آفْرُودِيتْ 🦢

الحلقة التاسعة🧚‍♀️

🔸️حلقة 9
🔸️إلينا_تحكي:
حليت عينيا شوية على الضو لي ضرب في وجهي دوب نجمت نفيق...خاطرني نحس في راسي باش يطرشق دورت عينيا على البيت لي أنا فيها مستغربة و هزيت روحي تقعدت بالزربة كي ريتو واقف قدامي  غزرتلو مصدومة...من غير ما ننطق بحرف...خاطرني لتوا منجمتش نستوعب اللي قاعد يصير...آخر شس نتذكرو إني كنت نحكي مع نووح...عينيا وساعو من الأفكار لي جات في مخي...بعدت الغطا عليا...نتفقد في الروبة متاعي و في الفرش فرد وقت...هز حاجبو شوية يحكي
أركان:متخاافش...كي نحب ناخو شي منك...تكون عيني في عينك...بالعادة منستغلش وحدة مش في وعيها
أنا:ملا فاش نعمل على سريرك ؟
قرب مني شوية و قعد مقابلني...لي خلاني نتكى لتالي بالوقت...حصرني بيديه زوز يحكي
أركان:مع إني حذرتك أكثر من مرة...أما مزلت تغلط
أنا:أنا ما نتذكر حتى شي من اللي صار والله
أركان:طبيعي خاطرك سكرت لين فقدت وعيك
أنا:جاوبني أنا علاش هوني و شنية عملتلي ؟
أركان:لتوا ما عملت شي...أما المرات الجاية منجمش نوعدك...خاصة بعد جلسة الإغراء متاع أمس
ضيقت عينيا مستغربة...محاولة مني باش نسترجع و لو جزء صغير من اللي صار أمس...أما منجمتش خذيت نفس نحكي
أنا:أنا كنت مع نوح...منتذكرش إني جيت لهوني
أركان:متطلعش عملت هذا الكل بدافع الغيرة
أنا:غيرة شنية ؟ فاش تحكي أنت...أصلا شمدخلني فيك أنا ؟
أركان:ملا علاش إنتي هوني ؟
أنا:منتذكرش...و راسي يوجع فيا زادة
أركان:باهي...و مع هكا مفماش سبب آخر يخليك هوني
عديت عينيا على وجهو...للحظة حسيت روحي كرزت من غزرة التحدي لي يغزرلي بيها...مديت يدي شوية حطيتها فوق يدو...كبست عليها و قربت منو على غفلة لين حسيت بأنفاسو ضربت في وجهي و قربت شوية لشفايفو...تبسمت نحكي
أنا:أنا ما نغير من حتى وحدة سيد أركاان...خاطر مفما حتى وحدة كيفي و لا أي وحدة زادة تنجم تأثر عليك كيما نعمل أنا...تنكر الكلام هذا ؟ غير هكا أنت متنجمش تتوقع كمية الغرور لي عندي...لدرجة إني ما نشوف حتى طفلة أحلى مني
مد يدو شوية...عدا صوابعو على خدي و نزل بيهم لشفايفي يحكي
أركان:و إنتي متنجمش تنكر أنك ملكي و باش تبقى ليا لآخر لحظة في حياتك
أنا:قانون الملكية يمشي على الكل أركان القايد...إذا أنا فرضت ملكيتي ليك...مستحيل تاخو حريتك مني أكا علاش نظن أنو فكرة وجودنا مع بعض غالطة خاطر إحنا من عالمين مختلفين
أركان:و رغم هكا باش تكون ليا أنا و كهو
عديت عينيا على وجهو و نزلت على شفايفي لي فكهم بصوابعو يحكي
أركان:متحاولش تستفزني و لا حتى تستغل نقطة ضعفي ناحيتك...خاطر ماكش باش تقوم من السرير هذا جملة
بقيت نغزرلو من غير حتى كلمة...قرب مني على غفلة باسني من جبيني و جبد روحو مني...ضيقت عينيا مستغربة...خاطرني متوقعتش الفازة منو...عاودت تسطحت لتالي...محاولة مني باش نتذكر أي شي صار أمس...أما ما خطر حتى شي لبالي...من غير صور بعيدة منجمتش نرتبها و لا نفهم شنية عملت خذيت نفس و هزيت روحي تقعدت مرة أخرى و عديت عينيا على تفاصيل بيتو...و على كمية التنظيم الموجودة هوني منعرفش من وين لقيت قوة باش ناقف...رجعت شعري لتالي و خرجت من البيت نغزرلو واقف في شباك ياخو في قهوتو...غزرت لفنجان القهوة متاعي...هزيتو في يدي و خذيت رشفة منو أحسن حاجة تخليني نصحصح توا...عينيا وساعو و أنا نغزر لصور متاعي لي منثورين على الطاولة حطيتو من يدي و قربت منها بالزربة...هزيت أكثر من وحدة نتفقد فيهم و في تواريخ لي موجودين فيهم هزيت راسي بالوقت وين جات عيني في عينو كبست عليهم و قربت منو شوية نحكي
أنا:شنية هذاا ؟
أركان:منعرفش...نظن فما شكون مهووس بيك أكثر مني
غزرت للبوات لي شاورلي عليها براسو...قربت منها و غزرت لإسمي لي مكتوب عليها...دقات قلبي قوات عاللخر و أكثر من إحتمال جا لمخي...رغم منعرفش شنوة لي قاعد يصير بالظبط...خذيت نفس نحكي
أنا:كيفاش هكا ؟ شكون عندو مصلحة يبعثلي الصور لسانتوريني...أصلا هذا المنتجع متاعك أركاان
أركان:إنتي قولي شكون عندو مصلحة...مدام تعرف تأثر على المعجبين متاعك
أنا:منعرفش...أول مرة نشوف حد مهتم بتفاصيلي هكا...حتى أنو كيفاش نجم يصورني في المسرح من غير ما ناخو بالي
أركان:يمكن اللي بعث الصور هو نفس الشخص لي في الماضي متاعك
أنا:لااا مستحيل يكوون غاالي
أركان:معناها غالي الوحيد لي يخليك تدخل بعضك لهدرجة
أنا:أما مش هو أنا متأكدة...غير هكا معاااد نحب حتى حددد يلحقني و لا يهددني بالطريقة هاذي...زيد على أساااس أنت باش تحميني...كيفاش يدخلو حاجة هكا من غير ما تعرفو شكون وراها
طيشت الصور على الأرض و رجعت شعري لتالي منعرفش علاش خفت و دخلت بعضي أكثر من الفازة حط الفنجان متاعو من يدو و قرب مني شوية...جبدني يدي و عدا عينيه على وجهي يحكي
أركان:هدي روحك توا
أنا:منجمش نهدي رووحي...منحبش نعيش نفس الشي مرة أخرى...بلكشي الشخص هذا حاول يضرني كيما عمل هو...ريت أنو يملك صوري الكل بتاريخها
أركان:إلينا...مداامك معايا حتى حد ما ينجم يضرك و لا حتى يمس شعرة منك...أكا علاش ما نحبك تخاف من حتى شي واضح...يكفي أنك تعلمني بأي شي يصير معاك...و مهما كان اللي بعث الصور هذوما حسابو باش يكون معايا
عديت عينيا على ملامح وجهو و هزيتلو براسي إيه قربت منو أكثر...إستندت عليه و كبست على أجنابو بيديا زوز...منعرفش علاش عملت هكا و لا حتى كيفاش قربت منو لهدرجة خاطرني كلشي كنت نفركس عليه في اللحظة هاذي هو الأمان و كهو.