي صار ماهوش باش يغير حقيقة عشقي و حبي لأركان القايد...كيما مستحيل نمنعو من ولدو و لا بنتو حتى لو وفات علاقتنااا وااضح ؟
أيان:مانيش هوني باش نقطع علاقتك بيه..إنتي حرة إلينا...عشقي ليك ميعنيش نفرض روحي عليك
دور راسو شوية و عطى إشارة بيدو للخادمة لي شافتو من ورا البلار..دخلت و قربت منا شوية...حطت بيسي و تليفون على الطاولة الثانية و خرجت غزرلي مرة أخرى يحكي
أيان:تنجم تتواصل مع أي شخص تحب عليه و حتى مع أركان القايد زادة...حتى باش نوصي شكون يوصلك توا...إذا حبيت ترجع
كمل كلامو و عطاني بظهرو باش يمشي...وقفتو نحكي
أنا:أعطيني دافع واحد يخليك تعمل هذا الكل على خاطري
أيان:معنديش دافع آخر من غير العشق
أنا:و شنوة تستفيد إذا كان قلبي و عقلي عند شخص آخر و حامل منو ؟
أيان:نظن أركان خسر فرصتو معاك...الوقت قدامك و تنجم تتحقق بنفسك..خاصة أنو حط شكون يلوج على إيما حبيبتو السابقة..زعمة باش يوفر نفس القوة باش يلقاك ؟ زعمة هو حبك بنفس الطريقة لي حبيتو بيها إنتي ؟ و لا باش يلوج عليك على خاطر الصغير لي في كرشك ؟ ساعة هو باش يحميك كيما حمى خوك من قبل ؟ و لا باش تنتهي صلاحيتك بعد ما تولد ؟ إنتي بحاجة أنك تراجع نفسك إليناا..إذا إنتي مقتنعة أنو أركان يحبك و ينجم يستمر معاك للأخير أطلبيه توا
شاورلي بيدو لتليفون لي حطاتو الطفلة قبيل..غزرتلو أما منجمتش نتحرك من بقعتي...كلامو كان كيما الكف لي عاود فيقني من جديد..للحظة نسيت أنو قبل ما يصير معانا هذا الكل..كان يلوج على المرا لي مزال محتفظ بكلشي يخصها..غير هكا هو تهاون لدرجة إني خسرت خويا في وسط قصرو..وخرت خطوة لتالي و تلفت لشباك مرة أخرى نحكي
أنا:نحب نبقى وحدي شوية
أيان:نشوفك مبعد..متنساش تفطر على خاطر البيبي متاعك
أنا:عيشك
حطيت يديا زوز على كرشي و كبست عليها...مزلت نحس في روحي ضايعة من غير خويا...منعرفش شكون نصدق و لا شنوة لازمني نعمل زادة..أنا خسرت الشخص الوحيد لي كان باش يسندني من غير مقابل و لا حسابات..مديت يدي و مسحت دموعي لي هبطت ورا بعضها فوق الجروح و حرقتني لدرجة حسيت وجهي باش يطرشق و مع هكا منجمتش نتحرك من بقعتي..للحظة حسيت انو العالم كل ضدي و معادش عندي مرسى ثابت نحط عليه...منعرفش شكون اللي باش يضرني و شكون لي ناوي يحميني بالحق...بقيت في المنتصف من غير حول و لا قوة..خسرت عيلتي الكل و خسرت داري و إستقراري لي عديت سنين محافظة عليه..يمكن هذا الكل عقاب ليا خاطرني منجمتش نحمي خويا و باش نعدي عمري الكل ضايعة بالطريقة هاذي و لا لازم نسترجع النصائح متاعو الكل ليا و نقلب الوضع لصالحي..سواء كان أركان و لا أيان..باش نستغل أي حد يقرب مني لمصلحتي الخاصة و كهو