آفْرُودِيتْ 🦢

الحلقة السابعة و الثلاثون🧚‍♀️

🔸️حلقة 37
🔸️إلينا_تحكي:
هزيت راسي شوية و غزرت لروحي...ملامحي لي كل مرة نضيع فيها ترجعني سنين لتالي...ساعات نحس أنو جمالي كان النقمة لي خلاتني نخسر كلشي...فرد وقت هو سلاحي لي يخليني نوصل لكلشي نحب عليه..حليت يدي شوية نغزر لتراص قديمة برشا تمحات بمرور السنين...يمكن الحل الوحيد بالنسبة ليا وقتها هو الموت باش ننسى كلشي عشتو تحت رحمتو...قطعت شريان يدي من غير ما نخمم لحظة وحدة...وين دخل على غفلة و غزرلي مصدوم..يحكي
ويليام:إليناااا...لاااا...لاااا مستحييل
بقيت نغزرلو من غير حتى كلمة...فرد وقت نسمع في قطرات الدم لي كانت تقطر على الأرض...قرب مني يجري و كبس على يدي يدي يحكي
ويليام:ماااكش بااش تمووت...مش تواا
أنا:ويليام
ويليام:ششش...معااادش تتكلم...ما تقول شي
أنا:منجمش نعيش أكثر من هكا...منحبش نعيش عندو مرة أخرى
كبس على يدي أكثر...و مد يدو لأخرى بالوقت شدني من وجهي...يحكي
ويليام:أغزرلي هووني...لا غااالي و لا أي حد آخر باش يضرك بعد توا...ماكش باش تكون ضحية مرة أخرى
أنا:مانيش باش نجم نبعدو عليا
ويليام:إليناا صدقني كل حد كان السبب في اللي عشتو باش يدفع الثمن لآخر لحظة
أنا:شقصدك ؟
ويليام:إنتي مجبورة تتخلص من الماضي و تعفس عليه...تخلص من الخوف لي داخلك...إنتي أقوى من أنك ترضخ لأي حد مرة أخرى
أنا:غالي مستعد يضر أي حد قريب مني في سبيل أنو يتحصل عليا مرة أخرى
ويليام:و أنا مستعد نموت في سبيل أنك تكون معايا معادش تخمم تخليني و تبعد عليا مرة أخرى
غزرتلو من غير حتى كلمة...كبس على يدي أكثر و عنقني...وين لقيت روحي جامدة في حضنو...خاطر كلشي كنت نخمم فيه وقتها إني نتخلص من غالي و كلشي يربطني بيه...فقت من سرحتي على صوت الباب لي تحل...وين رجعت للواقع...كبست على يدي بالوقت قرب مني شوية يحكي
أركان:لباس ماهو ؟
هزيتلو براسي إيه و وقفت...مد يدو شوية و حطها على خدي يحكي
أركان:شبي فينوسي ؟
أنا:منعرفش...سرحت في الماضي شوية
أركان:إيجا عندي تراه
قربت منو أكثر و دخلت في حضنو...دورت يديا زوز على ظهرو و خذيت نفس من ريحتو نحكي
أنا:ياخي مزلت تخدم لتوا ؟
جبدني من عندو شوية و رجعلي خصلات شعري لتالي يحكي
أركان:ساعة مكنتش نعرف باش نلقاك في الحالة هاذي
أنا:أنا لباس أركان
نزل عليا شوية و هزني في لحظة...تبسمت و دورت يديا زوز على رقبتو نحكي
أنا:ممم قتلك قبل إني نحب الإهتمام هذا منك
باسني من خدي و جبدني عندو أكثر..عديت صوابعي
على خدو...وجودي معاه هوني خلاني نعيش برشا تفاصيل و كسبت ذكريات غطات شوية على الماضي الأسود لي تعديت بيه...تبسمت كي ريت الطاولة و غزرتلو نحكي
أنا:إمتى حضرت هذا الكل ؟
أركان:والله توقعت باش نلقى الأكل حاضر ياخي صار العكس
نزلت على شفايفي شوية و كبست على خدو نحكي
أنا:مانيش شاطرة كيفك...أصلا بالعادة ويليام يحضر كلشي
أركان:مكنتش نتوقع أنو ويليام يعاني لهدرجة
أنا:أركاان...ياخي باش تفركهم عليا توا ؟
ضحك و حطني بالوقت...هزيت روحي شوية بستو من شفايفو...و جبدت الكرسي قعدت...أصلا جعت برشا خاصة أنو عديت النهار الكل وحدي...خاطرو غطس في الخدمة لي عندو...هزيت راسي شوية نحكي
أنا:شبيها القطوسة مولدتش لتوا ؟
أركان:شيعرفني أنا عزيزتي ؟
أنا:غريبة...زعمة لازم يشوفها طبيب ؟
غزرلي ندرا كيف...نزلت على شفايفي شوية نحكي
أنا:شنووة ؟
أركان:باهي...تو غدوة نشوفو بيطري للقطوسة
أنا:باهي برشااا...منحبش نخليها تتعذب أكثر
أركان:والله مفما حتى حد تعذب في الرحلة هااذي قدي
حطيت المغرفة من يدي و غزرتلو مستغربة...نحكي
أنا:توقعت العكس...مدام هكا خلينا نرجعو لأثينا
أركان:المشكلة مش في البلاصة عزيزتي...والله عالأغلب باش نعدي بقية حياتي على الحالة هاذي
أنا:شبيك تغزرلي هكا ؟ ساعة مانيش فاضية باش نتعارك معاك
أركان:علاش شنوة وراك ؟
أنا:والله نحب ندوش بعد العشا...بلكشي أعصابي تترخف شوية
تنهد بالقاوي و نزل راسو لصحن...منعرفش علاش ساعات نحسو يقاوم في مشاعرو ناحيتي...كملت صحني و هزيت روحي وقفت...قربت منو شوية دورت يديا زوز على رقبتو و نزلت نحكي في وذنو
أنا:حياتك باش تكون بجنبي أنا...إذا كان هذا عذاب بالنسبة ليك لازمك تتعود عليه ملا
تبسم و حط يدو على يدي...كبس عليا و دور راسو ناحيتي شوية...بستو قبل ما يقول حرف واحد غمضت عينيا و حليتهم على صوت تليفونو...جبدت روحي شوية منو و نزلت على شفايفي شوية...تنهد بالقاوي يحكي
أركان:أعطيني لحظة فينوسي
حطيت يدي على صدرو...كبست عليه و عاودت بستو بالوقت نحكي
أنا:أنا باش ناخو دوش و نرجعلك...أما بقية وقتك باش يكون ليا
أركان:مش لازم تمشي توا
أنا:مانيش باش نعطلك على خدمتك أكثر من هكا
غزرلي من غير حتى كلمة...تبسمت و جبدت روحي منو...دخلت لبيت البانو و هزيت راسي شوية غزرت لروحي و تبسمت...غريبة قوة المشاعر لي قاعدة نعيش فيها معاه...مع انو وجودنا هوني مؤقت أما لحظات تعدلت عليا...تمنيت لو كانت هاذي هي حياتنا الحقيقية يمكن خاطر اللي عشتو هوني...هو اللي حلمت بيه طول عمري و لي كان ضمن أحلام طفولتي زادة..تنهدت بالقاوي و حليت الروبة...خليتها طاحت عالأرض و عديت عينيا على بدني...لي كرهتو في الماضي و كرهت كلشي معاه...خذيت نفس طويل و رجعت لتالي و دخلت تحت الما...خاطر نحب نعدي بقية الأيامات هوني من غير ما نخلي الأفكار السلبية تأثر عليا مرة أخرى...مديت يديا زوز و عديتهم على شعري إستغربت في الما لي قص على غفلة...جبدت المنشفة لي كانت على يدي...دورتها على بدني و خرجت لصالة نفركس عليه وين كان واقف جنب البلار يتفرج على المطر واضح أنو كمل الخدمة لي عندو...قربت منو شوية نحكي
أنا:أركاان...تو معقول يقص الماء بالطريقة هاذي
دور راسو شوية...هزني و حطني مصدوم...قحرتلو نحكي
أنا:شبيك تغزرلي هكا...بالله معقول يتقص الما هكا على غفلة ؟
أركان:شنوة لي تقص ؟
أنا:أركاان
أركان:شنوة ؟
قربت منو أكثر و هزيت عينيا في وجهو نحكي
أنا:الما لي تقص و أنت باش تمشي توا و تشوف وين المشكلة خاطرني بردت
عدا عينيه على وجهي و مد يدو شوية...عدا صوابعو على قطرات الما لي فوق شفايفي...كبست على المنشفة فوق صدري أكثر و غزرت للوشم متاعو لي خلى دقات قلبي تقوا...أصلا قربو مني يحل حرب داخلي منجمش نهديها و لا نهرب منها...مديت يدي شوية و حطيتها على صدرو...و عديت صوابعي على الوشم لي حسيت بدقات قلبو القوية من وراه...نزلت على شفايفي شوية و هزيت عينيا في وجهو..ضيق عينيه و غزر لشفايفي يحكي
أركان:متعملش هكااا
كبست على شفتي...وين جبدني عندو و دورني في لحظة...هزيت عينيا في وجهو مع ظهري لي ضرب في البلار و جيت باش نحكي...قص عليا كي نزل على شفايفي و عضني بالوقت...منجمتش نبعدو عليا من العضة لي إستحليتها بعد ما تحولت لبوسة مديت
يدي باش نمسو...كبس عليها بالوقت و جبد روحو شوية يحكي
أركان:متحااولش تمسني و لا مانيش باش نتحكم في روحي أكثر من هكا إلينا
قربت لشفايفو من غير ما نجاوبو...يمكن خاطرني نحب نغرق معاه أكثر...جبدت يدي منو في لحظة حطيتها على رقبتو و نزلتو عندي أكثر...كبس على أجنابي بالوقت و هزني في لحظة...دورت ساقيا عليه باش نوازن روحي...فرد وقت شيعت راسي لتالي مع برودة البلار لي حسيتها في ظهري بعد ما نزلت المنشفة و حبست عند خصري...غمضت عينيا كي باسني من رقبتي و كبس عليا أكثر...كبست على شعرو من تالي و جبدتو شوية محاولة مني باش ناخو نفس...غزرلي يحكي
أركان:أنا نحب نضيع في تفاصيلك الكل آفروديت نحب نخلق عالم خاص بينا إحنا و كهو
عديت عينيا على تفاصيل وجهو...على خصلات شعرو لي تبللو مع الماء لي هبط من شعري عليه و هو يبوس فيا...مديت يدي شوية و عديت صوابعي من جبينو لخدو...لين وصلت بيهم لشفايفو...حتى أنا نحب نضيع معاه أكثر و نغرق في العالم لي باش يكون خاص بينا إحنا و كهو...نحب نعيش معاه الحلمة هاذي للأخير مهما كانت باش تكلفني في النهاية...منجمش نكبح مشاعري ناحيتو...و لا حتى نتغلب على دقات قلبي لي قاعدة تضرب في صدرو و لا على أنفاسي لي تخلطت مع أنفاسو...غير غزرتو ليا لي تخليني إني مختلفة على أي مرا عرفها قبلي خاطر مانيش مجرد بطلة من روايتو الخيالية و لا مجرد مرا من كتاب المغامرات متاعو...أنا باش نكون حقيقة راسخة في عقلو و قلبو...بعد اللحظات اللي باش يعيشها معايا و الليالي لي باش يعديها في حضني ماهوش باش ينجم يتخلص مني و لا حتى يتعود على ريحة مراا غيري و لا ينجم يضم أنفاس أخرى...لعنة #آفروديت باش ترافقو طول عمرو كيما ماهوش باش يحتل قلبي راجل من غيرو هو و لا حتى باش نعيش نفس التفاصيل مع حد غيرو..أصلا أنا كنت و مزلت مستعدة ليه هو و كهو...مهما كانت النهاية ملحمتنا مستحيل تكون عابرة و الكل باش يشهد عليها غمضت عينيا كي حسيت بشفايفو تحت وذني...ساعة هاذي نقطة ضعفي لي ولى. يعرفها بالقدا...كبست على شعرو أكثر و نزلت راسي شوية بستو من رقبتو و عضيتو من كتفو فرد وقت..جبدني عندو و عدا يدو على ظهري و كبس عليا يحكي
أركان:إيجا عندي ترااه
دورت يديا زوز و على رقبتو...كي حسيتو يقدم بخطواتو و جبدت روحي شوية نحكي
أنا:معناها ماكش باش تتفقد الما
أركان:عندنا حاجات أهم
عديت صوابعي على لحيتو شوية و تبسمت نحكي
أنا:كيما شنية ؟
دز الباب بساقو و دخل للبيت...كبس عليا أكثر و قعد وين لقيت روحي في مواجهة معاه قد قد...كبس على آخر ظهري...يحكي
أركان:كيما أنك تضيع معايا في اللحظات هاذي و تكون ملكي أنا لآخر عمرك
مديت يدي شوية...عديت صوابعي على خدو و طلعت بيهم لخصلات شعرو...فرد وقت ضعت في غزرة عينيه ليا...غير دقات قلبي لي منجمتش نتحكم فيها و أنا في حضنو...نزلت عليه شوية...نتحسس في أنفاسو لي قوات في وجهي...كبست على خدو و حطيت شفايفي فوق شفايفو نحكي
أنا:أنا ضعت فيك من أول لحظة ريتك فيها واقف قدامي
كبست على خدو مع صوابعو لي سرحت على رقبتي من تالي و نزل بيهم لآخر ظهري يحكي
أركان:إنتي أحلى شي صار في حياتي بعد السنين هذوما
أنا:و أنت أول شخص يخرجني من الضياع لي عشت فيه سنين...مهما صار بيناتنا متبعدش عليا أركان متخليش البعد هو الحل لمشاكلنا
أركان:ذكرني تراه شكون خذا القرار هذا
أنا:أنا مبعدتش عليك...أنا إخترت روحي خاطرني خفت من فكرة أنك تعتبرني مجرد تمضية وقت و كهو كيما النسا متاعك
أركان:ماكش مجرد مرا عابرة...إنتي حياتي أناا
كبست على خدو مع شفايفو لي إحتلو شفايفي أول ما كمل كلامو...غير يدو لي كبست على آخر ظهري و
جبدني عندو أكثر...جبدت روحي شوية كي جبد المنشفة لي بقات على خصري بقوة و طيشها عالأرض كبست على رقبتو أكثر و عاودت بستو..وين نزل على أجنابي...و قلبني في وسط السرير...و نزل عليا فرد وقت...لي خلاني نضيع في غزرة عينيه ليا و ملامح وجهو مع الضو الخافت لي في البيت قبل أي شي آخر.
عديت يديا زوز على ظهرو و كبست عليه مع شفايفو لي إحتلو شفايفي مرة أخرى...وين حسيت أنفاسي تقطعت شوية...مديت يدي شوية و حطيتها على خدو كبس عليها بالوقت...رجعها لتالي و جبد روحو شوية يحكي
أركان:أغزرلي هوني ملاكي
نزلت على شفايفي شوية و هزيت عينيا في وجهو عدا صوابعو على خدي و كمل يحكي
أركان:أنا ما نحب حتى شي منك إذا إنتي مكنتش راضية عليه...أكثر شي يهمني أنك تعيش معايا اللحظات هذوما بمشاعرك و كهو
مديت يدي لأخرى...عديت صوابعي على خدو و نزلت بيهم لرقبتو نحكي
أنا:أركاان...أنا قاعدة نعيش في نفس المشاعر هذوما ناحيتك...منعرفش شنوة باش يصير بعد اللحظات هذوما و لا حتى شنوة مصير علاقتنا..أما مانيش خايفة منك و لا حتى من علاقتي بيك...خاطر عندي ثقة في وعودك ليا
غزرلي ندرا كيف و كبس على شفايفي بصوابعو يحكي
أركان:إنتي أحلى شي صادفني في حياتي الكل
تبسمت و كبست على رقبتو أكثر...وين باسني جنب شفايفي و نزل لرقبتي بالوقت...غرست يدي في شعرو و غمضت عينيا و إستسلمت لمشاعري لي كان ليها سلطان عليا من أول لحظة ريتو فيها...وجودو في حياتي خلاني نطل على الجانب المسكر من حياتي و نسترجع روحي لي كانت ضايعة...لحظات تعدات عليا نسيت فيها أنو فما أحلام أخرى من غير النجاح و الشهرة...نسيت أنو عندي قلب من الأساس و عندو حق عليا...كيما متوقعتش أنو الجانب هذا باش يتحل قدام شخص كيما أركان...شخص منعرفش إذا عندي فرصة باش نكمل بقية حياتي معاه و لا لا...أما في اللحظة قاعدة نعيش في مشاعر أقوى من اللي توقعت...دقات قلبي كانت تقوى مع كل لمسة منو و كل نفس على بدني...كيما لقيت روحي نطرد في ذكريات الماضي لي سرقت مني كلشي قبل توا...قدام رغبتو القوية فيا رغبتو لي حسيت بيها من غزرتو ليا و من دقات قلبو لي تقوا في قربي منو و في كلامو معايا زادة...غير اللحظات لي بيناتنا توا تبسمت كي رجع لشفايفي في لحظة و بعدلي خصلات شعري لتالي...وين حسيت بأنفاسو القوية لي ضربت في وجهي...غير دقات قلبو لي ضربت في صدري زادة...تبسم يحكي
أركان:قبل شهور من توا...توقعت أنو علاقتي بيك مجرد رغبة و كهو...أما توا بالظبط كلشي نحب عليه من الدنيا هو إنتي إلينا
نزلت على شفايفي شوية قدام غزرت عينيه ليا و عديت يدي على جنبو...بعد ما خذيت نفس طويل نحكي
أنا:أ..أركاان
أركان:روح أركان
أنا:يكفي أنك تكون ليا و كهو...أنا منحبش نعيش جرح آخر تكون أنت السبب فيه...خاطرني معاك أنت أنا سلمت في كلشي مزلت نملكو لتوا و أمنتك على روحي و خويا زادة
نزل عليا شوية...دوب باسني من شفايفي و عدا عينيه على وجهي يحكي
أركان:منحبكش تخاف مني...و تأكد إني باش نعطيك العالم الكل و نفسخ كل ذكرى خايبة مزالت راسخة في ذاكرتك...إنتي عشقي أنا فينوسي
أنا:و أنا نحبك برشا أركان
غزرلي ندرا كيف...كأنو مستوعبش الكلمة مني...يمكن خاطرني تعودت منعبرش على مشاعري و لا حتى كان يهمني نحكي شنوة نحس فيه...ضحك و عاود غزر لعينيا يحكي
أركان:كأني باش نولي بحاجة الكلمة هاذي ديماا
أنا:يكفي أنو مشاعرك ليا تكون أكثر من مجرد رغبة قوية...و دقات قلبك هاذي تكون ليا و كهو
عديت يدي على صدرو...نتحسس في دقات قلبو و غزرت لعينيه مرة أخرى...وين كان جوابو ليا بطريقة أخرى..بعد ما نزل على شفايفي و غطس في تفاصيل
بدني من جديد...كأنو قاعد يحفظ فيه و يذكرني بلمسة شفايفو و يديه....لدرجة إني غرقت معاه من غير ما نخمم في حتى شي...من غير رغبتي فيه لي قوات على قبل...و لي حسيت بيها معاه هو و كهو..عديت عينيا على ملامح وجهو مرة أخرى و ضعت فيها مع الضو الخافت لي ضارب فيه...مديت يدي شوية و عديت صوابعي على خصلات شعرو و نزلت بيها لجبينو و طرف عينو...كيما تحسست خدو قبل ما ما ننزل بيهم لشفايفو...كأني نحب نتعرف على تفاصيلو أكثر...نحب نخبي ملامحو داخلي...خاطر معنديش ثقة في الماضي و في الوقت و في علاقتنا زادة...نحب نحفر ذكريات ليلة هاذي في بلاصة بعيدة على كلشي خايب عشتو قبل توا...مهما كان اللي يستنى فيا مستقبلا...مانيش باش نندم لحظة وحدة على الحاجات اللي قاعدة نعيش فيها توا و على إني تبعت قلبي مرة وحدة كهو...جبدتو عندي أكثر و بستو من رقبتو و كتفو...كبس على أجنابي في لحظة و هز عينيه في وجهي...لي حسيت فيهم برشا كلام تقال قبل و فما لي متقالش زادة...غير دقات قلبي لي قوات في اللحظة لي خلاني نعيش فيها أحاسيس جديدة و عرفني على العالم متاعو بطريقتو الخاصة لدرجة إني محسيتش بدموعي لي هبطت في لحظة منعرفش شنوة لي خممت فيه بالظبط...أما كأنو كلشي تخلط عليا في اللحظة هاذي من مشاعري ناحيتو...لتفاصيل الجديدة لي قاعدة نعيش فيها لذكريات الماضي لي مهما حاربتها تلقى ثنيتها و تسلل داخلي...أما هديت وسط أنفاسو القوية على رقبتي و خدو لي تعدا على خدي و هو يحكي في وذني
أركان:و أنا نحبك و نموت عليك فينوسي
تبسمت و مديت يدي حطيتها رقبتو...و غرستها في شعرو من تالي و نزلت بيدي لأخرى لوسط ظهرو..فرد وقت حليت عينيا شوية و غزرت للمطر لي قاعدة تصب على البلار و خلات الثلج يذوب...غير البرق لي لمحتو في لحظة...غريبة كيفاش تبدل الجو بالطريقة هاذي كيما لقيت روحي خايفة من اللحظة لي يبعد فيها عليا لي خلاني نكبس عليه أكثر..خاطر منحبش اللحظات لي عشتها معاه و بين يديه...تبقى مجرد ذكرى بيناتنا...و تموت بمرور الوقت الوقت و السنوات...يمكن الشي الوحيد لي نحب عليه من الدنيا هاذي أنو يكون ليا أنا و كهو...غمضت عينيا موجوعة...دوب جبد روحو مني شوية و كبست على ظهرو أكثر...عدا صوابعو على خدي و باسني من شفايفي يحكي
أركان:لباس يا روحي ؟
هزيتلو براسي إيه و حطيت يدي على صدرو نحكي
أنا:أنت باش تقوم توا ؟
أركان:علاش إنتي خليت فيا جهد ؟
تبسمت و نزلت على شفايفي شوية...فرد وقت منجمتش نتحرك من بقعتي بعد اللي صار...كأني لتوا تحت تأثير النشوة لي حسيتها معاه هو و كهو..باسني
من رقبتي يحكي
أركان:إنتي عطيتني أكثر من اللي حلمت بيه معاك
أنا:أركاان...أنا متوقعتش باش نعيش هذا الكل...غير هكا منحبش نخمم في شنوة اللي باش يصير معانا
عدا صوابعو على خدي و باسني من جبيني يحكي
أركان:إنتي متاعي أنا و كهو و اللي باش يصير بعد توا هو أنك باش تبقى بجنبي لآخر لحظة في عمري
أنا:يكفي أنك تعنقني و كهو
أركان:إيجا عندي تراه
مد يدو تحت ظهري و جبدني عندو أكثر...حطيت راسي على صدرو و خذيت نفس طويل من ريحتو لي مزالت عالقة في خشمي...كبس على يدي في لحظة باسني منها و حطها على رقبتو يحكي
أركان:موجوعة ياخي ؟
كبست على رقبتو و دخلت في حضنو أكثر...نحكي
أنا:أنا ضعت معاك لدرجة إني متوقعتش باش نعيش هذا الكل...مانيش موجوعة...أما تاعبة عاللخر
أركان:والله أنا لتوا مشبعتش منك و من تفاصيلك لي ضعت فيها
ضيقت عينيا مستغربة و هزيت راسي شوية...عديت عينيا على وجهو نحكي
أنا:لااا عاااد
أركان:شبيك ؟
أنا:أركااان...ياااخي أنا باش نحبل توا ؟
أركان:منعرفش
أنا:شنوة لي متعرفوش ؟ ملا شنية لي كنت تعمل فيه بكري ؟
ضحك و عدا يدو على ظهري...جبدني عندو مرة أخرى يحكي
أركان:باهي وين المشكلة إذا حبلت بعد ليلة هاذي ؟
أنا:على أساس متحبش يكون عندك صغاار
أركان:أنا معااك إنتي عفست على كل القوانين لي في حياتي...وجود صغير منك باش يعطيني أمل جديد فينوسي
أنا:إحنا مش قد المسؤولية هاذي توا
باسني من راسي و عدا يدو على زندي...يحكي
أركان:منحبش نخمم في اللي جاي...يكفي أنك تكون معايا و كهو
كبست على صدرو أكثر و بستو من رقبتو...غرس يدو في شعري يحكي
أركان:والله دوب مزلت متحكم في روحي خاطرني منحبش نضرك...معناها متحاولش تشعلني أكثر
أنا:شعندي عملت ؟
كبس عليا أكثر و طلعني عندو....وين حسيت بأنفاسو في وجهي...باسني من شفايفي بالوقت يحكي
أركان:أنا قاعد نفقد في عقلي جرايرك
مديت يدي شوية و عديت صوابعي على خدو...فرد وقت سرحت في ملامح وجهو...لتوا نحس في بدني ينمل...كيما مزلت داخلة بعضي من اللي صار...غير هكا منجمتش نتحرك برشا في حضنو...خذيت نفس نحكي
أنا:أنا قاعدة نسترجع في أحلامي لي سكرت عليها سنين لتالي...أنت القطعة لي قعدت مفقودة مني طول الوقت..أنا ليلة هاذي معطيتكش بدني و كهو أنا عطيتك روحي زادة...منعرفش على أي أساس باش تمشي علاقتنا...أما نتمنى كل مشكل يعرضنا يتحل بسرعة و كهو
أركان:مهما كان اللي باش يصير...كنت و باش تبقى جزء مني مستحيل نتخلى عليه...إنتي عيلتي بعد توا
تبسمت و عاوت بستو...فرد وقت دخلت في حضنو وين بديت نهدا مع لمسة يديه على شعري و ظهري لدرجة إني منعرفش كيفاش غفيت...خاصة إني حسيت روحي تعبت برشا و معادش عندي طاقة باش نركز معاه أكثر غير هكا ريحتو كانت كافية باش تخليني نحس بالأمان خاطر هذا اللي أنا بحاجتو توا بعد كلشي عشتو معاه في اللحظات لي فاتت...منحبوش يبعد عليا جملة...كيما حضنو الشي الوحيد لي خلاني نغرق في النوم من غير من غير ما نضيع في الكوابيس متاع العادة...حليت عينيا شوية بعد ما رقدت ليلة كاملة...تبسمت و أنا نغزر لتفاصيل وجهو...واضح أنو غفى من شوية كهو...خاطر مبعدنيش من حضنو لحظة وحدة...دورت راسي شوية و غزرت لثلج لي بدا يتساقط من جديد على البلار نزلت على شفايفي شوية و أنا نسترجع في التفاصيل لي عشتها معاه ليلة أمس...و لي كانت مجرد حلم بعيد بالنسبة ليا...عديت صوابعي على الوشم متاعو كي العادة و بستو من صدرو...نحيت يدو من جنبي و جبدت روحي منو بالسياسة...بعدت الغطا من فوقي و قعدت على طرف السرير...نزلت راسي شوية و غزرت لقطرات الدم لي قعدت على الفرش..خذيت نفس طويل مع دقات قلبي لي قوات خاطر لتوا مش مصدقة لي عشتو معاه...مع أنو ليلة أمس كانت أول مرة نشوف جانب آخر جديد منو و حنيتو عليا في كل لمسة و كل كلمة قالها زادة...هو بيدو خلاني نعيش تجربة جديدة توقعت أنها مستحيلة بعد الماضي الأسود لي إكتسبتو من غالي مديت يدي شوية و رجعت خصلات شعري ورا وذني...و هزيت روحي بالسيف وقفت...متوقعتش أنو الوجيعة باش تمتد معايا لتوا...قربت من الدريسنغ متاعو و جبدت أول شوميز جات على يدي...لبستها و سكرتها...فرد وقت غزرتلو مرة أخرى...غزرت لخصلات شعرو لي دوب لامست جبينو و لشفايفو غير الوشم لي على صدرو و زندو...غير يدو لي محطوطة فوق كرشو تنهدت بالقاوي و عطيتو بظهري...خرجت من البيت و هزيت راسي شوية و غزرت للبلار لي مقابلني...عديت عينيا على الثلج لي غطى الدنيا من جديد...و قربت بخطوات ثابتة ناحية السلة متاع القطوسة...حطيت يدي على كرشي و ضيقت عينيا مستغربة كي ريت صغارها الأربعة معاها...وين لقيت روحي نغزرلهم من غير ردة فعل رجعت خطوة لتالي و قربت من البلار حضنت روحي بيديا زوز و سرحت في أهم التفاصيل اللي ضيعتها و لا بالأحرى رفضت إني نخمم فيها و لا نواجها مرة أخرى...أو حتى لقيت جرأة كافية باش نصارحو بيها قبل ما تطور علاقتنا لنقطة هاذي..غمضت عينيا و رجعت شهور لتالي..لأيامات التحقيقات بالظبط في النهار لي تسكر علينا باب واحد بحجة أنو الموضوع يهمني..وقت مد يدو و عاود شاورلي للكرسي يحكي
إسكندر:تفضل
خذيت نفس و قعدت..لتوا منسيتش الإحساس لي تملكني في اللحظات هذيكا..إحساس يقول أنو فما برشا حاجات في حياتي باش تتبدل بعد حديثنا هذا هزيت راسي شوية و غزرتلو مع صوت الباب لي تسكر بعد ما خرج صاحبو..قعد مقابلني و تبسم يحكي
إسكندر:متوقعتش أنك باش طيح في يدي مرة أخرى
أنا:نظن موضوعنا توا معندوش علاقة بالجريمة لي صااارت
إسكندر:ساعة مانيش باش نستغرب أنك ورا كلشي صااار
حطيت يدي على الطاولة و هزيت عينيا في وجهو نحكي
أنا:متحكيش معااايا بالطريقة هااذي
إسكندر:نحكي معاك بالطريقة لي نشوفها مناسبة لوحدة كيفك
أنا:نتوقع أنك إسترجعت حقك مني..معناها إحنا متساويين توا
إسكندر:والله مانيش هوني باش ننتقم منك..خاطرك متستهلش باش نضيع وقتي معاك إليناا داايون
أنا:شنوة تحب مني بالظبط ؟
إسكندر:هذا السؤال لي ستنيتو منك
غزرتلو من غير حتى كلمة...تبسم و مد يدو شوية جبد الدوشي لي على طرف الطاولة و غزرلي يحكي
إسكندر:اللي بين يديا توا يخليني نسكر قضية صوفي راميز في أسبوع واحد و ننهي مسيرتك و وجودك في اليونان..بالمختصر باش نسحب منك الجنسية لي تملكها هوني و تفقد حقوقك كمواطنة شرعية
أنا:متنجمش تتهمني بحاجة مش أنا لي عملتها
إسكندر:غزرتك ليا تقول العكس...ياخي باش نصدق وحدة منافقة و مخادعة كيفك إنتي ؟
أنا:مانيش مظطرة باش نسمع هذا الكل منك...خاطر معندكش حق تحاسبني على حاجات خارج القضية هاذي
إسكندر:أعطيني سبب واحد يخليني نصدق أنو مش إنتي المجرمة..خاطر مفما حتى حد غيرك يملك دافع قوي باش يتخلص من صوفي راميز
أنا:منعرررفش كيفااش تشوف فيااا..منافقة و إستغلالية و كاذبة و مغرورة كان لزم أما مااانيش مجرمة إسكندر أنا مكنتش باش نتخلص منها بسبب الشهرة و لا مكانتها صدقني أنا عمري ما خممت بالطريقة هاذي
إسكندر:باش تجاوب نفس الشي بخصوص غاالي الرااسي
هزيت عينيا في وجهو مصدومة...خاطر هذا آخر إسم توقعت إني نسمعو منو في اللحظة هاذي..بقيت نغزرلو من غير حتى كلمة...خاطرني معرفتش شنوة نجاوبو بالظبط...تبسم على جنب و حل الدوسي وين جات عيني على تصويرتو بالوقت...دقات قلبي قوات لدرجة إني وليت نسمع فيها في وذنيا...خاطر كان آخر حد نحب نشوف ملامحو...كبست على يديا زوز وقت قلب التصويرة و قربها مني...لحظات كانت كافية باش تخليني نسترجع كلشي عشتو معاه و نسترجع صوتو لي يخلي بدني يرعش من غير ما نحس...هز روحو وقف قرب مني و وقف ورايا بالظبط...نزل عليا شوية وين ضربت ريحتو في خشمي و دور راسو شوية ناحية وجهي يحكي
إسكندر:غالي الراسي ضحية أخرى ليك إنتي
بقيت ساكتة من غير حتى حركة...رغم حسيت بأنفاسو لي ضربت على خدي...حط يدو على الطاولة جنب يدي يحكي
إسكندر:الدوسي لي عندي فيه كل التفاصيل لي تخص حادثة رجل الأعمال غالي الراسي و لي إنتي أدرى بيها خير مني
عديت عينيا على ملامح وجهو لي في التصويرة و غمضت عينيا باش نهدي روحي..فرد وقت نسمع فيه يحكي
إسكندر:مزال مسمعتش جوابك
أنا:شنية تحب مني حضرة المحقق
إسكندر:على حد علمي القضية هاذي ماهيش باش تضرك إنتي...فما شخص آخر مشارك فيها معاه..على حد علمي...ويليام دايون
هزيت عينيا في وجهو بالوقت...تبسم و بعد عليا شوية...تكى على الطاولة و عدا عينيه على وجهي يحكي
إسكندر:ويليااام..مكنتش نعرف أنو الإسم هذا يأثر عليك لهدرجة
أنا:خلي خويااا خارج المخططاات متاعك و مداامك بحثت وراياا...تنجم تخبرني توا شنوة تحب مني بالظبط...في سبيل أنك تبعد عليا و كهو
إسكندر:أنا باش نتغاضى على كلشي عرفتو..كيما إني مستعد نحرق كل دليل يدينك إنتي و خوك هوني و في تونس..في سبيل خدمة صغيرة منك
أنا:نسمع فيك
إسكندر:إنتي باش تخدم لصالحي فترة معينة...ناخو منك لي نحب عليه و إنتي تاخو حريتك و الأهم تستلم مركز النجمة الأولى هوني
أنا:مفهمتكش
إسكندر:إليناا دايون...إنتي باش تستغل جمالك و ذكائك و المكر متاعك و كان لزم بدنك في سبيل أنك تخلي أركان القااايد أسير عندك
وقفت بالوقت و غزرتلو مستغربة..محاولة مني باش نفهم الكلام لي قالو..مد يدو شوية و عدا صوابعو على خدي يحكي
إسكندر:منظنش فما حد ينجم يقاوم مفاتنك و لا غزرة عينيك...بجعتي الصغرونة..أكا علاش إنتي باش تستغل هذا الكل على خاطري..إنتي باش تدخل لحياتو و تعيش في قصرو زاادة..خليه يضيع فيك لدرجة ماهوش باش يشك لحظة وحدة أنك باش تضرو...و بعد ما توصل لهوني عندنا حديث آخر مع بعضنا
أنا:وقتها باش نكون الجاسوسة متاعك في قصر القايد
إسكندر:مع إمتيازات أخرى تعرفها مع الوقت و إذا خممت لحظة وحدة أنك تتراجع و لا تتذاكى معايا خوك أول شخص يتسلم لسلطات التونسية و باش يتعاقب على العلن...خاصة أنكم تخلصتو من شخص مهم برشا قبل ما تلجأو لهوني و حتى أركان القايد ماهوش باش ينقذكم من القانون و لا من الرأي العام خاصة أنو فما برشا ناس تضررت جراير لي صار غير هكا إنتي عقابك باش يكون مختلف خاطرك باش تكون المتهمة الأولى في موت صوفي راميز و تولي مسؤولة على جريمتين كاملين...أكا علاش نحبك توفر كل أعذارك و تبدا خدمتك من توا خاطر الوقت باش يكون عدوك الوحيد إلينا
جبد روحو مني و هز الدوسي في يدو قبل ما يخرج وين لقيت روحي واقفة من غير حتى حركة و لا حرف واحد...حليت عينيا كي حسيت بيديه زوز لي دارو على كرشي و أنفاسو لي لامست رقبتي...رجعت للواقع من غير ما نخرج من الدوامة لي انا محصورة فيها و الخوف لي حسيت بيه تسلل داخلي..باسني من خدي يحكي
أركان:فاش تعمل هوني ؟ شبيك قمت بكري ؟
مديت يدي شوية و حطيتها على يديه زوز نحكي
أنا:منعرفش
أركان:إلينا...شفما عزيزتي ؟ ياخي الأمر يتعلق باللي صار ليلة أمس ؟
أنا:لاا...أنا جيست تمنيت أنو هاذي هي حياتنا الحقيقية...أنا تعلقت بالمكان هذا برشا و منعرفش شنوة باش يصير معانا في الحياة الواقعية
أركان:المكان هذا ملكك إنتي بعد توا...و باش نرجعو ليه في الوقت لي تحب عليه
تبسمت و خذيت نفس طويل باش نمنع دموعي منحبش نضيع في أحلامي معاه...خاطرني مستحيل نجم نختارو على ويليام مهما صار...حتى لو عفست على قلبي...فرد وقت منجمش نتخايل حياتي من غيرو...منعرفش كيفاش ضعت في الثنية هاذي و عشقتو من غير ما نعمل حساب لشنوة باش يصير معانا و لا لإتفاقي مع إسكندر...كيما منعرفش شنوة الحل لي باش يخرجني من الدوامة هاذي من غير ما نخسر حتى حد منهم...خذيت نفس طويل و تلفت عندو...مديت يديا زوز دورتهم على رقبتو...وين نزل عليا شوية كبست عليه و بستو من رقبتو...قبل ما نحط راسي على صدرو...لفة يديه على ظهري كانت كافية باش تحتويني و تخليني نحس بالأمان لي فقدتو دقايق لتالي...حطيت يدي على رقبتو نحكي
أنا:أنا و لا مرة طلبت منك حاجة خاصة بيا...أما المرة هاذي نحبك توعدني...أنو مهما صار أنت باش تبقى معايا ديما و باش تعطيني فرصة نوضح فيها موقفي مهما كان
جبدني من عندو شوية و عدا عينيه على وجهي يحكي
أركان:نجم نفهم علاش إنتي في الحالة هاذي توا ؟
أنا:خايفة من مشاعري ناحيتك...خاطرني ولا مرة توقعت أنو قلبي باش يغلبني و يخليني نحبك لهدرجة أصلا أنا مكنتش باش نسمح لروحي نحب راجل كيفك أنت أركان...خاطر في الأخير مانيش باش ناخو معاك ثانية وحدة إذا حبيت تصرفني من حياتك
عدا عينيه على وجهي من غير حتى كلمة...مسح وجهو بيدو و نزل بيها ورا رقبتو يحكي
أركان:كان جينا في وضع آخر...كلامك لي قلتو توا باش يهزنا لثنية أخرى...على أساس إنتي تاثق فيا ؟
أنا:صحيح...أما مناثقش في الظروف
أركان:تتوقع مني باش نخمم في الظروف و إنتي معايا إليناا ؟
أنا:أوعدني و كهو
قرب مني شوية و حاوط وجهي بيديه زوز...يحكي
أركان:بالله و علاش الدموع هذوما توا ؟
نزلت عينيا من وجهو...تنهد بالقاوي و قرب مني أكثر باسني من جبيني و عاود غزرلي يحكي
أركان:إنتي باش تكون آخر مراا في حياتي و مهما كان اللي باش يصير..تلقاني بجنبك ديما...هذا وعد مني يا روحي
تبسمت و عاودت عنقتو مرة أخرى...كبس على أجنابي بيديه زوز و رجع بيا لتالي...تكاني على البلار و جبد روحو شوية...عدا عينيه على بدني و غزرلي ندرا كيف يحكي
أركان:بالله فينوسي..مخممتش أنو حالتك هاذي دخلني بعضي أكثر
أنا:مزلت موجوعة
ضحك بالوقت و نزل عليا شوية...باسني من شفايفي يحكي
أركان:نعرف أنك مزلت موجوعة يا روح أركان و متخافش مانيش باش نتعدا حدودي معاك توا..أما إنتي زادة أرحمني شوية
أنا:شعندي عملت توا ؟
أركان:معادش تقوم من جنبي مرة أخرى...مدامك رقدت معايا...تفيق معايااا...وااضح
أنا:على أساس تحب ترقد وحدك
أركان:مانيش باش ناقش الموضوع هذا توا..يكفي أنك تسمع كلامي مرة وحدة على الأقل
هزيتلو براسي باهي و حطيت يدي على الوشم نحكي
أنا:القطوسة ولدت..ريت صغارها بكري...تحب تشوفهم ؟
أركان:أكيد باش نشوفهم أما توا عندنا حاجة أهم
أنا:كيما شنوة ؟
أركان:إيجا عندي و بعد نجاوبك
ضحكت كي نزل عليا في لحظة و هزني في حملتو دورت يديا زوز على رقبتو و عديت عينيا على تفاصيل وجهو..لي كل مرة نضيع فيها و ننسى كلشي ورايا...كبشت فيه أكثر كي دخل لبيت البانو و غزرتلو نحكي
أنا:علاش جينا هوني ؟
باسني من شفايفي و حطني بالوقت...مد يدو شوية و كبس على الزر لي خلى الريدو يتحل الكل و يطل على البحر و غير الثلج لي غطا الحديقة برا..فرد وقت غزرت للجاكوزي لي بدا يتعبى...وقف ورايا بالظبط و نزل عليا شوية..باسني من رقبتي..حط يدو على كرشي و جبدني عندو أكثر...دقات قلبي قوات مع كل فلس يتحل...نزلت على شفايفي كي كبس على الشوميز من الأطراف و نزلها بالسياسة...وين طاحت عالأرض..خذيت نفس مع شعري لي تحط على جنب و غمضت عينيا مع شفايفو لي تحطت على كل أثر موجود في رقبتي من التالي و نزل بيهم لكتفي...يحكي
أركان:توا بالظبط ما نحبك تخمم في حتى شي من غيرنا إحنا و كهو
كبس على جنبي و دورني عندو بالوقت...وين دخلت بعضي أكثر من غزرتو ليا..خاصة بعد اللي صار بيناتنا أمس...باسني من جبيني يحكي
أركان:إنتي بعد توا قطعة مني..لي يمسك يمسني و لي يوجعك يوجعني أنا زادة
تبسمت و هزيتلو براسي باهي...كبس على يدي و عاوني باش ندخل للجاكوزي...للحظة إستحليت الماء الدافي على بدني...تكيت عليه أول ما خلط عليا و عديت صوابعي على يديه لي حاوطني بيهم..تبسمت كي حسيت بأنفاسو على رقبتي...باسني بالوقت و كبس عليا أكثر...دورت راسي شوية و ضعت في الطبيعة لي ورا البلار..أصلا بعد ليلة أمس و الذكريات لي هدت عليا اول ما قمت..حضنو كان الملجأ الوحيد لي يخليني نهدي أفكاري و ننسى اللي تعديت بيه الكل...غريبة برشا كمية التعب لي حاسة بيها رغم القوة لي إكتسبتها و تعلمت نعيش بيها و لي كان ثمنها هو الراحة لي معادش حسيت بيها من سنين طويلة.
#آفروديت🧚‍♀️
#سمر_القايد 💜